ਦਿਵਯ ਜਯੋਤੀ ਸੰਸਥਾਨ ਨੇ ਕਥਾ ਸਮਾਗਮ ਕਰਵਾਇਆ

ਪੱਤਰ ਪ੍ਰੇਰਕ ਪੰਜਾਬੀ ਜਾਗਰਣ ਕੋਟਕਪੂਰਾ : ਦਿਵਯ ਜਯੋਤੀ ਜਾਗਰਤੀ ਸੰਸਥਾਨ ਵੱਲੋਂ ਸ੍ਰੀ ਦੁਰਗਾ ਮਾਤਾ ਮੰਦਿਰ ਪੁਰਾਣਾ ਸ਼ਹਿਰ ਕੋਟਕਪੂਰਾ ਵਿਖੇ ਤਿੰਨ ਦਿਨਾਂ ਸ੍ਰੀ ਸੁੰਦਰਕਾਂਡ ਕਥਾ ਦਾ ਬਹੁਤ ਹੀ ਸ਼ਰਧਾ ਅਤੇ ਉਤਸ਼ਾਹ ਪੂਰਵਕ ਆਯੋਜਨ ਕੀਤਾ ਗਿਆ। ਇਸ ਅਧਿਆਤਮਿਕ ਸਮਾਗਮ ਦੇ ਦੌਰਾਨ ਸਰਵ ਸ਼੍ਰੀ ਆਸ਼ੂਤੋਸ਼ ਮਹਾਰਾਜ ਜੀ ਦੀ ਪਰਮ ਸ਼ਿਸ਼ ਅਤੇ ਵਿਦਵਾਨ ਕਥਾ ਵਿਆਸ ਸਾਧਵੀ ਸੁਖਧਾਮਾ ਭਾਰਤੀ ਜੀ ਨੇ ਆਪਣੀਆਂ ਅੰਮ੍ਰਿਤਮਈ ਅਤੇ ਪ੍ਰਭਾਵਸ਼ਾਲੀ ਵਿਚਾਰਾਂ ਰਾਹੀਂ ਸੰਗਤਾਂ ਨੂੰ ਸੁੰਦਰਕਾਂਡ ਦੇ ਗੂੜ੍ਹ ਅਧਿਆਤਮਿਕ ਰਹੱਸਾਂ ਤੋਂ ਜਾਣੂ ਕਰਵਾਇਆ। ਕਥਾ ਦੇ ਵੱਖ-ਵੱਖ ਪ੍ਰਸੰਗਾਂ ਦੀ ਖੂਬਸੂਰਤ ਵਿਆਖਿਆ ਕਰਦਿਆਂ ਸਾਧਵੀ ਜੀ ਨੇ ਦੱਸਿਆ ਕਿ ਸੁੰਦਰਕਾਂਡ ਦੀ ਪਵਿੱਤਰ ਕਥਾ ਅਸਲ ਵਿੱਚ ਭਗਤ ਸ਼੍ਰੋਮਣੀ ਹਨੂਮਾਨ ਜੀ ਦੀ ਭਗਤੀ ਰੂਪੀ ਯਾਤਰਾ ਵੱਲ ਸੰਕੇਤ ਕਰਦੀ ਹੈ। ਜਿਸ ਸਮੇਂ ਹਨੂਮਾਨ ਜੀ ਨੇ ਮਾਤਾ ਸੀਤਾ ਦੀ ਖੋਜ ਦੇ ਲਈ ਆਪਣੀ ਯਾਤਰਾ ਸ਼ੁਰੂ ਕੀਤੀ ਤਾਂ ਉਨ੍ਹਾਂ ਦੇ ਸਾਹਮਣੇ ਅਨੇਕਾਂ ਹੀ ਕਠਿਨ ਪਰਿਸਥਿਤੀਆਂ ਅਤੇ ਰੁਕਾਵਟਾਂ ਆਈਆਂ। ਮਾਤਾ ਸੀਤਾ ਜੋ ਕਿ ਭਗਤੀ ਦੀ ਅਸਲ ਪ੍ਰਤੀਕ ਹਨ, ਉਨ੍ਹਾਂ ਨੂੰ ਅਤੇ ਭਗਤੀ ਦੇ ਮਾਰਗ ਨੂੰ ਪ੍ਰਾਪਤ ਕਰਨਾ ਕਦੇ ਵੀ ਸੌਖਾ ਨਹੀਂ ਹੁੰਦਾ। ਠੀਕ ਇਸੇ ਤਰ੍ਹਾਂ ਜਦੋਂ ਕੋਈ ਇਨਸਾਨ ਅਸਲ ਭਗਤੀ ਦੇ ਮਾਰਗ ਤੇ ਚੱਲਦਾ ਹੈ, ਤਾਂ ਉਸ ਨੂੰ ਕਾਮ, ਕ੍ਰੋਧ, ਲੋਭ, ਮੋਹ, ਅਹੰਕਾਰ ਅਤੇ ਕਈ ਪ੍ਰਕਾਰ ਦੀਆਂ ਬਾਹਰੀ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਪਰ ਇੱਕ ਸੱਚਾ ਸਾਧਕ ਇਨ੍ਹਾਂ ਪਰਿਸਥਿਤੀਆਂ ਤੋਂ ਕਦੇ ਵੀ ਡਾਵਾਂਡੋਲ ਨਹੀਂ ਹੁੰਦਾ ਅਤੇ ਇਨ੍ਹਾਂ ਬੁਰਾਈਆਂ ਤੇ ਜਿੱਤ ਪ੍ਰਾਪਤ ਕਰਕੇ ਹਨੂਮਾਨ ਜੀ ਵਾਂਗ ਆਪਣੇ ਜੀਵਨ ਦੇ ਅਸਲ ਲਕਸ਼ ਨੂੰ ਪੂਰਾ ਕਰ ਲੈਂਦਾ ਹੈ। ਇਹ ਲਕਸ਼ ਉਦੋਂ ਹੀ ਹਾਸਲ ਹੋ ਸਕਦਾ ਹੈ ਜਦੋਂ ਮਨੁੱਖ ਕਿਸੇ ਪੂਰਨ ਗੁਰੂ ਦੀ ਸ਼ਰਨ ਵਿੱਚ ਜਾਂਦਾ ਹੈ, ਕਿਉਂਕਿ ਪੂਰਨ ਗੁਰੂ ਹੀ ਉਹ ਬ੍ਰਹਮ ਗਿਆਨ ਬਖਸ਼ਦੇ ਹਨ ਜਿਸ ਨਾਲ ਅੰਦਰੂਨੀ ਭਗਤੀ ਦੀ ਯਾਤਰਾ ਸਫਲ ਹੁੰਦੀ ਹੈ। ਉਨ੍ਹਾਂ ਅੱਗੇ ਚੇਤੰਨ ਕਰਦਿਆਂ ਕਿਹਾ ਕਿ ਅੱਜ ਦਾ ਇਨਸਾਨ ਬਾਹਰੋਂ ਬਹੁਤ ਸੋਹਣਾ ਲੱਗਦਾ ਹੈ, ਪਰ ਉਸ ਦੇ ਅੰਦਰ ਕਈ ਬੁਰਾਈਆਂ ਛਿਪੀਆਂ ਹੋਈਆਂ ਹਨ, ਜਿਵੇਂ ਲੰਕਾ ਦੇ ਸਾਰੇ ਘਰ ਬਾਹਰੋਂ ਮੰਦਿਰ ਵਰਗੇ ਸਨ ਪਰ ਅੰਦਰ ਪਾਪ ਤੇ ਭ੍ਰਿਸ਼ਟਾਚਾਰ ਸੀ। ਇਹ ਬੁਰਾਈਆਂ ਕੇਵਲ ਭਗਤੀ ਦੇ ਰਾਹ ਤੇ ਚੱਲ ਕੇ ਹੀ ਖ਼ਤਮ ਹੋ ਸਕਦੀਆਂ ਹਨ।