₹8 ਹਜ਼ਾਰ ਪ੍ਰਤੀ ਯੂਨਿਟ ਖ਼ੂਨ ਵੇਚ ਕੇ ਆਪਣੇ ਸ਼ੌਕ ਪੂਰੇ ਕਰ ਰਹੇ ਸਨ ਵਿਦਿਆਰਥੀ, ਪੰਜ ਗ੍ਰਿਫ਼ਤਾਰ

ਪੁਲਕ ਤ੍ਰਿਪਾਠੀ/ਵਿਨੇ ਤਿਵਾਰੀ, ਜਾਗਰਣ, ਲਖਨਊ : ਮਰੀਜ਼ਾਂ ਨੂੰ ਖ਼ੂਨ ਦੀ ਲੋੜ ਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੀ ਮਜਬੂਰੀ ਕੁਝ ਨੌਜਵਾਨਾਂ ਲਈ ਕਮਾਈ ਦਾ ਸਾਧਨ ਬਣ ਗਈ ਸੀ। ਐਸਜੀਪੀਜੀਆਈ ’ਚ ਦਾਖ਼ਲ ਇਕ ਮਰੀਜ਼ ਦੇ ਪਰਿਵਾਰਕ ਮੈਂਬਰ ਤੋਂ ਪੈਸੇ ਲੈ ਕੇ ਖ਼ੂਨ ਵੇਚਣ ਦੇ ਮਾਮਲੇ ’ਚ ਪੰਜ ਨੌਜਵਾਨਾਂ ਨੂੰ ਫੜਿਆ ਗਿਆ ਹੈ। ਮੁੱਢਲੀ ਜਾਂਚ ਦੌਰਾਨ ਹੈਰਾਨ ਕਰਨ ਵਾਲੇ ਤੱਥ ਸਾਹਮਣੇ ਆਏ ਹਨ। ਇਹ ਨੌਜਵਾਨ ਖ਼ੂਨਦਾਨ ਦੀ ਆੜ ’ਚ ਖ਼ੂਨ ਦਾ ਸੌਦਾ ਕਰਦੇ ਸਨ ਤੇ ਇਸ ਦੇ ਬਦਲੇ ਮਿਲੇ ਪੈਸਿਆਂ ਨਾਲ ਆਪਣੇ ਸ਼ੌਕ ਪੂਰੇ ਕਰਦੇ ਸਨ। ਉਹ ਇਕ ਯੂਨਿਟ ਖ਼ੂਨ ਲਈ ਅੱਠ ਹਜ਼ਾਰ ਰੁਪਏ ਤੱਕ ਲੈਂਦੇ ਸਨ। ਫੜੇ ਨੌਜਵਾਨਾਂ ’ਚ ਤਿੰਨ ਇੰਜੀਨੀਅਰਿੰਗ ਦੇ ਵਿਦਿਆਰਥੀ ਹਨ, ਜਦਕਿ ਇਕ ਨੌਕਰੀ ਕਰਦਾ ਹੈ।

ਐਸਜੀਪੀਜੀਆਈ ਥਾਣੇ ਦੀ ਪੁਲਿਸ ਦੀ ਮੁੱਢਲੀ ਜਾਂਚ ’ਚ ਰਾਏਬਰੇਲੀ ਦੇ ਖੀਰੋਂ ਥਾਣਾ ਖੇਤਰ ਦੇ ਰਹਿਣ ਵਾਲੇ ਹਿਮਾਂਸ਼ੂ ਸਿੰਘ ਦੀ ਭੂਮਿਕਾ ਮੁੱਖ ਤੌਰ ’ਤੇ ਸਾਹਮਣੇ ਆਈ ਹੈ। ਉਹ ਪੀਜੀਆਈ ਇਲਾਕੇ ਦੇ ਸਰਸਵਤੀਪੁਰਮ ’ਚ ਰਹਿੰਦਾ ਹੈ ਅਤੇ ਪਿਛਲੇ ਚਾਰ ਸਾਲਾਂ ਤੋਂ ਇਸ ਕੰਮ ਵਿਚ ਸ਼ਾਮਲ ਸੀ। ਸੂਤਰਾਂ ਮੁਤਾਬਕ, ਜਦੋਂ ਐਸਜੀਪੀਜੀਆਈ ਵਿਚ ਦਾਖ਼ਲ ਮਰੀਜ਼ਾਂ ਦੇ ਪਰਿਵਾਰਕ ਮੈਂਬਰ ਦਵਾਈਆਂ ਆਦਿ ਲੈਣ ਲਈ ਸੰਸਥਾ ਦੇ ਬਾਹਰ ਮੈਡੀਕਲ ਸਟੋਰ ’ਤੇ ਜਾਂਦੇ ਸਨ, ਤਾਂ ਸਟੋਰ ਸੰਚਾਲਕ ਉਨ੍ਹਾਂ ਨਾਲ ਖ਼ੂਨ ਦੀ ਲੋੜ ਬਾਰੇ ਵੀ ਗੱਲ ਕਰਦੇ ਸਨ। ਮਰੀਜ਼ ਦੇ ਨਾਲ ਆਏ ਸ਼ਾਹਬਾਜ਼ ਅਲੀ ਅਤੇ ਯਸ਼ ਕੁਮਾਰ ਨਾਲ ਵੀ ਅਜਿਹਾ ਹੀ ਹੋਇਆ। ਮੈਡੀਕਲ ਸਟੋਰ ਸੰਚਾਲਕ ਨੇ ਡੋਨਰ ਦਾ ਪ੍ਰਬੰਧ ਕਰਨ ਦੇ ਨਾਂ ’ਤੇ ਉਨ੍ਹਾਂ ਨਾਲ ਸੌਦਾ ਤੈਅ ਕੀਤਾ ਅਤੇ ਫਿਰ ਹਿਮਾਂਸ਼ੂ ਨਾਲ ਸੰਪਰਕ ਕਰਵਾਇਆ। ਹਿਮਾਂਸ਼ੂ ਆਪਣੇ ਸੰਪਰਕ ਵਿਚ ਸ਼ਾਮਲ ਇੰਜੀਨੀਅਰਿੰਗ ਦੇ ਵਿਦਿਆਰਥੀਆਂ ਨੂੰ ਫ਼ੋਨ ਕਰਕੇ ਨਿਰਧਾਰਤ ਸਮੇਂ ’ਤੇ ਐਸਜੀਪੀਜੀਆਈ ਪਹੁੰਚਣ ਲਈ ਕਹਿੰਦਾ ਸੀ। ਅਗਾਊਂ ਭੁਗਤਾਨ ਨਾ ਮਿਲਣ ਕਾਰਨ ਉੱਥੇ ਵਿਵਾਦ ਹੋ ਗਿਆ। ਇਸੇ ਦੌਰਾਨ ਪੁਲਿਸ ਨੇ ਸਾਰਿਆਂ ਨੂੰ ਫੜ ਕਰ ਲਿਆ।