ਚੰਡੀਗੜ੍ਹ ਪੁਲਿਸ ਲਈ ਵੱਡੀ ਚੁਣੌਤੀ ਬਣ ਸਕਦੇ ਹਨ ਪੈਟਰੋਲ ਬੰਬ, ਸਲੱਮ ਏਰੀਆ ਦੇ ਨੌਜਵਾਨਾਂ ਲਈ ਆਮ ਤੇ ਸਸਤਾ ਹਥਿਆਰ

ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ : ਸੈਕਟਰ-25 ਵਿਚ ਛੇ ਹਥਿਆਰਬੰਦ ਨੌਜਵਾਨਾਂ ਨੇ ਰੰਜਿਸ਼ ਤਹਿਤ ਇਕ ਮਕਾਨ 'ਤੇ ਹਮਲਾ ਕੀਤਾ। ਹਮਲਾਵਰਾਂ ਨੇ ਮਕਾਨ 'ਚ ਤਬਾਹੀ ਮਚਾਉਣ ਲਈ ਬੋਤਲਾਂ 'ਚ ਪੈਟਰੋਲ ਬੰਬ ਸੁੱਟੇ। ਹਾਲਾਂਕਿ, ਗੁਆਂਢੀਆਂ ਦੀ ਸਮਝਦਾਰੀ ਨਾਲ ਅੱਗ 'ਤੇ ਸਮੇਂ ਸਿਰ ਕਾਬੂ ਪਾ ਲਿਆ ਗਿਆ।

ਚੰਡੀਗੜ੍ਹ 'ਚ ਇਹ ਪਹਿਲੀ ਅਜਿਹੀ ਘਟਨਾ ਨਹੀਂ ਹੈ। ਇਸ ਤੋਂ ਪਹਿਲਾਂ ਵੀ ਸਲੱਮ ਏਰੀਆ ਜਾਂ ਕਾਲੋਨੀਆਂ 'ਚ ਪੈਟਰੋਲ ਬੰਬ ਨਾਲ ਹਮਲੇ ਦੀਆਂ ਵਾਰਦਾਤਾਂ ਹੋ ਚੁੱਕੀਆਂ ਹਨ। ਇਹ ਨੌਜਵਾਨਾਂ ਲਈ ਆਮ ਤੇ ਸਸਤਾ ਹਥਿਆਰ ਹੈ, ਜੋ ਕਿ ਪੁਲਿਸ ਲਈ ਵੱਡੀ ਚੁਣੌਤੀ ਬਣ ਸਕਦਾ ਹੈ। ਭੀੜ ਤੇ ਦੰਗਿਆਂ 'ਚ ਅਕਸਰ ਇਸੇ ਮਾਨਸਿਕਤਾ ਵਾਲੇ ਨੌਜਵਾਨ ਪਰੇਸ਼ਾਨੀ ਖੜ੍ਹੀ ਕਰਦੇ ਹਨ।

ਸੈਕਟਰ-25 ਵਿਚ ਹੋਈ ਇਹ ਪੂਰੀ ਘਟਨਾ ਸੀਸੀਟੀਵੀ ਕੈਮਰੇ 'ਚ ਰਿਕਾਰਡ ਹੋ ਗਈ। ਫੁਟੇਜ ਵਿਚ ਸਾਫ਼ ਦੇਖਿਆ ਜਾ ਸਕਦਾ ਹੈ ਕਿ ਦੇਰ ਰਾਤ ਹਥਿਆਰਬੰਦ ਛੇ ਨੌਜਵਾਨ ਇਕ ਘਰ ਦੇ ਬਾਹਰ ਪਹੁੰਚਦੇ ਹਨ। ਇਕ ਦੇ ਹੱਥ ਵਿਚ ਬੇਸਬਾਲ ਦਾ ਡੰਡਾ ਹੁੰਦਾ ਹੈ ਜਿਸ ਨਾਲ ਉਹ ਘਰ ਦੇ ਗੇਟ ਅਤੇ ਬਾਹਰ ਰੱਖੇ ਸਾਮਾਨ ਨੂੰ ਬੁਰੀ ਤਰ੍ਹਾਂ ਤੋੜਨਾ ਸ਼ੁਰੂ ਕਰ ਦਿੰਦਾ ਹੈ।

ਉਸ ਦਾ ਦੂਜਾ ਸਾਥੀ ਕੱਚ ਦੀ ਇਕ ਬੋਤਲ 'ਚ ਪੈਟਰੋਲ ਭਰ ਕੇ ਉਸ ਵਿਚ ਅੱਗ ਲਗਾਉਂਦਾ ਹੈ ਅਤੇ ਉਸ ਨੂੰ ਪੈਟਰੋਲ ਬੰਬ ਵਾਂਗ ਘਰ ਵੱਲ ਸੁੱਟ ਦਿੰਦਾ ਹੈ। ਬੋਤਲ ਦੇ ਡਿੱਗਦੇ ਹੀ ਉੱਥੇ ਭਿਆਨਕ ਅੱਗ ਭੜਕ ਉੱਠਦੀ ਹੈ। ਇਸ ਘਟਨਾ ਨਾਲ ਆਸ-ਪਾਸ ਦੇ ਲੋਕਾਂ 'ਚ ਭਾਰੀ ਚੀਕ-ਚਿਹਾੜਾ ਅਤੇ ਹਫੜਾ-ਦਫੜੀ ਮਚ ਜਾਂਦੀ ਹੈ।

ਸਥਾਨਕ ਨਿਵਾਸੀਆਂ ਨੇ ਤੁਰੰਤ ਅੱਗ ਬੁਝਾਉਣ ਦੀ ਕੋਸ਼ਿਸ਼ ਕੀਤੀ ਤੇ ਪੁਲਿਸ ਕੰਟਰੋਲ ਰੂਮ ਨੂੰ ਇਸ ਦੀ ਸੂਚਨਾ ਦਿੱਤੀ। ਪੁਲਿਸ ਨੇ ਛੇ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮੁਲਜ਼ਮਾਂ ਨੂੰ ਅਦਾਲਤ 'ਚ ਪੇਸ਼ ਕਰ ਕੇ ਰਿਮਾਂਡ ਮੰਗਿਆ ਜਾਵੇਗਾ।

ਲੋਕਾਂ ਦੀ ਮੰਗ ਹੈ ਕਿ ਪੈਟਰੋਲ ਬੰਬ ਨਾਲ ਭੜਕੀ ਅੱਗ ਕਈ ਘਰਾਂ ਨੂੰ ਤਬਾਹ ਕਰ ਸਕਦੀ ਸੀ, ਇਸ ਲਈ ਅਜਿਹੇ ਮੁਲਜ਼ਮਾਂ 'ਤੇ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ। ਇਸ ਦੇ ਲਈ ਚੰਡੀਗੜ੍ਹ ਪ੍ਰਸ਼ਾਸਨ ਨੂੰ ਕੋਈ ਸਖ਼ਤ ਨਿਯਮ ਜਾਂ ਕਾਨੂੰਨ ਬਣਾਉਣ ਦਾ ਯਤਨ ਕਰਨਾ ਚਾਹੀਦਾ ਹੈ।