ਇਕ ਪਿੰਡ, ਦੋ ਘਰ ਤੇ 12 ਅਰਥੀਆਂ… ਵੈਸ਼ਾਲੀ ਕਿਸ਼ਤੀ ਹਾਦਸੇ 'ਚ ਕਿਸੇ ਨੇ ਧੀਆਂ ਤਾਂ ਕਿਸੇ ਨੇ ਪੁੱਤ ਗੁਆਏ

Posted By Seema Anand

Publish Date: Wed, 14 Oct 2026 01:31 PM (IST)

Updated Date: Wed, 14 Oct 2026 01:33 PM (IST)

ਇਕ ਪਿੰਡ, ਦੋ ਘਰ ਤੇ 12 ਅਰਥੀਆਂ… ਵੈਸ਼ਾਲੀ ਕਿਸ਼ਤੀ ਹਾਦਸੇ 'ਚ ਕਿਸੇ ਨੇ ਧੀਆਂ ਤਾਂ ਕਿਸੇ ਨੇ ਪੁੱਤ ਗੁਆਏ

ਸੰਵਾਦ ਸੂਤਰ, ਰਾਘੋਪੁਰ (ਵੈਸ਼ਾਲੀ) : ਰਾਘੋਪੁਰ ਕਿਸ਼ਤੀ ਹਾਦਸੇ ਨੇ ਰਾਮਪੁਰ ਸ਼ਿਆਮਚੰਦ ਪਿੰਡ ਨੂੰ ਅਜਿਹਾ ਜ਼ਖ਼ਮ ਦਿੱਤਾ ਹੈ, ਜਿਸ ਨੂੰ ਭਰ ਸਕਣਾ ਆਸਾਨ ਨਹੀਂ ਹੋਵੇਗਾ। ਬੁੱਧਵਾਰ ਨੂੰ ਪਿੰਡ ਦੇ ਦੋ ਘਰਾਂ 'ਚੋਂ ਇੱਕੋ ਸਮੇਂ 12 ਅਰਥੀਆਂ ਨਿਕਲੀਆਂ ਤਾਂ ਪੂਰਾ ਪਿੰਡ ਧਾਹਾਂ ਮਾਰ ਕੇ ਰੋ ਪਿਆ। ਕਿਤੇ ਇੱਕੋ ਪਰਿਵਾਰ ਦੇ ਤਿੰਨ ਭਰਾਵਾਂ ਦੇ ਛੇ ਬੱਚਿਆਂ ਅਤੇ ਉਨ੍ਹਾਂ ਦੀ ਭੈਣ ਦੀ ਮੌਤ ਨਾਲ ਘਰ ਉੱਜੜ ਗਿਆ, ਤਾਂ ਕਿਤੇ ਚਾਰ ਧੀਆਂ ਅਤੇ ਇੱਕ ਪੁੱਤ ਦੀ ਮੌਤ ਨੇ ਪਰਿਵਾਰ ਦੀਆਂ ਖ਼ੁਸ਼ੀਆਂ ਖੋਹ ਲਈਆਂ। ਪਰਿਵਾਰਕ ਮੈਂਬਰ ਬੱਚਿਆਂ ਦੀਆਂ ਲਾਸ਼ਾਂ ਨਾਲ ਲਿਪਟ ਕੇ ਬਿਲਖਦੇ ਰਹੇ। ਪਿੰਡ 'ਚ ਸੋਗ ਅਜਿਹਾ ਪਸਰਿਆ ਕਿ ਕਈ ਘਰਾਂ 'ਚ ਚੁੱਲ੍ਹੇ ਤੱਕ ਨਹੀਂ ਬਲੇ।

ਇੱਕੋ ਵਿਹੜੇ 'ਚੋਂ ਉੱਠੀਆਂ ਸੱਤ ਅਰਥੀਆਂ, ਤਿੰਨ ਭਰਾਵਾਂ ਦਾ ਪਰਿਵਾਰ ਉੱਜੜਿਆ

ਰਾਮਪੁਰ ਸ਼ਿਆਮਚੰਦ ਪਿੰਡ 'ਚ ਫਰਨੀਚਰ ਦਾ ਕਾਰੋਬਾਰ ਕਰਨ ਵਾਲੇ ਸੁਰੇਸ਼ ਰਾਏ ਦੇ ਪਰਿਵਾਰ 'ਤੇ ਦੁੱਖਾਂ ਦਾ ਪਹਾੜ ਟੁੱਟ ਪਿਆ। ਕਿਸ਼ਤੀ ਹਾਦਸੇ 'ਚ ਉਨ੍ਹਾਂ ਦੇ ਪਰਿਵਾਰ ਦੇ ਸੱਤ ਜੀਆਂ ਦੀ ਮੌਤ ਹੋ ਗਈ।

ਮ੍ਰਿਤਕਾਂ 'ਚ ਸੁਰੇਸ਼ ਰਾਏ ਦੀਆਂ ਦੋ ਧੀਆਂ ਅਲੀਸ਼ਾ ਕੁਮਾਰੀ ਅਤੇ ਸ੍ਰਿਸ਼ਟੀ ਕੁਮਾਰੀ, ਉਨ੍ਹਾਂ ਦੇ ਭਰਾ ਰਾਮਨਰੇਸ਼ ਰਾਏ ਦਾ ਪੁੱਤ ਪੀਯੂਸ਼ ਕੁਮਾਰ ਅਤੇ ਧੀ ਸੋਨਮ ਕੁਮਾਰੀ, ਦੂਜੇ ਭਰਾ ਅਖਿਲੇਸ਼ ਰਾਏ ਦੇ ਪੁੱਤਰ ਆਰੀਅਨ ਕੁਮਾਰ ਅਤੇ ਬੰਟੀ ਕੁਮਾਰ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਤਿੰਨਾਂ ਭਰਾਵਾਂ ਦੀ ਭੈਣ ਸੋਨੀ ਕੁਮਾਰੀ ਦੀ ਵੀ ਹਾਦਸੇ 'ਚ ਜਾਨ ਚਲੀ ਗਈ।

ਇੱਕੋ ਘਰ 'ਚੋਂ ਸੱਤ ਅਰਥੀਆਂ ਨਿਕਲਦੀਆਂ ਦੇਖ ਪਿੰਡ ਦੇ ਲੋਕ ਆਪਣੇ ਹੰਝੂ ਨਹੀਂ ਰੋਕ ਸਕੇ। ਘਰ ਦੀਆਂ ਔਰਤਾਂ ਅਤੇ ਬਜ਼ੁਰਗਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਸੀ। ਜਿਸ ਵਿਹੜੇ 'ਚ ਬੱਚਿਆਂ ਦੇ ਹਾਸੇ ਗੂੰਜਦੇ ਸਨ, ਉੱਥੇ ਇੱਕੋ ਸਮੇਂ ਸੱਤ ਆਪਣੇ ਜੀਆਂ ਨੂੰ ਗੁਆਉਣ ਦਾ ਗਮ ਪਸਰਿਆ ਹੋਇਆ ਸੀ।

ਛੇ ਬੱਚਿਆਂ ਦੇ ਨਾਲ ਇਕਲੌਤੀ ਭੈਣ ਨੂੰ ਵੀ ਗੁਆਇਆ

ਸੁਰੇਸ਼ ਰਾਏ ਨੇ ਦੱਸਿਆ ਕਿ ਹਾਦਸੇ 'ਚ ਤਿੰਨਾਂ ਭਰਾਵਾਂ ਦੇ ਛੇ ਬੱਚਿਆਂ ਅਤੇ ਉਨ੍ਹਾਂ ਦੀ ਭੈਣ ਦੀ ਮੌਤ ਹੋ ਗਈ। ਉਨ੍ਹਾਂ ਕਿਹਾ ਕਿ 13 ਭੈਣ-ਭਰਾਵਾਂ 'ਚੋਂ ਸੋਨੀ ਸਭ ਤੋਂ ਛੋਟੀ ਸੀ। ਇੱਕੋ ਹਾਦਸੇ 'ਚ ਪਰਿਵਾਰ ਦੇ ਇੰਨੇ ਜੀਆਂ ਨੂੰ ਗੁਆਉਣ ਕਾਰਨ ਘਰ ਦੇ ਲੋਕ ਡੂੰਘੇ ਸਦਮੇ 'ਚ ਹਨ। ਬੱਚਿਆਂ ਦੀ ਮੌਤ ਨੇ ਤਿੰਨਾਂ ਭਰਾਵਾਂ ਦੇ ਪਰਿਵਾਰਾਂ ਨੂੰ ਅੰਦਰੋਂ ਤੋੜ ਕੇ ਰੱਖ ਦਿੱਤਾ ਹੈ। ਪਿੰਡ 'ਚ ਹਰ ਪਾਸੇ ਸੋਗ ਅਤੇ ਸੰਨਾਟਾ ਪਸਰਿਆ ਹੋਇਆ ਹੈ।

ਦੂਜੇ ਘਰ 'ਚੋਂ ਵੀ ਉੱਠੀਆਂ ਪੰਜ ਅਰਥੀਆਂ, ਚਾਰ ਧੀਆਂ ਤੇ ਇੱਕ ਪੁੱਤ ਦੀ ਮੌਤ

ਇਸੇ ਪਿੰਡ 'ਚ ਇਕ ਹੋਰ ਪਰਿਵਾਰ ਦਾ ਦੁੱਖ ਵੀ ਘੱਟ ਨਹੀਂ ਸੀ। ਕਿਸ਼ਤੀ ਹਾਦਸੇ 'ਚ ਸਤੇਂਦਰ ਰਾਏ ਦੀ 14 ਸਾਲਾ ਧੀ ਨਿਸ਼ੂ ਕੁਮਾਰੀ ਦੀ ਮੌਤ ਹੋ ਗਈ। ਉਨ੍ਹਾਂ ਦੇ ਭਤੀਜੇ ਰਾਜਕਿਸ਼ੋਰ ਰਾਏ ਦੀਆਂ ਤਿੰਨ ਧੀਆਂ—14 ਸਾਲਾ ਅੰਕਿਤਾ, 10 ਸਾਲਾ ਅੰਕੀ ਅਤੇ ਸੱਤ ਸਾਲਾ ਅੰਮ੍ਰਿਤਾ—ਵੀ ਹਾਦਸੇ 'ਚ ਜਾਨ ਗੁਆ ਬੈਠੀਆਂ। ਉੱਥੇ ਹੀ, ਦੂਜੇ ਭਤੀਜੇ ਮੁਕੇਸ਼ ਰਾਏ ਦੇ ਅੱਠ ਸਾਲਾ ਪੁੱਤ ਨਮਨ ਕੁਮਾਰ ਦੀ ਵੀ ਮੌਤ ਹੋ ਗਈ। ਬੁੱਧਵਾਰ ਨੂੰ ਇਸ ਪਰਿਵਾਰ 'ਚੋਂ ਪੰਜ ਬੱਚਿਆਂ ਦੀਆਂ ਅਰਥੀਆਂ ਨਿਕਲੀਆਂ ਤਾਂ ਪੂਰਾ ਪਿੰਡ ਇੱਕ ਵਾਰ ਫਿਰ ਧਾਹਾਂ ਮਾਰ ਕੇ ਰੋ ਪਿਆ।

ਇੱਕੋ ਸਮੇਂ ਪੰਜ ਬੱਚਿਆਂ ਦੀ ਮੌਤ ਨਾਲ ਮਾਤਮ, ਔਰਤਾਂ ਦਾ ਰੋ-ਰੋ ਕੇ ਬੁਰਾ ਹਾਲ

ਸਤੇਂਦਰ ਰਾਏ ਨੇ ਦੱਸਿਆ ਕਿ ਹਾਦਸੇ 'ਚ ਉਨ੍ਹਾਂ ਦੀ ਧੀ, ਭਤੀਜੇ ਰਾਜਕਿਸ਼ੋਰ ਦੀਆਂ ਤਿੰਨ ਧੀਆਂ ਅਤੇ ਭਤੀਜੇ ਮੁਕੇਸ਼ ਦਾ ਪੁੱਤ ਨਹੀਂ ਰਿਹਾ। ਇੱਕੋ ਪਰਿਵਾਰ ਦੇ ਪੰਜ ਬੱਚਿਆਂ ਦੀ ਮੌਤ ਨੇ ਪਰਿਵਾਰਕ ਮੈਂਬਰਾਂ ਨੂੰ ਤੋੜ ਕੇ ਰੱਖ ਦਿੱਤਾ ਹੈ। ਜਿਨ੍ਹਾਂ ਘਰਾਂ 'ਚ ਬੱਚਿਆਂ ਦੀ ਚਹਿਲ-ਪਹਿਲ ਰਹਿੰਦੀ ਸੀ, ਉੱਥੇ ਹੁਣ ਡੂੰਘਾ ਸੰਨਾਟਾ ਹੈ। ਪਿੰਡ ਵਾਸੀਆਂ ਮੁਤਾਬਕ, ਇੱਕੋ ਸਮੇਂ ਪੰਜ ਅਰਥੀਆਂ ਉੱਠਦੀਆਂ ਦੇਖ ਹਰ ਅੱਖ ਨਮ ਹੋ ਗਈ। ਪਰਿਵਾਰਕ ਮੈਂਬਰਾਂ ਦੀਆਂ ਚੀਕਾਂ ਅਤੇ ਵਿਰਲਾਪ ਕਾਰਨ ਮਾਹੌਲ ਗਮਗੀਨ ਹੋ ਗਿਆ।

ਖਾਲਸਾ ਘਾਟ 'ਤੇ ਹੋਇਆ ਅੰਤਿਮ ਸਸਕਾਰ, ਪਿੰਡ 'ਚ ਨਹੀਂ ਬਲੇ ਚੁੱਲ੍ਹੇ

ਬੁੱਧਵਾਰ ਨੂੰ ਹਾਦਸੇ 'ਚ ਜਾਨ ਗੁਆਉਣ ਵਾਲੇ ਬੱਚਿਆਂ ਦਾ ਅੰਤਿਮ ਸਸਕਾਰ ਖਾਲਸਾ ਘਾਟ 'ਤੇ ਕੀਤਾ ਗਿਆ। ਇੱਕੋ ਪਿੰਡ ਦੇ ਦੋ ਪਰਿਵਾਰਾਂ ਦੇ 12 ਜੀਆਂ ਦੀ ਮੌਤ ਨੇ ਪੂਰੇ ਇਲਾਕੇ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ। ਪਿੰਡ ਵਾਸੀ ਇਸ ਦੁਖਾਂਤ ਤੋਂ ਉੱਭਰ ਨਹੀਂ ਪਾ ਰਹੇ ਹਨ। ਕਿਸੇ ਨੇ ਆਪਣੀਆਂ ਧੀਆਂ ਗੁਆਈਆਂ, ਕਿਸੇ ਨੇ ਪੁੱਤ ਅਤੇ ਕਿਸੇ ਨੇ ਭੈਣ। ਰਾਮਪੁਰ ਸ਼ਿਆਮਚੰਦ 'ਚ ਇਸ ਹਾਦਸੇ ਤੋਂ ਬਾਅਦ ਸੋਗ ਦਾ ਅਜਿਹਾ ਮਾਹੌਲ ਹੈ ਕਿ ਪਿੰਡ ਦੇ ਕਈ ਘਰਾਂ 'ਚ ਚੁੱਲ੍ਹੇ ਤੱਕ ਨਹੀਂ ਬਲੇ।