ਧੀ ਦੇ ਐੱਮਬੀਬੀਐੱਸ 'ਚ ਦਾਖ਼ਲੇ ਲਈ ਰਾਜਜੀਤ ਨੇ ਬਣਵਾਇਆ ਸੀ ਆਪਣਾ ਹੀ ਮੌਤ ਦਾ ਸਰਟੀਫਿਕੇਟ

ਰੋਹਿਤ ਕੁਮਾਰ, ਜਾਗਰਣ, ਚੰਡੀਗੜ੍ਹ : ਨਸ਼ਿਆਂ ਦੇ ਮਾਮਲੇ ਵਿੱਚ ਪੰਜਾਬ ਸਰਕਾਰ ਵੱਲੋਂ ਬਰਖ਼ਾਸਤ ਕੀਤੇ ਗਏ ਪੀਪੀਐੱਸ ਅਧਿਕਾਰੀ ਰਾਜਜੀਤ ਸਿੰਘ ਹੁੰਦਲ ਦਾ ਵਿਵਾਦਾਂ ਨਾਲ ਲੰਬੇ ਸਮੇਂ ਤੋਂ ਨਾਤਾ ਰਿਹਾ ਹੈ। ਰਾਜਜੀਤ ਨੇ ਤਾਂ ਆਪਣਾ ਡੈਥ ਸਰਟੀਫਿਕੇਟ (ਮੌਤ ਦਾ ਸਰਟੀਫਿਕੇਟ) ਵੀ ਬਣਵਾ ਲਿਆ ਸੀ। ਰਾਜਜੀਤ ਆਪਣੀ ਪਹੁੰਚ ਦੇ ਦਮ ’ਤੇ ਹਮੇਸ਼ਾ ਮਹੱਤਵਪੂਰਨ ਅਹੁਦਿਆਂ ’ਤੇ ਤਾਇਨਾਤ ਰਿਹਾ ਅਤੇ ਬਰਖ਼ਾਸਤਗੀ ਤੋਂ ਪਹਿਲਾਂ ਤੱਕ ਐੱਨਆਰਆਈ ਵਿੰਗ ਦੇ ਏਆਈਜੀ ਹੈੱਡਕੁਆਰਟਰ ਦੇ ਅਹੁਦੇ ’ਤੇ ਤਾਇਨਾਤ ਸੀ।

ਸਿਆਸੀ ਪਹੁੰਚ ਕਾਰਨ ਰਾਜਜੀਤ ’ਤੇ ਕਦੇ ਕੋਈ ਕਾਰਵਾਈ ਨਹੀਂ ਹੋਈ, ਪਰ ਐੱਸਆਈਟੀ ਦੀ ਰਿਪੋਰਟ ਖੁੱਲ੍ਹਣ ਤੋਂ ਬਾਅਦ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਉਸ ਨੂੰ ਬਰਖ਼ਾਸਤ ਕਰ ਦਿੱਤਾ ਸੀ। ਰਾਜਜੀਤ ਸਿੰਘ ਸਭ ਤੋਂ ਪਹਿਲਾਂ ਸਾਲ 2013 ਵਿੱਚ ਵਿਵਾਦਾਂ ਵਿੱਚ ਆਇਆ ਸੀ। ਉਸ ਸਮੇਂ ਉਸ ਨੇ ਆਪਣੀ ਧੀ ਦਾ ਮੈਡੀਕਲ ਕਾਲਜ ਵਿੱਚ ਐੱਮਬੀਬੀਐੱਸ ਵਿੱਚ ਦਾਖ਼ਲਾ ਕਰਵਾਉਣ ਲਈ ਆਪਣਾ ਹੀ ਮੌਤ ਦਾ ਸਰਟੀਫਿਕੇਟ ਬਣਵਾ ਲਿਆ ਸੀ।

ਰਾਜਜੀਤ ਨੇ ਖ਼ੁਦ ਨੂੰ ਅੱਤਵਾਦੀਆਂ ਵੱਲੋਂ ਮਾਰਿਆ ਗਿਆ ਦਿਖਾ ਕੇ ਮੌਤ ਦਾ ਸਰਟੀਫਿਕੇਟ ਬਣਵਾਇਆ ਸੀ। ਪਰ ਮਾਮਲਾ ਸਾਹਮਣੇ ਆ ਗਿਆ, ਜਿਸ ਕਾਰਨ ਉਸ ਦੀ ਧੀ ਨੂੰ ਸੀਟ ਨਹੀਂ ਮਿਲ ਸਕੀ। ਉਸ ਸਮੇਂ ਰਾਜਜੀਤ ਨੇ ਮੁਆਫ਼ੀ ਮੰਗ ਕੇ ਆਪਣੀ ਨੌਕਰੀ ਬਚਾ ਲਈ ਸੀ।

ਨਸ਼ਾ ਤਸਕਰ ਬਣਦੇ ਸਨ ਰਾਜਜੀਤ ਅਤੇ ਇੰਦਰਜੀਤ ਦੇ ਨਿਸ਼ਾਨੇ

ਬਰਖ਼ਾਸਤ ਏਆਈਜੀ ਰਾਜਜੀਤ ਸਿੰਘ ਹੁੰਦਲ ਅਤੇ ਬਰਖ਼ਾਸਤ ਇੰਸਪੈਕਟਰ ਇੰਦਰਜੀਤ ਸਿੰਘ ਦੇ ਕਥਿਤ ਤੌਰ ’ਤੇ ਨਸ਼ਾ ਤਸਕਰ ਮੁੱਖ ਨਿਸ਼ਾਨੇ ਬਣਦੇ ਸਨ। ਨਸ਼ਾ ਤਸਕਰੀ ਵਿੱਚ ਫੜੇ ਜਾਣ ਵਾਲੇ ਲੋਕਾਂ ਨੂੰ ਉਨ੍ਹਾਂ ਦੀ ਜਾਇਦਾਦ ਨਸ਼ੇ ਦੇ ਪੈਸੇ ਨਾਲ ਖਰੀਦੀ ਹੋਣ ਦਾ ਦੋਸ਼ ਲਗਾ ਕੇ ਕੇਸ ਵਿੱਚ ਨਾਮ ਸ਼ਾਮਲ ਕਰਨ ਦਾ ਡਰ ਦਿਖਾਇਆ ਜਾਂਦਾ ਸੀ। ਕੇਸ ਵਿੱਚੋਂ ਨਾਮ ਕਢਵਾਉਣ ਦਾ ਵਾਅਦਾ ਕਰਕੇ ਉਨ੍ਹਾਂ ਤੋਂ ਜਾਇਦਾਦ ਹੜੱਪ ਲਈ ਜਾਂਦੀ ਸੀ।

ਇਸ ਲਈ ਇੰਦਰਜੀਤ ਸਿੰਘ ਪਹਿਲਾਂ ਨਸ਼ਾ ਤਸਕਰਾਂ ਬਾਰੇ ਜਾਣਕਾਰੀ ਇਕੱਠੀ ਕਰਕੇ ਉਨ੍ਹਾਂ ਨੂੰ ਹਿਰਾਸਤ ਵਿੱਚ ਲੈਂਦਾ ਸੀ। ਇਸ ਤੋਂ ਬਾਅਦ ਉਹ ਤਸਕਰਾਂ ਨੂੰ ਇਹ ਕਹਿ ਕੇ ਡਰਾਉਂਦਾ ਸੀ ਕਿ ਉਨ੍ਹਾਂ ਦੀ ਜ਼ਮੀਨ ਅਤੇ ਹੋਰ ਜਾਇਦਾਦ ਨਸ਼ਿਆਂ ਦੇ ਪੈਸੇ ਨਾਲ ਬਣਾਈ ਗਈ ਹੈ ਅਤੇ ਕਥਿਤ ਤੌਰ ’ਤੇ ਉਨ੍ਹਾਂ ਦੀ ਜਾਇਦਾਦ ਹੜੱਪ ਲੈਂਦਾ ਸੀ। ਜਾਇਦਾਦ ਤਸਕਰਾਂ ਦੇ ਰਿਸ਼ਤੇਦਾਰਾਂ ਦੇ ਨਾਂ ’ਤੇ ਤਬਦੀਲ ਕਰਵਾ ਕੇ ਬਾਅਦ ਵਿੱਚ ਵੇਚ ਦਿੱਤੀ ਜਾਂਦੀ ਸੀ। ਇਸ ਕੰਮ ਵਿੱਚ ਉਹ ਇਕੱਲਾ ਸ਼ਾਮਲ ਨਹੀਂ ਸੀ।

ਜੂਨ 2017 ਵਿੱਚ ਤਤਕਾਲੀ ਏਡੀਜੀਪੀ ਹਰਪ੍ਰੀਤ ਸਿੱਧੂ ਦੀ ਅਗਵਾਈ ਹੇਠ ਟੀਮ ਨੇ ਕਪੂਰਥਲਾ ਦੇ ਸੀਆਈਏ ਇੰਚਾਰਜ ਇੰਸਪੈਕਟਰ ਇੰਦਰਜੀਤ ਸਿੰਘ ਨੂੰ ਚਾਰ ਕਿਲੋ ਹੈਰੋਇਨ ਸਮੇਤ ਗ੍ਰਿਫ਼ਤਾਰ ਕੀਤਾ ਸੀ। ਉਸ ਦੇ ਘਰ ਤੋਂ ਪੁਲਿਸ ਨੂੰ ਇੱਕ ਏਕੇ-47, ਇੱਕ ਇਟਾਲੀਅਨ ਪਿਸਤੌਲ ਅਤੇ 16 ਲੱਖ ਰੁਪਏ ਮੁੱਲ ਦੀ ਬ੍ਰਿਟਿਸ਼ ਕਰੰਸੀ ਵੀ ਮਿਲੀ ਸੀ। ਮੁਲਜ਼ਮ ਕੋਲ ਕਰੋੜਾਂ ਰੁਪਏ ਦੀ ਜਾਇਦਾਦ ਹੋਣ ਦੀ ਗੱਲ ਵੀ ਜਾਂਚ ਦੌਰਾਨ ਸਾਹਮਣੇ ਆਈ ਸੀ। ਇਸ ਤੋਂ ਇਲਾਵਾ ਪੁੱਛਗਿੱਛ ਦੌਰਾਨ ਉਸ ਨੇ ਆਪਣੇ ਕਥਿਤ ਆਕਾ ਰਾਜਜੀਤ ਸਿੰਘ ਦਾ ਨਾਮ ਵੀ ਉਜਾਗਰ ਕੀਤਾ ਸੀ।

ਜਾਂਚ ਵਿੱਚ ਪਤਾ ਲੱਗਾ ਕਿ ਸਾਲ 2012 ਤੋਂ 2017 ਤੱਕ ਜਿਨ੍ਹਾਂ-ਜਿਨ੍ਹਾਂ ਜ਼ਿਲ੍ਹਿਆਂ ਵਿੱਚ ਰਾਜਜੀਤ ਸਿੰਘ ਹੁੰਦਲ ਦੀ ਤਾਇਨਾਤੀ ਹੋਈ, ਉਨ੍ਹਾਂ ਹੀ ਜ਼ਿਲ੍ਹਿਆਂ ਵਿੱਚ ਇੰਦਰਜੀਤ ਸਿੰਘ ਦੀ ਤਾਇਨਾਤੀ ਵੀ ਹੋਈ। ਰਾਜਜੀਤ ਬਕਾਇਦਾ ਸਿਫ਼ਾਰਸ਼ੀ ਪੱਤਰ ਲਿਖ ਕੇ ਇੰਦਰਜੀਤ ਦੀ ਤਾਇਨਾਤੀ ਆਪਣੇ ਨਾਲ ਕਰਵਾਉਂਦਾ ਸੀ। ਦੋਵੇਂ ਗੁਰਦਾਸਪੁਰ, ਤਰਨਤਾਰਨ, ਮੋਗਾ ਅਤੇ ਜਲੰਧਰ ਵਿੱਚ ਇਕੱਠੇ ਤਾਇਨਾਤ ਰਹੇ।

ਪੀਪੀਐੱਸ ਅਧਿਕਾਰੀ ਨੇ ਇੰਦਰਜੀਤ ਨੂੰ ਤਰਨਤਾਰਨ ਵਿੱਚ ਸੀਆਈਏ ਇੰਚਾਰਜ ਲਗਾ ਦਿੱਤਾ ਸੀ, ਜਦਕਿ ਇੰਦਰਜੀਤ ਸਿੰਘ ਨੂੰ ਆਊਟ ਆਫ਼ ਪ੍ਰਮੋਸ਼ਨ ਰੈਂਕ (ਓਆਰਪੀ) ਮਿਲਿਆ ਹੋਇਆ ਸੀ। ਜਿਸ ਸਮੇਂ ਇੰਦਰਜੀਤ ਦੀ ਤਾਇਨਾਤੀ ਕੀਤੀ ਗਈ, ਉਸ ਵੇਲੇ ਤਰਨਤਾਰਨ ਦੇ ਕਰੀਬ 40 ਇੰਸਪੈਕਟਰ ਅਤੇ ਸਬ-ਇੰਸਪੈਕਟਰ ਇੰਦਰਜੀਤ ਸਿੰਘ ਤੋਂ ਸੀਨੀਅਰ ਸਨ।

ਦੋ ਸਾਲ ਪਹਿਲਾਂ ਜਾਰੀ ਹੋਇਆ ਸੀ ਰਾਜਜੀਤ ਦਾ ਐੱਲਓਸੀ

ਪੁਲਿਸ ਨੇ ਦੋ ਸਾਲ ਪਹਿਲਾਂ ਰਾਜਜੀਤ ਸਿੰਘ ਦਾ ਲੁੱਕ ਆਊਟ ਸਰਕੂਲਰ (ਐੱਲਓਸੀ) ਵੀ ਜਾਰੀ ਕੀਤਾ ਸੀ। ਇਸ ਤੋਂ ਬਾਅਦ ਰਾਜਜੀਤ ਨੇ ਆਪਣਾ ਇੱਕ ਵੀਡੀਓ ਜਾਰੀ ਕਰਕੇ ਕਿਹਾ ਸੀ ਕਿ ਉਹ ਕਿਤੇ ਭੱਜ ਨਹੀਂ ਰਿਹਾ। ਪੁਲਿਸ ਸੂਤਰਾਂ ਅਨੁਸਾਰ, ਰਾਜਜੀਤ ਨੇ ਆਪਣਾ ਪਾਸਪੋਰਟ ਤਤਕਾਲੀ ਆਈਜੀ ਜਸਕਰਨ ਸਿੰਘ ਨੂੰ ਸੌਂਪ ਦਿੱਤਾ ਸੀ।

ਸਹੋਤਾ ਦੇ ਡੀਜੀਪੀ ਬਣਨ ’ਤੇ ਛੁੱਟੀ ’ਤੇ ਚਲਾ ਗਿਆ ਸੀ ਰਾਜਜੀਤ

ਸਾਲ 2021 ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਮੁੱਖ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫ਼ਾ ਦੇਣ ਤੋਂ ਬਾਅਦ ਕਾਂਗਰਸ ਨੇ ਚਰਨਜੀਤ ਸਿੰਘ ਚੰਨੀ ਨੂੰ ਪੰਜਾਬ ਦਾ ਨਵਾਂ ਮੁੱਖ ਮੰਤਰੀ ਬਣਾਇਆ ਸੀ। ਪੁਲਿਸ ਸੂਤਰਾਂ ਅਨੁਸਾਰ, ਜਦੋਂ ਚੰਨੀ ਸਰਕਾਰ ਦੇ ਸਮੇਂ ਇਕਬਾਲ ਪ੍ਰੀਤ ਸਿੰਘ ਸਹੋਤਾ ਨੂੰ ਪੰਜਾਬ ਦਾ ਕਾਰਜਕਾਰੀ ਡੀਜੀਪੀ ਨਿਯੁਕਤ ਕੀਤਾ ਗਿਆ ਤਾਂ ਉਨ੍ਹਾਂ ਦੇ ਅਹੁਦਾ ਸੰਭਾਲਣ ਤੋਂ ਇੱਕ ਦਿਨ ਪਹਿਲਾਂ, 24 ਸਤੰਬਰ 2021 ਨੂੰ ਰਾਜਜੀਤ ਸਿੰਘ ਛੁੱਟੀ ’ਤੇ ਚਲਾ ਗਿਆ ਸੀ।

ਸੂਤਰਾਂ ਦਾ ਕਹਿਣਾ ਹੈ ਕਿ ਉਸ ਨੂੰ ਡਰ ਸੀ ਕਿ ਜੇਕਰ ਨਸ਼ਿਆਂ ਦੇ ਮਾਮਲੇ ਦੀ ਗੱਲ ਉੱਠੀ ਤਾਂ ਉਸ ’ਤੇ ਸ਼ਿਕੰਜਾ ਕੱਸਿਆ ਜਾ ਸਕਦਾ ਹੈ।