ਸ਼ਹੀਦ ਜਵਾਨ ਦੀ ਮਾਂ ਨੂੰ ਮਿਲੇਗਾ ਬੀਮਾ ਰਾਸ਼ੀ ਦਾ ਬਾਕੀ 25% ਹਿੱਸਾ, ਹਾਈ ਕੋਰਟ ਨੇ ਪਲਟੇ ਹੇਠਲੀਆਂ ਅਦਾਲਤਾਂ ਦੇ ਫ਼ੈਸਲੇ

ਇਹ ਮਾਮਲਾ ਫ਼ੌਜ ਦੇ ਸਿਪਾਹੀ ਹਰਜਿੰਦਰ ਸਿੰਘ ਨਾਲ ਸਬੰਧਤ ਹੈ। ਉਨ੍ਹਾਂ ਦੀ 11 ਅਗਸਤ 2009 ਨੂੰ ਜੰਮੂ-ਕਸ਼ਮੀਰ ਦੇ ਅੱਤਵਾਦ ਪ੍ਰਭਾਵਿਤ ਤੇ ਆਪਰੇਸ਼ਨਲ ਖੇਤਰ 'ਚ ਡਿਊਟੀ ਦੌਰਾਨ ਮੌਤ ਹੋ ਗਈ ਸੀ। ਪਰਿਵਾਰ 'ਚ ਉਨ੍ਹਾਂ ਦੀ ਮਾਂ ਬਲਜੀਤ ਕੌਰ, ਪਿਤਾ ਤੇਜਪਾਲ ਸਿੰਘ ਤੇ ਪਤਨੀ ਹਰਦੀਪ ਕੌਰ ਹਨ। ਜਵਾਨ ਦੀ ਮੌਤ ਤੋਂ ਬਾਅਦ ਫ਼ੌਜ ਦੀ ਸਮੂਹ ਬੀਮਾ ਰਾਸ਼ੀ ਦੀ ਵੰਡ ਨੂੰ ਲੈ ਕੇ ਵਿਵਾਦ ਹੋ ਗਿਆ ਸੀ। ਅਦਾਲਤੀ ਰਿਕਾਰਡ ਅਨੁਸਾਰ, ਨਾਮਜ਼ਦਗੀ ਦੇ ਆਧਾਰ 'ਤੇ ਪਤਨੀ ਹਰਦੀਪ ਕੌਰ ਨੂੰ ਬੀਮਾ ਰਾਸ਼ੀ ਦਾ 50 ਫ਼ੀਸਦੀ ਹਿੱਸਾ ਦਿੱਤਾ ਗਿਆ ਸੀ। ਪਿਤਾ ਤੇਜਪਾਲ ਸਿੰਘ ਨੂੰ 3.75 ਲੱਖ ਰੁਪਏ ਮਿਲੇ ਸਨ, ਜਦੋਂਕਿ ਬਾਕੀ 25 ਫ਼ੀਸਦੀ ਰਕਮ ਤਿੰਨ ਸਾਲਾਂ ਲਈ ਜਮ੍ਹਾਂ ਕਰਵਾ ਦਿੱਤੀ ਗਈ ਸੀ। ਮਾਂ ਅਤੇ ਪਤਨੀ ਵਿਚਾਲੇ ਵਿਵਾਦ ਕਾਰਨ ਇਹ ਰਕਮ ਰੋਕ ਦਿੱਤੀ ਗਈ ਸੀ।