ਦੀਵਾਲੀ ਤੋਂ ਅਲਗੇ ਹੀ ਦਿਨ ਵਾਪਰਿਆ ਭਾਣਾ: CNG ਕਾਰ ਨੂੰ ਲੱਗੀ ਅੱਗ, ਜ਼ਿੰਦਾ ਸੜਨ ਨਾਲ 6 ਲੋਕਾਂ ਦੀ ਮੌਤ; ਡਿਵਾਈਡਰ ਨਾਲ ਟਕਰਾ ਕੇ ਪਲਟੀ ਕਾਰ

ਜਾਗਰਣ ਸੰਵਾਦਦਾਤਾ, ਮੁਜ਼ੱਫਰਨਗਰ : ਪਾਣੀਪਤ-ਖਟੀਮਾ ਹਾਈਵੇਅ ’ਤੇ ਤਿਤਾਵੀ ਥਾਣਾ ਖੇਤਰ ਵਿੱਚ ਇਕ ਕਾਰ ਡਿਵਾਈਡਰ ਨਾਲ ਟਕਰਾਉਣ ਤੋਂ ਬਾਅਦ ਪਲਟ ਗਈ। ਇਸ ਹਾਦਸੇ ਤੋਂ ਬਾਅਦ ਕਾਰ ਨੂੰ ਭਿਆਨਕ ਅੱਗ ਲੱਗ ਗਈ। ਕਾਰ ਵਿੱਚ ਸਵਾਰ ਹਰਿਆਣਾ ਦੇ ਰਹਿਣ ਵਾਲੇ 6 ਲੋਕਾਂ ਦੀ ਸੜ ਕੇ ਮੌਤ ਹੋ ਗਈ।

ਸੋਮਵਾਰ ਸਵੇਰੇ ਪਾਣੀਪਤ-ਖਟੀਮਾ ਹਾਈਵੇਅ ’ਤੇ ਸ਼ਾਮਲੀ ਵੱਲੋਂ ਇਕ ਕਾਰ ਤੇਜ਼ ਰਫ਼ਤਾਰ ਨਾਲ ਮੁਜ਼ੱਫਰਨਗਰ ਵੱਲ ਆ ਰਹੀ ਸੀ। ਤਿਤਾਵੀ ਥਾਣਾ ਖੇਤਰ ਵਿੱਚ ਜਗਾਹੇੜੀ ਪੁਲ ਨੇੜੇ ਕਾਰ ਬੇਕਾਬੂ ਹੋ ਕੇ ਡਿਵਾਈਡਰ ਨਾਲ ਟਕਰਾ ਗਈ ਅਤੇ ਸੜਕ ਦੇ ਦੂਜੇ ਪਾਸੇ ਜਾ ਕੇ ਪਲਟ ਗਈ। ਕਾਰ ਵਿੱਚ CNG ਕਿੱਟ ਲੱਗੀ ਹੋਈ ਸੀ। ਹਾਦਸੇ ਤੋਂ ਬਾਅਦ ਕਾਰ ਨੂੰ ਅੱਗ ਲੱਗ ਗਈ।

ਹਰਿਆਣਾ ਦੇ ਰਹਿਣ ਵਾਲੇ 6 ਲੋਕਾਂ ਦੀ ਸੜ ਕੇ ਮੌਤ

ਰਾਹਗੀਰਾਂ ਨੇ ਇਸ ਦੀ ਸੂਚਨਾ ਡਾਇਲ 112 ’ਤੇ ਦਿੱਤੀ। ਇਸ ਤੋਂ ਬਾਅਦ ਪੁਲਿਸ ਅਤੇ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਮੌਕੇ ’ਤੇ ਪਹੁੰਚੀਆਂ। ਫਾਇਰ ਬ੍ਰਿਗੇਡ ਦੀ ਟੀਮ ਨੇ ਕਾਫ਼ੀ ਮੁਸ਼ੱਕਤ ਤੋਂ ਬਾਅਦ ਅੱਗ ’ਤੇ ਕਾਬੂ ਪਾਇਆ, ਪਰ ਉਦੋਂ ਤੱਕ ਕਾਰ ਵਿੱਚ ਸਵਾਰ 6 ਲੋਕਾਂ ਦੀ ਮੌਤ ਹੋ ਚੁੱਕੀ ਸੀ।

ਤਿਤਾਵੀ ਥਾਣਾ ਮੁਖੀ ਜੈਵੀਰ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਸਾਰੇ ਹਰਿਆਣਾ ਦੇ ਜੀਂਦ ਦੇ ਰਹਿਣ ਵਾਲੇ ਸਨ। ਫਿਲਹਾਲ ਮ੍ਰਿਤਕਾਂ ਦੇ ਪਰਿਵਾਰਕ ਮੈਂਬਰ ਮੌਕੇ ’ਤੇ ਨਹੀਂ ਪਹੁੰਚੇ ਸਨ।