ਉੱਤਰਾਖੰਡ 'ਚ ਵੱਡਾ ਹਾਦਸਾ: ਜੋਸ਼ੀਮਠ 'ਚ ਹੈਲੀਕਾਪਟਰ ਕ੍ਰੈਸ਼, ਪਾਇਲਟ ਸਮੇਤ 6 ਲੋਕ ਸਨ ਸਵਾਰ; SDRF ਦੀ ਟੀਮ ਮੌਕੇ 'ਤੇ ਰਵਾਨਾ

ਜਾਗਰਣ ਸੰਵਾਦਦਾਤਾ, ਚਮੋਲੀ। ਬਦਰੀਨਾਥ ਤੋਂ ਦੇਹਰਾਦੂਨ ਪਰਤ ਰਿਹਾ ਇੱਕ ਹੈਲੀਕਾਪਟਰ ਹਾਦਸਾਗ੍ਰਸਤ ਹੋ ਗਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਹਾਦਸਾ ਬਦਰੀਨਾਥ ਅਤੇ ਜੋਸ਼ੀਮਠ ਦੇ ਵਿਚਕਾਰ ਵਾਪਰਿਆ। ਹੈਲੀਕਾਪਟਰ ਟ੍ਰਾਂਸ ਭਾਰਤ ਕੰਪਨੀ ਦਾ ਸੀ, ਜਿਸ ਵਿੱਚ ਇੱਕ ਪਾਇਲਟ ਅਤੇ ਪੰਜ ਯਾਤਰੀ ਸਵਾਰ ਸਨ।

ਹੈਲੀਕਾਪਟਰ ਬਦਰੀਨਾਥ ਤੋਂ ਦੇਹਰਾਦੂਨ ਆ ਰਿਹਾ ਸੀ ਅਤੇ ਇਸ ਨੇ ਸਹਸ੍ਰਧਾਰਾ ਹੈਲੀਪੈਡ ’ਤੇ ਉਤਰਨਾ ਸੀ। ਹੈਲੀਕਾਪਟਰ ਦੇ ਚੱਟਾਨ ਨਾਲ ਟਕਰਾ ਕੇ ਡਿੱਗਣ ਦਾ ਖ਼ਦਸ਼ਾ ਜਤਾਇਆ ਜਾ ਰਿਹਾ ਹੈ। ਐੱਸਡੀਆਰਐੱਫ ਦੀਆਂ ਟੀਮਾਂ ਰਾਹਤ ਅਤੇ ਬਚਾਅ ਕਾਰਜਾਂ ਲਈ ਪਹਾੜੀ ’ਤੇ ਚੜ੍ਹ ਰਹੀਆਂ ਹਨ।

ਡੀਐੱਸਪੀ ਮਦਨ ਸਿੰਘ ਬਿਸ਼ਟ ਨੇ ਕਿਹਾ ਕਿ ਮਾਮਲੇ ਸਬੰਧੀ ਜਾਣਕਾਰੀ ਇਕੱਠੀ ਕੀਤੀ ਜਾ ਰਹੀ ਹੈ। ਉੱਥੇ ਹੀ, ਆਫ਼ਤ ਪ੍ਰਬੰਧਨ ਅਧਿਕਾਰੀ ਨੰਦਕਿਸ਼ੋਰ ਜੋਸ਼ੀ ਨੇ ਦੱਸਿਆ ਕਿ ਜੇਪੀ ਡੈਮ ਦੇ ਉੱਪਰ ਜੰਗਲ ਵਿੱਚ ਚਿੱਟੇ ਰੰਗ ਦੀ ਕਿਸੇ ਚੀਜ਼ ਨੂੰ ਅੱਗ ਲੱਗਣ ਦੀ ਸੂਚਨਾ ਮਿਲੀ ਹੈ। ਜਾਂਚ ਲਈ ਹੋਰ ਹੈਲੀਕਾਪਟਰ ਭੇਜੇ ਗਏ ਹਨ।

ਯੂਕਾਡਾ ਦੇ ਸੀਈਓ ਪ੍ਰਤੀਕ ਜੈਨ ਨੇ ਦੱਸਿਆ ਕਿ ਪਾਇਲਟ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਅਤੇ ਟੀਮ ਨੂੰ ਘਟਨਾ ਵਾਲੀ ਥਾਂ ਲਈ ਰਵਾਨਾ ਕਰ ਦਿੱਤਾ ਗਿਆ ਹੈ।

ਸੀਐੱਮ ਧਾਮੀ ਪੂਰੇ ਘਟਨਾਕ੍ਰਮ ’ਤੇ ਰੱਖ ਰਹੇ ਹਨ ਨਜ਼ਰ

ਸੀਐੱਮ ਧਾਮੀ ਨੇ ਸੋਸ਼ਲ ਮੀਡੀਆ ’ਤੇ ਪੋਸਟ ਸਾਂਝੀ ਕਰਕੇ ਇਸ ਹਾਦਸੇ ਨੂੰ ਮੰਦਭਾਗਾ ਦੱਸਿਆ। ਉਨ੍ਹਾਂ ਕਿਹਾ, “ਚਾਈਂ ਪਿੰਡ, ਜੋਸ਼ੀਮਠ ਦੇ ਨੇੜੇ ਹੈਲੀਕਾਪਟਰ ਹਾਦਸਾਗ੍ਰਸਤ ਹੋਣ ਦੀ ਮੰਦਭਾਗੀ ਸੂਚਨਾ ਮਿਲੀ ਹੈ। ਜ਼ਿਲ੍ਹਾ ਪ੍ਰਸ਼ਾਸਨ, ਆਫ਼ਤ ਪ੍ਰਬੰਧਨ ਵਿਭਾਗ ਅਤੇ ਐੱਸਡੀਆਰਐੱਫ ਵੱਲੋਂ ਸਾਂਝੇ ਤੌਰ ’ਤੇ ਬਚਾਅ ਮੁਹਿੰਮ ਚਲਾਈ ਜਾ ਰਹੀ ਹੈ। ਮੈਂ ਖ਼ੁਦ ਵੀ ਪੂਰੇ ਘਟਨਾਕ੍ਰਮ ’ਤੇ ਲਗਾਤਾਰ ਨਜ਼ਰ ਰੱਖ ਰਿਹਾ ਹਾਂ। ਗੰਭੀਰ ਜ਼ਖ਼ਮੀਆਂ ਨੂੰ ਤੁਰੰਤ ਏਅਰਲਿਫਟ ਕਰਕੇ ਬਿਹਤਰ ਇਲਾਜ ਲਈ ਉੱਚ ਸਿਹਤ ਕੇਂਦਰ ਪਹੁੰਚਾਉਣ ਦੇ ਨਿਰਦੇਸ਼ ਦਿੱਤੇ ਹਨ। ਮੈਂ ਪ੍ਰਮਾਤਮਾ ਅੱਗੇ ਯਾਤਰੀਆਂ ਦੀ ਸੁਰੱਖਿਆ ਅਤੇ ਉਨ੍ਹਾਂ ਦੇ ਸਹੀ-ਸਲਾਮਤ ਹੋਣ ਦੀ ਅਰਦਾਸ ਕਰਦਾ ਹਾਂ।”

ਖ਼ਰਾਬ ਮੌਸਮ ਦੇ ਬਾਵਜੂਦ ਜਾਰੀ ਸੀ ਉਡਾਣ

ਖ਼ਰਾਬ ਮੌਸਮ ਦੇ ਬਾਵਜੂਦ ਸ਼ੁੱਕਰਵਾਰ ਨੂੰ ਬਦਰੀਨਾਥ ਲਈ ਹੈਲੀਕਾਪਟਰ ਉਡਾਣਾਂ ਜਾਰੀ ਸਨ। ਦੁਪਹਿਰ 1 ਵੱਜ ਕੇ 5 ਮਿੰਟ ’ਤੇ ਇੱਕ ਹੈਲੀਕਾਪਟਰ ਨੇ ਉਡਾਣ ਭਰੀ, ਜੋ ਦੇਹਰਾਦੂਨ ਪਹੁੰਚ ਗਿਆ। ਇਸ ਤੋਂ ਬਾਅਦ 1 ਵੱਜ ਕੇ 12 ਮਿੰਟ ’ਤੇ ਦੂਜੇ ਹੈਲੀਕਾਪਟਰ ਨੇ ਦੇਹਰਾਦੂਨ ਲਈ ਉਡਾਣ ਭਰੀ, ਪਰ ਉਹ ਲਾਪਤਾ ਹੋ ਗਿਆ। ਦੁਪਹਿਰ 1 ਵੱਜ ਕੇ 20 ਮਿੰਟ ’ਤੇ ਇੱਕ ਹੋਰ ਹੈਲੀਕਾਪਟਰ ਨੇ ਬਦਰੀਨਾਥ ਤੋਂ ਉਡਾਣ ਭਰੀ ਅਤੇ ਉਹ ਵੀ ਸੁਰੱਖਿਅਤ ਦੇਹਰਾਦੂਨ ਪਹੁੰਚ ਗਿਆ।

ਬਾਅਦ ਵਿੱਚ ਪਤਾ ਲੱਗਾ ਕਿ ਦੁਪਹਿਰ 1 ਵੱਜ ਕੇ 12 ਮਿੰਟ ’ਤੇ ਉਡਾਣ ਭਰਨ ਵਾਲਾ ਹੈਲੀਕਾਪਟਰ ਲਾਪਤਾ ਹੈ। ਇਸ ਦੇ ਬਾਵਜੂਦ ਦੁਪਹਿਰ 2 ਵੱਜ ਕੇ 10 ਮਿੰਟ, 2 ਵੱਜ ਕੇ 15 ਮਿੰਟ ਅਤੇ 2 ਵੱਜ ਕੇ 22 ਮਿੰਟ ’ਤੇ ਵੀ ਉਡਾਣਾਂ ਭਰੀਆਂ ਗਈਆਂ। ਦਿਨ ਭਰ ਵਿੱਚ ਦੇਹਰਾਦੂਨ ਲਈ ਲਗਭਗ 12 ਹੈਲੀਕਾਪਟਰਾਂ ਨੇ ਉਡਾਣ ਭਰੀ ਸੀ। ਇਹ ਸਾਰੀਆਂ ਚਾਰਟਰ ਉਡਾਣਾਂ ਸਨ।

ਹੈਲੀਕਾਪਟਰ ਵਿੱਚ ਸਵਾਰ ਲੋਕਾਂ ਦੇ ਨਾਮ

• ਕੈਪਟਨ ਹਿਮਾਂਸ਼ੂ (ਪਾਇਲਟ)

• ਪ੍ਰਥਾਪਾ

• ਅਰੁਣ

• ਸ਼ੰਕਰ ਗੌੜਾ

• ਸੁਧੀਰ ਕੇ.

• ਐੱਸਐੱਸ ਨਟਰਾਜਾ