Punjab Politics : ਪੰਜਾਬ ਯੂਥ ਕਾਂਗਰਸ ਲਈ ਪ੍ਰਧਾਨ ਦੀ ਚੋਣ ਜਿੱਤੇ ਸ਼ੁਭਮ ਦੇਵਗਨ, ਰਸਮੀ ਮਨਜੂਰੀ ਤੋਂ ਬਾਅਦ ਸੰਭਾਲਣਗੇ ਅਹੁਦਾ

ਸਟੇਟ ਬਿਊਰੋ, ਚੰਡੀਗੜ੍ਹ : ਪੰਜਾਬ ਯੂਥ ਕਾਂਗਰਸ ਦੇ ਸੰਗਠਨਾਤਮਕ ਚੋਣਾਂ 'ਚ ਸੂਬਾ ਪ੍ਰਧਾਨ ਦੇ ਅਹੁਦੇ ਲਈ ਡੈਲੀਗੇਟ ਚੋਣਾਂ 'ਚ ਸ਼ੁਭਮ ਦੇਵਗਨ ਨੇ ਸਭ ਤੋਂ ਵੱਧ ਵੋਟਾਂ ਹਾਸਲ ਕੀਤੀਆਂ। ਉਨ੍ਹਾਂ ਨੇ 1,60,154 ਵੋਟਾਂ ਪ੍ਰਾਪਤ ਕਰ ਕੇ ਆਪਣੇ ਨੇੜਲੇ ਵਿਰੋਧੀ ਗਗਨਦੀਪ ਸਿੰਘ ਨੂੰ ਸਖ਼ਤ ਮੁਕਾਬਲੇ 'ਚ ਪਿੱਛੇ ਛੱਡ ਦਿੱਤਾ।

ਸੋਮਵਾਰ ਨੂੰ ਐਲਾਨੇ ਗਏ ਚੋਣ ਨਤੀਜਿਆਂ ਅਨੁਸਾਰ, ਗਗਨਦੀਪ ਸਿੰਘ ਨੂੰ 1,56,271 ਵੋਟਾਂ ਮਿਲੀਆਂ, ਜਦੋਂ ਕਿ ਕਰਨਵੀਰ ਸਿੰਘ ਢਿੱਲੋਂ 94,181 ਵੋਟਾਂ ਨਾਲ ਤੀਜੇ ਸਥਾਨ 'ਤੇ ਰਹੇ। ਚੋਣ ਵਿੱਚ ਕੁੱਲ 4,68,614 ਵੋਟਾਂ ਪਈਆਂ। ਜਾਣਕਾਰੀ ਅਨੁਸਾਰ, ਪਾਰਟੀ ਦੀ ਰਸਮੀ ਪ੍ਰਵਾਨਗੀ ਅਤੇ ਐਲਾਨ ਤੋਂ ਬਾਅਦ ਸ਼ੁਭਮ ਦੇਵਗਨ ਪੰਜਾਬ ਯੂਥ ਕਾਂਗਰਸ ਦੇ ਪ੍ਰਧਾਨ ਦਾ ਅਹੁਦਾ ਸੰਭਾਲਣਗੇ। ਪ੍ਰਧਾਨ ਦੇ ਅਹੁਦੇ ਲਈ ਚੋਟੀ ਦੇ ਤਿੰਨ ਉਮੀਦਵਾਰਾਂ ਦਾ ਕਾਂਗਰਸ ਹਾਈ ਕਮਾਂਡ ਵੱਲੋਂ ਇੰਟਰਵਿਊ ਲਿਆ ਜਾਂਦਾ ਹੈ, ਜਿਸ ਤੋਂ ਬਾਅਦ ਅਹੁਦੇ ਬਾਰੇ ਫੈਸਲਾ ਲਿਆ ਜਾਂਦਾ ਹੈ।

ਉਹ ਅਗਸਤ 2023 ਵਿੱਚ ਪ੍ਰਧਾਨ ਬਣੇ ਮੋਹਿਤ ਮਹਿੰਦਰਾ ਦੀ ਜਗ੍ਹਾ ਲੈ ਸਕਦੇ ਹਨ। ਮਹਿੰਦਰਾ ਨੇ ਇਸ ਤੋਂ ਪਹਿਲਾਂ ਬਰਿੰਦਰ ਸਿੰਘ ਢਿੱਲੋਂ ਦੀ ਜਗ੍ਹਾ ਲਈ ਸੀ। ਸੂਬਾ ਪ੍ਰਧਾਨ ਦੇ ਅਹੁਦੇ ਤੋਂ ਇਲਾਵਾ, ਵੱਖ-ਵੱਖ ਸੰਗਠਨਾਤਮਕ ਅਹੁਦਿਆਂ ਲਈ ਚੋਣ ਨਤੀਜੇ ਵੀ ਐਲਾਨੇ ਗਏ ਸਨ।

ਸੂਬਾ ਜਨਰਲ ਸਕੱਤਰ (EC) ਦੇ ਅਹੁਦੇ ਲਈ ਗੁਰਜੋਤ ਸਿੰਘ ਨੂੰ ਸਭ ਤੋਂ ਵੱਧ 39,568 ਵੋਟਾਂ ਮਿਲੀਆਂ। ਉੱਥੇ ਸੂਬਾ ਸਕੱਤਰ (EC) ਦੇ ਅਹੁਦੇ ਲਈ ਰਵਿੰਦਰ ਸਿੰਘ 2,744 ਵੋਟਾਂ ਨਾਲ ਸੂਚੀ ਵਿੱਚ ਸਭ ਤੋਂ ਉੱਪਰ ਰਹੇ।

ਸ਼੍ਰੇਣੀ-ਵਾਰ ਉਪ-ਪ੍ਰਧਾਨ ਚੋਣਾਂ ਵਿੱਚ, ਪਰਮਵੀਰ ਸਿੰਘ ਢੱਡੇਕਟਵਾਲ ਨੂੰ ਸਭ ਤੋਂ ਵੱਧ ਸਮਰਥਨ ਮਿਲਿਆ, ਉਪ-ਪ੍ਰਧਾਨ (OBC) ਦੇ ਅਹੁਦੇ ਲਈ 2,953 ਵੋਟਾਂ ਪ੍ਰਾਪਤ ਹੋਈਆਂ। ਨਵਤੇਜ ਸਿੰਘ ਅਮਰਕੋਟ ਨੇ 2,318 ਵੋਟਾਂ ਨਾਲ ਉਪ-ਪ੍ਰਧਾਨ (SC/ST) ਸ਼੍ਰੇਣੀ ਜਿੱਤੀ।

ਉਪ-ਪ੍ਰਧਾਨ (ਘੱਟ ਗਿਣਤੀ) ਦੇ ਅਹੁਦੇ ਲਈ ਅਰਸ਼ਦ ਖਾਨ ਰਾਣਾ ਨੇ ਸਭ ਤੋਂ ਵੱਧ 1,102 ਵੋਟਾਂ ਪ੍ਰਾਪਤ ਕੀਤੀਆਂ, ਜਦੋਂ ਕਿ ਸ਼ਿਵਾਨੀ ਸ਼ਰਮਾ ਨੇ ਉਪ-ਪ੍ਰਧਾਨ (ਓਪਨ ਮਹਿਲਾ) ਸ਼੍ਰੇਣੀ ਵਿੱਚ 2,125 ਵੋਟਾਂ ਪ੍ਰਾਪਤ ਕਰ ਕੇ ਪਹਿਲਾ ਸਥਾਨ ਪ੍ਰਾਪਤ ਕੀਤਾ।

ਹੋਰ ਨਤੀਜਿਆਂ ਵਿੱਚ, ਰੁਪਿੰਦਰ ਸਿੰਘ ਭੁੱਲਰ 185 ਵੋਟਾਂ ਪ੍ਰਾਪਤ ਕਰਕੇ ਉਪ-ਪ੍ਰਧਾਨ (ਦਿਵਯਾਂਗ) ਦੇ ਅਹੁਦੇ 'ਤੇ ਅੱਗੇ ਰਹੇ, ਜਦੋਂ ਕਿ ਮਨਪ੍ਰੀਤ ਕੌਰ 104 ਵੋਟਾਂ ਨਾਲ ਉਪ-ਪ੍ਰਧਾਨ (ਓਬੀਸੀ ਮਹਿਲਾ) ਸ਼੍ਰੇਣੀ ਵਿੱਚ ਸਭ ਤੋਂ ਵੱਧ ਰਹੇ।