1101 ਕੁੰਡੀਆ ਅਤਿ ਰੁਦਰ ਮਹਾਯੱਗ ਦਾ ਦੂਜਾ ਦਿਨ ਸ਼ਰਧਾ ਨਾਲ ਸੰਪੰਨ

ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ, ਹੁਸ਼ਿਆਰਪੁਰ : ਹੁਸ਼ਿਆਰਪੁਰ ਦੇ ਪਿੰਡ ਬੱਸੀ ਗੁਲਾਮ ਹੁਸੈਨ ਸਥਿਤ ਸ਼੍ਰੀ ਸਿੱਧੇਸ਼ਵਰ ਮਹਾਦੇਵ ਮੰਦਿਰ ਵਿਖੇ 19 ਤੋਂ 25 ਫਰਵਰੀ ਤੱਕ ਮਹੰਤ ਉਦੈਗਿਰੀ ਮਹਾਰਾਜ ਦੇ ਪਵਿੱਤਰ ਸੰਕਲਪ ਨਾਲ ਆਯੋਜਿਤ 1101 ਕੁੰਡੀਆ ਅਤਿ ਰੁਦਰ ਮਹਾਯੱਗ ਦਾ ਦੂਜਾ ਦਿਨ ਸ਼ਰਧਾ, ਉਤਸ਼ਾਹ ਅਤੇ ਆਧਿਆਤਮਿਕ ਜੋਸ਼ ਨਾਲ ਸਮਾਪਤ ਹੋਇਆ। ਹਜ਼ਾਰਾਂ ਦੀ ਗਿਣਤੀ ਵਿੱਚ ਪਹੁੰਚੇ ਸ਼ਰਧਾਲੂਆਂ ਦੀ ਮੌਜੂਦਗੀ ਵਿੱਚ ਵੈਦਿਕ ਮੰਤਰਾਂ ਦੀ ਗੂੰਜ ਨਾਲ ਪੂਰਾ ਮਾਹੌਲ ਸ਼ਿਵ ਭਗਤੀ ਨਾਲ ਰੰਗਿਆ ਰਿਹਾ। ਅੱਜ ਦੇ ਯੱਗ ਦੇ ਮੁੱਖ ਮੇਜ਼ਬਾਨ ਵਜੋਂ ਹਿੰਦੂਜਾ ਗਰੁੱਪ ਦੇ ਕਾਰਪੋਰੇਟ ਪ੍ਰਧਾਨ ਡਾ. ਐਸ.ਕੇ. ਚੱਢਾ ਆਪਣੇ ਪਰਿਵਾਰ ਸਮੇਤ ਮੌਜੂਦ ਰਹੇ। ਉਨ੍ਹਾਂ ਨੇ ਵੈਦਿਕ ਰੀਤਿ-ਰਿਵਾਜਾਂ ਅਨੁਸਾਰ ਮੁੱਖ ਹਵਨ ਕੁੰਡ ਵਿੱਚ ਭੇਟ ਚੜ੍ਹਾਈ ਅਤੇ ਵਿਸ਼ਵ ਸ਼ਾਂਤੀ, ਵਾਤਾਵਰਣ ਦੀ ਸ਼ੁੱਧਤਾ ਅਤੇ ਮਨੁੱਖਤਾ ਦੇ ਕਲਿਆਣ ਲਈ ਪ੍ਰਾਰਥਨਾ ਕੀਤੀ। ਇਸ ਮੌਕੇ ‘ਤੇ ਹਿੰਦੂਜਾ ਗਰੁੱਪ ਵੱਲੋਂ ਯੱਗ ਲਈ 5,000 ਲੀਟਰ ਸ਼ੁੱਧ ਘਿਓ ਦਾ ਵਿਸ਼ੇਸ਼ ਦਾਨ ਵੀ ਦਿੱਤਾ ਗਿਆ, ਜਿਸਨੂੰ ਪ੍ਰਬੰਧਕ ਕਮੇਟੀ ਨੇ ਸੇਵਾ ਅਤੇ ਸਮਰਪਣ ਦੀ ਪ੍ਰੇਰਨਾਦਾਇਕ ਮਿਸਾਲ ਕਰਾਰ ਦਿੱਤਾ। ਆਪਣੇ ਸੰਬੋਧਨ ਵਿੱਚ ਡਾ. ਐੱਸਕੇ ਚੱਢਾ ਨੇ ਕਿਹਾ ਕਿ ਅਤਿ ਰੁਦਰ ਮਹਾਂਯੱਗ ਵਰਗੀਆਂ ਬ੍ਰਹਮ ਰਸਮਾਂ ਸਨਾਤਨ ਸੰਸਕ੍ਰਿਤੀ ਦੀ ਆਤਮਾ ਹਨ। ਅਜਿਹੇ ਆਯੋਜਨ ਸਮਾਜ ਵਿੱਚ ਆਧਿਆਤਮਿਕ ਉਰਜਾ ਭਰਦੇ ਹਨ ਅਤੇ ਸਕਾਰਾਤਮਕ ਸੋਚ, ਨੈਤਿਕ ਮੁੱਲਾਂ ਅਤੇ ਸਮੂਹਿਕ ਏਕਤਾ ਨੂੰ ਮਜ਼ਬੂਤ ਕਰਦੇ ਹਨ। ਇਸ ਮੌਕੇ ‘ਤੇ ਸਾਬਕਾ ਸੰਸਦ ਮੈਂਬਰ ਅਵਿਨਾਸ਼ ਰਾਏ ਖੰਨਾ, ਵਿਧਾਇਕ ਪੰਡਿਤ ਬ੍ਰਹਮਾ ਸ਼ੰਕਰ ਜਿੰਪਾ, ਮੇਅਰ ਸੁਰਿੰਦਰ ਸ਼ਿੰਦਾ, ਸ਼ਿਵ ਭਗਤ ਅਨੁਰਾਗ ਸੂਦ ਅਤੇ ਡਾ. ਹਰਸ਼ਵਿੰਦਰ ਪਠਾਨੀਆ ਵੀ ਪ੍ਰਮੁੱਖ ਤੌਰ ‘ਤੇ ਹਾਜ਼ਰ ਰਹੇ। ਉਨ੍ਹਾਂ ਨੇ ਸ਼ਰਧਾਲੂਆਂ ਨੂੰ ਵੱਡੀ ਗਿਣਤੀ ਵਿੱਚ ਯੱਗ ਸਥਾਨ ‘ਤੇ ਪਹੁੰਚ ਕੇ ਪੁੰਨ ਪ੍ਰਾਪਤ ਕਰਨ ਦੀ ਅਪੀਲ ਕੀਤੀ। ਪ੍ਰਬੰਧਕ ਕਮੇਟੀ ਦੇ ਅਨੁਸਾਰ, ਹਫ਼ਤੇ ਭਰ ਚੱਲਣ ਵਾਲੇ ਇਸ ਮਹਾਯੱਗ ਦੌਰਾਨ ਰੋਜ਼ਾਨਾ ਵਿਸ਼ੇਸ਼ ਪੂਜਾ, ਰੁਦਰਭਿਸ਼ੇਕ, ਪ੍ਰਵਚਨ ਅਤੇ ਵਿਸ਼ਾਲ ਲੰਗਰ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਪਿੰਡ ਬੱਸੀ ਗੁਲਾਮ ਹੁਸੈਨ ਵਿੱਚ ਆਯੋਜਿਤ ਇਹ ਮਹਾਯੱਗ ਆਸਥਾ, ਪਰੰਪਰਾ ਅਤੇ ਸਮਾਜਿਕ ਸਦਭਾਵਨਾ ਦਾ ਵਿਲੱਖਣ ਸੰਗਮ ਬਣਿਆ ਹੋਇਆ ਹੈ। “ਹਰ ਹਰ ਮਹਾਦੇਵ” ਦੇ ਜੈਕਾਰਿਆਂ ਨਾਲ ਇਲਾਕਾ ਸ਼ਿਵ ਭਗਤੀ ਵਿੱਚ ਝੂਮਦਾ ਨਜ਼ਰ ਆਇਆ।