Punjab Cabinet 'ਚ ਹੁਣ 4 ਡਾਕਟਰ, ਇਸ ਮੰਤਰੀ ਨੇ ਵੀ ਮੁਕੰਮਲ ਕੀਤੀ ਪੀਐੱਚਡੀ; ਸਿਆਸਤ 'ਚ ਵਧਿਆ ਉੱਚ ਸਿੱਖਿਆ ਦਾ ਪੱਧਰ
Punjab Cabinet 'ਚ ਡਾ. ਬਲਜੀਤ ਕੌਰ, ਡਾ. ਬਲਬੀਰ ਸਿੰਘ ਅਤੇ ਡਾ. ਰਵਜੋਤ ਸਿੰਘ ਪਹਿਲਾਂ ਤੋਂ ਹੀ ਡਾਕਟਰ ਹਨ। ਡਾ. ਬਲਜੀਤ ਕੌਰ ਨੇ ਐੱਮਬੀਬੀਐੱਸ ਅਤੇ ਐੱਮਐੱਸ (ਨੇਤਰ ਵਿਗਿਆਨ) ਦੀ ਡਿਗਰੀ ਹਾਸਲ ਕੀਤੀ ਹੈ। ਉਹ ਅੱਖਾਂ ਦੇ ਰੋਗਾਂ ਦੀ ਮਾਹਿਰ ਰਹੀ ਹਨ। ਡਾ. ਬਲਬੀਰ ਸਿੰਘ ਵੀ ਅੱਖਾਂ ਦੇ ਰੋਗਾਂ ਦੇ ਮਾਹਿਰ ਹਨ ਅਤੇ ਉਨ੍ਹਾਂ ਕੋਲ ਐੱਮਬੀਬੀਐੱਸ ਦੇ ਨਾਲ ਐੱਮਐੱਸ ਦੀ ਡਿਗਰੀ ਹੈ। ਉੱਥੇ ਹੀ ਡਾ. ਰਵਜੋਤ ਸਿੰਘ ਨੇ ਐੱਮਬੀਬੀਐੱਸ ਤੋਂ ਬਾਅਦ ਪੀਜੀਆਈ ਚੰਡੀਗੜ੍ਹ ਤੋਂ ਇੰਟਰਨਲ ਮੈਡੀਸਨ 'ਚ ਐੱਮਡੀ ਕੀਤੀ ਹੈ। ਹੁਣ ਹਰਭਜਨ ਸਿੰਘ ਈਟੀਓ ਦਾ ਨਾਂ ਵੀ ਇਸ ਸੂਚੀ 'ਚ ਸ਼ਾਮਲ ਹੋ ਗਿਆ ਹੈ।
Publish Date: Wed, 18 Nov 2026 12:43 PM (IST)
Updated Date: Wed, 18 Nov 2026 12:58 PM (IST)
ਰੋਹਿਤ ਕੁਮਾਰ, ਚੰਡੀਗੜ੍ਹ : ਪੰਜਾਬ ਦੇ ਲੋਕ ਨਿਰਮਾਣ ਮੰਤਰੀ ਹਰਭਜਨ ਸਿੰਘ ਈਟੀਓ ਦੀ ਪੀਐੱਚਡੀ ਪੂਰੀ ਹੋਣ ਦੇ ਨਾਲ ਹੀ ਭਗਵੰਤ ਮਾਨ ਮੰਤਰੀ ਮੰਡਲ 'ਚ ਡਾਕਟਰ ਦੀ ਉਪਾਧੀ ਵਾਲੇ ਮੰਤਰੀਆਂ ਦੀ ਗਿਣਤੀ ਚਾਰ ਹੋ ਗਈ ਹੈ। ਹੁਣ ਤਕ ਮੰਤਰੀ ਮੰਡਲ 'ਚ ਤਿੰਨ ਮੰਤਰੀ ਮੈਡੀਕਲ ਖੇਤਰ ਨਾਲ ਜੁੜੇ ਹੋਏ ਸਨ, ਜਦਕਿ ਹਰਭਜਨ ਸਿੰਘ ਨੇ ਸਿਆਸਤ ਅਤੇ ਪ੍ਰਸ਼ਾਸਨਿਕ ਜ਼ਿੰਮੇਵਾਰੀਆਂ ਦੇ ਨਾਲ ਆਪਣੀ ਅਕਾਦਮਿਕ ਯਾਤਰਾ ਜਾਰੀ ਰੱਖਦਿਆਂ ਪੀਐੱਚਡੀ ਦੀ ਡਿਗਰੀ ਹਾਸਲ ਕੀਤੀ ਹੈ।
ਖ਼ਾਸ ਗੱਲ ਇਹ ਹੈ ਕਿ ਪੰਜਾਬ ਦੀ ਸਿਆਸਤ 'ਚ ਵੀ ਕਈ ਅਜਿਹੇ ਆਗੂ ਹਨ ਜਿਨ੍ਹਾਂ ਨੇ ਚੋਣ ਰਾਜਨੀਤੀ ਦੇ ਨਾਲ ਉੱਚ ਸਿੱਖਿਆ ਦਾ ਸਫ਼ਰ ਜਾਰੀ ਰੱਖਿਆ ਅਤੇ ਡਾਕਟਰੇਟ ਦੀ ਉਪਾਧੀ ਹਾਸਲ ਕੀਤੀ।
ਮੰਤਰੀ ਮੰਡਲ 'ਚ ਤਿੰਨ ਮੈਡੀਕਲ ਡਾਕਟਰ
ਪੰਜਾਬ ਮੰਤਰੀ ਮੰਡਲ 'ਚ ਡਾ. ਬਲਜੀਤ ਕੌਰ, ਡਾ. ਬਲਬੀਰ ਸਿੰਘ ਅਤੇ ਡਾ. ਰਵਜੋਤ ਸਿੰਘ ਪਹਿਲਾਂ ਤੋਂ ਹੀ ਡਾਕਟਰ ਹਨ। ਡਾ. ਬਲਜੀਤ ਕੌਰ ਨੇ ਐੱਮਬੀਬੀਐੱਸ ਅਤੇ ਐੱਮਐੱਸ (ਨੇਤਰ ਵਿਗਿਆਨ) ਦੀ ਡਿਗਰੀ ਹਾਸਲ ਕੀਤੀ ਹੈ। ਉਹ ਅੱਖਾਂ ਦੇ ਰੋਗਾਂ ਦੀ ਮਾਹਿਰ ਰਹੀ ਹਨ। ਡਾ. ਬਲਬੀਰ ਸਿੰਘ ਵੀ ਅੱਖਾਂ ਦੇ ਰੋਗਾਂ ਦੇ ਮਾਹਿਰ ਹਨ ਅਤੇ ਉਨ੍ਹਾਂ ਕੋਲ ਐੱਮਬੀਬੀਐੱਸ ਦੇ ਨਾਲ ਐੱਮਐੱਸ ਦੀ ਡਿਗਰੀ ਹੈ। ਉੱਥੇ ਹੀ ਡਾ. ਰਵਜੋਤ ਸਿੰਘ ਨੇ ਐੱਮਬੀਬੀਐੱਸ ਤੋਂ ਬਾਅਦ ਪੀਜੀਆਈ ਚੰਡੀਗੜ੍ਹ ਤੋਂ ਇੰਟਰਨਲ ਮੈਡੀਸਨ 'ਚ ਐੱਮਡੀ ਕੀਤੀ ਹੈ।
ਹੁਣ ਹਰਭਜਨ ਸਿੰਘ ਈਟੀਓ ਦਾ ਨਾਂ ਵੀ ਇਸ ਸੂਚੀ 'ਚ ਸ਼ਾਮਲ ਹੋ ਗਿਆ ਹੈ। ਉਨ੍ਹਾਂ ਨੇ ਪੰਜਾਬ ਯੂਨੀਵਰਸਿਟੀ ਦੇ ਸੈਂਟਰ ਫਾਰ ਹਿਊਮਨ ਰਾਈਟਸ ਐਂਡ ਡਿਊਟੀਜ਼ ਤੋਂ ਪੀਐੱਚਡੀ ਪੂਰੀ ਕੀਤੀ ਹੈ। ਉਨ੍ਹਾਂ ਦੀ ਖੋਜ ਡਾ. ਬੀ.ਆਰ. ਅੰਬੇਡਕਰ ਅਤੇ ਪੰਜਾਬ 'ਚ ਦਲਿਤਾਂ ਦੇ ਮਨੁੱਖੀ ਅਧਿਕਾਰਾਂ 'ਤੇ ਕੇਂਦਰਿਤ ਰਹੀ। ਇਸ ਤਰ੍ਹਾਂ ਮੰਤਰੀ ਮੰਡਲ 'ਚ ਡਾਕਟਰ ਦੀ ਉਪਾਧੀ ਵਾਲੇ ਚਾਰ ਮੰਤਰੀ ਹੋ ਗਏ ਹਨ। ਹਾਲਾਂਕਿ, ਇਨ੍ਹਾਂ 'ਚੋਂ ਤਿੰਨ ਮੈਡੀਕਲ ਪੇਸ਼ੇ ਨਾਲ ਜੁੜੇ ਹਨ, ਜਦਕਿ ਹਰਭਜਨ ਸਿੰਘ ਨੇ ਪੀਐੱਚਡੀ ਦੇ ਆਧਾਰ 'ਤੇ ਡਾਕਟਰੇਟ ਦੀ ਉਪਾਧੀ ਹਾਸਲ ਕੀਤੀ ਹੈ।
ਸਾਬਕਾ ਮੁੱਖ ਮੰਤਰੀ ਚੰਨੀ ਨੇ ਵੀ ਪੂਰੀ ਕੀਤੀ ਪੀਐੱਚਡੀ
ਪੰਜਾਬ ਦੀ ਸਿਆਸਤ 'ਚ ਪੀਐੱਚਡੀ ਹਾਸਲ ਕਰਨ ਵਾਲੇ ਆਗੂਆਂ ਦੀ ਗੱਲ ਕਰੀਏ ਤਾਂ ਹਰਭਜਨ ਸਿੰਘ ਈਟੀਓ ਤੋਂ ਇਲਾਵਾ ਸਾਬਕਾ ਮੁੱਖ ਮੰਤਰੀ ਅਤੇ ਕਾਂਗਰਸ ਦੇ ਸੰਸਦ ਮੈਂਬਰ ਚਰਨਜੀਤ ਸਿੰਘ ਚੰਨੀ ਦਾ ਨਾਂ ਵੀ ਪ੍ਰਮੁੱਖ ਹੈ। ਚੰਨੀ ਨੇ ਸਾਲ 2023 'ਚ ਪੰਜਾਬ ਯੂਨੀਵਰਸਿਟੀ ਤੋਂ ਰਾਜਨੀਤੀ ਸ਼ਾਸਤਰ 'ਚ ਪੀਐੱਚਡੀ ਹਾਸਲ ਕੀਤੀ ਸੀ। ਉਨ੍ਹਾਂ ਦੀ ਖੋਜ ਭਾਰਤੀ ਰਾਸ਼ਟਰੀ ਕਾਂਗਰਸ ਦੇ ਕੇਂਦਰੀ ਸੰਗਠਨ ਅਤੇ ਲੋਕ ਸਭਾ ਚੋਣਾਂ ਦੀਆਂ ਰਣਨੀਤੀਆਂ 'ਤੇ ਆਧਾਰਿਤ ਸੀ।
ਉਨ੍ਹਾਂ ਨੇ ਸਾਲ 2017 'ਚ ਪੀਐੱਚਡੀ ਲਈ ਰਜਿਸਟ੍ਰੇਸ਼ਨ ਕਰਵਾਈ ਸੀ ਅਤੇ ਮੁੱਖ ਮੰਤਰੀ ਬਣਨ ਤੋਂ ਬਾਅਦ ਵੀ ਆਪਣੀ ਪੜ੍ਹਾਈ ਜਾਰੀ ਰੱਖੀ। ਇਸ ਤੋਂ ਇਲਾਵਾ ਆਮ ਆਦਮੀ ਪਾਰਟੀ ਦੇ ਮਾਲੇਰਕੋਟਲਾ ਤੋਂ ਵਿਧਾਇਕ ਮੁਹੰਮਦ ਜਮੀਲ ਉਰ ਰਹਿਮਾਨ ਵੀ ਪੀਐੱਚਡੀ ਡਿਗਰੀ ਧਾਰਕ ਹਨ।
ਉਨ੍ਹਾਂ ਨੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਸਾਲ 2016 'ਚ ਡਾਕਟਰੇਟ ਦੀ ਡਿਗਰੀ ਹਾਸਲ ਕੀਤੀ ਸੀ। ਉਨ੍ਹਾਂ ਦੀ ਖੋਜ ਗੁਰੂ ਨਾਨਕ ਦੇਵ ਜੀ ਦੇ ਵੰਸ਼ਜਾਂ 'ਤੇ ਕੇਂਦਰਿਤ ਸੀ। ਉਨ੍ਹਾਂ ਨੇ ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ 'ਚ ਕਾਂਗਰਸ ਦੀ ਸੀਨੀਅਰ ਆਗੂ ਰਜ਼ੀਆ ਸੁਲਤਾਨਾ ਨੂੰ ਹਰਾ ਕੇ ਜਿੱਤ ਹਾਸਲ ਕੀਤੀ ਸੀ।
ਸਾਬਕਾ ਆਈਪੀਐੱਸ ਅਧਿਕਾਰੀ ਦਾ ਨਾਂ ਵੀ ਸ਼ਾਮਲ
ਇਸ ਸੂਚੀ 'ਚ ਸਾਬਕਾ ਆਈਪੀਐੱਸ ਅਧਿਕਾਰੀ ਅਤੇ ਅੰਮ੍ਰਿਤਸਰ ਨਾਰਥ ਦੇ ਸਾਬਕਾ ਵਿਧਾਇਕ ਰਹੇ ਕੁੰਵਰ ਵਿਜੇ ਪ੍ਰਤਾਪ ਸਿੰਘ ਦਾ ਨਾਂ ਵੀ ਸ਼ਾਮਲ ਹੈ। ਉਨ੍ਹਾਂ ਨੇ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅੰਮ੍ਰਿਤਸਰ ਤੋਂ ਸਾਲ 2010 'ਚ ਪੁਲਿਸ ਪ੍ਰਸ਼ਾਸਨ ਵਿਸ਼ੇ 'ਚ ਪੀਐੱਚਡੀ ਹਾਸਲ ਕੀਤੀ ਸੀ। ਸਿਆਸਤ 'ਚ ਆਉਣ ਤੋਂ ਪਹਿਲਾਂ ਉਹ ਪੰਜਾਬ ਕੈਡਰ ਦੇ ਆਈਪੀਐੱਸ ਅਧਿਕਾਰੀ ਸਨ। ਸਾਲ 2022 'ਚ ਉਹ ਆਮ ਆਦਮੀ ਪਾਰਟੀ ਦੀ ਟਿਕਟ 'ਤੇ ਵਿਧਾਨ ਸਭਾ ਪਹੁੰਚੇ ਸਨ। ਹਾਲਾਂਕਿ, ਉਨ੍ਹਾਂ ਨੇ ਨਵੰਬਰ 2026 'ਚ ਵਿਧਾਨ ਸਭਾ ਦੀ ਮੈਂਬਰਸ਼ਿਪ ਤੋਂ ਅਸਤੀਫ਼ਾ ਦੇ ਦਿੱਤਾ।
ਇਸ ਤਰ੍ਹਾਂ ਹਰਭਜਨ ਸਿੰਘ ਈਟੀਓ, ਚਰਨਜੀਤ ਸਿੰਘ ਚੰਨੀ, ਮੁਹੰਮਦ ਜਮੀਲ ਉਰ ਰਹਿਮਾਨ ਅਤੇ ਕੁੰਵਰ ਵਿਜੇ ਪ੍ਰਤਾਪ ਸਿੰਘ ਪੰਜਾਬ ਦੀ ਸਿਆਸਤ ਦੇ ਅਜਿਹੇ ਚਾਰ ਪ੍ਰਮੁੱਖ ਚਿਹਰੇ ਹਨ, ਜਿਨ੍ਹਾਂ ਕੋਲ ਪੀਐੱਚਡੀ ਦੀ ਡਿਗਰੀ ਹੈ। ਇਨ੍ਹਾਂ 'ਚੋਂ ਹਰਭਜਨ ਸਿੰਘ ਅਤੇ ਚੰਨੀ ਨੇ ਸਿਆਸੀ ਜ਼ਿੰਮੇਵਾਰੀਆਂ ਦੇ ਨਾਲ ਆਪਣੀ ਉੱਚ ਸਿੱਖਿਆ ਪੂਰੀ ਕੀਤੀ, ਜਦਕਿ ਜਮੀਲ ਉਰ ਰਹਿਮਾਨ ਅਤੇ ਕੁੰਵਰ ਵਿਜੇ ਪ੍ਰਤਾਪ ਸਿੰਘ ਨੇ ਸਿਆਸਤ 'ਚ ਆਉਣ ਤੋਂ ਪਹਿਲਾਂ ਹੀ ਡਾਕਟਰੇਟ ਹਾਸਲ ਕਰ ਲਈ ਸੀ।