ਪੰਜਾਬ ਬਣਿਆ ਹੈਰੋਇਨ ਦਾ ਟਰਾਂਜ਼ਿਟ ਕਾਰੀਡੋਰ, ਡਰੋਨਾਂ ਰਾਹੀਂ ਬਰਾਮਦ 460 ਕਿਲੋ ਨਸ਼ੀਲੇ ਪਦਾਰਥਾਂ 'ਚੋਂ 448 ਕਿਲੋ ਹੈਰੋਇਨ; ਪੰਜਾਬ ਰਾਹੀਂ ਕਈ ਸੂਬਿਆਂ ਤੱਕ ਪਹੁੰਚ ਰਹੀ ਖੇਪ

ਰੋਹਿਤ ਕੁਮਾਰ, ਚੰਡੀਗੜ੍ਹ : ਪਾਕਿਸਤਾਨ ਤੋਂ ਪੰਜਾਬ ਸਰਹੱਦ ਰਾਹੀਂ ਆਉਣ ਵਾਲੀ ਹੈਰੋਇਨ ਹੁਣ ਸਿਰਫ਼ ਸਰਹੱਦੀ ਜ਼ਿਲ੍ਹਿਆਂ ਤੱਕ ਸੀਮਿਤ ਨਹੀਂ ਰਹਿੰਦੀ, ਸਗੋਂ ਇੱਥੋਂ ਸੰਗਠਿਤ ਤਸਕਰੀ ਨੈੱਟਵਰਕ ਰਾਹੀਂ ਦੇਸ਼ ਦੇ ਕਈ ਸੂਬਿਆਂ ਤੱਕ ਪਹੁੰਚਾਈ ਜਾ ਰਹੀ ਹੈ। ਰਾਸ਼ਟਰੀ ਜਾਂਚ ਏਜੰਸੀ (ਐਨਆਈਏ), ਨਾਰਕੋਟਿਕਸ ਕੰਟਰੋਲ ਬਿਊਰੋ (ਐਨਸੀਬੀ), ਪੰਜਾਬ ਪੁਲਿਸ ਅਤੇ ਦਿੱਲੀ ਪੁਲਿਸ ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਪੰਜਾਬ ਵਿੱਚ ਪਹੁੰਚਣ ਤੋਂ ਬਾਅਦ ਹੈਰੋਇਨ ਦੀ ਖੇਪ ਦਿੱਲੀ-ਐਨਸੀਆਰ, ਹਰਿਆਣਾ, ਰਾਜਸਥਾਨ, ਉੱਤਰ ਪ੍ਰਦੇਸ਼, ਜੰਮੂ-ਕਸ਼ਮੀਰ, ਹਿਮਾਚਲ ਪ੍ਰਦੇਸ਼ ਅਤੇ ਮਹਾਰਾਸ਼ਟਰ ਤੱਕ ਭੇਜੀ ਜਾਂਦੀ ਹੈ।

ਕੇਂਦਰੀ ਗ੍ਰਹਿ ਰਾਜ ਮੰਤਰੀ ਨਿਤਿਆਨੰਦ ਰਾਏ ਨੇ ਰਾਜ ਸਭਾ ਵਿੱਚ ਲਿਖਤੀ ਜਵਾਬ ਦਿੰਦਿਆਂ ਦੱਸਿਆ ਕਿ 2025 ਦੌਰਾਨ ਡਰੋਨਾਂ ਰਾਹੀਂ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੇ 305 ਮਾਮਲੇ ਸਾਹਮਣੇ ਆਏ, ਜਿਨ੍ਹਾਂ ਵਿੱਚੋਂ 298 ਮਾਮਲੇ ਸਿਰਫ਼ ਪੰਜਾਬ ਸਰਹੱਦ ਨਾਲ ਸਬੰਧਿਤ ਸਨ। ਇਨ੍ਹਾਂ ਮਾਮਲਿਆਂ ਵਿੱਚ ਲਗਭਗ 460 ਕਿਲੋ ਨਸ਼ੀਲੇ ਪਦਾਰਥ ਬਰਾਮਦ ਹੋਏ, ਜਿਨ੍ਹਾਂ ਵਿੱਚ 448 ਕਿਲੋ ਹੈਰੋਇਨ, ਨੌਂ ਕਿਲੋ ਮੈਥਾਮਫੈਟਾਮਾਈਨ ਅਤੇ ਤਿੰਨ ਕਿਲੋ ਅਫੀਮ ਸ਼ਾਮਲ ਸੀ। ਡਰੋਨਾਂ ਰਾਹੀਂ ਬਰਾਮਦ ਹੋਏ ਨਸ਼ੀਲੇ ਪਦਾਰਥਾਂ ਵਿੱਚ ਕਰੀਬ 97 ਫੀਸਦੀ ਹਿੱਸਾ ਹੈਰੋਇਨ ਦਾ ਸੀ।

ਜਾਂਚ ਏਜੰਸੀਆਂ ਅਨੁਸਾਰ ਪਾਕਿਸਤਾਨ ਤੋਂ ਡਰੋਨਾਂ ਰਾਹੀਂ ਅੰਮ੍ਰਿਤਸਰ, ਤਰਨਤਾਰਨ, ਫਿਰੋਜ਼ਪੁਰ, ਫਾਜ਼ਿਲਕਾ ਅਤੇ ਗੁਰਦਾਸਪੁਰ ਵਿੱਚ ਸੁੱਟੀ ਗਈ ਖੇਪ ਨੂੰ ਸਥਾਨਕ ਤਸਕਰ ਪਹਿਲਾਂ ਸੁਰੱਖਿਅਤ ਥਾਵਾਂ 'ਤੇ ਪਹੁੰਚਾਉਂਦੇ ਹਨ। ਇਸ ਤੋਂ ਬਾਅਦ ਕੌਮੀ ਰਾਜਮਾਰਗਾਂ ਰਾਹੀਂ ਇਸ ਨੂੰ ਹੋਰ ਸੂਬਿਆਂ ਵਿੱਚ ਸਰਗਰਮ ਗਿਰੋਹਾਂ ਤੱਕ ਭੇਜਿਆ ਜਾਂਦਾ ਹੈ। ਐਨਸੀਬੀ ਦੀ ਇੰਡੀਆ ਨਾਰਕੋਟਿਕਸ ਥਰੈਟ ਅਸੈਸਮੈਂਟ-2024, ਐਨਆਈਏ ਅਤੇ ਪੰਜਾਬ ਪੁਲਿਸ ਦੀਆਂ ਜਾਂਚਾਂ ਵਿੱਚ ਪੰਜਾਬ ਨੂੰ ਅੰਤਰਰਾਜੀ ਤਸਕਰੀ ਦਾ ਪ੍ਰਮੁੱਖ ਟਰਾਂਜ਼ਿਟ ਕਾਰੀਡੋਰ ਦੱਸਿਆ ਗਿਆ ਹੈ।

ਤਸਕਰ ਹੁਣ ਸੰਪਰਕ ਅਤੇ ਨੈੱਟਵਰਕ ਚਲਾਉਣ ਲਈ ਗੁਪਤ ਸੁਨੇਹਾ ਪਲੇਟਫਾਰਮਾਂ, ਵੀਪੀਐਨ ਅਤੇ ਡਿਜ਼ੀਟਲ ਕਰੰਸੀ ਦੀ ਵਰਤੋਂ ਕਰ ਰਹੇ ਹਨ। ਕੁਝ ਮਾਮਲਿਆਂ ਵਿੱਚ ਜੇਲ੍ਹਾਂ ਵਿੱਚ ਬੰਦ ਤਸਕਰ ਵੀ ਮੋਬਾਈਲ ਫੋਨਾਂ ਰਾਹੀਂ ਆਪਣੇ ਸਾਥੀਆਂ ਨਾਲ ਸੰਪਰਕ ਵਿੱਚ ਰਹਿ ਕੇ ਨੈੱਟਵਰਕ ਚਲਾਉਂਦੇ ਪਾਏ ਗਏ ਹਨ। ਇਸ ਕਾਰਨ ਜਾਂਚ ਏਜੰਸੀਆਂ ਹੁਣ ਸਰਹੱਦੀ ਨਿਗਰਾਨੀ ਦੇ ਨਾਲ-ਨਾਲ ਡਿਜ਼ੀਟਲ ਸਬੂਤਾਂ ਅਤੇ ਵਿੱਤੀ ਲੈਣ-ਦੇਣ ਦੀ ਵੀ ਡੂੰਘਾਈ ਨਾਲ ਜਾਂਚ ਕਰ ਰਹੀਆਂ ਹਨ।