'ਭੈਣ! ਕਰ ਦਿੱਤਾ ਕੰਮ ਤਮਾਮ', ਵਿਚੋਲੇ ਨੇ ਅਮਰੀਨ ਨੂੰ ਭੇਜਿਆ ਸੀ ਮੈਸੇਜ; ਚੰਡੀਗੜ੍ਹ 'ਚ ਚਿੰਨੀ ਕਤਲਕਾਂਡ 'ਚ ਹੋਇਆ ਖੁਲਾਸਾ

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ: 18 ਮਾਰਚ ਨੂੰ ਸੈਕਟਰ-9 ਦੀ ਪਾਰਕਿੰਗ ਵਿੱਚ ਪ੍ਰਾਪਰਟੀ ਡੀਲਰ ਚਮਨਪ੍ਰੀਤ ਸਿੰਘ ਉਰਫ਼ ਚਿੰਨੀ ਕੁਬਾਹੇੜੀ ਦੀ ਦਿਨ-ਦਿਹਾੜੇ ਹੱਤਿਆ ਕਰ ਦਿੱਤੀ ਗਈ। ਇਸ ਮਾਮਲੇ ਵਿੱਚ ਚਾਰਜਸ਼ੀਟ ਰਾਹੀਂ ਇੱਕ ਮਹੱਤਵਪੂਰਨ ਜਾਣਕਾਰੀ ਸਾਹਮਣੇ ਆਈ ਹੈ।

ਹੱਤਿਆ ਤੋਂ ਕੁਝ ਸਮੇਂ ਬਾਅਦ ਮੋਹਾਲੀ ਵਾਸੀ 27 ਸਾਲਾ ਹਰਸ਼ਪ੍ਰੀਤ ਸਿੰਘ ਉਰਫ਼ ਹਰਸ਼ ਸੋਹਾਣਾ ਨੇ ਅਮਰੀਨ ਕੌਰ ਨੂੰ ਸਨੈਪਚੈਟ 'ਤੇ ਮੈਸੇਜ ਭੇਜਿਆ, ਜਿਸ ਵਿਚ ਲਿਖਿਆ ਸੀ, 'ਭੈਣ, ਚਿੰਨੀ ਦਾ ਕੰਮ ਤਮਾਮ ਹੋ ਗਿਆ।'

ਪੁਲਿਸ ਦਾ ਦੋਸ਼ ਹੈ ਕਿ ਚਿੰਨੀ ਦੀ ਹੱਤਿਆ ਦੀ ਸਾਜ਼ਿਸ਼ ਅਮਰੀਨ ਨੇ ਰਚੀ ਸੀ ਅਤੇ ਹਰਸ਼ ਨੇ ਉਸ ਦਾ ਸਾਥ ਦਿੱਤਾ। ਚਾਰਜਸ਼ੀਟ ਵਿੱਚ ਇਹ ਵੀ ਦੱਸਿਆ ਗਿਆ ਹੈ ਕਿ ਹਰਸ਼ ਨੇ ਵਿਦੇਸ਼ ਵਿੱਚ ਬੈਠੇ ਗੈਂਗਸਟਰ ਲੱਕੀ ਪਟਿਆਲ ਨਾਲ ਅਮਰੀਨ ਦੀ ਗੱਲਬਾਤ ਕਰਵਾਈ। ਅਮਰੀਨ ਨੇ ਪੁਲਿਸ ਦੇ ਸਾਹਮਣੇ ਸਵੀਕਾਰ ਕੀਤਾ ਕਿ ਉਸ ਦੀ ਲੱਕੀ ਪਟਿਆਲ ਨਾਲ ਗੱਲਬਾਤ ਹੁੰਦੀ ਸੀ ਅਤੇ ਹਰਸ਼ ਨੂੰ ਇਸ ਬਾਰੇ ਜਾਣਕਾਰੀ ਸੀ।

ਪ੍ਰਾਪਰਟੀ ਡੀਲ 'ਚ ਧੋਖਾ, ਫਿਰ ਵਧੀ ਦੁਸ਼ਮਣੀ

ਅਮਰੀਨ ਅਤੇ ਚਿੰਨੀ ਵਿਚਕਾਰ ਵਿਵਾਦ ਦਾ ਕਾਰਨ ਇਕ ਪ੍ਰਾਪਰਟੀ ਸੀ, ਜਿਸ ਨੂੰ ਅਮਰੀਨ ਨੇ ਚਿੰਨੀ ਤੋਂ ਖਰੀਦਿਆ ਸੀ। ਅਮਰੀਨ ਨੂੰ ਲੱਗਾ ਕਿ ਚਿੰਨੀ ਨੇ ਉਸ ਨਾਲ ਧੋਖਾ ਕੀਤਾ ਤੇ ਉਸ ਨੂੰ ਪ੍ਰਾਪਰਟੀ ਦਾ ਕਬਜ਼ਾ ਵੀ ਨਹੀਂ ਦਿੱਤਾ, ਜਿਸ ਕਾਰਨ ਉਸ ਨੂੰ ਨੁਕਸਾਨ ਹੋਇਆ।

ਇਸੇ ਕਾਰਨ ਦੋਵਾਂ ਵਿਚਕਾਰ ਦੁਸ਼ਮਣੀ ਵਧਦੀ ਗਈ। ਇਸ ਦੌਰਾਨ ਅਮਰੀਨ ਦੀ ਮੁਲਾਕਾਤ ਹਰਸ਼ ਨਾਲ ਹੋਈ, ਜਿਸ ਨੇ ਉਸ ਦੀ ਮੁਲਾਕਾਤ ਲੱਕੀ ਪਟਿਆਲ ਨਾਲ ਕਰਵਾਈ। ਅਮਰੀਨ ਨੇ ਚਿੰਨੀ ਦੀ ਹੱਤਿਆ ਦੇ ਬਦਲੇ ਲੱਕੀ ਪਟਿਆਲ ਨੂੰ ਮੋਟੀ ਰਕਮ ਦੇਣ ਦਾ ਵਾਅਦਾ ਕੀਤਾ ਸੀ।

ਪੰਜਾਬ ਪੁਲਿਸ ਨੇ ਫੜੇ ਸਨ ਸ਼ੂਟਰ

18 ਮਾਰਚ ਨੂੰ ਦੋ ਸ਼ੂਟਰਾਂ ਨੇ ਚਿੰਨੀ ਦੀ ਹੱਤਿਆ ਕਰ ਦਿੱਤੀ। ਪੰਜਾਬ ਪੁਲਿਸ ਨੇ ਅਗਲੇ ਦਿਨ ਸ਼ੂਟਰਾਂ ਰਾਜਨ ਉਰਫ਼ ਪੀਯੂਸ਼ ਪਹਿਲਵਾਨ ਅਤੇ ਪ੍ਰੀਤਮ ਸ਼ਾਹ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਚੰਡੀਗੜ੍ਹ ਪੁਲਿਸ ਨੇ ਇਨ੍ਹਾਂ ਤੋਂ ਪੁੱਛਗਿੱਛ ਕੀਤੀ ਅਤੇ ਹੱਤਿਆ ਵਿੱਚ ਮਦਦ ਕਰਨ ਵਾਲੇ ਹੋਰ ਮੁਲਜ਼ਮਾਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ, ਜਿਨ੍ਹਾਂ ਵਿਚ ਜਾਨੂ ਮਲਿਕ, ਕਮਲਪ੍ਰੀਤ ਉਰਫ਼ ਕਮੂ, ਰਾਹੁਲ ਸ਼ਰਮਾ ਤੇ ਵਿੱਕੀ ਸ਼ਾਮਲ ਸਨ।