SSP ਬਠਿੰਡਾ ਨੇ ਜ਼ਿਲ੍ਹਾ ਪੁਲਿਸ 'ਚ ਥਾਣਾ ਤੇ ਚੌਕੀ ਪੱਧਰ 'ਤੇ ਕੀਤੇ ਫੇਰਬਦਲ, 8 ਚੌਕੀ ਇੰਚਾਰਜ ਬਦਲੇ ਤੇ 3 ਅਧਿਕਾਰੀ ਪੁਲਿਸ ਲਾਈਨ ਭੇਜੇ

ਜਾਗਰਣ ਪੱਤਰ ਪ੍ਰੇਰਕ, ਬਠਿੰਡਾ: ਅਮਨ ਕਾਨੂੰਨ ਦੀ ਵਿਵਸਥਾ ਨੂੰ ਹੋਰ ਵਧੀਆ ਬਣਾਉਣ ਦੇ ਉਦੇਸ਼ ਨਾਲ ਐਸ.ਐਸ.ਪੀ.ਬਠਿੰਡਾ ਨੇ ਜ਼ਿਲ੍ਹਾ ਪੁਲਿਸ ਵਿੱਚ ਥਾਣਾ ਅਤੇ ਚੌਕੀ ਪੱਧਰ 'ਤੇ ਵਿਆਪਕ ਫੇਰਬਦਲ ਕੀਤੇ ਹਨ। ਇਸ ਪ੍ਰਸ਼ਾਸਨਿਕ ਤਬਦੀਲੀ ਤਹਿਤ ਅੱਠ ਪੁਲਿਸ ਚੌਕੀਆਂ ਦੇ ਇੰਚਾਰਜ ਬਦਲੇ ਗਏ ਹਨ, ਜਦੋਂ ਕਿ ਤਿੰਨ ਅਧਿਕਾਰੀਆਂ ਨੂੰ ਫੀਲਡ ਡਿਊਟੀ ਤੋਂ ਹਟਾ ਕੇ ਪੁਲਿਸ ਲਾਈਨਜ਼ ਵਿੱਚ ਭੇਜਿਆ ਗਿਆ ਹੈ।

ਐਸਐਸਪੀ ਦਫ਼ਤਰ ਵੱਲੋਂ ਜਾਰੀ ਹੁਕਮਾਂ ਅਨੁਸਾਰ ਚੌਕੀ ਬਰਧਮਾਨ ਵਿਖੇ ਤਾਇਨਾਤ ਐਸਐਚਓ ਜਗਸੀਰ ਸਿੰਘ ਦਾ ਤਬਾਦਲਾ ਕਰਕੇ ਉਨ੍ਹਾਂ ਨੂੰ ਬਠਿੰਡਾ ਦੀ ਅਹਿਮ ਚੌਕੀ ਬੱਸ ਸਟੈਂਡ ਦਾ ਇੰਚਾਰਜ ਨਿਯੁਕਤ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਸੀਆਈਏ ਸਟਾਫ-2 ਵਿੱਚ ਤਾਇਨਾਤ ਸੁਖਪ੍ਰੀਤ ਸਿੰਘ ਨੂੰ ਚੌਕੀ ਵਰਧਮਾਨ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ।

ਪੁਲਿਸ ਲਾਈਨ ਤੋਂ ਰਾਜਪਾਲ ਸਿੰਘ ਨੂੰ ਚੌਕੀ ਬੱਲੂਆਣਾ ਦਾ ਨਵਾਂ ਇੰਚਾਰਜ ਨਿਯੁਕਤ ਕੀਤਾ ਗਿਆ ਹੈ। ਚੌਕੀ ਬੱਲੂਆਣਾ ਵਿਖੇ ਤਾਇਨਾਤ ਪਰਦੀਪ ਕੁਮਾਰ ਨੂੰ ਚੌਕੀ ਕੇਂਦਰੀ ਜੇਲ੍ਹ ਬਠਿੰਡਾ ਭੇਜ ਦਿੱਤਾ ਗਿਆ ਹੈ। ਮਲਕੀਤ ਸਿੰਘ ਨੂੰ ਕੇਂਦਰੀ ਜੇਲ੍ਹ ਚੌਕੀ ਤੋਂ ਬਦਲ ਕੇ ਥਾਣਾ ਸੰਗਤ ਵਿੱਚ ਤਾਇਨਾਤ ਕੀਤਾ ਗਿਆ ਹੈ।

ਇਸੇ ਕੜੀ ਤਹਿਤ ਪੁਲਿਸ ਲਾਈਨ ਤੋਂ ਨਿਰਮਲਜੀਤ ਸਿੰਘ ਨੂੰ ਚੌਕੀ ਕਿਲੀ ਨਿਹਾਲ ਸਿੰਘ ਵਾਲਾ ਦਾ ਇੰਚਾਰਜ ਲਾਇਆ ਗਿਆ ਹੈ, ਜਦੋਂ ਕਿ ਉਥੇ ਤਾਇਨਾਤ ਗੁਰਤੇਜ ਸਿੰਘ ਨੂੰ ਥਾਣਾ ਸਿਟੀ ਰਾਮਪੁਰਾ ਵਿਖੇ ਭੇਜਿਆ ਗਿਆ ਹੈ। ਥਾਣਾ ਸੰਗਤ ਤੋਂ ਧਰਮਵੀਰ ਸਿੰਘ ਨੂੰ ਚੌਕੀ ਪਥਰਾਲਾ ਦਾ ਇੰਚਾਰਜ ਲਾਇਆ ਗਿਆ ਹੈ। ਡੀਐਸਪੀ ਤਲਵੰਡੀ ਸਾਬੋ ਦੇ ਰੀਡਰ ਰਵਨੀਤ ਸਿੰਘ ਨੂੰ ਚੌਕੀ ਸਿੰਗੋ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ। ਇਸ ਦੌਰਾਨ ਚੌਕੀ ਸਿੰਗੋ ਵਿਖੇ ਤਾਇਨਾਤ ਕੁਲਵਿੰਦਰ ਸਿੰਘ ਨੂੰ ਚੌਕੀ ਰਿਫਾਇਨਰੀ ਦਾ ਨਵਾਂ ਇੰਚਾਰਜ ਲਾਇਆ ਗਿਆ ਹੈ।

ਪ੍ਰਸ਼ਾਸਨਿਕ ਕਾਰਨਾਂ ਕਰਕੇ ਚੌਕੀ ਬੱਸ ਸਟੈਂਡ ਵਿਖੇ ਤਾਇਨਾਤ ਜਸਕਰਨ ਸਿੰਘ, ਚੌਕੀ ਪਥਰਾਲਾ ਦੇ ਸੁਖਜੰਟ ਸਿੰਘ ਅਤੇ ਚੌਕੀ ਰਿਫਾਇਨਰੀ ਦੇ ਕੁਲਵਿੰਦਰ ਸਿੰਘ ਨੂੰ ਫੀਲਡ ਡਿਊਟੀ ਤੋਂ ਹਟਾ ਕੇ ਪੁਲਿਸ ਲਾਈਨਜ਼ ਬਠਿੰਡਾ ਭੇਜ ਦਿੱਤਾ ਗਿਆ ਹੈ।

ਐਸ.ਐਸ.ਪੀ ਨੇ ਸਾਰੇ ਨਵ-ਨਿਯੁਕਤ ਅਧਿਕਾਰੀਆਂ ਨੂੰ ਹਦਾਇਤ ਕੀਤੀ ਹੈ ਕਿ ਉਹ ਤੁਰੰਤ ਪ੍ਰਭਾਵ ਨਾਲ ਆਪਣੇ ਨਵੇਂ ਤਾਇਨਾਤੀ ਸਥਾਨਾਂ 'ਤੇ ਪਹੁੰਚ ਕੇ ਚਾਰਜ ਸੰਭਾਲਣ ਅਤੇ ਡਿਊਟੀ ਦੌਰਾਨ ਪੂਰੀ ਚੌਕਸੀ ਰੱਖਣ। ਪੁਲਿਸ ਵਿਭਾਗ ਵਿੱਚ ਇਸ ਫੇਰਬਦਲ ਨੂੰ ਪ੍ਰਸ਼ਾਸਨਿਕ ਕੰਮਕਾਜ ਨੂੰ ਹੋਰ ਮਜ਼ਬੂਤ ​​ਕਰਨ ਦਾ ਉਪਰਾਲਾ ਮੰਨਿਆ ਜਾ ਰਿਹਾ ਹੈ।