ਰਣਜੀਤ ਐਵੇਨਿਊ ਈ ਬਲਾਕ ਤੋਂ ਕੂੜੇ ਦਾ ਡੰਪ ਹਟਾਇਆ ਜਾਵੇ, ਆਰਚਿਡ ਸਿਟੀ-ਲੋਹਾਰਕਾ ਰੋਡ ਬਣਾਈ ਜਾਵੇ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ ਅੰਮ੍ਰਿਤਸਰ : ਸਰਬ ਲੋਕ ਕਲਿਆਣ ਕਮੇਟੀ ਦੇ ਵਫ਼ਦ ਨੇ ਨਗਰ ਨਿਗਮ ਕਮਿਸ਼ਨਰ ਨਾਲ ਮੁਲਾਕਾਤ ਕੀਤੀ, ਜਿਸ ਵਿਚ ਈ ਬਲਾਕ ਆਨੰਦ ਪਾਰਕ ਦੇ ਨੇੜੇ ਕੂੜੇ ਦੇ ਡੰਪ ਨੂੰ ਹਟਾਉਣ ਦੀ ਮੰਗ ਕੀਤੀ ਗਈ। ਉਨ੍ਹਾਂ ਨੇ ਆਰਚਿਡ ਸਿਟੀ ਅਤੇ ਲੋਹਾਰਕਾ ਰੋਡ ਦੇ ਵਿਚਕਾਰ 1 ਕਿਲੋਮੀਟਰ ਦੀ ਖਸਤਾ ਸੜਕ ਦੀ ਮੁਰੰਮਤ ਦੀ ਵੀ ਮੰਗ ਕੀਤੀ। ਨਗਰ ਨਿਗਮ ਕਮਿਸ਼ਨਰ ਨੇ ਮੌਕੇ ਤੇ ਅਧਿਕਾਰੀਆਂ ਨੂੰ ਵਫ਼ਦ ਦੀਆਂ ਮੁਸ਼ਕਿਲਾਂ ਨੂੰ ਦੂਰ ਕਰਨ ਦੇ ਨਿਰਦੇਸ਼ ਦਿੱਤੇ। ਵਫ਼ਦ ਨੇ ਕਿਹਾ ਕਿ ਸ਼ਹਿਰ ਦੇ ਪਾਸ਼ ਰਣਜੀਤ ਐਵੀਨਿਊ ਈ ਬਲਾਕ ਖੇਤਰ ਵਿਚ ਕੂੜੇ ਦੇ ਡੰਪ ਨੇ ਗੰਦਗੀ ਦੀ ਗੰਭੀਰ ਸਮੱਸਿਆ ਪੈਦਾ ਕਰ ਦਿੱਤੀ ਹੈ। ਪਹਿਲਾਂ ਭਰੋਸਾ ਦਿੱਤਾ ਗਿਆ ਸੀ ਕਿ ਕੂੜੇ ਦੇ ਡੰਪ ਨੂੰ ਹਟਾ ਦਿੱਤਾ ਜਾਵੇਗਾ, ਪਰ ਅਜਿਹਾ ਨਹੀਂ ਕੀਤਾ ਗਿਆ। ਕੂੜੇ ਦਾ ਡੰਪ ਵਧਦਾ ਹੀ ਜਾ ਰਿਹਾ ਹੈ। ਕੂੜੇ ਤੋਂ ਨਿਕਲਣ ਵਾਲੀ ਬਦਬੂ ਨੇ ਪਾਸ਼ ਖੇਤਰ ਵਿਚ ਸਥਿਤੀ ਨੂੰ ਹੋਰ ਵੀ ਵਿਗੜ ਦਿੱਤਾ ਹੈ ਅਤੇ ਬੀਮਾਰੀਆਂ ਫੈਲਣ ਦਾ ਖ਼ਤਰਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਇਲਾਕਾ ਪਹਿਲਾਂ ਹੀ ਗੰਦੇ ਨਾਲਿਆਂ ਦੀ ਸਮੱਸਿਆ ਦਾ ਸਾਹਮਣਾ ਕਰ ਰਿਹਾ ਹੈ। ਇਸ ਤੋਂ ਇਲਾਵਾ ਆਰਚਿਡ ਸਿਟੀ ਤੋਂ ਲੋਹਾਰਕਾ ਰੋਡ ਤੱਕ ਸੜਕ ਦਾ ਲਗਭਗ ਇਕ ਕਿਲੋਮੀਟਰ ਬਣਾਉਣ ਦੀ ਮੰਗ ਕੀਤੀ ਗਈ। ਇਸੇ ਵਫ਼ਦ ਨੇ ਆਪਣੀਆਂ ਮੰਗਾਂ ਪੇਸ਼ ਕਰਨ ਲਈ ਵਧੀਕ ਡਿਪਟੀ ਕਮਿਸ਼ਨਰ ਪਲਵੀ ਮਿਸ਼ਰਾ ਨਾਲ ਵੀ ਮੁਲਾਕਾਤ ਕੀਤੀ। ਵਫ਼ਦ ਵਿਚ ਰਣਜੀਤ ਵਿਹਾਰ ਅਤੇ ਲੋਹਾਰਕਾ ਰੋਡ ਖੇਤਰਾਂ ਤੋਂ ਹਰਵਿੰਦਰ ਸਿੰਘ ਵਿਰਕ, ਤਰਸੇਮ ਸਿੰਘ ਚਾਹਲ, ਦਲਜੀਤ ਸਿੰਘ ਢਿੱਲੋਂ, ਅਮਨ ਢੋਟ, ਹਰਭਜਨ ਸਿੰਘ, ਅਮਨਦੀਪ ਸਿੰਘ, ਮੰਗਲ ਸਿੰਘ, ਪਰਮਾਰ ਸਾਹਿਬ, ਕੈਪਟਨ ਜਵਾਹਰ ਸਿੰਘ, ਸਰਬਜੀਤ ਸਿੰਘ, ਸੁਖਰਾਜ ਸਿੰਘ, ਪ੍ਰੀਤਪਾਲ ਸਿੰਘ ਅਤੇ ਨੰਬਰਦਾਰ ਹਰਮਨ ਗੁਮਟਾਲਾ ਸ਼ਾਮਲ ਸਨ। 10 ਦਿਨਾਂ ’ਚ ਸੜਕ ਬਣਾਉਣ ਦੇ ਨਿਰਦੇਸ਼ ਨਗਰ ਨਿਗਮ ਕਮਿਸ਼ਨਰ ਬਿਕਰਮਜੀਤ ਸਿੰਘ ਸ਼ੇਰਗਿੱਲ ਨੇ ਐਸਈ ਸੰਦੀਪ ਸਿੰਘ ਨੂੰ ਆਰਚਿਡ ਸਿਟੀ ਤੋਂ ਗੁਮਟਾਲਾ ਤੱਕ ਸੜਕ 10 ਦਿਨਾਂ ਦੇ ਅੰਦਰ ਬਣਾਉਣ ਦੇ ਨਿਰਦੇਸ਼ ਦਿੱਤੇ। ਉਨ੍ਹਾਂ ਕੂੜਾ ਇਕੱਠਾ ਕਰਨ ਵਾਲੀ ਕੰਪਨੀ ਨੂੰ ਸਫਾਈ ਨੂੰ ਯਕੀਨੀ ਬਣਾਉਣ ਅਤੇ ਈ ਬਲਾਕ ਵਿਚ ਕੂੜੇ ਦੇ ਢੇਰ ਨੂੰ ਰੋਕਣ ਦੇ ਵੀ ਨਿਰਦੇਸ਼ ਦਿੱਤੇ।