ਦਿੱਗਜਾਂ ਦੇ ਹਲਕਿਆਂ ’ਚ ਨਵੇਂ ਵੋਟਰਾਂ ਨਾਲੋਂ ਵੱਧ ਨਾਮ ਕੱਟੇ, SIR ਮਗਰੋਂ ਪੰਜਾਬ ’ਚ 13.60 ਲੱਖ ਵੋਟਰ ਘਟੇ ਤੇ 7.06 ਲੱਖ ਨਵੇਂ ਨਾਮ ਜੁੜੇ

ਸਟੇਟ ਬਿਊਰੋ, ਜਾਗਰਣ, ਚੰਡੀਗੜ੍ਹ: ਪੰਜਾਬ ਵਿੱਚ ਵਿਸ਼ੇਸ਼ ਗਹਿਰਾਈ ਨਾਲ ਵੋਟਰ ਸੂਚੀਆਂ ਦੀ ਸੋਧ (ਐੱਸਆਈਆਰ) ਮਗਰੋਂ ਅੰਤਿਮ ਸੂਚੀ ਵਿੱਚ 13,60,316 ਵੋਟਰ ਘਟ ਗਏ ਹਨ। ਇਸ ਦਾ ਅਸਰ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਸਮੇਤ ਸਾਰੀਆਂ ਪ੍ਰਮੁੱਖ ਪਾਰਟੀਆਂ ਦੇ ਆਗੂਆਂ ਦੇ ਹਲਕਿਆਂ ਵਿੱਚ ਵੀ ਦਿਖਿਆ ਹੈ। ਜ਼ਿਆਦਾਤਰ ਹਲਕਿਆਂ ਵਿੱਚ ਨਵੇਂ ਜੁੜੇ ਵੋਟਰਾਂ ਨਾਲੋਂ ਵੱਧ ਨਾਮ ਕੱਟੇ ਗਏ, ਜਦਕਿ ਕੁਝ ਥਾਵਾਂ ’ਤੇ ਵੋਟਰਾਂ ਦੀ ਗਿਣਤੀ ਵਧੀ ਹੈ।

ਐੱਸਆਈਆਰ ਤੋਂ ਪਹਿਲਾਂ ਪੰਜਾਬ ਵਿੱਚ 2,14,61,043 ਵੋਟਰ ਸਨ, ਜੋ ਅੰਤਿਮ ਸੂਚੀ ਵਿੱਚ ਘਟ ਕੇ 2,01,00,727 ਰਹਿ ਗਏ। 13 ਅਗਸਤ ਨੂੰ ਜਾਰੀ ਖਰੜਾ ਸੂਚੀ ਵਿੱਚੋਂ 20,66,608 ਨਾਮ ਹਟਾਏ ਗਏ ਸਨ ਅਤੇ ਦਾਅਵਿਆਂ ਤੇ ਇਤਰਾਜ਼ਾਂ ਦੇ ਨਿਪਟਾਰੇ ਮਗਰੋਂ 7,06,292 ਨਾਮ ਮੁੜ ਜੋੜੇ ਗਏ। ਮੁੱਖ ਚੋਣ ਅਧਿਕਾਰੀ ਅਨਿੰਦਿਤਾ ਮਿਤਰਾ ਮੁਤਾਬਕ ਹੁਣ ਤੱਕ ਕਿਸੇ ਸਿਆਸੀ ਪਾਰਟੀ ਨੇ ਇਤਰਾਜ਼ ਨਹੀਂ ਕੀਤਾ ਅਤੇ ਹਰ ਪੜਾਅ ’ਤੇ ਪਾਰਟੀਆਂ ਦੇ ਨੁਮਾਇੰਦਿਆਂ ਦੀ ਸਹਿਮਤੀ ਤੇ ਦਸਤਖ਼ਤ ਲਏ ਗਏ।

ਮੰਤਰੀਆਂ ਦੇ ਹਲਕਿਆਂ ’ਚ ਵੋਟਰਾਂ ਦੀ ਗਿਣਤੀ

ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਧੂਰੀ ਹਲਕੇ ਵਿੱਚ 9,070 ਵੋਟਰ ਘਟੇ ਤੇ 3,052 ਨਵੇਂ ਜੁੜੇ। ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਦੇ ਦਿੜ੍ਹਬਾ ਵਿੱਚ 945 ਵੋਟਰ ਵਧੇ। ਉਦਯੋਗ ਮੰਤਰੀ ਅਮਨ ਅਰੋੜਾ ਦੇ ਸੁਨਾਮ ਵਿੱਚ 6,001 ਵੋਟਰ ਘਟੇ ਤੇ 1,148 ਨਵੇਂ ਜੁੜੇ। ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਦੇ ਸ੍ਰੀ ਆਨੰਦਪੁਰ ਸਾਹਿਬ ਵਿੱਚ 11,256 ਵੋਟਰ ਘਟੇ ਤੇ 1,715 ਜੁੜੇ, ਜਦਕਿ ਮਹਿਲਾ ਤੇ ਬਾਲ ਵਿਕਾਸ ਮੰਤਰੀ ਡਾ. ਬਲਜੀਤ ਕੌਰ ਦੇ ਮਲੋਟ ਵਿੱਚ 26,912 ਘਟੇ ਤੇ 2,564 ਨਵੇਂ ਨਾਮ ਦਰਜ ਹੋਏ।

ਲੋਕ ਨਿਰਮਾਣ ਮੰਤਰੀ ਹਰਭਜਨ ਸਿੰਘ ਈਟੀਓ ਦੇ ਜੰਡਿਆਲਾ ਵਿੱਚ 4,925 ਵੋਟਰ ਘਟੇ ਤੇ 7,189 ਜੁੜੇ। ਜੰਗਲਾਤ ਮੰਤਰੀ ਲਾਲ ਚੰਦ ਕਟਾਰੂਚੱਕ ਦੇ ਭੋਆ ਵਿੱਚ 11,004 ਘਟੇ ਤੇ 6,219 ਜੁੜੇ। ਪੇਂਡੂ ਵਿਕਾਸ ਮੰਤਰੀ ਤਰੁਨਪ੍ਰੀਤ ਸਿੰਘ ਸੌਂਦ ਦੇ ਖੰਨਾ ਵਿੱਚ 12,714 ਨਾਮ ਕੱਟੇ ਤੇ 4,514 ਜੁੜੇ। ਜਲ ਸਰੋਤ ਮੰਤਰੀ ਬਰਿੰਦਰ ਗੋਇਲ ਦੇ ਲਹਿਰਾ ਵਿੱਚ 1,186 ਘਟੇ ਤੇ 4,435 ਜੁੜੇ। ਐੱਨਆਰਆਈ ਮਾਮਲਿਆਂ ਦੇ ਮੰਤਰੀ ਡਾ. ਰਵਜੋਤ ਸਿੰਘ ਦੇ ਸ਼ਾਮ ਚੁਰਾਸੀ ਵਿੱਚ 7,591 ਘਟੇ ਤੇ 5,858 ਜੁੜੇ। ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਦੇ ਪਟਿਆਲਾ ਦਿਹਾਤੀ ਵਿੱਚ 14,108 ਘਟੇ ਤੇ 7,676 ਨਵੇਂ ਵੋਟਰ ਜੁੜੇ।

ਹੋਰ ਪ੍ਰਮੁੱਖ ਆਗੂਆਂ ਦੇ ਹਲਕੇ

ਮੋਹਿੰਦਰ ਭਗਤ ਦੇ ਜਲੰਧਰ ਪੱਛਮੀ ਵਿੱਚ 8,047 ਵੋਟਰ ਘਟੇ ਤੇ 9,698 ਜੁੜੇ। ਜੇਲ੍ਹ ਵਿੱਚ ਬੰਦ ਮੰਤਰੀ ਸੰਜੀਵ ਅਰੋੜਾ ਦੇ ਲੁਧਿਆਣਾ ਪੱਛਮੀ ਵਿੱਚ 28,827 ਘਟੇ ਤੇ 4,144 ਨਵੇਂ ਨਾਮ ਜੁੜੇ। ਕਾਂਗਰਸ ਪ੍ਰਧਾਨ ਪਰਗਟ ਸਿੰਘ ਦੇ ਜਲੰਧਰ ਕੈਂਟ ਵਿੱਚ 13,073 ਵੋਟਰ ਘਟੇ ਤੇ 8,595 ਜੁੜੇ। ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਜਲਾਲਾਬਾਦ ਵਿੱਚ 2,714 ਘਟੇ ਤੇ 5,592 ਨਵੇਂ ਨਾਮ ਜੁੜੇ। ਭਾਜਪਾ ਪ੍ਰਧਾਨ ਕੇਵਲ ਸਿੰਘ ਢਿੱਲੋਂ ਦੇ ਬਰਨਾਲਾ ਵਿੱਚ 16,759 ਵੋਟਰ ਘਟੇ ਤੇ 3,498 ਜੁੜੇ। ਵਿਰੋਧੀ ਧਿਰ ਦੇ ਨੇਤਾ ਪ੍ਰਤਾਪ ਸਿੰਘ ਬਾਜਵਾ ਦੇ ਕਾਦੀਆਂ ਵਿੱਚ 10,244 ਵੋਟਰ ਘਟੇ ਤੇ 9,000 ਨਵੇਂ ਨਾਮ ਜੁੜੇ।