ਹੁਣ ਜਨਤਾ ਦੀ ਆਵਾਜ਼ ਸਿੱਧੀ ਪਹੁੰਚੇਗੀ ਸੰਸਦ, AI ਸਮਰੱਥ ਵੈੱਬ ਪੋਰਟਲ ਕਰੇਗਾ ਮਦਦ; 12 ਭਾਸ਼ਾਵਾਂ ਵਿੱਚ 24×7 ਸੁਵਿਧਾ

ਸੁਮੇਸ਼ ਠਾਕੁਰ, ਚੰਡੀਗੜ੍ਹ : ਹੁਣ ਜਨਤਾ ਦੀ ਆਵਾਜ਼ ਸਿੱਧੀ ਸੰਸਦ ਤਕ ਪਹੁੰਚੇਗੀ। ਇਹ ਸਭ ਇੱਕ ਵੈੱਬ ਪੋਰਟਲ ਰਾਹੀਂ ਸੰਭਵ ਹੋਵੇਗਾ। ਰਾਜ ਸਭਾ ਮੈਂਬਰ ਸਤਨਾਮ ਸਿੰਘ ਸੰਧੂ (Satnam Singh Sandhu) ਨੇ ਨਾਗਰਿਕਾਂ ਦੀ ਭਾਗੀਦਾਰੀ ਨੂੰ ਮਜ਼ਬੂਤ ਕਰਨ ਲਈ AI-ਸਮਰੱਥ ਵੈੱਬ ਪੋਰਟਲ https://satnamsandhu.in/ ਲਾਂਚ ਕੀਤਾ ਹੈ। ਇਹ ਪੋਰਟਲ 12 ਭਾਰਤੀ ਭਾਸ਼ਾਵਾਂ ਵਿੱਚ 24×7 ਸਹਾਇਤਾ ਪ੍ਰਦਾਨ ਕਰੇਗਾ।

ਪੋਰਟਲ ਨੂੰ ਲਾਂਚ ਕਰਦੇ ਸਮੇਂ ਸ਼ੁੱਕਰਵਾਰ ਨੂੰ ਸੰਸਦ ਮੈਂਬਰ ਸੰਧੂ ਨੇ ਕਿਹਾ ਕਿ ਵੈੱਬਸਾਈਟ ਜਨਤਾ ਨਾਲ ਸਿੱਧੇ ਜੁੜਨ ਦਾ ਇਕ ਸਾਧਨ ਹੈ। ਇਸ ਦਾ AI (ਆਰਟੀਫੀਸ਼ੀਅਲ ਇੰਟੈਲੀਜੈਂਸ) ਫੀਚਰ ਨਾਗਰਿਕਾਂ ਦੀ ਰਾਏ, ਸੁਝਾਅ ਅਤੇ ਸ਼ਿਕਾਇਤਾਂ ਨੂੰ ਇਕੱਠਾ ਕਰਕੇ ਸ਼ਹਿਰੀ ਅਤੇ ਪੇਂਡੂ ਖੇਤਰਾਂ ਵਿੱਚ ਕਿਸੇ ਵੀ ਮੁੱਦੇ ਜਾਂ ਸਮੱਸਿਆ ਦੇ ਪ੍ਰਭਾਵ ਦਾ ਵਿਸ਼ਲੇਸ਼ਣ ਕਰੇਗਾ।

ਇਹ ਪੋਰਟਲ ਸੰਸਦ ਦੀ ਕਾਰਵਾਈ, ਲੋਕ ਨੁਮਾਇੰਦਿਆਂ ਦੀ ਭੂਮਿਕਾ, ਸਰਕਾਰੀ ਨੀਤੀਆਂ ਦੇ ਪ੍ਰਭਾਵ ਅਤੇ ਜਨਤਕ ਸ਼ਿਕਾਇਤਾਂ ਦੇ ਨਿਪਟਾਰੇ ਲਈ ਉਪਲਬਧ ਪਲੇਟਫਾਰਮਾਂ ਬਾਰੇ ਜਾਗਰੂਕਤਾ ਵੀ ਪੈਦਾ ਕਰੇਗਾ। ਇਸ ਦਾ AI ਫੀਚਰ 'ਇਮੋਸ਼ਨ ਡਿਟੈਕਸ਼ਨ' (ਭਾਵਨਾਵਾਂ ਦੀ ਪਛਾਣ) ਰਾਹੀਂ ਗੁੱਸਾ, ਪਰੇਸ਼ਾਨੀ, ਕਾਹਲੀ ਜਾਂ ਪੀੜਾ ਵਰਗੀਆਂ ਭਾਵਨਾਵਾਂ ਦੇ ਆਧਾਰ 'ਤੇ ਕਿਸੇ ਮੁੱਦੇ ਦੀ ਗੰਭੀਰਤਾ ਦੀ ਪਛਾਣ ਕਰੇਗਾ।

ਪੋਰਟਲ ਵਿੱਚ ਉਪਲਬਧ ‘MP ਪਰਫਾਰਮੈਂਸ ਡੈਸ਼ਬੋਰਡ’ ਰਾਹੀਂ ਲੋਕ ਸੰਸਦ ਵਿੱਚ ਸੰਸਦ ਮੈਂਬਰ ਸੰਧੂ ਦੀਆਂ ਗਤੀਵਿਧੀਆਂ ਦੇਖ ਸਕਣਗੇ ਅਤੇ ਇਹ ਜਾਣ ਸਕਣਗੇ ਕਿ ਉਨ੍ਹਾਂ ਨੇ ਕਿਹੜੇ-ਕਿਹੜੇ ਸਵਾਲ ਉਠਾਏ ਅਤੇ ਬਹਿਸ ਵਿੱਚ ਕਿਵੇਂ ਹਿੱਸਾ ਲਿਆ। ਪੋਰਟਲ ਦੀ ਸ਼ੁਰੂਆਤ ਨਾਗਰਿਕਾਂ ਵੱਲੋਂ ਕੇਂਦਰੀ ਬਜਟ 2026-27 ਲਈ ਆਪਣੇ ਵਿਚਾਰ ਅਤੇ ਸੁਝਾਅ ਦੇਣ ਨਾਲ ਕੀਤੀ ਗਈ ਹੈ।

ਦੋ ਸਾਲਾਂ ਦੇ ਕਾਰਜਕਾਲ ਦਾ ਦਿੱਤਾ ਲੇਖਾ-ਜੋਖਾ

ਸੰਸਦ ਮੈਂਬਰ ਸਤਨਾਮ ਸਿੰਘ ਸੰਧੂ ਨੇ ਪੋਰਟਲ ਲਾਂਚ ਕਰਨ ਦੇ ਨਾਲ-ਨਾਲ ਆਪਣੇ ਦੋ ਸਾਲਾਂ ਦਾ ਲੇਖਾ-ਜੋਖਾ ਵੀ ਸਾਂਝਾ ਕੀਤਾ। ਜਨਵਰੀ 2024 ਵਿੱਚ ਰਾਜ ਸਭਾ ਮੈਂਬਰ ਨਾਮਜ਼ਦ ਕੀਤੇ ਜਾਣ ਤੋਂ ਬਾਅਦ ਚਾਰ ਸੰਸਦ ਸੈਸ਼ਨਾਂ ਵਿੱਚ 100 ਫੀਸਦੀ ਹਾਜ਼ਰੀ ਦਰਜ ਕਰਵਾਈ। ਇਸ ਦੌਰਾਨ 150 ਸਵਾਲ ਪੁੱਛੇ, 35 ਬਹਿਸਾਂ ਵਿੱਚ ਹਿੱਸਾ ਲਿਆ, 10 ਵਿਸ਼ੇਸ਼ ਜ਼ਿਕਰ ਕੀਤੇ ਅਤੇ ਚਾਰ ਨਿੱਜੀ ਮੈਂਬਰ ਬਿੱਲ (Private Member Bills) ਪੇਸ਼ ਕੀਤੇ। ਸਿਫ਼ਰ ਕਾਲ (Zero Hour) ਦੌਰਾਨ ਉਨ੍ਹਾਂ ਨੇ ਜਨਹਿਤ ਦੇ 19 ਜ਼ਰੂਰੀ ਮੁੱਦੇ ਉਠਾਏ। ਪੰਜਾਬ ਨਾਲ ਸਬੰਧਤ 54 ਸਵਾਲਾਂ ਰਾਹੀਂ ਪਾਣੀ ਦਾ ਪ੍ਰਦੂਸ਼ਣ, ਡਰੱਗਜ਼, ਹੜ੍ਹ, ‘ਡੰਕੀ ਰੂਟ’, ਐਮ.ਐਸ.ਪੀ., ਕੈਮੀਕਲ ਖਾਦਾਂ ਅਤੇ ਖੇਤੀਬਾੜੀ ਨਾਲ ਜੁੜੇ ਅਹਿਮ ਮੁੱਦੇ ਸੰਸਦ ਵਿੱਚ ਰੱਖੇ। ਸਿੱਖ ਕੌਮ ਨਾਲ ਜੁੜੇ 11 ਸਵਾਲਾਂ ਵਿੱਚ ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦਾ ਸ਼ਹੀਦੀ ਦਿਹਾੜਾ, ਪਾਕਿਸਤਾਨ ਅਤੇ ਅਫ਼ਗਾਨਿਸਤਾਨ ਵਿੱਚ ਸਿੱਖਾਂ 'ਤੇ ਅੱਤਿਆਚਾਰ, ਸਿਕਲੀਗਰ ਸਿੱਖਾਂ ਦੀ ਕਲਾ, ਤਖ਼ਤ ਸੱਚਖੰਡ ਸ੍ਰੀ ਹਜ਼ੂਰ ਸਾਹਿਬ ਤੱਕ ਰੇਲ ਸੰਪਰਕ ਅਤੇ ਮਹਾਰਾਜਾ ਰਣਜੀਤ ਸਿੰਘ ਦੀ ਵਿਰਾਸਤ ਵਰਗੇ ਵਿਸ਼ੇ ਸ਼ਾਮਲ ਸਨ।

ਪ੍ਰਦੂਸ਼ਣ ਵੱਡੀ ਸਮੱਸਿਆ, ਘੱਟ ਗਿਣਤੀ ਹਿੱਤਾਂ ਲਈ ਸਰਕਾਰ ਕਰ ਰਹੀ ਹੈ ਕੰਮ

ਸੰਸਦ ਮੈਂਬਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਘੱਟ ਗਿਣਤੀਆਂ, ਸਿੱਖਿਆ, ਹੁਨਰ ਵਿਕਾਸ (Skill Development) ਅਤੇ ਉੱਦਮਤਾ ਨਾਲ ਜੁੜੇ ਸਵਾਲ ਵੀ ਪੁੱਛੇ। ਸੰਸਦ ਵਿੱਚ ਉਨ੍ਹਾਂ ਨੇ ਪੰਜਾਬ ਦੇ ਜ਼ਮੀਨੀ ਪਾਣੀ ਵਿੱਚ ਯੂਰੇਨੀਅਮ ਅਤੇ ਨਾਈਟ੍ਰੇਟ ਪ੍ਰਦੂਸ਼ਣ, ਲੰਬਿਤ ਵਜ਼ੀਫੇ (Scholarships), ਪ੍ਰਵਾਸੀ ਨੌਜਵਾਨਾਂ ਦੀ ਤਸਕਰੀ, ਬੁੱਢਾ ਨਾਲਾ ਪ੍ਰਦੂਸ਼ਣ ਅਤੇ ਪੰਜਾਬੀ ਭਾਸ਼ਾ ਦੇ ਸੱਭਿਆਚਾਰ ਦੀ ਸੁਰੱਖਿਆ ਵਰਗੇ ਮੁੱਦਿਆਂ 'ਤੇ ਆਵਾਜ਼ ਉਠਾਈ।

ਉਨ੍ਹਾਂ ਵੱਲੋਂ ਪੇਸ਼ ਕੀਤੇ ਗਏ ਚਾਰ ਨਿੱਜੀ ਮੈਂਬਰ ਬਿੱਲਾਂ ਨਦੀਆਂ ਨੂੰ ਕਾਨੂੰਨੀ ਵਿਅਕਤੀ ਦਾ ਦਰਜਾ ਦੇਣ, ਕਿਸਾਨਾਂ ਲਈ ਲਾਜ਼ਮੀ ਬੀਮਾ, ਉੱਚ ਵਿੱਦਿਅਕ ਸੰਸਥਾਵਾਂ ਦੀ ਰੈਂਕਿੰਗ, ਪ੍ਰਵਾਸੀ ਭਾਰਤੀਆਂ (NRIs) ਦੀ ਪ੍ਰਤਿਭਾ ਨੂੰ ਦੇਸ਼ ਦੇ ਵਿਕਾਸ ਲਈ ਵਰਤਣਾ ਆਦਿ ਸ਼ਾਮਲ ਹਨ। ਉਨ੍ਹਾਂ ਅਨੁਸਾਰ, ਇਹ AI-ਸਮਰੱਥ ਪੋਰਟਲ ਸ਼ਾਸਨ ਨੂੰ ਵਧੇਰੇ ਪਾਰਦਰਸ਼ੀ, ਜਵਾਬਦੇਹ ਅਤੇ ਸਮਾਵੇਸ਼ੀ ਬਣਾਉਣ ਦੀ ਦਿਸ਼ਾ ਵਿੱਚ ਇੱਕ ਅਹਿਮ ਕਦਮ ਹੈ।