- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਚੰਡੀਗੜ੍ਹ ਕੈਸ਼ੀਅਰ ਕਤਲ ਕਾਂਡ 'ਚ ਵੱਡਾ ਖ਼ੁਲਾਸਾ, 'ਨਾਰਕੋ-ਟੈਰਰ ਨੈੱਟਵਰਕ ਬੇਨਕਾਬ'; ਪਾਕਿਸਤਾਨ ਤੋਂ ਆ ਰਹੇ ਨਕਲੀ ਨੋਟ, ਹਥਿਆਰ ਤੇ ਆਈਸ
ਸੈਕਟਰ-11 ਸਥਿਤ ਸ਼੍ਰੀ ਕੁਮਾਰ ਮੈਡੀਕੋਜ਼ ਦੇ ਕੈਸ਼ੀਅਰ ਜਾਨਕੀ ਦਾਸ ਕਤਲ ਕਾਂਡ ਦੀ ਜਾਂਚ ਨੇ ਪਾਕਿਸਤਾਨ ਤੋਂ ਚੱਲ ਰਹੇ ਇੱਕ ਵੱਡੇ ਕਰਾਸ-ਬਾਰਡਰ ਨਾਰਕੋ-ਟੈਰਰ ਅਤੇ ਫੇਕ ਇੰਡੀਅਨ ਕਰੰਸੀ ਨੈੱਟਵਰਕ ਦਾ ਪਰਦਾਫਾਸ਼ ਕਰਨ ਦਾ ਦਾਅਵਾ ਕੀਤਾ ਹੈ। ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਪਾਕਿਸਤਾਨ ਤੋਂ ਨੀਵੀਂ ਉਡਾਣ ਵਾਲੇ ਡਰੋਨਾਂ ਰਾਹੀਂ ਭਾਰਤੀ ਸਰਹੱਦ 'ਚ ਸੁੱਟੇ ਜਾਣ ਵਾਲੇ ਵਿਦੇਸ਼ੀ ਹਥਿਆਰ, ਹਾਈ-ਗ੍ਰੇਡ ਆਈਸ ਅਤੇ ਨਕਲੀ ਨੋਟ ਇੱਕ ਸੁਚੱਜੇ ਨੈੱਟਵਰਕ ਰਾਹੀਂ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੱਕ ਪਹੁੰਚਾਏ ਜਾ ਰਹੇ ਸਨ। ਡੀਐਸਪੀ ਕ੍ਰਾਈਮ ਲਕਸ਼ੈ ਪਾਂਡੇ ਦੀ ਅਗਵਾਈ ਅਤੇ ਇੰਸਪੈਕਟਰ ਨਰਿੰਦਰ ਸਿੰਘ ਪਟਿਆਲ ਦੀ ਅਗਵਾਈ ਹੇਠ ਟੀਮ ਨੇ ਪੰਜਾਬ ਦੇ ਤਰਨ
Posted By Sunita
Publish Date: Thu, 09 Jul 2026 12:27 PM (IST)
Updated Date: Thu, 09 Jul 2026 12:29 PM (IST)
ਜਾਗਰਣ ਸੰਵਾਦਦਾਤਾ, ਚੰਡੀਗੜ੍ਹ : ਸੈਕਟਰ-11 ਸਥਿਤ ਸ਼੍ਰੀ ਕੁਮਾਰ ਮੈਡੀਕੋਜ਼ ਦੇ ਕੈਸ਼ੀਅਰ ਜਾਨਕੀ ਦਾਸ ਕਤਲ ਕਾਂਡ ਦੀ ਜਾਂਚ ਨੇ ਪਾਕਿਸਤਾਨ ਤੋਂ ਚੱਲ ਰਹੇ ਇੱਕ ਵੱਡੇ ਕਰਾਸ-ਬਾਰਡਰ ਨਾਰਕੋ-ਟੈਰਰ ਅਤੇ ਫੇਕ ਇੰਡੀਅਨ ਕਰੰਸੀ ਨੈੱਟਵਰਕ ਦਾ ਪਰਦਾਫਾਸ਼ ਕਰਨ ਦਾ ਦਾਅਵਾ ਕੀਤਾ ਹੈ। ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਪਾਕਿਸਤਾਨ ਤੋਂ ਨੀਵੀਂ ਉਡਾਣ ਵਾਲੇ ਡਰੋਨਾਂ ਰਾਹੀਂ ਭਾਰਤੀ ਸਰਹੱਦ 'ਚ ਸੁੱਟੇ ਜਾਣ ਵਾਲੇ ਵਿਦੇਸ਼ੀ ਹਥਿਆਰ, ਹਾਈ-ਗ੍ਰੇਡ ਆਈਸ ਅਤੇ ਨਕਲੀ ਨੋਟ ਇੱਕ ਸੁਚੱਜੇ ਨੈੱਟਵਰਕ ਰਾਹੀਂ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੱਕ ਪਹੁੰਚਾਏ ਜਾ ਰਹੇ ਸਨ। ਡੀਐਸਪੀ ਕ੍ਰਾਈਮ ਲਕਸ਼ੈ ਪਾਂਡੇ ਦੀ ਅਗਵਾਈ ਅਤੇ ਇੰਸਪੈਕਟਰ ਨਰਿੰਦਰ ਸਿੰਘ ਪਟਿਆਲ ਦੀ ਅਗਵਾਈ ਹੇਠ ਟੀਮ ਨੇ ਪੰਜਾਬ ਦੇ ਤਰਨਤਾਰਨ ਅਤੇ ਅੰਮ੍ਰਿਤਸਰ 'ਚ ਕਈ ਦਿਨਾਂ ਤੱਕ ਚੱਲੀ ਛਾਪੇਮਾਰੀ ਦੌਰਾਨ ਤਿੰਨ ਮੁਲਜ਼ਮਾਂ ਗੁਰਮੀਤ ਸਿੰਘ ਉਰਫ਼ ਬਾਦਸ਼ਾਹ, ਆਕਾਸ਼ ਕੁਮਾਰ ਉਰਫ਼ ਮਨੀ ਅਤੇ ਸਚਿਨ ਸਿਲਵੈਸਟਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
ਇਸ ਪੂਰੇ ਨੈੱਟਵਰਕ ਦੇ ਮਾਸਟਰਮਾਈਂਡ ਅਤੇ ਕਪੂਰਥਲਾ ਜੇਲ੍ਹ 'ਚ ਬੰਦ ਖ਼ਤਰਨਾਕ ਗੈਂਗਸਟਰ ਧਰਮਿੰਦਰ ਸਿੰਘ ਉਰਫ਼ ਗੋਲੀ ਨੂੰ ਵੀ ਪ੍ਰੋਡਕਸ਼ਨ ਵਾਰੰਟ ’ਤੇ ਹਿਰਾਸਤ 'ਚ ਲੈ ਕੇ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਗਈ ਹੈ। ਪੁਲਿਸ ਨੇ ਮੁਲਜ਼ਮਾਂ ਦੇ ਕਬਜ਼ੇ 'ਚੋਂ 3.028 ਕਿਲੋਗ੍ਰਾਮ ਆਈਸ ਡਰੱਗ, ਅੱਠ ਲੱਖ ਰੁਪਏ ਦੇ ਨਕਲੀ ਨੋਟ, ਦੋ ਵਿਦੇਸ਼ੀ ਪਿਸਤੌਲ ਅਤੇ ਮੈਗਜ਼ੀਨ ਬਰਾਮਦ ਕੀਤੇ ਹਨ। ਮੁੱਢਲੀ ਜਾਂਚ 'ਚ ਇਹ ਨੈੱਟਵਰਕ ਪਾਕਿਸਤਾਨ, ਵਿਦੇਸ਼ਾਂ 'ਚ ਬੈਠੇ ਗੈਂਗਸਟਰਾਂ ਅਤੇ ਪੰਜਾਬ ਦੇ ਸਰਹੱਦੀ ਜ਼ਿਲ੍ਹਿਆਂ 'ਚ ਸਰਗਰਮ ਮਾਡਿਊਲਾਂ ਵਿਚਕਾਰ ਇੱਕ ਮਜ਼ਬੂਤ ਕੜੀ ਵਜੋਂ ਸਾਹਮਣੇ ਆਇਆ ਹੈ।
ਡਰੋਨ ਰਾਹੀਂ ਸਰਹੱਦ ਪਾਰ, ਫਿਰ ਕਈ ਹੱਥਾਂ 'ਚੋਂ ਲੰਘਦੀ ਸੀ ਖੇਪ
ਜਾਂਚ 'ਚ ਸਾਹਮਣੇ ਆਇਆ ਕਿ ਪਾਕਿਸਤਾਨ 'ਚ ਬੈਠੇ ਸੰਚਾਲਕ ਰਾਤ ਵੇਲੇ ਲੋ-ਫਲਾਈਂਗ ਡਰੋਨਾਂ ਰਾਹੀਂ ਪੰਜਾਬ ਸਰਹੱਦ ਨੇੜੇ ਹਥਿਆਰ, ਨਸ਼ੀਲੇ ਪਦਾਰਥ ਅਤੇ ਨਕਲੀ ਭਾਰਤੀ ਕਰੰਸੀ ਸੁੱਟਦੇ ਸਨ। ਇਸ ਤੋਂ ਬਾਅਦ ਸਰਹੱਦੀ ਖੇਤਰ 'ਚ ਸਰਗਰਮ ਸਥਾਨਕ ਮਾਡਿਊਲ, ਜਿਨ੍ਹਾਂ ਨੂੰ ਨੈੱਟਵਰਕ 'ਚ 'ਪਾਂਡੀ' ਕਿਹਾ ਜਾਂਦਾ ਹੈ, ਇਨ੍ਹਾਂ ਖੇਪਾਂ ਨੂੰ ਚੁੱਕ ਕੇ ਸੁਰੱਖਿਅਤ ਥਾਵਾਂ 'ਤੇ ਪਹੁੰਚਾਉਂਦੇ ਸਨ।
ਇਨ੍ਹਾਂ ਦਾ ਕੰਮ ਸਿਰਫ਼ ਕੰਸਾਈਨਮੈਂਟ ਚੁੱਕਣਾ ਹੀ ਨਹੀਂ ਸੀ, ਸਗੋਂ ਵਿਦੇਸ਼ਾਂ 'ਚ ਬੈਠੇ ਗੈਂਗਸਟਰਾਂ ਦੇ ਨਿਰਦੇਸ਼ਾਂ 'ਤੇ ਤੈਅ ਥਾਂ 'ਤੇ ਸਾਮਾਨ ਰੱਖ ਕੇ ਉਸ ਦੀ ਫ਼ੋਟੋ, ਵੀਡੀਓ ਅਤੇ ਲਾਈਵ ਲੋਕੇਸ਼ਨ ਭੇਜਣਾ ਵੀ ਸੀ। ਇਸ ਤੋਂ ਬਾਅਦ ਦੂਜੇ ਵਿਅਕਤੀ ਨੂੰ ਉਹੀ ਲੋਕੇਸ਼ਨ ਭੇਜੀ ਜਾਂਦੀ ਸੀ ਅਤੇ ਉਹ ਖੇਪ ਚੁੱਕ ਕੇ ਅਗਲੇ ਟਿਕਾਣੇ ਤੱਕ ਪਹੁੰਚਾਉਂਦਾ ਸੀ। ਇਸੇ ਤਰ੍ਹਾਂ ਕਈ ਪੜਾਵਾਂ 'ਚ ਸਾਮਾਨ ਆਖਰੀ ਸਪਲਾਇਰ ਤੱਕ ਪਹੁੰਚਦਾ ਸੀ। ਆਕਾਸ਼ ਕੁਮਾਰ ਉਰਫ਼ ਮਨੀ ਤੱਕ ਵੀ ਖੇਪ ਇਸੇ ਤਰੀਕੇ ਨਾਲ ਪਹੁੰਚਦੀ ਸੀ।
ਐਨਕ੍ਰਿਪਟਡ ਐਪਸ ਰਾਹੀਂ ਚੱਲਦਾ ਸੀ ਨੈੱਟਵਰਕ
ਪੂਰੇ ਗਿਰੋਹ ਦੇ ਮੈਂਬਰ ਐਂਡ-ਟੂ-ਐਂਡ ਐਨਕ੍ਰਿਪਟਡ ਮੈਸੇਜਿੰਗ ਐਪਲੀਕੇਸ਼ਨਾਂ ਰਾਹੀਂ ਇੱਕ ਦੂਜੇ ਦੇ ਸੰਪਰਕ 'ਚ ਸਨ। ਸਾਰੇ ਨਿਰਦੇਸ਼ ਵਿਦੇਸ਼ਾਂ 'ਚ ਬੈਠੇ ਹੈਂਡਲਰਾਂ ਅਤੇ ਜੇਲ੍ਹ 'ਚ ਬੰਦ ਗੈਂਗਸਟਰਾਂ ਵੱਲੋਂ ਦਿੱਤੇ ਜਾਂਦੇ ਸਨ। ਗੱਲਬਾਤ ਅਤੇ ਲੋਕੇਸ਼ਨ ਸ਼ੇਅਰਿੰਗ ਅਜਿਹੇ ਮਾਧਿਅਮਾਂ ਰਾਹੀਂ ਹੀ ਕੀਤੀ ਜਾਂਦੀ ਸੀ।
ਚੀਨ ਤੋਂ ਪਾਕਿਸਤਾਨ, ਫਿਰ ਭਾਰਤ ਪਹੁੰਚੀ 'ਜ਼ਿਗਾਨਾ'
ਜਾਨਕੀ ਦਾਸ ਦੇ ਕਤਲ 'ਚ ਵਰਤੀ ਗਈ ਵਿਦੇਸ਼ੀ ਜ਼ਿਗਾਨਾ ਪਿਸਤੌਲ ਚੀਨ ਤੋਂ ਪਾਕਿਸਤਾਨ ਦੇ ਰਸਤੇ ਡਰੋਨ ਰਾਹੀਂ ਭਾਰਤ ਭੇਜੀ ਗਈ ਸੀ। ਵਿਦੇਸ਼ ਬੈਠੇ ਗੈਂਗਸਟਰ ਨੇ ਇਹ ਹਥਿਆਰ ਪਾਕਿਸਤਾਨ ਰਾਹੀਂ ਮੰਗਵਾਇਆ ਸੀ। ਬਾਅਦ 'ਚ ਇਹ ਹਥਿਆਰ ਕਰੀਬ ਤਿੰਨ ਲੱਖ ਰੁਪਏ ਕਿਰਾਏ ’ਤੇ ਗੈਂਗਸਟਰ ਗੋਲਡੀ ਢਿੱਲੋਂ ਤੱਕ ਪਹੁੰਚਾਇਆ ਗਿਆ। ਕਤਲ ਤੋਂ ਬਾਅਦ ਹਥਿਆਰ ਵਾਪਸ ਨੈੱਟਵਰਕ ਨੂੰ ਮੋੜ ਦਿੱਤਾ ਗਿਆ ਸੀ।
ਕੇਂਦਰੀ ਏਜੰਸੀਆਂ ਵੀ ਜਾਂਚ 'ਚ ਹੋਈਆਂ ਸ਼ਾਮਲ
ਪੁਲਿਸ ਦਾ ਮੰਨਣਾ ਹੈ ਕਿ ਬਰਾਮਦ ਕੀਤੇ ਗਏ ਅੱਠ ਲੱਖ ਰੁਪਏ ਦੇ ਨਕਲੀ ਨੋਟ ਇਸ ਨੈੱਟਵਰਕ ਦਾ ਮਹਿਜ਼ ਇੱਕ ਹਿੱਸਾ ਹਨ। ਹੁਣ ਇਹ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਸਰਹੱਦ ਪਾਰ ਤੋਂ ਹੁਣ ਤੱਕ ਕਿੰਨੀ ਮਾਤਰਾ 'ਚ ਨਕਲੀ ਭਾਰਤੀ ਕਰੰਸੀ ਦੇਸ਼ 'ਚ ਪਹੁੰਚ ਚੁੱਕੀ ਹੈ ਅਤੇ ਇਸ ਦੀ ਵਰਤੋਂ ਕਿਹੜੇ-ਕਿਹੜੇ ਰਾਜਾਂ 'ਚ ਕੀਤੀ ਗਈ ਹੈ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਕੇਂਦਰੀ ਏਜੰਸੀਆਂ ਵੀ ਜਾਂਚ 'ਚ ਜੁੱਟ ਗਈਆਂ ਹਨ।