ਭਾਜਪਾ ਦਫ਼ਤਰ ਗ੍ਰਨੇਡ ਹਮਲਾ : ਪੁਰਤਗਾਲ, ਫਰਾਂਸ ਤੇ ਪਾਕਿਸਤਾਨ ਨਾਲ ਜੁੜੀਆਂ ਸਾਜ਼ਿਸ਼ ਦੀਆਂ ਤਾਰਾਂ; ਚਾਰਜਸ਼ੀਟ 'ਚ ਵੱਡਾ ਖੁਲਾਸਾ

ਰਵੀ ਅਟਵਾਲ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਸੈਕਟਰ-37 ਸਥਿਤ ਪੰਜਾਬ ਭਾਜਪਾ ਦਫ਼ਤਰ 'ਤੇ 1 ਅਪ੍ਰੈਲ ਨੂੰ ਹੋਏ ਗ੍ਰਨੇਡ ਹਮਲੇ ਦੇ ਮਾਮਲੇ ਵਿੱਚ ਚੰਡੀਗੜ੍ਹ ਪੁਲਿਸ ਨੇ ਜ਼ਿਲ੍ਹਾ ਅਦਾਲਤ ਵਿੱਚ 11 ਮੁਲਜ਼ਮਾਂ ਖ਼ਿਲਾਫ਼ ਚਾਰਜਸ਼ੀਟ ਦਾਖ਼ਲ ਕਰ ਦਿੱਤੀ ਹੈ। ਚਾਰਜਸ਼ੀਟ ਵਿੱਚ ਜਾਂਚ ਏਜੰਸੀ ਨੇ ਦਾਅਵਾ ਕੀਤਾ ਹੈ ਕਿ ਸਾਜ਼ਿਸ਼ ਦੀਆਂ ਤਾਰਾਂ ਪੁਰਤਗਾਲ, ਫਰਾਂਸ ਅਤੇ ਪਾਕਿਸਤਾਨ ਨਾਲ ਜੁੜੀਆਂ ਹਨ। ਜਾਂਚ ਅਨੁਸਾਰ ਪਾਕਿਸਤਾਨ ਤੋਂ ਡਰੋਨ ਰਾਹੀਂ ਹਥਿਆਰ ਅਤੇ ਹੈਰੋਇਨ ਭੇਜੇ ਗਏ, ਜਦਕਿ ਪੁਰਤਗਾਲ ਅਤੇ ਫਰਾਂਸ ਵਿੱਚ ਬੈਠੇ ਹੈਂਡਲਰ ਐਨਕ੍ਰਿਪਟਡ ਮੈਸੇਜਿੰਗ ਐਪਾਂ ਰਾਹੀਂ ਪੂਰੇ ਆਪ੍ਰੇਸ਼ਨ ਨੂੰ ਸੰਚਾਲਿਤ ਕਰ ਰਹੇ ਸਨ।

ਪੁਲਿਸ ਮੁਤਾਬਕ ਸਾਜ਼ਿਸ਼ ਵਿੱਚ ਸ਼ਾਮਲ ਵਿਦੇਸ਼ੀ ਹੈਂਡਲਰਾਂ ਨੇ ਪੰਜਾਬ ਦੇ ਘੱਟ ਪੜ੍ਹੇ-ਲਿਖੇ ਅਤੇ ਆਰਥਿਕ ਤੌਰ 'ਤੇ ਕਮਜ਼ੋਰ ਨੌਜਵਾਨਾਂ ਨੂੰ ਵਰਤਿਆ। ਕੁਝ ਨੂੰ ਪੁਰਤਗਾਲ ਅਤੇ ਇਟਲੀ ਵਿੱਚ ਵਸਾਉਣ ਦਾ ਲਾਲਚ ਵੀ ਦਿੱਤਾ ਗਿਆ ਸੀ। ਚਾਰਜਸ਼ੀਟ ਅਨੁਸਾਰ ਪੁਰਤਗਾਲ ਵਿੱਚ ਬੈਠੇ ਬਲਜੋਤ ਸਿੰਘ ਉਰਫ਼ ਜੋਤਾ, ਸੁਰਜੀਤ ਉਰਫ਼ ਸਰਪੰਚ ਅਤੇ ਫਰਾਂਸ ਵਿੱਚ ਬੈਠੇ ਔਜਲਾ ਨੇ ਹਮਲੇ ਦੀ ਸਾਜ਼ਿਸ਼ ਰਚੀ, ਜਦਕਿ ਫਰਾਂਸ ਤੋਂ ਡਿਜ਼ੀਟਲ ਫੰਡਿੰਗ ਵੀ ਕੀਤੀ ਗਈ।

ਪਹਿਲਾ ਨਿਸ਼ਾਨਾ ਸੀ ਚੰਡੀਗੜ੍ਹ ਭਾਜਪਾ ਦਫ਼ਤਰ

ਚਾਰਜਸ਼ੀਟ ਅਨੁਸਾਰ ਹਮਲਾਵਰ ਗੁਰਤੇਜ ਉਰਫ਼ ਤੇਜ਼ੀ ਅਤੇ ਅਮਨਪ੍ਰੀਤ ਉਰਫ਼ ਅਮਨ ਪਹਿਲਾਂ ਸੈਕਟਰ-33 ਸਥਿਤ ਚੰਡੀਗੜ੍ਹ ਭਾਜਪਾ ਦਫ਼ਤਰ ਪਹੁੰਚੇ ਸਨ। ਉੱਥੇ ਭੀੜ ਜ਼ਿਆਦਾ ਹੋਣ ਕਾਰਨ ਉਨ੍ਹਾਂ ਨੇ ਯੋਜਨਾ ਬਦਲ ਦਿੱਤੀ। ਗੂਗਲ ਮੈਪ ਰਾਹੀਂ ਦੂਜੇ ਭਾਜਪਾ ਦਫ਼ਤਰ ਦੀ ਜਾਣਕਾਰੀ ਲੈ ਕੇ ਉਹ ਸੈਕਟਰ-37 ਸਥਿਤ ਪੰਜਾਬ ਭਾਜਪਾ ਦਫ਼ਤਰ ਪਹੁੰਚੇ। ਕਰੀਬ 15 ਤੋਂ 20 ਮਿੰਟ ਰੇਕੀ ਕਰਨ ਤੋਂ ਬਾਅਦ ਉਨ੍ਹਾਂ ਨੇ ਗ੍ਰਨੇਡ ਸੁੱਟਿਆ ਅਤੇ ਸੀਟੀਯੂ ਬੱਸ ਰਾਹੀਂ ਫ਼ਰਾਰ ਹੋ ਗਏ। ਪੁਲਿਸ ਦਾ ਦਾਅਵਾ ਹੈ ਕਿ ਹਮਲੇ ਦੀ ਵੀਡੀਓ ਜੈਂਗੀ ਐਪ ਰਾਹੀਂ ਵਿਦੇਸ਼ੀ ਹੈਂਡਲਰਾਂ ਨੂੰ ਭੇਜੀ ਗਈ ਸੀ।

'ਪਿਆਜ਼' ਸੀ ਗ੍ਰਨੇਡ ਦਾ ਕੋਡਵਰਡ

ਪੁਲਿਸ ਦੀ ਜਾਂਚ ਮੁਤਾਬਕ ਮੁਲਜ਼ਮ ਆਪਸੀ ਗੱਲਬਾਤ ਦੌਰਾਨ ਗ੍ਰਨੇਡ ਨੂੰ 'ਪਿਆਜ਼' ਅਤੇ ਗੋਲੀਆਂ ਨੂੰ 'ਦਾਣੇ' ਕਹਿੰਦੇ ਸਨ। ਚਾਰਜਸ਼ੀਟ ਵਿੱਚ ਦੱਸਿਆ ਗਿਆ ਹੈ ਕਿ 15 ਮਾਰਚ ਨੂੰ ਲਖਵਿੰਦਰ ਸਿੰਘ ਨੂੰ ਅੰਮ੍ਰਿਤਸਰ ਭੇਜਿਆ ਗਿਆ, ਜਿੱਥੇ ਉਸ ਨੂੰ ਹਥਿਆਰਾਂ ਨਾਲ ਭਰਿਆ ਬੈਗ ਸੌਂਪਿਆ ਗਿਆ। ਇਸ ਵਿੱਚ ਦੋ ਹੈਂਡ ਗ੍ਰਨੇਡ, ਇੱਕ ਪਿਸਤੌਲ ਅਤੇ 25-30 ਕਾਰਤੂਸ ਸਨ। ਇਹ ਬੈਗ ਵੱਖ-ਵੱਖ ਵਿਅਕਤੀਆਂ ਰਾਹੀਂ ਹੁੰਦਾ ਹੋਇਆ ਅਖ਼ੀਰ ਗੁਰਤੇਜ ਅਤੇ ਅਮਨ ਤੱਕ ਪਹੁੰਚਿਆ।

ਚਾਰਜਸ਼ੀਟ ਦੇ ਮੁੱਖ ਖੁਲਾਸੇ

11 ਮੁਲਜ਼ਮਾਂ ਖ਼ਿਲਾਫ਼ ਚਾਰਜਸ਼ੀਟ ਦਾਖ਼ਲ।

ਸਾਜ਼ਿਸ਼ ਦੀਆਂ ਤਾਰਾਂ ਪੁਰਤਗਾਲ, ਫਰਾਂਸ ਅਤੇ ਪਾਕਿਸਤਾਨ ਨਾਲ ਜੁੜਨ ਦਾ ਦਾਅਵਾ।

ਡਰੋਨ ਰਾਹੀਂ ਦੋ ਹੈਂਡ ਗ੍ਰਨੇਡ, ਇੱਕ ਪਿਸਤੌਲ ਅਤੇ 25-30 ਕਾਰਤੂਸ ਭੇਜੇ ਗਏ।

ਪਹਿਲਾ ਨਿਸ਼ਾਨਾ ਸੈਕਟਰ-33 ਸਥਿਤ ਚੰਡੀਗੜ੍ਹ ਭਾਜਪਾ ਦਫ਼ਤਰ ਸੀ।

ਭੀੜ ਕਾਰਨ ਯੋਜਨਾ ਬਦਲ ਕੇ ਸੈਕਟਰ-37 ਸਥਿਤ ਪੰਜਾਬ ਭਾਜਪਾ ਦਫ਼ਤਰ 'ਤੇ ਹਮਲਾ ਕੀਤਾ ਗਿਆ।

ਗ੍ਰਨੇਡ ਲਈ 'ਪਿਆਜ਼' ਅਤੇ ਗੋਲੀਆਂ ਲਈ 'ਦਾਣੇ' ਕੋਡਵਰਡ ਵਰਤੇ ਜਾਂਦੇ ਸਨ।