- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਇੰਸਪੈਕਟਰ ਅਮਨਜੋਤ ਸਨ ਚੰਡੀਗੜ੍ਹ ਪੁਲਿਸ ਦੇ 'ਟਫ਼ ਕਾਪ', ਲਾਰੈਂਸ ਨੂੰ ਕੀਤਾ ਸੀ ਗ੍ਰਿਫ਼ਤਾਰ; ਗੈਂਗਸਟਰ ਦਿਲਪ੍ਰੀਤ ਖ਼ਿਲਾਫ਼ ਗਵਾਹੀ ਦੇਣ ਕਿਉਂ ਨਹੀਂ ਆ ਰਹੇ?
ਅਦਾਲਤ ਵੱਲੋਂ ਵਾਰ-ਵਾਰ ਸੰਮਨ ਭੇਜੇ ਜਾ ਰਹੇ ਹਨ। ਦਿਲਪ੍ਰੀਤ ਨਾਲ ਅੱਠ ਸਾਲ ਪਹਿਲਾਂ 2018 'ਚ ਸੈਕਟਰ-43 ਬੱਸ ਸਟੈਂਡ ਨੇੜੇ ਹੋਏ ਪੁਲਿਸ ਮੁਕਾਬਲੇ ਦੇ ਮਾਮਲੇ 'ਚ ਵੀ ਉਨ੍ਹਾਂ ਦੀ ਗਵਾਹੀ ਹੋਣੀ ਹੈ। ਅਦਾਲਤ ਕਈ ਵਾਰ ਜ਼ਮਾਨਤੀ ਵਾਰੰਟ ਜਾਰੀ ਕਰ ਚੁੱਕੀ ਹੈ, ਪਰ ਅਮਨਜੋਤ ਅਦਾਲਤ 'ਚ ਨਹੀਂ ਪਹੁੰਚ ਰਹੇ। ਹੁਣ 21 ਸਤੰਬਰ ਲਈ ਵੀ ਸੰਮਨ ਜਾਰੀ ਕੀਤੇ ਗਏ ਹਨ।
Posted By Seema Anand
Publish Date: Sat, 19 Sep 2026 01:47 PM (IST)
Updated Date: Sat, 19 Sep 2026 01:50 PM (IST)
ਰਵੀ ਅਟਵਾਲ, ਚੰਡੀਗੜ੍ਹ : ਵੀਆਰਐੱਸ ਲੈ ਚੁੱਕੇ ਇੰਸਪੈਕਟਰ ਅਮਨਜੋਤ ਸਿੰਘ ਕਦੇ ਚੰਡੀਗੜ੍ਹ ਪੁਲਿਸ ਦੇ 'ਟਫ਼ ਕਾਪ' ਵਜੋਂ ਜਾਣੇ ਜਾਂਦੇ ਸਨ। ਲਾਰੈਂਸ ਬਿਸ਼ਨੋਈ ਨੂੰ ਪਹਿਲੀ ਵਾਰ ਉਨ੍ਹਾਂ ਨੇ ਹੀ ਗ੍ਰਿਫ਼ਤਾਰ ਕੀਤਾ ਸੀ, ਪਰ ਹੁਣ ਗੈਂਗਸਟਰ ਦਿਲਪ੍ਰੀਤ ਸਿੰਘ ਉਰਫ਼ ਬਾਬਾ ਖ਼ਿਲਾਫ਼ ਗਵਾਹੀ ਦੇਣ ਲਈ ਅਦਾਲਤ 'ਚ ਪੇਸ਼ ਨਹੀਂ ਹੋ ਰਹੇ। ਇਸ ਨੂੰ ਲੈ ਕੇ ਕਈ ਤਰ੍ਹਾਂ ਦੇ ਸਵਾਲ ਉੱਠ ਰਹੇ ਹਨ।
ਅਦਾਲਤ ਵੱਲੋਂ ਵਾਰ-ਵਾਰ ਸੰਮਨ ਭੇਜੇ ਜਾ ਰਹੇ ਹਨ। ਦਿਲਪ੍ਰੀਤ ਨਾਲ ਅੱਠ ਸਾਲ ਪਹਿਲਾਂ 2018 'ਚ ਸੈਕਟਰ-43 ਬੱਸ ਸਟੈਂਡ ਨੇੜੇ ਹੋਏ ਪੁਲਿਸ ਮੁਕਾਬਲੇ ਦੇ ਮਾਮਲੇ 'ਚ ਵੀ ਉਨ੍ਹਾਂ ਦੀ ਗਵਾਹੀ ਹੋਣੀ ਹੈ। ਅਦਾਲਤ ਕਈ ਵਾਰ ਜ਼ਮਾਨਤੀ ਵਾਰੰਟ ਜਾਰੀ ਕਰ ਚੁੱਕੀ ਹੈ, ਪਰ ਅਮਨਜੋਤ ਅਦਾਲਤ 'ਚ ਨਹੀਂ ਪਹੁੰਚ ਰਹੇ। ਹੁਣ 21 ਸਤੰਬਰ ਲਈ ਵੀ ਸੰਮਨ ਜਾਰੀ ਕੀਤੇ ਗਏ ਹਨ।
ਪੁਲਿਸ ਮੁਤਾਬਕ ਦਿਲਪ੍ਰੀਤ ਸਿੰਘ ਤੇ ਰਣਜੀਤ ਸਿੰਘ ਸਾਲ 2014 ਦੇ ਇੱਕ ਮਾਮਲੇ 'ਚ ਲੋੜੀਂਦੇ ਸਨ। ਪੁਲਿਸ ਨੂੰ ਸੂਚਨਾ ਮਿਲੀ ਸੀ ਕਿ ਦਿਲਪ੍ਰੀਤ ਸਿੰਘ ਚਿੱਟੇ ਰੰਗ ਦੀ ਸਵਿਫਟ ਡਿਜ਼ਾਇਰ ਕਾਰ 'ਚ ਸੈਕਟਰ-43 ਬੱਸ ਸਟੈਂਡ ਪਹੁੰਚੇਗਾ। ਗ੍ਰਿਫ਼ਤਾਰੀ ਲਈ ਸੀਨੀਅਰ ਅਧਿਕਾਰੀਆਂ ਦੇ ਨਿਰਦੇਸ਼ਾਂ 'ਤੇ ਪੁਲਿਸ ਦੀਆਂ ਕਈ ਟੀਮਾਂ ਬਣਾਈਆਂ ਗਈਆਂ ਸਨ।
ਦੁਪਹਿਰ ਸਮੇਂ ਪੁਲਿਸ ਟੀਮ ਨੂੰ ਚਿੱਟੇ ਰੰਗ ਦੀ ਸਵਿਫਟ ਡਿਜ਼ਾਇਰ ਕਾਰ ਆਉਂਦੀ ਦਿਖਾਈ ਦਿੱਤੀ। ਇੰਸਪੈਕਟਰ ਗੁਰਚਰਨ ਸਿੰਘ ਦੀ ਟੀਮ ਨੇ ਕਾਰ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਪਰ ਡਰਾਈਵਰ ਨੇ ਵਾਹਨ ਨਹੀਂ ਰੋਕਿਆ। ਇਸ ਤੋਂ ਬਾਅਦ ਇੰਸਪੈਕਟਰ ਅਮਨਜੋਤ ਸਿੰਘ ਨੇ ਆਪਣੀ ਫਾਰਚੂਨਰ ਕਾਰ ਨਾਲ ਪਿੱਛਾ ਕਰਦਿਆਂ ਸਵਿਫਟ ਡਿਜ਼ਾਇਰ ਨੂੰ ਪਿੱਛਿਓਂ ਟੱਕਰ ਮਾਰ ਦਿੱਤੀ।
ਪੁਲਿਸ ਮੁਤਾਬਕ ਵਾਹਨ ਨੂੰ ਰੋਕਣ ਦੀ ਕੋਸ਼ਿਸ਼ ਦੌਰਾਨ ਦੂਜੀ ਟੀਮ ਨੇ ਕਾਰ ਦੀ ਵਿੰਡਸਕ੍ਰੀਨ 'ਤੇ ਪੱਥਰ ਸੁੱਟੇ। ਇਸ ਤੋਂ ਬਾਅਦ ਦਿਲਪ੍ਰੀਤ ਸਿੰਘ ਹਥਿਆਰ ਲੈ ਕੇ ਕਾਰ 'ਚੋਂ ਬਾਹਰ ਆਇਆ ਅਤੇ ਪੁਲਿਸ ਮੁਲਾਜ਼ਮਾਂ 'ਤੇ ਗੋਲੀਆਂ ਚਲਾ ਦਿੱਤੀਆਂ।
ਪੁਲਿਸ ਦਾ ਦੋਸ਼ ਹੈ ਕਿ ਉਸ ਨੇ ਇੰਸਪੈਕਟਰ ਅਮਨਜੋਤ ਸਿੰਘ ਅਤੇ ਇੰਸਪੈਕਟਰ ਸ਼ਿਵ ਕੁਮਾਰ ਵੱਲ ਗੋਲੀ ਚਲਾਈ। ਜਵਾਬੀ ਕਾਰਵਾਈ 'ਚ ਡੀਐੱਸਪੀ ਰਾਕੇਸ਼ ਯਾਦਵ ਨੇ ਗੋਲੀ ਚਲਾਈ, ਜੋ ਦਿਲਪ੍ਰੀਤ ਦੀ ਲੱਤ 'ਚ ਲੱਗੀ। ਇਸ ਤੋਂ ਬਾਅਦ ਉਸ ਨੂੰ ਗ੍ਰਿਫ਼ਤਾਰ ਕਰਕੇ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ।
ਇਸ ਕਾਰਵਾਈ ਦੌਰਾਨ ਅਮਨਜੋਤ ਸਿੰਘ ਪੁਲਿਸ ਦੀ ਉਸ ਵਿਸ਼ੇਸ਼ ਟੀਮ ਦਾ ਹਿੱਸਾ ਸਨ ਅਤੇ ਮਾਮਲੇ ਦੇ ਮਹੱਤਵਪੂਰਨ ਗਵਾਹ ਹਨ। ਇਸਤਗਾਸਾ ਪੱਖ ਲਈ ਉਨ੍ਹਾਂ ਦੀ ਗਵਾਹੀ ਇਸ ਲਈ ਵੀ ਅਹਿਮ ਹੈ ਕਿਉਂਕਿ ਉਹ ਘਟਨਾ ਸਥਾਨ 'ਤੇ ਮੌਜੂਦ ਪੁਲਿਸ ਅਧਿਕਾਰੀਆਂ 'ਚ ਸ਼ਾਮਲ ਸਨ।
ਇਸ ਲਈ ਕਿਹਾ ਜਾਂਦਾ ਸੀ 'ਟਫ਼ ਕਾਪ'
ਸਾਲ/ਪਹਿਲੂ | ਵੇਰਵਾ |
|---|---|
26 ਸਾਲ ਪੁਲਿਸ ਸੇਵਾ | ਕਰੀਬ 26 ਸਾਲ ਦੇ ਕਰੀਅਰ ਦੌਰਾਨ ਕਈ ਚਰਚਿਤ ਅਪਰਾਧਿਕ ਮਾਮਲਿਆਂ ਦੀ ਜਾਂਚ 'ਚ ਅਹਿਮ ਭੂਮਿਕਾ ਨਿਭਾਈ। |
'ਟਫ਼ ਕਾਪ' ਦੀ ਪਛਾਣ | ਮੁਸ਼ਕਲ ਅਤੇ ਹਾਈ-ਪ੍ਰੋਫਾਈਲ ਮਾਮਲਿਆਂ ਦੀ ਜਾਂਚ ਲਈ ਪੁਲਿਸ ਵਿਭਾਗ 'ਚ ਵੱਖਰੀ ਪਛਾਣ ਬਣੀ। |
ਜੈਪਾਲ ਭੁੱਲਰ ਗੈਂਗ 'ਤੇ ਸ਼ਿਕੰਜਾ | ਬਦਨਾਮ ਅੰਤਰਰਾਜੀ ਹਾਈਵੇ ਲੁਟੇਰੇ ਜੈਪਾਲ ਭੁੱਲਰ ਗੈਂਗ ਦੇ ਮੈਂਬਰਾਂ ਨੂੰ ਫੜਨ 'ਚ ਅਹਿਮ ਭੂਮਿਕਾ ਨਿਭਾਈ। |
ਸੂਬਿਆਂ 'ਚ ਮਜ਼ਬੂਤ ਨੈੱਟਵਰਕ | ਪੰਜਾਬ, ਹਰਿਆਣਾ ਅਤੇ ਦਿੱਲੀ 'ਚ ਮਜ਼ਬੂਤ ਪੁਲਿਸ ਨੈੱਟਵਰਕ ਦਾ ਕਈ ਮਾਮਲੇ ਸੁਲਝਾਉਣ 'ਚ ਫ਼ਾਇਦਾ ਮਿਲਿਆ। |
2004- ਰਣਪਾਲ ਗੁੱਜਰ | ਲੋੜੀਂਦੇ ਅਪਰਾਧੀ ਰਣਪਾਲ ਗੁੱਜਰ ਨੂੰ ਫੜਨ 'ਚ ਮਹੱਤਵਪੂਰਨ ਭੂਮਿਕਾ ਨਿਭਾਈ। |
2005- ਅੱਤਵਾਦੀ ਗ੍ਰਿਫ਼ਤਾਰੀ | ਸੈਕਟਰ-17 ਆਈਐੱਸਬੀਟੀ ਤੋਂ ਹਥਿਆਰ ਅਤੇ ਗੋਲਾ-ਬਾਰੂਦ ਸਮੇਤ ਇੱਕ ਅੱਤਵਾਦੀ ਨੂੰ ਗ੍ਰਿਫ਼ਤਾਰ ਕੀਤਾ। |
2007- ਸੀਏ ਕਤਲਕਾਂਡ | ਚਾਰਟਰਡ ਅਕਾਊਂਟੈਂਟ ਰਾਕੇਸ਼ ਗੋਇਲ ਦੇ ਕਤਲ ਦੀ ਗੁੱਥੀ ਸੁਲਝਾਉਣ 'ਚ ਯੋਗਦਾਨ ਦਿੱਤਾ। |
2008- ਅਨੁਰਾਧਾ ਕਤਲਕਾਂਡ | ਅਨੁਰਾਧਾ ਕਤਲਕਾਂਡ ਨੂੰ ਸੁਲਝਾਉਣ 'ਚ ਮਹੱਤਵਪੂਰਨ ਭੂਮਿਕਾ ਨਿਭਾਈ। |
2008- ਡਿੰਪੀ ਸ਼ੂਟਆਊਟ | ਸੁਖਨਾ ਝੀਲ ਨੇੜੇ ਹੋਏ ਡਿੰਪੀ ਸ਼ੂਟਆਊਟ ਦੀ ਗੁੱਥੀ ਸੁਲਝਾਉਣ 'ਚ ਯੋਗਦਾਨ ਦਿੱਤਾ। |
2011- ਤਨਿਸ਼ਕ 'ਚ ਲੁੱਟ | ਜਨਵਰੀ 2011 'ਚ ਤਨਿਸ਼ਕ ਜਿਊਲਰੀ ਸ਼ੋਅਰੂਮ 'ਚ ਲੁੱਟ ਦੇ ਮੁਲਜ਼ਮਾਂ ਨੂੰ ਫੜਨ 'ਚ ਸਫਲਤਾ ਹਾਸਲ ਕੀਤੀ। ਹਾਲਾਂਕਿ ਬਾਅਦ 'ਚ ਮੁਲਜ਼ਮ ਅਦਾਲਤ ਤੋਂ ਬਰੀ ਹੋ ਗਏ। |
2021- ਜੈਪਾਲ ਐਨਕਾਊਂਟਰ | ਏ-ਕੈਟੇਗਰੀ ਗੈਂਗਸਟਰ ਜੈਪਾਲ ਭੁੱਲਰ ਨੂੰ ਪੱਛਮੀ ਬੰਗਾਲ ਪੁਲਿਸ ਦੀ ਐੱਸਟੀਐੱਫ ਨੇ ਕੋਲਕਾਤਾ 'ਚ ਮੁਕਾਬਲੇ ਦੌਰਾਨ ਮਾਰ ਦਿੱਤਾ ਸੀ। |
ਵਿਭਾਗੀ ਵਿਵਾਦ | 2012 'ਚ ਅਨੁਸ਼ਾਸਨਹੀਣਤਾ ਦੇ ਦੋਸ਼ਾਂ 'ਚ ਵਿਭਾਗੀ ਜਾਂਚ ਸ਼ੁਰੂ ਹੋਈ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਅਸਤੀਫ਼ਾ ਦਿੱਤਾ, ਜਿਸ ਨੂੰ ਵਿਭਾਗ ਨੇ ਮਨਜ਼ੂਰ ਕਰ ਲਿਆ ਸੀ। |
ਅਸਤੀਫ਼ਾ ਵਾਪਸ ਲਿਆ | ਬਾਅਦ 'ਚ ਪੁਲਿਸ ਵਿਭਾਗ ਵੱਲੋਂ ਦੋ ਵਿਭਾਗੀ ਜਾਂਚਾਂ ਬੰਦ ਕਰਨ ਦੇ ਫ਼ੈਸਲੇ ਤੋਂ ਬਾਅਦ ਉਨ੍ਹਾਂ ਨੇ ਆਪਣਾ ਅਸਤੀਫ਼ਾ ਵਾਪਸ ਲੈ ਲਿਆ। |