Triple Murder ਨਾਲ ਸਨਸਨੀ : ਪ੍ਰੇਮੀ ਨਾਲ ਮਿਲ ਕੇ ਘਰ ਦੀ ਵੱਡੀ ਧੀ ਨੇ ਕੀਤਾ ਮਾਂ-ਬਾਪ ਦਾ ਕਤਲ, ਭੈਣ ਦੀ ਵੀ ਲਈ ਜਾਨ

ਡਿਜੀਟਲ ਡੈਸਕ, ਬੰਗਲੌਰ : ਬੰਗਲੌਰ ਤੋਂ ਇੱਕ ਦਿਲ ਦਹਿਲਾ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ ਅਪਾਰਟਮੈਂਟ ਵਿੱਚ ਇੱਕੋ ਪਰਿਵਾਰ ਦੇ ਤਿੰਨ ਜੀਆਂ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ। ਹੱਤਿਆ ਦਾ ਆਰੋਪ ਪਰਿਵਾਰ ਦੀ ਵੱਡੀ ਧੀ 'ਸ਼ਵੇਤਾ' 'ਤੇ ਹੈ।

ਪੁਲਿਸ ਨੂੰ ਸ਼ੱਕ ਹੈ ਕਿ ਸ਼ਵੇਤਾ ਨੇ ਆਪਣੇ ਬੁਆਏਫ੍ਰੈਂਡ 'ਕੇਨੇਥ' ਨਾਲ ਮਿਲ ਕੇ ਇਸ ਵਾਰਦਾਤ ਨੂੰ ਅੰਜਾਮ ਦਿੱਤਾ ਹੈ। ਘਟਨਾ ਤੋਂ ਬਾਅਦ ਤੋਂ ਹੀ ਸ਼ਵੇਤਾ ਅਤੇ ਕੇਨੇਥ ਫ਼ਰਾਰ ਚੱਲ ਰਹੇ ਹਨ। ਪੁਲਿਸ ਦੋਵਾਂ ਦੀ ਭਾਲ ਕਰ ਰਹੀ ਹੈ।

ਰਿਸ਼ਤੇ ਦੇ ਖ਼ਿਲਾਫ਼ ਸਨ ਮਾਤਾ-ਪਿਤਾ

ਪੁਲਿਸ ਮੁਤਾਬਕ ਸ਼ਵੇਤਾ ਆਪਣੇ ਬੁਆਏਫ੍ਰੈਂਡ ਨਾਲ ਲਿਵ-ਇਨ ਰਿਲੇਸ਼ਨਸ਼ਿਪ ਵਿੱਚ ਰਹਿੰਦੀ ਸੀ ਪਰ ਉਸ ਦੇ ਮਾਤਾ-ਪਿਤਾ ਸੋਮਸੁੰਦਰ ਅਤੇ ਮੁਥੁਲਕਸ਼ਮੀ ਇਸ ਰਿਸ਼ਤੇ ਦੇ ਖ਼ਿਲਾਫ਼ ਸਨ। ਖ਼ਦਸ਼ਾ ਜਤਾਇਆ ਜਾ ਰਿਹਾ ਹੈ ਕਿ ਇਸੇ ਵਿਰੋਧ ਕਾਰਨ ਇਹ ਕਤਲ ਹੋਇਆ ਹੋ ਸਕਦਾ ਹੈ।

ਇਹ ਮਾਮਲਾ ਕੇ.ਆਰ. ਪੁਰਮ ਪੁਲਿਸ ਸਟੇਸ਼ਨ ਦੇ ਅਧੀਨ ਆਉਂਦੇ ਸਾਈ ਗ੍ਰੀਨ ਅਪਾਰਟਮੈਂਟ, ਧਾਮਨਿਕ ਲੇਆਊਟ, ਸੀਗੇਹੱਲੀ ਦਾ ਹੈ। ਕਥਿਤ ਤੌਰ 'ਤੇ ਸ਼ਵੇਤਾ ਸਿਰ 30 ਲੱਖ ਰੁਪਏ ਦਾ ਕਰਜ਼ਾ ਸੀ। ਉਸ ਦੇ ਮਾਂ-ਬਾਪ ਅਕਸਰ ਇਸ ਗੱਲ ਲਈ ਉਸ ਨੂੰ ਟੋਕਦੇ ਸਨ, ਜਿਸ ਕਾਰਨ ਪਰਿਵਾਰ ਵਿੱਚ ਤਣਾਅ ਪੈਦਾ ਹੋ ਗਿਆ ਸੀ।

ਪਰਿਵਾਰ ਨੂੰ ਮਿਲਣ ਗਈ ਸੀ ਸ਼ਵੇਤਾ

ਜਾਂਚਕਰਤਾਵਾਂ ਦਾ ਮੰਨਣਾ ਹੈ ਕਿ ਸੋਮਵਾਰ ਨੂੰ ਸ਼ਵੇਤਾ ਆਪਣੇ ਬੁਆਏਫ੍ਰੈਂਡ ਕੇਨੇਥ ਨਾਲ ਆਪਣੇ ਪਰਿਵਾਰ ਨੂੰ ਮਿਲਣ ਗਈ ਸੀ। ਇਸ ਦੌਰਾਨ ਘਰ ਵਿੱਚ ਸਿਰਫ਼ ਉਸ ਦੀ ਮਾਂ ਮੁਥੁਲਕਸ਼ਮੀ ਹੀ ਮੌਜੂਦ ਸੀ। ਪਿਤਾ ਸੋਮਸੁੰਦਰ ਅਤੇ ਛੋਟੀ ਭੈਣ ਸੁਪ੍ਰਿਆ ਕਿਧਰੇ ਬਾਹਰ ਗਏ ਹੋਏ ਸਨ।

ਇਸੇ ਦੌਰਾਨ ਸ਼ਵੇਤਾ, ਕੇਨੇਥ ਅਤੇ ਮੁਥੁਲਕਸ਼ਮੀ ਵਿਚਕਾਰ ਕਾਫੀ ਬਹਿਸ ਹੋਈ। ਬਹਿਸ ਦੌਰਾਨ ਹੀ ਮੁਥੁਲਕਸ਼ਮੀ 'ਤੇ ਕਥਿਤ ਤੌਰ 'ਤੇ ਕਿਸੇ ਤੇਜ਼ਧਾਰ ਹਥਿਆਰ ਨਾਲ ਹਮਲਾ ਕਰਕੇ ਉਸ ਦਾ ਕਤਲ ਕਰ ਦਿੱਤਾ ਗਿਆ। ਕਤਲ ਦੇ ਤੁਰੰਤ ਬਾਅਦ ਮੁਲਜ਼ਮਾਂ ਨੇ ਬਾਥਰੂਮ ਵਿੱਚੋਂ ਖ਼ੂਨ ਦੇ ਧੱਬੇ ਧੋ ਦਿੱਤੇ।

ਮਾਮਲੇ ਦੀ ਜਾਂਚ ਜਾਰੀ

ਜਦੋਂ ਥੋੜ੍ਹੀ ਦੇਰ ਬਾਅਦ ਸੁਪ੍ਰਿਆ ਘਰ ਵਿੱਚ ਆਈ ਤਾਂ ਸ਼ਵੇਤਾ ਨੇ ਉਸ ਨੂੰ ਫੜ ਲਿਆ ਅਤੇ ਕੇਨੇਥ ਨੇ ਉਸੇ ਹਥਿਆਰ ਨਾਲ ਸੁਪ੍ਰਿਆ ਦਾ ਵੀ ਕਤਲ ਕਰ ਦਿੱਤਾ। ਇਸ ਤੋਂ ਬਾਅਦ ਸ਼ਵੇਤਾ ਨੇ ਕੇਨੇਥ ਨਾਲ ਮਿਲ ਕੇ ਆਪਣੇ ਪਿਤਾ ਸੋਮਸੁੰਦਰ 'ਤੇ ਵੀ ਹਮਲਾ ਕਰ ਦਿੱਤਾ। ਹਾਲਾਂਕਿ ਗੰਭੀਰ ਸੱਟਾਂ ਲੱਗਣ ਦੇ ਬਾਵਜੂਦ ਉਹ ਉੱਥੋਂ ਭੱਜਣ ਵਿੱਚ ਕਾਮਯਾਬ ਹੋ ਗਏ ਪਰ ਬਾਅਦ ਵਿੱਚ ਉਨ੍ਹਾਂ ਦੀ ਮੌਤ ਹੋ ਗਈ।

ਪੁਲਿਸ ਨੇ ਘਟਨਾ ਸਥਾਨ ਦਾ ਮੁਆਇਨਾ ਕੀਤਾ ਅਤੇ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ। ਮੁਲਜ਼ਮਾਂ ਦੀ ਭਾਲ ਕੀਤੀ ਜਾ ਰਹੀ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ।