PGI 'ਚ 20 ਲੱਖ ਦੇ ਟੀਕੇ ਚੋਰੀ, ਅਟੈਂਡੈਂਟ ਖ਼ਿਲਾਫ਼ FIR; ਪੂਰੇ ਗਿਰੋਹ ਦੀਆਂ ਪਰਤਾਂ ਖੋਲ੍ਹੇਗੀ ਪੁਲਿਸ

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ : ਪੀਜੀਆਈ ਦੇ ਗਾਇਨੀ ਵਿਭਾਗ 'ਚ ਗਰਭਵਤੀ ਔਰਤਾਂ ਤੇ ਨਵਜੰਮੇ ਬੱਚਿਆਂ ਦੇ ਇਲਾਜ 'ਚ ਵਰਤੇ ਜਾਣ ਵਾਲੇ ਕਰੀਬ 20 ਲੱਖ ਰੁਪਏ ਦੇ ਟੀਕੇ ਚੋਰੀ ਹੋਣ ਦੇ ਮਾਮਲੇ 'ਚ ਹੁਣ ਪੁਲਿਸ ਕੇਸ ਦਰਜ ਹੋ ਗਿਆ ਹੈ। ਹਸਪਤਾਲ ਅਟੈਂਡੈਂਟ ਰੋਹਿਤ ਖ਼ਿਲਾਫ਼ ਐਫਆਈਆਰ ਦਰਜ ਕੀਤੀ ਗਈ ਹੈ।

ਪੁਲਿਸ ਤੇ ਪੀਜੀਆਈ ਪ੍ਰਸ਼ਾਸਨ ਦੀ ਜਾਂਚ ਦਾ ਮੁੱਖ ਕੇਂਦਰ ਇਹ ਪਤਾ ਲਗਾਉਣਾ ਹੈ ਕਿ ਵਾਰਡ 'ਚੋਂ ਟੀਕੇ ਕਦੋਂ, ਕਿੰਨੀ ਗਿਣਤੀ 'ਚ ਅਤੇ ਕਿਸ ਦੀ ਮਿਲੀਭੁਗਤ ਨਾਲ ਬਾਹਰ ਗਏ। ਗਾਇਨੀ ਵਾਰਡ ਦੀ ਨਰਸਿੰਗ ਅਫਸਰ ਨੇ ਟੀਕੇ ਗਾਇਬ ਹੋਣ ਸਬੰਧੀ ਅਟੈਂਡੈਂਟ ਰੋਹਿਤ ਖ਼ਿਲਾਫ਼ ਸ਼ਿਕਾਇਤ ਦਿੱਤੀ ਸੀ।

ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਹ ਪਤਾ ਲਗਾਇਆ ਜਾਵੇਗਾ ਕਿ ਮੁਲਜ਼ਮ ਦੀ ਡਿਊਟੀ ਕਿਸ ਥਾਂ ਅਤੇ ਕਿਸ ਸਮੇਂ ਸੀ ਤੇ ਉਸ ਦੌਰਾਨ ਦਵਾਈਆਂ ਦੇ ਸਟਾਕ ਤਕ ਉਸ ਦੀ ਪਹੁੰਚ ਕਿਵੇਂ ਹੋਈ। ਇਸ ਦੇ ਨਾਲ ਹੀ ਵਾਰਡ 'ਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਅਤੇ ਦਵਾਈਆਂ ਦੇ ਰਿਕਾਰਡ ਦੀ ਵੀ ਜਾਂਚ ਕੀਤੀ ਜਾ ਸਕਦੀ ਹੈ।

ਸਟਾਕ ਤੇ ਮਰੀਜ਼ਾਂ ਨੂੰ ਲਗਾਏ ਟੀਕਿਆਂ ਦਾ ਹੋਵੇਗਾ ਮਿਲਾਨ

ਜਾਂਚ ਦਾ ਅਹਿਮ ਬਿੰਦੂ ਪੀਜੀਆਈ ਦਾ ਸਟਾਕ ਰਿਕਾਰਡ ਹੈ। ਪੁਲਿਸ ਅਤੇ ਹਸਪਤਾਲ ਪ੍ਰਸ਼ਾਸਨ ਇਹ ਮਿਲਾਨ ਕਰ ਸਕਦੇ ਹਨ ਕਿ ਵਿਭਾਗ 'ਚ ਕਿੰਨੇ ਟੀਕੇ ਪਹੁੰਚੇ, ਕਿੰਨੇ ਮਰੀਜ਼ਾਂ ਨੂੰ ਲਗਾਏ ਗਏ ਤੇ ਸਟਾਕ 'ਚੋਂ ਕਿੰਨੇ ਟੀਕੇ ਘੱਟ ਮਿਲੇ। ਇਸ ਨਾਲ ਇਹ ਪਤਾ ਲਗਾਉਣ 'ਚ ਮਦਦ ਮਿਲੇਗੀ ਕਿ ਅਸਲ ਵਿਚ ਕਿੰਨੀਆਂ ਦਵਾਈਆਂ ਗਾਇਬ ਹੋਈਆਂ ਹਨ ਅਤੇ ਚੋਰੀ ਦੀ ਘਟਨਾ ਕਿੰਨੇ ਸਮੇਂ ਤੋਂ ਚੱਲ ਰਹੀ ਸੀ।

ਪਹਿਲਾਂ ਵੀ ਸਾਹਮਣੇ ਆ ਚੁੱਕਾ ਹੈ ਅਜਿਹਾ ਮਾਮਲਾ

ਪੀਜੀਆਈ ਦੇ ਗਾਇਨੀ ਵਿਭਾਗ 'ਚ ਟੀਕੇ ਗਾਇਬ ਹੋਣ ਦਾ ਮਾਮਲਾ ਪਹਿਲਾਂ ਵੀ ਸਾਹਮਣੇ ਆ ਚੁੱਕਾ ਹੈ। ਅਗਸਤ 2025 'ਚ ਵੀ ਮਹਿੰਗੇ ਟੀਕੇ ਗਾਇਬ ਹੋਣ ਦੀ ਸ਼ਿਕਾਇਤ ਹੋਈ ਸੀ। ਉਸ ਮਾਮਲੇ 'ਚ ਮਰੀਜ਼ ਲਈ ਖਰੀਦੇ ਗਏ ਟੀਕਿਆਂ 'ਚੋਂ ਤਿੰਨ ਟੀਕੇ ਵਾਰਡ ਦੇ ਫਰਿੱਜ 'ਚੋਂ ਗਾਇਬ ਮਿਲੇ ਸਨ। ਸ਼ਿਕਾਇਤ ਤੋਂ ਬਾਅਦ ਹਸਪਤਾਲ ਅਟੈਂਡੈਂਟ ਖ਼ਿਲਾਫ਼ ਕਾਰਵਾਈ ਕੀਤੀ ਗਈ ਸੀ।

ਹੁਣ ਪੁਲਿਸ ਜਾਂਚ ਨਾਲ ਖੁੱਲ੍ਹੇਗਾ ਪੂਰਾ ਨੈੱਟਵਰਕ

ਮੌਜੂਦਾ ਮਾਮਲੇ 'ਚ ਪੁਲਿਸ ਇਸ ਗੱਲ ਦੀ ਵੀ ਜਾਂਚ ਕਰੇਗੀ ਕਿ ਜੇਕਰ ਟੀਕੇ ਚੋਰੀ ਹੋਏ ਹਨ ਤਾਂ ਉਨ੍ਹਾਂ ਦੀ ਵਰਤੋਂ ਕਿੱਥੇ ਕੀਤੀ ਗਈ ਜਾਂ ਉਨ੍ਹਾਂ ਨੂੰ ਕਿਸੇ ਨੂੰ ਵੇਚਿਆ ਗਿਆ। ਹਸਪਤਾਲ ਦੇ ਅੰਦਰੋਂ ਦਵਾਈਆਂ ਦਾ ਬਾਹਰ ਜਾਣਾ ਸਿਰਫ਼ ਚੋਰੀ ਦਾ ਮਾਮਲਾ ਨਹੀਂ, ਸਗੋਂ ਮਰੀਜ਼ਾਂ ਦੀ ਸੁਰੱਖਿਆ ਅਤੇ ਦਵਾਈ ਪ੍ਰਬੰਧਨ ਪ੍ਰਣਾਲੀ ਨਾਲ ਜੁੜਿਆ ਗੰਭੀਰ ਸਵਾਲ ਹੈ।