ਪੰਜਾਬ 'ਚ ਅਧਿਆਪਕਾਂ ਲਈ ਨਵੀਂ ਟਰਾਂਸਫਰ ਪਾਲਿਸੀ ਜਾਰੀ, PTR ਵਿਗੜਣ 'ਤੇ ਸਾਲ ਦੌਰਾਨ ਕਦੇ ਵੀ ਹੋ ਸਕੇਗਾ ਤਬਾਦਲਾ

ਰੋਹਿਤ ਕੁਮਾਰ, ਚੰਡੀਗੜ੍ਹ : ਪੰਜਾਬ ਦੇ ਸਕੂਲ ਸਿੱਖਿਆ ਵਿਭਾਗ ਨੇ ਐਸੋਸੀਏਟ ਟੀਚਰ, ਐਸੋਸੀਏਟ ਪ੍ਰੀ-ਪ੍ਰਾਇਮਰੀ ਟੀਚਰ ਅਤੇ ਇਨਕਲੂਸਿਵ ਐਜੂਕੇਸ਼ਨ ਅਸਿਸਟੈਂਟ ਟੀਚਰਾਂ ਲਈ ਨਵੀਂ ਤਬਾਦਲਾ ਨੀਤੀ ਜਾਰੀ ਕੀਤੀ ਹੈ। 11 ਸਤੰਬਰ ਨੂੰ ਜਾਰੀ ਨੀਤੀ ਅਕਾਦਮਿਕ ਸੈਸ਼ਨ 2026-27 ਲਈ ਇਕ ਅਪ੍ਰੈਲ 2026 ਤੋਂ ਲਾਗੂ ਮੰਨੀ ਜਾਵੇਗੀ। ਇਸ ਤਹਿਤ ਆਮ ਤਬਾਦਲੇ ਸਾਲ ਵਿੱਚ ਇਕ ਵਾਰ ਹੋਣਗੇ, ਪਰ ਵਿਦਿਆਰਥੀਆਂ ਦੇ ਹਿੱਤ ਅਤੇ ਪ੍ਰਸ਼ਾਸਨਿਕ ਲੋੜ ਦੇ ਆਧਾਰ ’ਤੇ ਵਿਭਾਗ ਨੂੰ ਸਾਲ ਦੇ ਕਿਸੇ ਵੀ ਸਮੇਂ ਤਬਾਦਲਾ ਕਰਨ ਦਾ ਅਧਿਕਾਰ ਹੋਵੇਗਾ। ਸਕੂਲ ਵਿੱਚ ਪੀਟੀਆਰ (ਵਿਦਿਆਰਥੀ-ਅਧਿਆਪਕ ਅਨੁਪਾਤ) ਅਸੰਤੁਲਿਤ ਹੋਣ, ਲੋੜੀਂਦਾ ਕਾਰਜਭਾਰ ਨਾ ਹੋਣ ਜਾਂ ਅਨੁਸ਼ਾਸਨਾਤਮਕ ਮਾਮਲੇ ਵਿੱਚ ਕਰਮਚਾਰੀ ਨੂੰ ਹੋਰ ਥਾਂ ਭੇਜਿਆ ਜਾ ਸਕੇਗਾ।

ਆਮ ਤਬਾਦਲੇ ਲਈ ਦੋ ਸਾਲ ਦਾ ਠਹਿਰਾਅ ਜ਼ਰੂਰੀ

ਕਿਸੇ ਸਕੂਲ ਤੋਂ ਆਮ ਤਬਾਦਲਾ ਮੰਗਣ ਲਈ ਕਰਮਚਾਰੀ ਦਾ ਉੱਥੇ ਘੱਟੋ-ਘੱਟ ਦੋ ਸਾਲ ਦਾ ਠਹਿਰਾਅ ਲਾਜ਼ਮੀ ਹੋਵੇਗਾ। ਆਨਲਾਈਨ ਵਿਕਲਪ 15 ਫਰਵਰੀ ਤੋਂ 15 ਮਾਰਚ ਤੱਕ ਭਰੇ ਜਾ ਸਕਣਗੇ ਅਤੇ ਤਬਾਦਲਾ ਹੁਕਮ ਅਪ੍ਰੈਲ ਦੇ ਦੂਜੇ ਹਫ਼ਤੇ ਜਾਰੀ ਹੋਣਗੇ। ਨਵੀਂ ਥਾਂ ’ਤੇ ਅਪ੍ਰੈਲ ਦੇ ਅੰਤ ਤੱਕ ਜੁਆਇਨ ਕਰਨਾ ਹੋਵੇਗਾ। ਅੰਕਾਂ ਅਤੇ ਠਹਿਰਾਅ ਦੀ ਗਿਣਤੀ ਲਈ 31 ਮਾਰਚ ਕੱਟ-ਆਫ਼ ਤਾਰੀਖ ਹੋਵੇਗੀ। ਆਪਸੀ ਤਬਾਦਲੇ ਲਈ ਦੋਵਾਂ ਕਰਮਚਾਰੀਆਂ ਦੇ 255 ਵਿੱਚੋਂ 25 ਤੋਂ ਵੱਧ ਅੰਕ ਹੋਣੇ ਜ਼ਰੂਰੀ ਹਨ।

ਗੰਭੀਰ ਬਿਮਾਰੀ ਤੇ ਵਿਧਵਾ ਹੋਣ ਵਾਲਿਆਂ ਨੂੰ ਵਿਸ਼ੇਸ਼ ਰਾਹਤ

ਕੈਂਸਰ, ਡਾਇਲਸਿਸ, ਲੀਵਰ ਜਾਂ ਕਿਡਨੀ ਟਰਾਂਸਪਲਾਂਟ, 40 ਫ਼ੀਸਦੀ ਜਾਂ ਵੱਧ ਦਿਵਿਆਂਗਤਾ, ਹੈਪੇਟਾਈਟਸ ਬੀ-ਸੀ, ਸਿਕਲ ਸੈੱਲ ਅਨੀਮੀਆ ਅਤੇ ਥੈਲੇਸੀਮੀਆ ਵਰਗੇ ਮਾਮਲਿਆਂ ਨੂੰ ਵਿਸ਼ੇਸ਼ ਸ਼੍ਰੇਣੀ ਵਿੱਚ ਰੱਖਿਆ ਗਿਆ ਹੈ। ਤਲਾਕਸ਼ੁਦਾ ਕਰਮਚਾਰੀ, ਦਿਵਿਆਂਗ ਜਾਂ ਬੌਧਿਕ ਤੌਰ ’ਤੇ ਦਿਵਿਆਂਗ ਬੱਚੇ ਵਾਲੇ ਕਰਮਚਾਰੀ, ਜੰਗੀ ਵਿਧਵਾ, ਸ਼ਹੀਦ ਦੀ ਵਿਧਵਾ ਅਤੇ ਪਤੀ ਦੀ ਮੌਤ ਤੋਂ ਬਾਅਦ 18 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਵਾਲੇ ਮਾਮਲੇ ਵੀ ਇਸ ਵਿੱਚ ਸ਼ਾਮਲ ਹਨ। ਇਨ੍ਹਾਂ ਮਾਮਲਿਆਂ ਵਿੱਚ ਹਰ ਮਹੀਨੇ ਆਨਲਾਈਨ ਅਰਜ਼ੀ ਦਿੱਤੀ ਜਾ ਸਕੇਗੀ।

ਨਤੀਜਿਆਂ ਦੇ ਆਧਾਰ ’ਤੇ ਮਿਲਣਗੇ ਅੰਕ

ਤਬਾਦਲੇ ਲਈ ਕਾਰਗੁਜ਼ਾਰੀ ਨੂੰ ਵੀ ਅੰਕ ਪ੍ਰਣਾਲੀ ਨਾਲ ਜੋੜਿਆ ਗਿਆ ਹੈ। ਬੋਰਡ ਨਤੀਜੇ ਦੇ ਆਧਾਰ ’ਤੇ ਵੱਧ ਤੋਂ ਵੱਧ 40 ਅੰਕ ਮਿਲਣਗੇ। 50 ਫ਼ੀਸਦੀ ਨਤੀਜੇ ’ਤੇ ਪੰਜ, 61 ਤੋਂ 70 ਫ਼ੀਸਦੀ ’ਤੇ 10, 71 ਤੋਂ 80 ਫ਼ੀਸਦੀ ’ਤੇ 20, 81 ਤੋਂ 90 ਫ਼ੀਸਦੀ ’ਤੇ 30, 91 ਤੋਂ 99 ਫ਼ੀਸਦੀ ’ਤੇ 35 ਅਤੇ 100 ਫ਼ੀਸਦੀ ਨਤੀਜੇ ’ਤੇ 40 ਅੰਕ ਹੋਣਗੇ। ‘ਪੜ੍ਹੋ ਪੰਜਾਬ, ਪੜ੍ਹਾਓ ਪੰਜਾਬ’ ਦੇ ਮੁਲਾਂਕਣ ਵਿੱਚ ਸੂਬਾਈ ਔਸਤ ਤੋਂ ਬਿਹਤਰ ਕਾਰਗੁਜ਼ਾਰੀ ਲਈ ਵੀ 40 ਅੰਕ ਤੱਕ ਮਿਲਣਗੇ, ਜਦਕਿ ਔਸਤ ਤੋਂ ਘੱਟ ਕਾਰਗੁਜ਼ਾਰੀ ਲਈ ਨੈਗੇਟਿਵ ਅੰਕਾਂ ਦੀ ਵਿਵਸਥਾ ਹੈ।

ਗਲਤ ਜਾਣਕਾਰੀ ਦੇਣ ’ਤੇ ਤਬਾਦਲਾ ਰੱਦ ਕਰਨ ਦੇ ਨਾਲ ਅਨੁਸ਼ਾਸਨਾਤਮਕ ਕਾਰਵਾਈ ਵੀ ਹੋ ਸਕੇਗੀ। ਪੂਰੀ ਪ੍ਰਕਿਰਿਆ ਸਾਫ਼ਟਵੇਅਰ ਰਾਹੀਂ ਹੋਵੇਗੀ ਅਤੇ ਇਕ ਫ਼ੀਸਦੀ ਮਾਮਲਿਆਂ ਦੀ ਰੈਂਡਮ ਆਧਾਰ ’ਤੇ ਮੈਨੂਅਲ ਜਾਂਚ ਕੀਤੀ ਜਾਵੇਗੀ। ਤਬਾਦਲਾ ਹੁਕਮ ਜਾਰੀ ਹੋਣ ਤੋਂ 15 ਦਿਨਾਂ ਅੰਦਰ ਲਾਗੂ ਕਰਨੇ ਹੋਣਗੇ। ਨਵੀਂ ਥਾਂ ਜੁਆਇਨ ਕਰਨ ਤੋਂ ਬਾਅਦ 15 ਦਿਨਾਂ ਅੰਦਰ ਆਨਲਾਈਨ ਸ਼ਿਕਾਇਤ ਵੀ ਕੀਤੀ ਜਾ ਸਕੇਗੀ। ਬਾਹਰੀ ਦਬਾਅ ਜਾਂ ਪ੍ਰਭਾਵ ਰਾਹੀਂ ਤਬਾਦਲਾ ਕਰਵਾਉਣ ਦੀ ਕੋਸ਼ਿਸ਼ ਕਰਨ ਵਾਲਿਆਂ ਖ਼ਿਲਾਫ਼ ਵੀ ਕਾਰਵਾਈ ਦੀ ਵਿਵਸਥਾ ਕੀਤੀ ਗਈ ਹੈ।