ਸਾਈਕਲਿਸਟ ਚੌਹਾਨ ਨੇ 9 ਘੰਟਿਆਂ ’ਚ ਪੂਰੀ ਕੀਤੀ ਬਰੇਵਟ ਰਾਈਡ

ਸਟਾਫ਼ ਰਿਪੋਰਟਰ, ਪੰਜਾਬੀ ਜਾਗਰਣ, ਹੁਸ਼ਿਆਰਪੁਰ: ਔਡੈਕਸ ਇੰਡੀਆ ਤੋਂ ਮਾਨਤਾ ਪ੍ਰਾਪਤ ਹਾਕ ਰਾਈਡਰਜ਼ ਜਲੰਧਰ ਵੱਲੋਂ 200 ਕਿਲੋਮੀਟਰ ਦੀ ਬਰੇਵਟ ਸਾਈਕਲਿੰਗ ਰਾਈਡ ਕਰਵਾਈ ਗਈ। ਇਹ ਰਾਈਡ ਸਵੇਰੇ 5:15 ਵਜੇ ਦੇਵੀ ਤਲਾਬ ਮੰਦਰ, ਜਲੰਧਰ ਤੋਂ ਸ਼ੁਰੂ ਹੋ ਕੇ ਟਾਂਡਾ, ਦਸੂਹਾ, ਮੁਕੇਰੀਆਂ ਅਤੇ ਪਠਾਨਕੋਟ ਤੋਂ ਹੁੰਦੀ ਹੋਈ ਵਾਪਸ ਜਲੰਧਰ ਵਿਖੇ ਸਮਾਪਤ ਹੋਈ।ਇਸ ਰਾਈਡ ਵਿੱਚ ਹੁਸ਼ਿਆਰਪੁਰ ਦੇ ਸਟੇਟ ਐਵਾਰਡੀ ਸਾਈਕਲਿਸਟ ਬਲਰਾਜ ਸਿੰਘ ਚੌਹਾਨ ਨੇ ਭਾਗ ਲੈਂਦਿਆਂ 211 ਕਿਲੋਮੀਟਰ ਦਾ ਸਫ਼ਰ ਮਹਿਜ਼ 9 ਘੰਟਿਆਂ ਵਿੱਚ ਸਫਲਤਾਪੂਰਵਕ ਪੂਰਾ ਕੀਤਾ। ਉਹ ਸਵੱਛ ਭਾਰਤ ਮਿਸ਼ਨ, ਨਗਰ ਨਿਗਮ ਹੁਸ਼ਿਆਰਪੁਰ ਦੇ ਬ੍ਰਾਂਡ ਅੰਬੈਸਡਰ ਅਤੇ ਸਪੋਰਟਸ ਅਥਾਰਟੀ ਆਫ ਇੰਡੀਆ ਤੇ ਫਿੱਟ ਇੰਡੀਆ ਮੂਵਮੈਂਟ ਦੇ ਪੰਜਾਬ ਸਟੇਟ ਲੀਡਰ ਹਨ। ਬਲਰਾਜ ਚੌਹਾਨ ਨੇ ਦੱਸਿਆ ਕਿ ਸਵੇਰੇ ਤੇਜ਼ ਹਵਾ ਸਾਹਮਣੇ ਤੋਂ ਚੱਲਣ ਕਾਰਨ ਸਾਈਕਲਿੰਗ ਕਰਨਾ ਚੁਣੌਤੀਪੂਰਨ ਰਿਹਾ। ਪਠਾਨਕੋਟ ਤੋਂ ਪਹਿਲਾਂ ਤਿੰਨ ਕਿਲੋਮੀਟਰ ਦੀ ਔਖੀ ਚੜ੍ਹਾਈ ਵੀ ਪਾਰ ਕਰਨੀ ਪਈ। ਇਸ ਦੇ ਬਾਵਜੂਦ ਉਨ੍ਹਾਂ ਨੇ ਨਿਰਧਾਰਤ 13.5 ਘੰਟਿਆਂ ਦੇ ਸਮੇਂ ਤੋਂ ਕਾਫ਼ੀ ਪਹਿਲਾਂ ਰਾਈਡ ਪੂਰੀ ਕਰਕੇ ਆਪਣਾ ਪਿਛਲਾ ਰਿਕਾਰਡ ਸੁਧਾਰਿਆ। ਜ਼ਿਕਰਯੋਗ ਹੈ ਕਿ ਬਲਰਾਜ ਚੌਹਾਨ ਹੁਣ ਤੱਕ ਦੇਸ਼-ਵਿਦੇਸ਼ ਵਿੱਚ ਦੋ ਲੱਖ ਕਿਲੋਮੀਟਰ ਤੋਂ ਵੱਧ ਸਾਈਕਲਿੰਗ ਕਰ ਚੁੱਕੇ ਹਨ। ਇਸ ਰਾਈਡ ਵਿੱਚ ਗੰਗਾਨਗਰ ਦੇ ਭਗਵਾਨ ਸਿੰਘ ਸਿੱਧੂ ਅਤੇ ਅੰਮ੍ਰਿਤਸਰ ਦੇ ਰਣਜੀਤ ਸਿੰਘ ਨਾਹਲ ਵੀ ਸ਼ਾਮਲ ਸਨ।