17 ਸਾਲਾਂ ਤੋਂ ਚੰਡੀਗੜ੍ਹ 'ਚ ਤਾਇਨਾਤ DRDO ਵਿਗਿਆਨੀ ਨੂੰ CAT ਤੋਂ ਵੱਡਾ ਝਟਕਾ, ਹੈਦਰਾਬਾਦ ਤਬਾਦਲਾ ਰੱਖਿਆ ਬਰਕਰਾਰ

ਸਟਾਫ਼ ਰਿਪੋਰਟਰ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਚੰਡੀਗੜ੍ਹ ਵਿੱਚ ਡਿਫੈਂਸ ਰਿਸਰਚ ਐਂਡ ਡਿਵੈਲਪਮੈਂਟ ਆਰਗੇਨਾਈਜ਼ੇਸ਼ਨ (ਡੀਆਰਡੀਓ) ਵਿੱਚ ਪਿਛਲੇ 17 ਸਾਲਾਂ ਤੋਂ ਤਾਇਨਾਤ ਇੱਕ ਵਿਗਿਆਨੀ ਨੂੰ ਸੈਂਟਰਲ ਐਡਮਿਨਿਸਟ੍ਰੇਟਿਵ ਟ੍ਰਿਬਿਊਨਲ (ਕੈਟ) ਦੀ ਚੰਡੀਗੜ੍ਹ ਬੈਂਚ ਤੋਂ ਵੱਡਾ ਝਟਕਾ ਲੱਗਾ ਹੈ। ਕੈਟ ਨੇ ਵਿਗਿਆਨੀ ਦੇ ਹੈਦਰਾਬਾਦ ਤਬਾਦਲੇ ਦੇ ਹੁਕਮਾਂ ਖ਼ਿਲਾਫ਼ ਦਾਇਰ ਪਟੀਸ਼ਨ ਨੂੰ ਖਾਰਜ ਕਰ ਦਿੱਤਾ ਹੈ।

ਡੀਆਰਡੀਓ ਦੀ ਟਰਮੀਨਲ ਬੈਲਿਸਟਿਕਸ ਰਿਸਰਚ ਲੈਬੋਰੇਟਰੀ (ਟੀਬੀਆਰਐੱਲ) ’ਚ ਤਾਇਨਾਤ ਵਿਗਿਆਨੀ ਲਲਿਤ ਪ੍ਰਸ਼ਾਦ ਦਾ ਦਸੰਬਰ 2025 ਵਿੱਚ ਤਬਾਦਲਾ ਕਰ ਦਿੱਤਾ ਗਿਆ ਸੀ। ਉਨ੍ਹਾਂ ਨੂੰ ਹੈਦਰਾਬਾਦ ਸਥਿਤ ਰਿਸਰਚ ਸੈਂਟਰ ਇਮਾਰਤ (ਆਰਸੀਆਈ) ਵਿੱਚ ਭੇਜਿਆ ਗਿਆ ਸੀ। ਇਸ ਤੋਂ ਬਾਅਦ ਜਨਵਰੀ 2026 ’ਚ ਉਨ੍ਹਾਂ ਨੂੰ ਰਿਲੀਵ ਕਰਨ ਦੇ ਹੁਕਮ ਵੀ ਜਾਰੀ ਕਰ ਦਿੱਤੇ ਗਏ ਸਨ। ਲਲਿਤ ਪ੍ਰਸਾਦ ਨੇ ਇਨ੍ਹਾਂ ਹੁਕਮਾਂ ਨੂੰ ਕੈਟ ਵਿੱਚ ਚੁਣੌਤੀ ਦਿੱਤੀ ਸੀ।

ਪਟੀਸ਼ਨ ਵਿੱਚ ਉਨ੍ਹਾਂ ਨੇ 17 ਸਾਲਾਂ ਤੋਂ ਚੰਡੀਗੜ੍ਹ ਵਿੱਚ ਤਾਇਨਾਤੀ, ਆਪਣੀ ਤਕਨੀਕੀ ਮੁਹਾਰਤ, ਬੱਚਿਆਂ ਦੀ ਪੜ੍ਹਾਈ ਅਤੇ ਪਤਨੀ ਦੀ ਨੌਕਰੀ ਅਤੇ ਸਿਹਤ ਦਾ ਹਵਾਲਾ ਦਿੰਦਿਆਂ ਤਬਾਦਲਾ ਰੱਦ ਕਰਨ ਦੀ ਮੰਗ ਕੀਤੀ ਸੀ। ਹਾਲਾਂਕਿ ਕੈਟ ਨੇ ਕਿਹਾ ਕਿ ਵਿਗਿਆਨੀਆਂ ਦੀ ਤਾਇਨਾਤੀ ਅਤੇ ਉਪਲਬਧ ਸਰੋਤਾਂ ਦੀ ਵਰਤੋਂ ਪ੍ਰਸ਼ਾਸਨਿਕ ਅਤੇ ਤਕਨੀਕੀ ਲੋੜਾਂ ਅਨੁਸਾਰ ਤੈਅ ਕਰਨਾ ਡੀਆਰਡੀਓ ਦਾ ਅਧਿਕਾਰ ਹੈ।

ਕੈਟ ਨੇ ਇਹ ਵੀ ਨੋਟ ਕੀਤਾ ਕਿ ਸਰੋਤਾਂ ਦੀ ਬਿਹਤਰ ਵਰਤੋਂ ਅਤੇ ਤਕਨੀਕੀ ਲੋੜਾਂ ਨੂੰ ਪੂਰਾ ਕਰਨ ਲਈ ਡੀਆਰਡੀਓ ਵੱਲੋਂ ਇੱਕੋ ਸਮੇਂ 21 ਵਿਗਿਆਨੀਆਂ ਦੇ ਤਬਾਦਲੇ ਕੀਤੇ ਗਏ ਸਨ। ਇਸ ਲਈ ਟ੍ਰਿਬਿਊਨਲ ਨੇ ਲਲਿਤ ਪ੍ਰਸਾਦ ਦੀ ਪਟੀਸ਼ਨ ਖਾਰਜ ਕਰਦਿਆਂ ਉਨ੍ਹਾਂ ਦੇ ਹੈਦਰਾਬਾਦ ਤਬਾਦਲੇ ਦੇ ਹੁਕਮਾਂ ਨੂੰ ਬਰਕਰਾਰ ਰੱਖਿਆ।

17 ਸਾਲਾਂ ਤੋਂ ਟੀਬੀਆਰਐੱਲ ਵਿੱਚ ਸਨ ਤਾਇਨਾਤ

ਲਲਿਤ ਪ੍ਰਸਾਦ ਨੇ ਆਪਣੀ ਪਟੀਸ਼ਨ ਵਿੱਚ ਦੱਸਿਆ ਸੀ ਕਿ ਉਹ ਸਾਲ 2008 ਵਿੱਚ ਡੀਆਰਡੀਓ ਵਿੱਚ ਵਿਗਿਆਨੀ ‘ਬੀ’ ਵਜੋਂ ਭਰਤੀ ਹੋਏ ਸਨ ਅਤੇ ਕਰੀਬ 17 ਸਾਲਾਂ ਤੋਂ ਚੰਡੀਗੜ੍ਹ ਵਿੱਚ ਸੇਵਾ ਨਿਭਾ ਰਹੇ ਹਨ। ਟੀਬੀਆਰਐਲ ਵਿੱਚ ਉਨ੍ਹਾਂ ਨੇ ਵਿਸਫੋਟਕ ਵਾਰਹੈੱਡਾਂ ਦੇ ਡਿਜ਼ਾਈਨ, ਵਿਕਾਸ, ਅਸੈਂਬਲੀ, ਟੈਸਟਿੰਗ ਅਤੇ ਮੁਲਾਂਕਣ ਨਾਲ ਸਬੰਧਤ ਕੰਮ ਵਿੱਚ ਵਿਸ਼ੇਸ਼ ਮੁਹਾਰਤ ਹਾਸਲ ਕੀਤੀ।

ਅਕਤੂਬਰ 2017 ਤੋਂ ਉਹ ਟੀਬੀਆਰਐਲ ਦੇ ਪਲਾਨਿੰਗ ਐਂਡ ਕੋਆਰਡੀਨੇਸ਼ਨ ਡਿਵੀਜ਼ਨ ਵਿੱਚ ਕੰਮ ਕਰ ਰਹੇ ਸਨ ਅਤੇ ਕੌਮੀ ਤੇ ਰਣਨੀਤਕ ਮਹੱਤਵ ਵਾਲੇ ਪ੍ਰੋਜੈਕਟਾਂ ਨਾਲ ਜੁੜੇ ਹੋਏ ਸਨ। ਉਨ੍ਹਾਂ ਦਾ ਤਰਕ ਸੀ ਕਿ ਟੀਬੀਆਰਐਲ ਅਤੇ ਆਰਸੀਆਈ ਦੇ ਕਾਰਜ ਖੇਤਰ ਵੱਖ-ਵੱਖ ਹਨ।

ਉਨ੍ਹਾਂ ਅਨੁਸਾਰ ਟੀਬੀਆਰਐਲ ਮੁੱਖ ਤੌਰ ’ਤੇ ਟਰਮੀਨਲ ਬੈਲਿਸਟਿਕਸ, ਵਿਸਫੋਟਕ ਸਮੱਗਰੀ, ਵਾਰਹੈੱਡ ਡਿਜ਼ਾਈਨ ਅਤੇ ਟੈਸਟਿੰਗ ਨਾਲ ਸਬੰਧਤ ਕੰਮ ਕਰਦੀ ਹੈ, ਜਦਕਿ ਆਰਸੀਆਈ ਮਿਜ਼ਾਈਲ ਪ੍ਰਣਾਲੀਆਂ, ਗਾਈਡਿਡ ਹਥਿਆਰਾਂ, ਐਵੀਓਨਿਕਸ ਅਤੇ ਨੇਵੀਗੇਸ਼ਨ ਆਦਿ ਦੇ ਖੇਤਰ ਵਿੱਚ ਕੰਮ ਕਰਦਾ ਹੈ। ਇਸ ਲਈ ਉਨ੍ਹਾਂ ਨੇ ਦਲੀਲ ਦਿੱਤੀ ਸੀ ਕਿ ਉਨ੍ਹਾਂ ਦੀ ਵਿਸ਼ੇਸ਼ ਮੁਹਾਰਤ ਦੇ ਮੱਦੇਨਜ਼ਰ ਹੈਦਰਾਬਾਦ ਤਬਾਦਲਾ ਉਚਿਤ ਨਹੀਂ ਹੈ।

ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਪਰਿਵਾਰਕ ਕਾਰਨਾਂ ਦਾ ਵੀ ਹਵਾਲਾ ਦਿੱਤਾ ਸੀ। ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਦੀ ਪਤਨੀ ਹਰਿਆਣਾ ਸਰਕਾਰ ਵਿੱਚ ਨੌਕਰੀ ਕਰਦੀ ਹੈ ਅਤੇ ਉਨ੍ਹਾਂ ਦੇ ਤਬਾਦਲੇ ਕਾਰਨ ਬੱਚਿਆਂ ਦੀ ਪੜ੍ਹਾਈ ਵੀ ਪ੍ਰਭਾਵਿਤ ਹੋਵੇਗੀ।

ਡੀਆਰਡੀਓ ਦੇ 21 ਵਿਗਿਆਨੀਆਂ ਦੇ ਹੋਏ ਤਬਾਦਲੇ

ਦੂਜੇ ਪਾਸੇ, ਡੀਆਰਡੀਓ ਨੇ ਕੈਟ ਨੂੰ ਦੱਸਿਆ ਕਿ ਇਹ ਤਬਾਦਲੇ ਮਿਜ਼ਾਈਲ ਐਂਡ ਸਟ੍ਰੈਟੇਜਿਕ ਸਿਸਟਮਜ਼ ਕਲੱਸਟਰ ਵਿੱਚ ਵਿਗਿਆਨੀਆਂ ਦੀ ਲੋੜ ਅਤੇ ਉਪਲਬਧ ਮਨੁੱਖੀ ਸਰੋਤਾਂ ਦੀ ਬਿਹਤਰ ਵਰਤੋਂ ਨੂੰ ਧਿਆਨ ਵਿੱਚ ਰੱਖ ਕੇ ਕੀਤੇ ਗਏ ਸਨ। ਮਈ 2025 ਵਿੱਚ ਕਲੱਸਟਰ ਨਾਲ ਸਬੰਧਤ ਪ੍ਰਯੋਗਸ਼ਾਲਾਵਾਂ ਦੇ ਕੰਮਕਾਜ ਅਤੇ ਪ੍ਰਦਰਸ਼ਨ ਦੀ ਸਮੀਖਿਆ ਕੀਤੀ ਗਈ ਸੀ। ਇਸ ਤੋਂ ਬਾਅਦ ਸਬੰਧਤ ਅਧਿਕਾਰੀਆਂ ਵਿਚਾਲੇ ਵਿਚਾਰ-ਵਟਾਂਦਰਾ ਹੋਇਆ ਅਤੇ 21 ਵਿਗਿਆਨੀਆਂ ਦੇ ਤਬਾਦਲੇ ਦਾ ਪ੍ਰਸਤਾਵ ਤਿਆਰ ਕੀਤਾ ਗਿਆ। ਇਸ ਪ੍ਰਸਤਾਵ ਨੂੰ ਰੱਖਿਆ ਖੋਜ ਅਤੇ ਵਿਕਾਸ ਵਿਭਾਗ ਦੇ ਸਕੱਤਰ ਅਤੇ ਡੀਆਰਡੀਓ ਦੇ ਚੇਅਰਮੈਨ ਵੱਲੋਂ 5 ਦਸੰਬਰ 2025 ਨੂੰ ਮਨਜ਼ੂਰੀ ਦਿੱਤੀ ਗਈ ਸੀ।

ਡੀਆਰਡੀਓ ਨੇ ਇਹ ਵੀ ਕਿਹਾ ਕਿ ਟੀਬੀਆਰਐਲ ਅਤੇ ਆਰਸੀਆਈ ਦੋਵੇਂ ਇੱਕੋ ਕਲੱਸਟਰ ਦਾ ਹਿੱਸਾ ਹਨ ਅਤੇ ਕਈ ਤਕਨੀਕੀ ਖੇਤਰਾਂ ਵਿੱਚ ਆਪਸੀ ਸਹਿਯੋਗ ਨਾਲ ਕੰਮ ਕਰਦੇ ਹਨ। ਅਜਿਹੇ ਵਿੱਚ ਆਰਸੀਆਈ ਵਿੱਚ ਵਿਗਿਆਨੀਆਂ ਦੀ ਲੋੜ ਦੇ ਮੱਦੇਨਜ਼ਰ ਲਲਿਤ ਪ੍ਰਸਾਦ ਦਾ ਤਬਾਦਲਾ ਕੀਤਾ ਗਿਆ ਸੀ। ਕੈਟ ਨੇ ਡੀਆਰਡੀਓ ਦੀ ਇਸ ਦਲੀਲ ਨੂੰ ਸਵੀਕਾਰ ਕਰਦਿਆਂ ਵਿਗਿਆਨੀ ਨੂੰ ਤਬਾਦਲੇ ਦੇ ਮਾਮਲੇ ਵਿੱਚ ਕੋਈ ਰਾਹਤ ਦੇਣ ਤੋਂ ਇਨਕਾਰ ਕਰ ਦਿੱਤਾ।