ਸੀਟੀ ਗਰੁੱਪ ’ਚ ਦਿਸੀ ਰਾਸ਼ਟਰੀ ਏਕਤਾ ਦੀ ਮਿਸਾਲ

11 ਸੰਸਥਾਵਾਂ ਦੇ ਵਿਦਿਆਰਥੀਆਂ ਨੇ ਸੱਭਿਆਚਾਰਕ ਵੰਨ-ਸੁਵੰਨਤਾ, ਲੋਕ-ਕਲਾਵਾਂ ਪੇਸ਼ ਕੀਤੀਆਂ

ਸੀਨੀਅਰ ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ ਜਲੰਧਰ : ‘ਵਸੁਧੈਵ ਕੁਟੁੰਬਕਮ’ ਇੱਕ ਧਰਤੀ, ਇੱਕ ਪਰਿਵਾਰ, ਇੱਕ ਭਵਿੱਖ ਦੀ ਭਾਵਨਾ ਨੂੰ ਸਾਕਾਰ ਕਰਦਿਆਂ ਸੀਟੀ ਗਰੁੱਪ ਆਫ਼ ਇੰਸਟੀਚਿਊਸ਼ਨਜ਼ ਵੱਲੋਂ ਸ਼ਾਹਪੁਰ ਕੈਂਪਸ ਵਿਖੇ ਸਾਲਾਨਾ ਸੱਭਿਆਚਾਰਕ ਮੇਲਾ ‘ਯੂਨਾਈਟਿਡ ਭਾਰਤ 2026’ ਕਰਵਾਇਆ ਗਿਆ। ਸੀਟੀ ਗਰੁੱਪ ਦੀਆਂ 11 ਸੰਸਥਾਵਾਂ ਦੇ ਵਿਦਿਆਰਥੀਆਂ ਨੇ ਵੱਖ-ਵੱਖ ਸੂਬਿਆਂ ਦੇ ਸੱਭਿਆਚਾਰ, ਲੋਕ-ਨਾਚਾਂ, ਰਵਾਇਤੀ ਪਹਿਰਾਵਿਆਂ, ਪਕਵਾਨਾਂ ਅਤੇ ਇਤਿਹਾਸਕ ਵਿਰਾਸਤ ਬਾਰੇ ਜਾਣਕਾਰੀ ਹਾਸਲ ਕੀਤੀ। ਇਸ ਮੌਕੇ ਸਹਿ-ਚੇਅਰਪਰਸਨ ਪਰਮਿੰਦਰ ਕੌਰ, ਸੰਯੁਕਤ ਪ੍ਰਬੰਧ ਨਿਰਦੇਸ਼ਕ ਤਨਿਕਾ ਚੰਨੀ, ਪ੍ਰਬੰਧ ਨਿਰਦੇਸ਼ਕ ਡਾ. ਮਨਬੀਰ ਸਿੰਘ, ਵਾਈਸ ਚੇਅਰਮੈਨ ਹਰਪ੍ਰੀਤ ਸਿੰਘ ਅਤੇ ਕੈਂਪਸ ਡਾਇਰੈਕਟਰ ਡਾ. ਜਯਾਸ਼ਿਸ਼ ਸੇਠੀ ਸਮੇਤ ਸੰਸਥਾ ਦੇ ਸੀਨੀਅਰ ਪ੍ਰਬੰਧਕੀ ਅਧਿਕਾਰੀ ਮੌਜੂਦ ਰਹੇ।

ਪ੍ਰਬੰਧ ਨਿਰਦੇਸ਼ਕ ਡਾ. ਮਨਬੀਰ ਸਿੰਘ ਨੇ ਕਿਹਾ ਕਿ ‘ਯੂਨਾਈਟਿਡ ਭਾਰਤ’ ਸਿਰਫ਼ ਇੱਕ ਸੱਭਿਆਚਾਰਕ ਮੇਲਾ ਨਹੀਂ, ਸਗੋਂ ਸਿੱਖਣ ਅਤੇ ਸ਼ਖ਼ਸੀਅਤ ਦੇ ਵਿਕਾਸ ਦਾ ਇੱਕ ਪ੍ਰਭਾਵਸ਼ਾਲੀ ਮੰਚ ਹੈ। ਵੱਖ-ਵੱਖ ਰਾਜਾਂ ਦੀ ਵਿਰਾਸਤ, ਖਾਣ-ਪੀਣ, ਕਲਾ ਅਤੇ ਪਰੰਪਰਾਵਾਂ ਨੂੰ ਨੇੜਿਓਂ ਸਮਝਣ ਨਾਲ ਨੌਜਵਾਨਾਂ ’ਚ ਰਾਸ਼ਟਰੀ ਏਕਤਾ, ਆਪਸੀ ਸਤਿਕਾਰ ਅਤੇ ਸਦਭਾਵਨਾ ਦੇ ਮੁੱਲ ਹੋਰ ਮਜ਼ਬੂਤ ਹੁੰਦੇ ਹਨ। ਸੀਟੀ ਇੰਸਟੀਚਿਊਟ ਆਫ਼ ਹੋਟਲ ਮੈਨੇਜਮੈਂਟ (ਸੀਟੀ ਆਈ ਐੱਚ ਐੱਮ) ਦੇ ਪ੍ਰਿੰਸੀਪਲ ਡਾ. ਦਿਵੋਏ ਛਾਬੜਾ ਦੀ ਅਗਵਾਈ ਅਤੇ ਮਾਰਗਦਰਸ਼ਨ ਹੇਠ ਕਰਵਾਏ ਗਏ ਇਸ ਸ਼ਾਨਦਾਰ ਸਮਾਗਮ ਨੇ ਭਾਰਤ ਦੀ ਅਮੀਰ ਸੱਭਿਆਚਾਰਕ ਵਿਰਾਸਤ ਅਤੇ ਖੇਤਰੀ ਵਿਭਿੰਨਤਾ ਨੂੰ ਇੱਕ ਸਾਂਝੇ ਮੰਚ ’ਤੇ ਪੇਸ਼ ਕੀਤਾ। ਮਹਾਰਾਸ਼ਟਰ ਦੀ ਮਰਾਠਾ ਸ਼ਾਨ ਨੂੰ ਦਰਸਾਉਂਦਿਆਂ ਲਾਵਣੀ ਨਾਚ, ਰਵਾਇਤੀ ਨੌਵਾਰੀ ਸਾੜੀਆਂ ਤੇ ਪੂਰਨ ਪੋਲੀ ਤੇ ਮਿਸਲ ਪਾਵ ਵਰਗੇ ਮਸ਼ਹੂਰ ਪਕਵਾਨਾਂ ਪੇਸ਼ ਕੀਤੇ ਗਏ। ਰਾਜਸਥਾਨ ਦੀ ਸ਼ਾਹੀ ਵਿਰਾਸਤ ਨੂੰ ਘੂਮਰ ਨਾਚ ਤੇ ਦਾਲ ਬਾਟੀ ਚੂਰਮਾ ਰਾਹੀਂ ਦਰਸਾਇਆ ਗਿਆ।

ਸੀਟੀ ਆਈ ਐੱਚ ਐੱਮ ਨੇ ਅਸਾਮ ਦੇ ਬਿਹੂ ਨਾਚ ਅਤੇ ਉੱਤਰ-ਪੂਰਬੀ ਭਾਰਤ ਦੇ ਰਵਾਇਤੀ ਖਾਣ-ਪੀਣ ਨੂੰ ਪੇਸ਼ ਕੀਤਾ, ਜਦਕਿ ਸੀਟੀ ਆਈ ਐੱਚ ਐੱਸ ਨੇ ਮੱਧ ਪ੍ਰਦੇਸ਼ ਦੀ ਕਬਾਇਲੀ ਵਿਰਾਸਤ ਅਤੇ ਚੰਦੇਰੀ ਕੱਪੜਿਆਂ ਦੀ ਪਰੰਪਰਾ ਨੂੰ ਉਜਾਗਰ ਕੀਤਾ। ਹਾਸਪਿਟੈਲਿਟੀ ਮੈਨੇਜਮੈਂਟ ਵਿਭਾਗ ਨੇ ਪੱਛਮੀ ਬੰਗਾਲ ਦੀ ਸਾਹਿਤਕ ਵਿਰਾਸਤ, ਧੁਨੁਚੀ ਨਾਚ ਅਤੇ ਮਿਸ਼ਟੀ ਦੋਈ ਵਰਗੇ ਰਵਾਇਤੀ ਪਕਵਾਨਾਂ ਨੂੰ ਪੇਸ਼ ਕੀਤਾ। ਸੀਟੀ ਆਈ ਐੱਮ ਟੀ ਨੇ ਗੁਜਰਾਤ ਦੇ ਗਰਬਾ ਨਾਚ ਅਤੇ ਨਵਰਾਤਰੀ ਦੇ ਰੰਗਾਂ ਨੂੰ ਪੇਸ਼ ਕੀਤਾ। ਸੀਟੀ ਆਈ ਐੱਲ ਨੇ ਕੇਰਲ ਦੀ ਕਥਕ ਕਲੀ ਕਲਾ ਅਤੇ ਰਵਾਇਤੀ ਸੱਦਿਆ ਭੋਜਨ, ਸੀਟੀ ਆਈ ਟੀ ਨੇ ਉੱਤਰ ਪ੍ਰਦੇਸ਼ ਦੀ ਗੰਗਾ-ਜਮੁਨੀ ਤਹਿਜ਼ੀਬ ਅਤੇ ਕਥਕ ਨਾਚ, ਜਦਕਿ ਸੀਟੀ ਆਈ ਪੀ ਐੱਸ ਨੇ ਜੰਮੂ-ਕਸ਼ਮੀਰ ਦੀ ਵਾਦੀ ਦੇ ਸੱਭਿਆਚਾਰ ਅਤੇ ਰੂਫ਼ ਨਾਚ ਨੂੰ ਦਰਸਾਇਆ।

ਸੀਟੀ ਆਈ ਏ ਪੀ ਨੇ ਹਿਮਾਚਲ ਪ੍ਰਦੇਸ਼ ਦੇ ਨਾਟੀ ਨਾਚ ਅਤੇ ਪਹਾੜੀ ਪਰੰਪਰਾਵਾਂ ਦੀ ਪੇਸ਼ਕਾਰੀ ਕੀਤੀ, ਜਦਕਿ ਸੀਟੀ ਆਈ ਈ ਐੱਮ ਟੀ ਨੇ ਬਿਹਾਰ ਦੀ ਪ੍ਰਾਚੀਨ ਵਿੱਦਿਅਕ ਵਿਰਾਸਤ, ਮਧੂਬਨੀ ਕਲਾ ਅਤੇ ਲਿੱਟੀ-ਚੋਖਾ ਨੂੰ ਪੇਸ਼ ਕੀਤਾ। ਸੀਟੀ ਕਾਲਜ ਆਫ਼ ਫਾਰਮੇਸੀ (ਸੀਟੀਸੀਪੀ) ਦੀ ਰਾਜਸਥਾਨ ਨੂੰ ਦਰਸਾਉਂਦੀ ਪੇਸ਼ਕਾਰੀ ਅਤੇ ਸੀਟੀ ਇੰਸਟੀਚਿਊਟ ਆਫ਼ ਲਾਅ (ਸੀਟੀ ਆਈ ਐੱਲ) ਦੀ ਕੇਰਲ ਨੂੰ ਦਰਸਾਉਂਦੀ ਪੇਸ਼ਕਾਰੀ ਨੇ ਸਾਂਝੇ ਤੌਰ ’ਤੇ ਪਹਿਲਾ ਸਥਾਨ ਹਾਸਲ ਕੀਤਾ। ਇਸ ਤੋਂ ਇਲਾਵਾ, ਗੁਜਰਾਤ ਦੀ ਨੁਮਾਇੰਦਗੀ ਕਰਨ ਵਾਲੇ ਸੀਟੀ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਐਂਡ ਟੈਕਨਾਲੋਜੀ (ਸੀਟੀ ਆਈ ਐੱਮ ਟੀ) ਨੇ ਉਪ ਜੇਤੂ ਟਰਾਫ਼ੀ ਜਿੱਤੀ। ‘ਯੂਨਾਈਟਿਡ ਭਾਰਤ 2026’ ਨੇ ਵਿਦਿਆਰਥੀਆਂ ਨੂੰ ਦੇਸ਼ ਦੀ ਸੱਭਿਆਚਾਰਕ ਵਿਭਿੰਨਤਾ ਨੂੰ ਸਮਝਣ, ਆਪਣੀ ਰਚਨਾਤਮਕਤਾ ਦਿਖਾਉਣ ਅਤੇ ਰਾਸ਼ਟਰੀ ਏਕਤਾ ਦੇ ਸੰਦੇਸ਼ ਨੂੰ ਹੋਰ ਮਜ਼ਬੂਤ ਬਣਾਉਣ ਦਾ ਸੁਨਹਿਰੀ ਮੌਕਾ ਪ੍ਰਦਾਨ ਕੀਤਾ।