ਰੇਲਵੇ ਫਾਟਕ ’ਤੇ ਟਰੈਫ਼ਿਕ ਸਮੱਸਿਆ ਦੇ ਹੱਲ ਲਈ ਵਫ਼ਦ ਕੇਂਦਰੀ ਰੇਲ ਮੰਤਰੀ ਨੂੰ ਮਿਲਿਆ

ਪੰਜਾਬੀ ਜਾਗਰਣ ਰਿਪੋਰਟਰ, ਫਤਹਿਗੜ੍ਹ ਸਾਹਿਬ : ਸਰਹਿੰਦ ਫਤਹਿਗੜ੍ਹ ਸਾਹਿਬ ਤੋਂ ਇਕ ਵਫ਼ਦ ਪੰਜਾਬ ਭਾਜਪਾ ਦੇ ਸੀਨੀਅਰ ਆਗੂ ਅਤੇ ਸਾਬਕਾ ਮੰਤਰੀ ਡਾ. ਹਰਬੰਸ ਲਾਲ ਦੀ ਅਗਵਾਈ ਵਿਚ ਕੇਂਦਰੀ ਰੇਲ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੂੰ ਮਿਲਿਆ। ਵਫ਼ਦ ਨੇ ਮੰਤਰੀ ਨੂੰ ਜਾਣੂ ਕਰਵਾਇਆ ਕਿ ਦਸਮ ਪਾਤਸ਼ਾਹ ਸ਼੍ਰੀ ਗੁਰੂ ਗੋਬਿੰਦ ਸਿੰਘ ਦੇ ਛੋਟੇ ਸਾਹਿਬਜ਼ਾਦਿਆਂ ਦੇ ਯਾਦਗਾਰੀ ਗੁਰਦੁਆਰਾ ਸ਼੍ਰੀ ਫਤਹਿਗੜ੍ਹ ਸਾਹਿਬ ਦੇ ਨਜ਼ਦੀਕ ਰੇਲਵੇ ਫਾਟਕ ’ਤੇ ਹਮੇਸ਼ਾ ਭਾਰੀ ਟਰੈਫ਼ਿਕ ਰਹਿੰਦਾ ਹੈ। ਫਾਟਕ ਘੰਟਾ-ਘੰਟਾ ਬੰਦ ਰਹਿਣ ਕਾਰਨ ਸ਼ਰਧਾਲੂਆਂ ਨੂੰ ਗੁਰਦੁਆਰਾ ਸਾਹਿਬ ਪਹੁੰਚਣ ਵਿੱਚ ਵੱਡੀ ਮੁਸ਼ਕਲ ਹੁੰਦੀ ਹੈ ਅਤੇ ਫਾਟਕ ਖੁੱਲ੍ਹਣ ਵੇਲੇ ਲੰਬੀਆਂ ਲਾਈਨਾਂ ਲੱਗਣ ਕਾਰਨ ਆਮ ਲੋਕ ਵੀ ਪ੍ਰੇਸ਼ਾਨ ਹੁੰਦੇ ਹਨ। ਵਫ਼ਦ ਨੇ ਮੰਗ ਕੀਤੀ ਕਿ ਇਸ ਰੇਲਵੇ ਫਾਟਕ ’ਤੇ ਅੰਡਰਗਰਾਊਂਡ ਪੁਲ ਬਣਾਉਣ ਜਾਂ ਸਰਵੇ ਕਰਕੇ ਕੋਈ ਹੋਰ ਪ੍ਰਬੰਧ ਕਰਨ ਲਈ ਰੇਲਵੇ ਵਿਭਾਗ ਫ਼ੌਰੀ ਠੋਸ ਕਦਮ ਚੁੱਕੇ ਤਾਂ ਜੋ ਸ਼ਰਧਾਲੂਆਂ ਨੂੰ ਦਰਸ਼ਨ ਕਰਨ ਵਿਚ ਕੋਈ ਦਿੱਕਤ ਨਾ ਆਵੇ। ਇਸ ਦੌਰਾਨ ਸਰਹਿੰਦ ਰੇਲਵੇ ਸਟੇਸ਼ਨ ਨੂੰ ‘ਏ’ ਕੈਟਾਗਰੀ ਵਿਚ ਸ਼ਾਮਲ ਕਰਕੇ ਕਾਇਆ-ਕਲਪ ਕਰਨ ਅਤੇ ਹਮਾਯੂੰਪੁਰ, ਸਰਹਿੰਦ ਮਦਰਾਸੀ ਕਾਲੋਨੀ, ਸਾਧੂਗੜ੍ਹ ਖੇੜਾ ਹੰਸਾਲੀ ਸਾਹਿਬ, ਖਾਨਪੁਰ ਜੀਟੀ ਰੋਡ, ਰਜਿੰਦਰਗੜ੍ਹ ਚੁੰਨੀ ਮਾਜਰਾ ਅਤੇ ਭਗੜਾਣਾ ਸਰਾਏ ਬੰਜਾਰਾ ਵਿਖੇ ਅੰਡਰਗਰਾਊਂਡ ਪੁਲ ਬਣਾਉਣ ਲਈ ਕੇਂਦਰੀ ਮੰਤਰੀ ਦਾ ਧੰਨਵਾਦ ਵੀ ਕੀਤਾ ਗਿਆ। ਵਫ਼ਦ ਨੇ ਮੰਗ ਕੀਤੀ ਕਿ ਖਮਾਣੋਂ ਸ਼ਹਿਰ ਦੇ ਨਵੇਂ ਬਣੇ ਰੇਲਵੇ ਸਟੇਸ਼ਨ ’ਤੇ ਲੰਘਣ ਵਾਲੀਆਂ ਰੇਲ ਗੱਡੀਆਂ ਦਾ ਦਾ ਰੁਕਣਾ ਯਕੀਨੀ ਬਣਾਇਆ ਜਾਵੇ, ਕਿਉਂਕਿ ਹਾਲੇ ਤੱਕ ਉੱਥੇ ਕੋਈ ਗੱਡੀ ਨਹੀਂ ਰੁਕਦੀ। ਇਸ ਦੇ ਨਾਲ ਹੀ ਸਰਹਿੰਦ ਦੇ ਮੁੱਖ ਜੰਕਸ਼ਨ ਹੋਣ ਕਰਕੇ ਇੱਥੋਂ ਦਿੱਲੀ, ਅੰਮ੍ਰਿਤਸਰ ਜਾਂ ਹੋਰ ਰੂਟਾਂ ਵੱਲ ਲੰਘਣ ਵਾਲੀ ਹਰ ਰੇਲ ਗੱਡੀ ਨੂੰ ਘੱਟੋ-ਘੱਟ 2 ਮਿੰਟ ਦਾ ਸਟਾਪੇਜ ਦੇਣ ਦੀ ਮੰਗ ਕੀਤੀ ਗਈ। ਇਸ ਮੌਕੇ ਸਾਬਕਾ ਮੰਤਰੀ ਨਾਲ ਬਲਵਿੰਦਰ ਸਿੰਘ ਗੋਗੀ ਬਹਾਦਰਗੜ੍ਹ, ਜਗਵੀਰ ਸਿੰਘ ਤਰਖੇੜੀ, ਯੂਥ ਆਗੂ ਗੁਰਕੀਰਤ ਸਿੰਘ ਬੇਦੀ, ਗੁਰਤੇਜ ਸਿੰਘ ਭਾਗਨਪੁਰ, ਵਿਪਨ ਵਰਮਾ ਬੱਬੂ ਸਰਹਿੰਦ, ਭਾਰਤ ਵਿਕਾਸ ਪ੍ਰੀਸ਼ਦ ਸਰਹਿੰਦ ਦੇ ਪ੍ਰਧਾਨ ਮਨੀਸ਼ ਵਰਮਾ, ਬਲਦੇਵ ਸਿੰਘ ਚੌਰਵਾਲਾ, ਮੋਹਨ ਸਿੰਘ ਨੰਬਰਦਾਰ ਚੁੰਨੀ ਖੁਰਦ, ਅਮਨਦੀਪ ਸਿੰਘ ਸਰਹਿੰਦ, ਗੁਰਿੰਦਰ ਸਿੰਘ ਗੁਰੂ ਫਤਹਿਗੜ੍ਹ ਸਾਹਿਬ, ਗੁਰਦੇਵ ਸਿੰਘ ਡੇਰਾ ਮੀਰ ਮੀਰਾਂ, ਸੁੱਚਾ ਖਾਨ ਮਹਾਦੀਆਂ, ਦਰਸ਼ਨ ਸਿੰਘ ਕੋਟਲਾ ਬਜਵਾੜਾ, ਅਸ਼ੋਕ ਕੁਮਾਰ ਤਲਾਣੀਆਂ, ਗੁਰੀ ਬੇਦੀ, ਸੁਭਮ ਮੋਦਕ ਸਰਹਿੰਦ, ਪੰਜਾਬ ਦੇ ਪ੍ਰੈੱਸ ਸਕੱਤਰ ਗੁਰਦੀਪ ਸਿੰਘ ਭਾਗਨਪੁਰ, ਸੁਖਵੀਰ ਸਿੰਘ ਚੌਰਵਾਲਾ, ਹਨੂੰਮਾਨ ਸੇਵਾ ਦਲ ਸਰਹਿੰਦ ਦੇ ਪ੍ਰਧਾਨ ਸ਼ਸ਼ੀ ਭੂਸ਼ਣ ਉੱਪਲ, ਰੋਬਿਨ ਸਿੰਘ ਸਰਹਿੰਦ ਅਤੇ ਟਰਾਂਸਪੋਰਟਰ ਨਰਿੰਦਰ ਸਿੰਘ ਬਲਾੜੀ ਕਲਾਂ ਮੌਜੂਦ ਸਨ।