ਹਾਈ ਕੋਰਟ ਦਾ ਵੱਡਾ ਫੈਸਲਾ: ਜਬਰ-ਜਨਾਹ ਦੇ ਝੂਠੇ ਕੇਸ ਦੀ ਧਮਕੀ ਤੇ ਬਲੈਕਮੇਲਿੰਗ ਤੋਂ ਤੰਗ ਹੋ ਕੇ ਜਾਨ ਦੇਣ ਵਾਲੇ ਨੌਜਵਾਨ ਦੇ ਮਾਮਲੇ 'ਚ ਮੁਲਜ਼ਮ ਔਰਤ ਦੀ ਅਗਾਊਂ ਜ਼ਮਾਨਤ ਖਾਰਜ

ਮਾਮਲਾ 11 ਮਾਰਚ 2026 ਨੂੰ ਕਪੂਰਥਲਾ ਸਿਟੀ ਥਾਣੇ ’ਚ ਬੀਐੱਨਐੱਸ ਦੀ ਧਾਰਾ 108 ਤਹਿਤ ਦਰਜ ਕੀਤੀ ਗਈ ਐੱਫਆਈਆਰ ਨਾਲ ਜੁੜਿਆ ਹੈ। ਸ਼ਿਕਾਇਤ ਮ੍ਰਿਤਕ ਦੀ ਮਾਂ ਨੇ ਦਰਜ ਕਰਵਾਈ ਸੀ। ਉਨ੍ਹਾਂ ਅਨੁਸਾਰ, ਉਨ੍ਹਾਂ ਦਾ ਪੁੱਤਰ, ਜੋ ਪੇਸ਼ੇ ਤੋਂ ਪਲੰਬਰ ਸੀ ਤੇ ਅੱਠਵੀਂ ਕਲਾਸ ਤੱਕ ਪੜ੍ਹਿਆ ਸੀ, ਪਿਛਲੇ ਕਰੀਬ ਡੇਢ ਸਾਲ ਤੋਂ ਦੋਸ਼ੀ ਔਰਤ ਦੇ ਸੰਪਰਕ ’ਚ ਸੀ। ਸ਼ਿਕਾਇਤ ਮੁਤਾਬਕ ਔਰਤ ਉਸ ਨੂੰ ਲਗਾਤਾਰ ਬਲੈਕ ਮੇਲ ਕਰ ਕੇ ਪੈਸੇ ਲੈ ਰਹੀ ਸੀ। ਘਟਨਾ ਤੋਂ ਕਰੀਬ 15 ਦਿਨ ਪਹਿਲਾਂ ਉਸ ਨੇ ਦੋ ਲੱਖ ਰੁਪਏ ਦੀ ਮੰਗ ਕੀਤੀ। ਉਨ੍ਹਾਂ ਪੁੱਤਰ ਨੂੰ ਭਰੋਸਾ ਦਿਤਾ ਕਿ ਅਗਲੇ ਦਿਨ ਪੰਚਾਇਤ ਜ਼ਰੀਏ ਔਰਤ ਨਾਲ ਗੱਲ ਕੀਤੀ ਜਾਵੇਗੀ, ਪਰ ਉਸੇ ਰਾਤ ਨੌਜਵਾਨ ਨੇ ਬੈੱਡਸ਼ੀਟ ਸਹਾਰੇ ਪੱਖੇ ਨਾਲ ਫਾਹਾ ਲੈ ਕੇ ਆਤਮਹੱਤਿਆ ਕਰ ਲਈ। ਘਟਨਾ ਦੇ ਬਾਅਦ ਜਦੋਂ ਮਾਂ ਨੇ ਪੁੱਤਰ ਦਾ ਮੋਬਾਈਲ ਦੇਖਿਆ ਤਾਂ ਉਸ ’ਚ ਆਤਮਹੱਤਿਆ ਤੋਂ ਪਹਿਲਾਂ ਰਿਕਾਰਡ ਕੀਤਾ ਗਿਆ ਇਕ ਵੀਡੀਓ ਮਿਲਿਆ, ਜਿਸ ’ਚ ਉਸ ਨੇ ਔਰਤ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਸ਼ਿਕਾਇਤ ’ਚ ਇਹ ਵੀ ਦੋਸ਼ ਲਾਇਆ ਗਿਆ ਕਿ ਔਰਤ ਦੇ ਰਿਸ਼ਤੇਦਾਰਾਂ ਨੇ ਵੀ ਨੌਜਵਾਨ ਨੂੰ ਫੋਨ 'ਤੇ ਧਮਕੀਆਂ ਦਿੱਤੀਆਂ ਸਨ।