ਜ਼ਿਲ੍ਹਾ ਕ੍ਰਿਕਟ ਐਸੋਸੀਏਸ਼ਨ ਦੀ ਸਲਾਨਾ ਮੀਟਿੰਗ: ਪਦਮਸ਼੍ਰੀ ਰਾਜਿੰਦਰ ਗੁਪਤਾ ਦਾ ਕੀਤਾ ਧੰਨਵਾਦ

ਯਾਦਵਿੰਦਰ ਸਿੰਘ ਭੁੱਲਰ, ਪੰਜਾਬੀ ਜਾਗਰਣ,

ਬਰਨਾਲਾ : ਕਦੇ ਕ੍ਰਿਕਟ ਦੇ ਨਕਸ਼ੇ 'ਤੇ ਹਾਸ਼ੀਏ ਵਾਲਾ ਸਮਝਿਆ ਜਾਂਦਾ ਬਰਨਾਲਾ ਜ਼ਿਲ੍ਹਾ ਅੱਜ ਪੰਜਾਬ ਦੇ ਉੱਭਰਦੇ ਕ੍ਰਿਕਟ ਕੇਂਦਰਾਂ ’ਚ ਗਿਣਿਆ ਜਾਣ ਲੱਗਾ ਹੈ। ਜ਼ਿਲ੍ਹਾ ਕ੍ਰਿਕਟ ਐਸੋਸੀਏਸ਼ਨ ਬਰਨਾਲਾ ਦੀ ਸਾਲਾਨਾ ਜਨਰਲ ਮੀਟਿੰਗ ’ਚ ਪੇਸ਼ ਕੀਤੇ ਅੰਕੜੇ ਇਸ ਗੱਲ ਦੀ ਗਵਾਹੀ ਭਰਦੇ ਹਨ ਕਿ ਜੇ ਸਹੀ ਸਹੂਲਤਾਂ, ਮਾਰਗਦਰਸ਼ਨ ਤੇ ਸਰਪ੍ਰਸਤੀ ਮਿਲੇ ਤਾਂ ਛੋਟੇ ਸ਼ਹਿਰਾਂ ਦੀ ਪ੍ਰਤਿਭਾ ਵੀ ਕੌਮੀ ਪੱਧਰ ਤੱਕ ਪਹੁੰਚ ਸਕਦੀ ਹੈ। ਮੀਟਿੰਗ ਐਸੋਸੀਏਸ਼ਨ ਦੇ ਪ੍ਰਧਾਨ ਵਿਵੇਕ ਸਿੰਧਵਾਨੀ ਦੀ ਅਗਵਾਈ ਹੇਠ ਅਰੁਣ ਮੈਮੋਰੀਅਲ ਹਾਲ, ਬਰਨਾਲਾ ਸਥਿਤ ਦਫ਼ਤਰ ਵਿਖੇ ਹੋਈ। ਇਸ ’ਚ ਜਨਰਲ ਸਕੱਤਰ ਰੁਪਿੰਦਰ ਗੁਪਤਾ, ਖਜ਼ਾਨਚੀ ਸੰਜੇ ਗਰਗ, ਗੁਰਪ੍ਰੀਤ ਸਿੰਘ ਲਾਡੀ, ਸੰਜੀਵ ਸ਼ੋਰੀ, ਕੁਲਦੀਪ ਸਿੰਘ ਗਰੇਵਾਲ, ਚਰਨਜੀਤ ਸਿੰਘ, ਜਗਰਾਜ ਸਿੰਘ, ਵਰੁਣ ਭਾਰਤੀ, ਸ਼ਿਵ ਸਿੰਗਲਾ, ਨੀਟੂ ਢੀਂਗਰਾ, ਡਾ. ਰਾਜੀਵ ਗਰਗ, ਨਰੇਸ਼ ਗਰੋਵਰ, ਡਾ. ਨਰੇਸ਼ ਗੋਇਲ, ਸ਼ਾਮ ਸੁੰਦਰ ਜੈਨ, ਸੰਜੀਵ ਬਾਂਸਲ, ਸੰਦੀਪ, ਸ਼ੈਲੀ ਅਰੋੜਾ, ਅਨਿਲ ਗੁਪਤਾ, ਸਾਹਿਲ ਗੁਲਾਟੀ, ਕਮਲ ਗੁਪਤਾ ਬੱਬੂ, ਵਿਕਾਸ ਬਾਂਸਲ ਬੰਟੀ, ਕੇਸ਼ਵ ਗਰਗ, ਸੰਦੀਪ ਗਰਗ ਤੇ ਲੋਕੇਸ਼ ਸਮੇਤ ਲਗਭਗ ਤਿੰਨ ਦਰਜਨ ਮੈਂਬਰ ਹਾਜ਼ਰ ਸਨ।

ਖਿਡਾਰੀਆਂ ਦੀ ਗਿਣਤੀ ਹੀ ਨਹੀਂ, ਗੁਣਵੱਤਾ ਵੀ ਵਧੀ

ਪ੍ਰਧਾਨ ਵਿਵੇਕ ਸਿੰਧਵਾਨੀ ਨੇ ਐਸੋਸੀਏਸ਼ਨ ਦੀਆਂ ਗਤੀਵਿਧੀਆਂ 'ਤੇ ਚਾਨਣਾ ਪਾਉਂਦਿਆਂ ਦੱਸਿਆ ਕਿ ਜ਼ਿਲ੍ਹੇ ’ਚ ਇਸ ਵੇਲੇ ਤਿੰਨ ਕ੍ਰਿਕਟ ਅਕੈਡਮੀਆਂ ਚੱਲ ਰਹੀਆਂ ਹਨ, ਜਿਨ੍ਹਾਂ ’ਚ 220 ਖਿਡਾਰੀ ਕੋਚਿੰਗ ਲੈ ਰਹੇ ਹਨ। ਇਹ ਸਿਰਫ਼ ਗਿਣਤੀ ਦੀ ਗੱਲ ਨਹੀਂ, ਨਤੀਜੇ ਵੀ ਇਸ ਮਿਹਨਤ ਦੀ ਪੁਸ਼ਟੀ ਕਰਦੇ ਹਨ। ਜ਼ਿਲ੍ਹੇ ਦੇ 24 ਖਿਡਾਰੀ ਪੰਜਾਬ ਕੈਂਪ ’ਚ ਪਹੁੰਚ ਚੁੱਕੇ ਹਨ, ਜਦਕਿ 13 ਖਿਡਾਰੀਆਂ ਨੂੰ ਪੰਜਾਬ ਟੀਮ ਲਈ ਚੁਣਿਆ ਗਿਆ ਹੈ। ਉਨ੍ਹਾਂ ਵਿਸ਼ੇਸ਼ ਤੌਰ 'ਤੇ ਦੋ ਨਾਵਾਂ ਦਾ ਜ਼ਿਕਰ ਕੀਤਾ। ਜ਼ਿਲ੍ਹੇ ਦਾ ਖਿਡਾਰੀ ਹਵਨੀਤ ਸਿੰਘ ਸ਼ੇਰੇ ਪੰਜਾਬ ਲੀਗ ਲਈ ਚੁਣਿਆ ਗਿਆ ਸੀ, ਜਦਕਿ ਖਿਡਾਰਨ ਅਕਸ਼ਤਾ ਭਗਤ ਭਾਰਤ ‘ਏ’ ਟੀਮ ਦਾ ਹਿੱਸਾ ਬਣੀ ਤੇ ਕੁਝ ਦਿਨ ਪਹਿਲਾਂ ਹੀ ਆਸਟਰੇਲੀਆ ਖ਼ਿਲਾਫ਼ ਮੈਚ ਖੇਡ ਕੇ ਆਈ ਹੈ। ਬਰਨਾਲਾ ਦੀ ਧੀ ਦਾ ਕੌਮਾਂਤਰੀ ਪੱਧਰ ਦੇ ਮੁਕਾਬਲੇ ਵਿੱਚ ਉਤਰਨਾ ਜ਼ਿਲ੍ਹੇ ਲਈ ਮਾਣ ਵਾਲੀ ਗੱਲ ਹੈ ਤੇ ਖ਼ਾਸ ਕਰਕੇ ਕੁੜੀਆਂ ਲਈ ਪ੍ਰੇਰਨਾ ਦਾ ਸਰੋਤ ਵੀ।

-----

ਮੁਫ਼ਤ ਸਹੂਲਤਾਂ ਪਿੱਛੇ ਪਦਮਸ੍ਰੀ ਰਾਜਿੰਦਰ ਗੁਪਤਾ ਦੀ ਸਰਪ੍ਰਸਤੀ

ਸਿੰਧਵਾਨੀ ਨੇ ਇਸ ਸਾਰੀ ਪ੍ਰਾਪਤੀ ਦਾ ਵੱਡਾ ਸਿਹਰਾ ਟਰਾਈਡੈਂਟ ਗਰੁੱਪ ਤੇ ਇਸ ਦੇ ਸੰਸਥਾਪਕ ਪਦਮਸ਼੍ਰੀ ਰਾਜਿੰਦਰ ਗੁਪਤਾ ਨੂੰ ਦਿੰਦਿਆਂ ਉਨ੍ਹਾਂ ਦਾ ਉਚੇਚਾ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਗੁਪਤਾ ਦੇ ਸਹਿਯੋਗ ਸਦਕਾ ਹੀ ਅਕੈਡਮੀਆਂ ਚੱਲ ਰਹੀਆਂ ਹਨ ਤੇ ਉਨ੍ਹਾਂ ਦੀ ਅਗਵਾਈ ਹੇਠ ਖਿਡਾਰੀਆਂ ਨੂੰ ਹਰ ਤਰ੍ਹਾਂ ਦੀ ਸਹੂਲਤ ਬਿਲਕੁਲ ਮੁਫ਼ਤ ਮੁਹੱਈਆ ਕਰਵਾਈ ਜਾ ਰਹੀ ਹੈ। ਇਹ ਉਹ ਪਹਿਲੂ ਹੈ ਜੋ ਆਮ ਪਰਿਵਾਰਾਂ ਦੇ ਬੱਚਿਆਂ ਲਈ ਕ੍ਰਿਕਟ ਵਰਗੀ ਮਹਿੰਗੀ ਖੇਡ ਦੇ ਦਰਵਾਜ਼ੇ ਖੋਲ੍ਹਦਾ ਹੈ, ਕਿਉਂਕਿ ਕਿੱਟ, ਕੋਚਿੰਗ ਅਤੇ ਮੈਦਾਨ ਦਾ ਖ਼ਰਚਾ ਅਕਸਰ ਪ੍ਰਤਿਭਾ ਦੇ ਰਾਹ ’ਚ ਅੜਿੱਕਾ ਬਣ ਜਾਂਦਾ ਹੈ।

-----

ਆਉਣ ਵਾਲੇ ਸਮੇਂ ਦੀ ਯੋਜਨਾ: ਟੂਰਨਾਮੈਂਟ ਤੇ ਨਵੀਆਂ ਸਹੂਲਤਾਂ

ਜਨਰਲ ਸਕੱਤਰ ਰੁਪਿੰਦਰ ਗੁਪਤਾ ਨੇ ਐਸੋਸੀਏਸ਼ਨ ਦੇ ਕੰਮਕਾਜ ਦੀ ਸਾਲਾਨਾ ਰਿਪੋਰਟ ਪੇਸ਼ ਕੀਤੀ ਤੇ ਭਵਿੱਖ ਦੀਆਂ ਯੋਜਨਾਵਾਂ ਦਾ ਖ਼ਾਕਾ ਰੱਖਿਆ। ਉਨ੍ਹਾਂ ਦੱਸਿਆ ਕਿ ਜਲਦੀ ਹੀ ਐਸੋਸੀਏਸ਼ਨ ਵੱਲੋਂ ਇੰਟਰ ਡਿਸਟ੍ਰਿਕਟ ਸਕੂਲ ਟੂਰਨਾਮੈਂਟ ਕਰਵਾਏ ਜਾਣਗੇ, ਜਿਸ ਨਾਲ ਸਕੂਲੀ ਪੱਧਰ ਦੇ ਖਿਡਾਰੀਆਂ ਨੂੰ ਵੱਡਾ ਮੰਚ ਮਿਲੇਗਾ। ਆਰੀਆਭੱਟ ਕਾਲਜ ਵਿਖੇ ਚੱਲ ਰਹੀ ਅਕੈਡਮੀ ਨੂੰ ਹੋਰ ਆਧੁਨਿਕ ਸਹੂਲਤਾਂ ਨਾਲ ਅਪਗ੍ਰੇਡ ਕੀਤਾ ਜਾਵੇਗਾ। ਪ੍ਰੈਜ਼ੀਡੈਂਟ ਅਕੈਡਮੀ ’ਚ ਨਵੀਆਂ ਫਲੱਡ ਲਾਈਟਾਂ ਲਗਾਈਆਂ ਜਾਣਗੀਆਂ, ਜਿਸ ਨਾਲ ਸ਼ਾਮ ਵੇਲੇ ਵੀ ਅਭਿਆਸ ਅਤੇ ਮੈਚ ਸੰਭਵ ਹੋ ਸਕਣਗੇ। ਫਲੱਡ ਲਾਈਟਾਂ ਦਾ ਲੱਗਣਾ ਖ਼ਾਸ ਤੌਰ 'ਤੇ ਉਨ੍ਹਾਂ ਵਿਦਿਆਰਥੀਆਂ ਲਈ ਲਾਹੇਵੰਦ ਹੋਵੇਗਾ ਜੋ ਸਕੂਲ ਜਾਂ ਕਾਲਜ ਦੇ ਸਮੇਂ ਤੋਂ ਬਾਅਦ ਹੀ ਮੈਦਾਨ ’ਚ ਪਹੁੰਚ ਪਾਉਂਦੇ ਹਨ।

ਵਿੱਤੀ ਰਿਪੋਰਟ ਵੀ ਪੇਸ਼

ਖ਼ਜ਼ਾਨਚੀ ਸੰਜੇ ਗਰਗ ਨੇ ਐਸੋਸੀਏਸ਼ਨ ਦੀ ਸਾਲਾਨਾ ਵਿੱਤੀ ਰਿਪੋਰਟ ਪੇਸ਼ ਕੀਤੀ, ਜਿਸ ਨੂੰ ਹਾਜ਼ਰ ਮੈਂਬਰਾਂ ਨੇ ਧਿਆਨ ਨਾਲ ਸੁਣਿਆ।

ਮੀਟਿੰਗ ’ਚ ਹਾਜ਼ਰ ਮੈਂਬਰਾਂ ਨੇ ਐਸੋਸੀਏਸ਼ਨ ਦੀ ਕਾਰਗੁਜ਼ਾਰੀ ’ਤੇ ਸੰਤੁਸ਼ਟੀ ਪ੍ਰਗਟਾਈ ਤੇ ਖਿਡਾਰੀਆਂ ਦੇ ਬਿਹਤਰ ਭਵਿੱਖ ਲਈ ਮਿਲ ਕੇ ਕੰਮ ਕਰਨ ਦਾ ਅਹਿਦ ਲਿਆ। ਪ੍ਰਬੰਧਕਾਂ ਦਾ ਕਹਿਣਾ ਸੀ ਕਿ ਟੀਚਾ ਸਿਰਫ਼ ਖਿਡਾਰੀਆਂ ਨੂੰ ਪੰਜਾਬ ਟੀਮ ਤੱਕ ਪਹੁੰਚਾਉਣਾ ਨਹੀਂ, ਸਗੋਂ ਭਾਰਤੀ ਟੀਮ ਦੇ ਦਰਵਾਜ਼ੇ ਤੱਕ ਲੈ ਜਾਣਾ ਹੈ।