ਅੰਮ੍ਰਿਤਸਰ ਹਵਾਈ ਅੱਡੇ ’ਤੇ ਉਡਾਣਾਂ ਦੀ ਪਾਬੰਦੀ ਹਟੀ, ਵਿੰਟਰ ਸ਼ਡਿਊਲ ’ਚ ਸ਼ੁਰੂ ਹੋਣਗੀਆਂ ਉਡਾਣਾਂ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਅੰਮ੍ਰਿਤਸਰ : ਸ੍ਰੀ ਗੁਰੂ ਰਾਮਦਾਸ ਜੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਰਨਵੇਅ ਦੀ ਰੀ-ਕਾਰਪੇਟਿੰਗ ਅਤੇ ਆਧੁਨਿਕ ਐੱਲਈਡੀ ਲਾਈਟਾਂ ਲਗਾਉਣ ਕਾਰਨ ਦੁਪਹਿਰ 2 ਤੋਂ ਰਾਤ 10 ਵਜੇ ਤੱਕ ਲਗਾਈ ਗਈ ਉਡਾਣਾਂ ਦੀ ਪਾਬੰਦੀ ਹਟਾ ਦਿੱਤੀ ਗਈ ਹੈ। ਹਾਲਾਂਕਿ ਏਅਰਲਾਈਨਜ਼ ਨੇ ਫਿਲਹਾਲ ਇਸ ਸਮੇਂ ਦੌਰਾਨ ਉਡਾਣਾਂ ਸ਼ੁਰੂ ਨਹੀਂ ਕੀਤੀਆਂ। 25 ਅਕਤੂਬਰ ਤੋਂ ਵਿੰਟਰ ਸ਼ਡਿਊਲ ਲਾਗੂ ਹੋਣ ਮਗਰੋਂ ਇਸ ਸਮੇਂ ਦੌਰਾਨ ਉਡਾਣਾਂ ਦੀ ਆਵਾਜਾਈ ਪਹਿਲਾਂ ਵਾਂਗ ਆਮ ਹੋਣ ਦੀ ਉਮੀਦ ਹੈ।

ਏਅਰਪੋਰਟ ਅਥਾਰਟੀ ਨੇ 1 ਅਪ੍ਰੈਲ ਤੋਂ 27 ਸਤੰਬਰ ਤੱਕ ਰੋਜ਼ਾਨਾ ਅੱਠ ਘੰਟਿਆਂ ਲਈ ਰਨਵੇਅ ਬੰਦ ਰੱਖਿਆ ਸੀ। ਇਸ ਕਾਰਨ ਏਅਰਲਾਈਨਜ਼ ਨੇ ਆਪਣੀਆਂ ਉਡਾਣਾਂ ਦੇ ਸਮੇਂ ’ਚ ਬਦਲਾਅ ਕੀਤਾ ਸੀ। ਹੁਣ ਰਨਵੇਅ ’ਤੇ ਹੋਰ ਵਿਕਾਸ ਕਾਰਜ ਪੂਰੇ ਹੋ ਚੁੱਕੇ ਹਨ।

ਅਗਲੇ ਸਾਲ ਹੋਵੇਗੀ ਰਨਵੇਅ ਦੀ ਰੀ-ਕਾਰਪੇਟਿੰਗ

ਸ੍ਰੀ ਗੁਰੂ ਰਾਮਦਾਸ ਜੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ 3658 ਮੀਟਰ ਲੰਬੇ ਰਨਵੇਅ ਦੀ ਰੀ-ਕਾਰਪੇਟਿੰਗ ਦਾ ਕੰਮ ਅਪ੍ਰੈਲ ’ਚ ਸ਼ੁਰੂ ਕੀਤਾ ਗਿਆ ਸੀ। ਉਡਾਣਾਂ ਦੀ ਆਵਾਜਾਈ ਸੁਚਾਰੂ ਰੱਖਣ ਲਈ ਦੋ ਲੇਅਰਾਂ ’ਚ ਰੀ-ਕਾਰਪੇਟਿੰਗ ਦੀ ਯੋਜਨਾ ਸੀ। ਹਾਲਾਂਕਿ ਬਿਟੂਮਨ ਦੀ ਘਾਟ ਅਤੇ ਬਾਅਦ ’ਚ ਮਾਨਸੂਨ ਕਾਰਨ ਇਹ ਕੰਮ ਪੂਰਾ ਨਹੀਂ ਹੋ ਸਕਿਆ। ਹੁਣ ਰੀ-ਕਾਰਪੇਟਿੰਗ ਅਗਲੇ ਸਾਲ ਹੋਵੇਗੀ। ਏਅਰਪੋਰਟ ’ਤੇ ਰੋਜ਼ਾਨਾ ਕਰੀਬ 56 ਉਡਾਣਾਂ ਦੀ ਆਵਾਜਾਈ ਹੁੰਦੀ ਹੈ, ਜਿਨ੍ਹਾਂ ’ਚ ਲਗਭਗ 18 ਅੰਤਰਰਾਸ਼ਟਰੀ ਉਡਾਣਾਂ ਹਨ।

ਆਈਐੱਲਸੀਐੱਮਐੱਸ ਤੇ ਡੀਵੀਓਆਰ ਅਪਗ੍ਰੇਡ

ਏਅਰਪੋਰਟ ’ਤੇ ਇੰਡੀਵਿਜੁਅਲ ਲੈਂਪ ਕੰਟਰੋਲ ਐਂਡ ਮਾਨੀਟਰਿੰਗ ਸਿਸਟਮ (ਆਈਐੱਲਸੀਐੱਮਐੱਸ) ਲਗਾਇਆ ਗਿਆ ਹੈ। ਇਸ ਨਾਲ ਖ਼ਰਾਬ ਲਾਈਟ ਦੀ ਤੁਰੰਤ ਪਛਾਣ ਹੋ ਸਕੇਗੀ। ਪਹਿਲਾਂ ਲਾਈਟਾਂ ਦੀ ਮੈਨੂਅਲੀ ਜਾਂਚ ਕਰਨੀ ਪੈਂਦੀ ਸੀ, ਜਿਸ ’ਚ ਕਰੀਬ ਅੱਧਾ ਘੰਟਾ ਲੱਗਦਾ ਸੀ। ਪੁਰਾਣੀਆਂ ਲਾਈਟਾਂ ਦੀ ਥਾਂ ਰਨਵੇਅ ’ਤੇ ਆਧੁਨਿਕ ਐੱਲਈਡੀ ਲਾਈਟਾਂ ਲਗਾਈਆਂ ਗਈਆਂ ਹਨ। ਇਸ ਤੋਂ ਇਲਾਵਾ ਡਾਪਲਰ ਵੈਰੀ ਹਾਈ ਫ੍ਰੀਕੁਐਂਸੀ ਓਮਨੀਡਾਇਰੈਕਸ਼ਨਲ ਰੇਂਜ (ਡੀਵੀਓਆਰ) ਸਿਸਟਮ ਵੀ ਅਪਗ੍ਰੇਡ ਕੀਤਾ ਗਿਆ ਹੈ।

ਰਨਵੇਅ ’ਤੇ ਪਾਬੰਦੀ ਹਟਾਈ : ਡਾਇਰੈਕਟਰ

ਏਅਰਪੋਰਟ ਡਾਇਰੈਕਟਰ ਏਕੇ ਸ਼ਰਮਾ ਨੇ ਦੱਸਿਆ ਕਿ ਵਿਕਾਸ ਕਾਰਜਾਂ ਕਾਰਨ ਰੋਜ਼ਾਨਾ ਅੱਠ ਘੰਟਿਆਂ ਲਈ ਰਨਵੇਅ ਬੰਦ ਰੱਖਿਆ ਜਾਂਦਾ ਸੀ, ਜਿਸ ਨੂੰ ਹੁਣ ਬਹਾਲ ਕਰ ਦਿੱਤਾ ਗਿਆ ਹੈ। ਏਅਰਲਾਈਨਜ਼ ਨੇ ਅਜੇ ਇਸ ਸਮੇਂ ਦੌਰਾਨ ਉਡਾਣਾਂ ਸ਼ੁਰੂ ਨਹੀਂ ਕੀਤੀਆਂ। ਉਨ੍ਹਾਂ ਕਿਹਾ ਕਿ ਬਿਟੂਮਨ ਦੀ ਘਾਟ ਅਤੇ ਬਾਅਦ ’ਚ ਬਰਸਾਤ ਕਾਰਨ ਰੀ-ਕਾਰਪੇਟਿੰਗ ਨਹੀਂ ਹੋ ਸਕੀ, ਜਦਕਿ ਬਾਕੀ ਵਿਕਾਸ ਕਾਰਜ ਪੂਰੇ ਹੋ ਚੁੱਕੇ ਹਨ।