ਲੰਬੇ ਸਮੇਂ ਤੋਂ ਤਰੱਕੀ ਦੀ ਉਡੀਕ ਕਰ ਰਹੇ ਅਧਿਆਪਕਾਂ ਲਈ ਖੁਸ਼ਖ਼ਬਰੀ, 760 ਅਧਿਆਪਕਾਂ ਨੂੰ ਮਾਸਟਰ ਕੈਡਰ 'ਚ ਪ੍ਰਮੋਸ਼ਨ; ਨਵੇਂ ਸਟੇਸ਼ਨ ’ਜੁਆਇਨ ਕਰਨ ਦੇ ਹੁਕਮ

ਸਟੇਟ ਬਿਊਰੋ, ਜਾਗਰਣ, ਚੰਡੀਗੜ੍ਹ : ਪੰਜਾਬ ਸਿੱਖਿਆ ਵਿਭਾਗ ਨੇ ਪ੍ਰਾਇਮਰੀ ਕੈਡਰ ਤੋਂ ਮਾਸਟਰ ਕੈਡਰ ਵਿੱਚ 760 ਅਧਿਆਪਕਾਂ ਨੂੰ ਪਦਉੱਨਤ ਕਰ ਦਿੱਤਾ ਹੈ। ਵਿਭਾਗ ਨੇ ਇਨ੍ਹਾਂ ਅਧਿਆਪਕਾਂ ਨੂੰ ਸਟੇਸ਼ਨ ਵੀ ਅਲਾਟ ਕਰ ਦਿੱਤੇ ਹਨ ਅਤੇ ਸਬੰਧਤ ਸਕੂਲ ਮੁਖੀਆਂ ਤੇ ਡੀਡੀਓਜ਼ ਨੂੰ ਅੱਜ ਹੀ ਜੁਆਇਨ ਕਰਵਾ ਕੇ ਹਾਜ਼ਰੀ ਰਿਪੋਰਟ ਮੁੱਖ ਦਫ਼ਤਰ ਭੇਜਣ ਦੇ ਹੁਕਮ ਦਿੱਤੇ ਹਨ।

ਪਦਉੱਨਤ ਅਧਿਆਪਕਾਂ ਵਿੱਚ ਸੋਸ਼ਲ ਸਾਇੰਸ ਦੇ 275, ਪੰਜਾਬੀ ਦੇ 225, ਹਿੰਦੀ ਦੇ 225, ਅੰਗਰੇਜ਼ੀ ਦੇ 28, ਸਰੀਰਕ ਸਿੱਖਿਆ ਦੇ ਚਾਰ ਅਤੇ ਹੋਮ ਸਾਇੰਸ ਦੇ ਤਿੰਨ ਅਧਿਆਪਕ ਸ਼ਾਮਲ ਹਨ। ਪ੍ਰਾਇਮਰੀ ਕੈਡਰ ਦੇ ਅਧਿਆਪਕ ਲੰਬੇ ਸਮੇਂ ਤੋਂ ਮਾਸਟਰ ਕੈਡਰ ਵਿੱਚ ਪਦਉੱਨਤੀ ਦੀ ਮੰਗ ਕਰ ਰਹੇ ਸਨ।

ਸੀਨੀਅਰਤਾ ਦੇ ਆਧਾਰ ’ਤੇ ਹੋਈ ਪਦਉੱਨਤੀ

ਵਿਭਾਗ ਨੇ ਪੰਜਾਬ ਐਜੂਕੇਸ਼ਨਲ (ਟੀਚਿੰਗ ਕੈਡਰ) ਗਰੁੱਪ-ਸੀ ਸਰਵਿਸ ਰੂਲਜ਼ ਅਤੇ ਇਨ੍ਹਾਂ ਵਿੱਚ ਕੀਤੀਆਂ ਸੋਧਾਂ ਤਹਿਤ ਪਦਉੱਨਤੀ ਪ੍ਰਕਿਰਿਆ ਪੂਰੀ ਕੀਤੀ ਹੈ। 21 ਅਗਸਤ 2026 ਨੂੰ ਜਾਰੀ ਨੋਟਿਸ ਵਿੱਚ ਯੋਗਤਾ ਲਈ 31 ਜੁਲਾਈ 2026 ਨੂੰ ਕੱਟਆਫ਼ ਤਰੀਕ ਰੱਖੀ ਗਈ ਸੀ। ਜ਼ਿਲ੍ਹਿਆਂ ਤੋਂ ਮਿਲੇ ਮਾਮਲਿਆਂ ਦੀ ਜਾਂਚ ਮਗਰੋਂ ਸੀਨੀਅਰਤਾ ਦੇ ਆਧਾਰ ’ਤੇ ਯੋਗ ਅਧਿਆਪਕਾਂ ਨੂੰ ਪਦਉੱਨਤ ਕੀਤਾ ਗਿਆ।

ਅਦਾਲਤੀ ਮਾਮਲੇ ’ਚ ਵੀ ਜੁਆਇਨਿੰਗ ਰਹੇਗੀ ਸੁਰੱਖਿਅਤ

ਵਿਭਾਗ ਨੇ ਕਿਹਾ ਹੈ ਕਿ ਪਦਉੱਨਤ ਅਧਿਆਪਕ ਪਹਿਲਾਂ ਅਲਾਟ ਕੀਤੇ ਸਟੇਸ਼ਨ ’ਤੇ ਜ਼ਰੂਰ ਜੁਆਇਨ ਕਰਨ। ਜੇ ਸਟੇਸ਼ਨ ਸਬੰਧੀ ਕੋਈ ਇਤਰਾਜ਼ ਹੈ ਤਾਂ ਜੁਆਇਨ ਕਰਨ ਤੋਂ ਬਾਅਦ ਸ਼ਿਕਾਇਤ ਮੁੱਖ ਦਫ਼ਤਰ ਭੇਜੀ ਜਾਵੇਗੀ। ਇਸ ਦਾ ਮਕਸਦ ਭਵਿੱਖ ਵਿੱਚ ਪਦਉੱਨਤੀ ਸਬੰਧੀ ਮਾਮਲਾ ਅਦਾਲਤ ਵਿੱਚ ਜਾਣ ਦੀ ਸੂਰਤ ਵਿੱਚ ਜੁਆਇਨਿੰਗ ਨੂੰ ਪ੍ਰਭਾਵਿਤ ਹੋਣ ਤੋਂ ਬਚਾਉਣਾ ਹੈ।

ਜੇ ਕੋਈ ਅਧਿਆਪਕ ਐੱਸਆਈਆਰ ਡਿਊਟੀ ’ਤੇ ਹੈ ਤਾਂ ਉਸ ਦੀ ਹਾਜ਼ਰੀ ਰਿਪੋਰਟ ਵਟਸਐਪ ਰਾਹੀਂ ਵੀ ਲਈ ਜਾ ਸਕਦੀ ਹੈ। ਜਿਸ ਸਟੇਸ਼ਨ ’ਤੇ ਅਸਾਮੀ ਪਹਿਲਾਂ ਹੀ ਭਰੀ ਹੋਵੇਗੀ, ਉੱਥੇ ਹਾਜ਼ਰੀ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਦਫ਼ਤਰ ਵਿੱਚ ਦਰਜ ਹੋਵੇਗੀ।

ਯੋਗਤਾ ਪੂਰੀ ਕਰਨਾ ਲਾਜ਼ਮੀ

ਵਿਭਾਗ ਨੇ ਸਪੱਸ਼ਟ ਕੀਤਾ ਹੈ ਕਿ ਕੱਟਆਫ਼ ਤਰੀਕ ਤੱਕ ਸਾਰੀਆਂ ਨਿਰਧਾਰਤ ਵਿੱਦਿਅਕ ਤੇ ਪੇਸ਼ੇਵਰ ਯੋਗਤਾਵਾਂ ਪੂਰੀਆਂ ਹੋਣੀਆਂ ਚਾਹੀਦੀਆਂ ਹਨ। ਗੈਰ-ਟੀਈਟੀ ਯੋਗ ਅਧਿਆਪਕਾਂ ਦੀ ਪਦਉੱਨਤੀ ਨਿਯਮਾਂ ਅਨੁਸਾਰ ਮੰਨਣਯੋਗ ਨਹੀਂ ਹੋਵੇਗੀ। ਯੋਗਤਾ ਜਾਂ ਦਸਤਾਵੇਜ਼ਾਂ ਵਿੱਚ ਗਲਤ ਜਾਣਕਾਰੀ ਮਿਲਣ ’ਤੇ ਪਦਉੱਨਤੀ ਰੱਦ ਕਰਕੇ ਅਧਿਆਪਕ ਨੂੰ ਮੁੜ ਫੀਡਰ ਕੈਡਰ ਵਿੱਚ ਭੇਜਿਆ ਜਾ ਸਕਦਾ ਹੈ। ਪਦਉੱਨਤ ਅਧਿਆਪਕਾਂ ਦਾ ਪਰਖ ਕਾਲ ਇੱਕ ਸਾਲ ਦਾ ਹੋਵੇਗਾ