ਏਜੀਆਈ ਨੇ ਮਨਾਇਆ ਵਿਜੇਦਸ਼ਮੀ ਮਹਾਉਤਸਵ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਏਜੀਆਈ ਦੀਆਂ ਰਿਹਾਇਸ਼ੀ ਸੋਸਾਇਟੀਆਂ ਦੇ ਹਜ਼ਾਰਾਂ ਵਸਨੀਕਾਂ ਨੇ ਜਲੰਧਰ ਹਾਈਟਸ-1, 66 ਫੁੱਟ ਰੋਡ, ਜਲੰਧਰ ਦੇ ਟੀ-ਬਲਾਕ ਖੇਡ ਮੈਦਾਨ ’ਚ ਵਿਜੇਦਸ਼ਮੀ ਮਹਾਉਤਸਵ ਮਨਾਇਆ। ਇਹ ਸਮਾਗਮ ਜਲੰਧਰ ਹਾਈਟਸ-1 ਸਥਿਤ ਸ਼ਿਵ ਸ਼ਕਤੀ ਮੰਦਰ ਤੇ ਸ੍ਰੀ ਗੁਰਦੁਆਰਾ ਸਾਹਿਬ ਦੇ ਆਸ਼ੀਰਵਾਦ ਤੇ ਸਹਿਯੋਗ ਨਾਲ ਕਰਵਾਇਆ ਗਿਆ। ਇਸ ਨੇ ਵਿਜੇਦਸ਼ਮੀ ਦਾ ਸਦੀਵੀ ਸੰਦੇਸ਼ ਦਿੱਤਾ ਕਿ ਹਮੇਸ਼ਾ ਬੁਰਾਈ ’ਤੇ ਨੇਕੀ ਦੀ ਜਿੱਤ ਹੁੰਦੀ ਹੈ। ਸ਼ੁਰੂਆਤ ਸ੍ਰੀ ਵੀਰ ਹਨੂਮਾਨ ਜੀ ਦੀ ਵਾਨਰ ਸੈਨਾ ਦੀ ਸ਼ਾਨਦਾਰ ਸ਼ੋਭਾ ਯਾਤਰਾ ਨਾਲ ਹੋਈ। ਰਵਾਇਤੀ ਪਹਿਰਾਵੇ ’ਚ ਸਜੇ ਵਾਨਰ ਸੈਨਾ ਦੇ ਮੈਂਬਰਾਂ ਨੇ ਬੈਂਡ ਦੇ ਨਾਲ ਪੂਰੀ ਸੋਸਾਇਟੀ ਦੀ ਪਰਿਕਰਮਾ ਕੀਤੀ। ਹਜ਼ਾਰਾਂ ਵਸਨੀਕ ਆਪਣੇ ਪਰਿਵਾਰਾਂ ਤੇ ਬੱਚਿਆਂ ਸਮੇਤ ਖੇਡ ਮੈਦਾਨ ’ਚ ਇਕੱਠੇ ਹੋਏ ਤੇ ਰਵਾਇਤੀ ਰਾਵਣ ਦਹਿਨ ਦੇਖਿਆ। ਏਜੀਆਈ ਇਨਫਰਾ ਲਿਮਿਟਿਡ ਦੇ ਪ੍ਰਬੰਧ ਨਿਰਦੇਸ਼ਕ ਸੁਖਦੇਵ ਸਿੰਘ ਨੇ ਇਸ ਮਹਾਉਤਸਵ ’ਚ ਸ਼ਿਰਕਤ ਕੀਤੀ। ਉਨ੍ਹਾਂ ਦੇ ਨਾਲ ਕੰਪਨੀ ਦੇ ਸੀਨੀਅਰ ਅਧਿਕਾਰੀ ਸਲਵਿੰਦਰਜੀਤ ਕੌਰ, ਵਰਿੰਦਰ ਸਿੰਘ ਤੇ ਅਭਿਜੀਤ ਸਿੰਘ ਵੀ ਪਰਿਵਾਰਾਂ ਸਮੇਤ ਮੌਜੂਦ ਸਨ। ਰਾਵਣ ਦਹਿਨ ਤੋਂ ਪਹਿਲਾਂ ਸੁਖਦੇਵ ਸਿੰਘ ਨੇ ਪੂਰੀ ਸ਼ਰਧਾ ਨਾਲ ਰਵਾਇਤੀ ਪੂਜਾ ਕੀਤੀ। ਸ਼ਿਵ ਸ਼ਕਤੀ ਮੰਦਰ ਦੇ ਮੁੱਖ ਪੁਜਾਰੀ ਨਰਿੰਦਰ ਵਸ਼ਿਸ਼ਟ ਨੇ ਧਾਰਮਿਕ ਰਸਮਾਂ ਪੂਰੀਆਂ ਕਰਵਾਈਆਂ। ਇਸ ਤੋਂ ਬਾਅਦ ਸੁਖਦੇਵ ਸਿੰਘ ਨੇ ਰਾਵਣ ਦੇ ਪੁਤਲੇ ਨੂੰ ਅੱਗ ਲਗਾਈ ਤੇ ਸਮਾਗਮ ਦਾ ਮੁੱਖ ਕਾਰਜ ਸੰਪੰਨ ਹੋਇਆ। ਇਸ ਤੋਂ ਬਾਅਦ ਸੰਗਤਾਂ ’ਚ ਪ੍ਰਸ਼ਾਦ ਵੰਡਿਆ ਗਿਆ। ਹਾਜ਼ਰੀਨ ਨੇ ਸਮਾਗਮ ਦੇ ਪ੍ਰਬੰਧਾਂ ਦੀ ਸ਼ਲਾਘਾ ਕੀਤੀ।