ਸ਼ਾਮਲੀ ’ਚ ਹੋਇਆ ਗਾਇਕ ਅੰਕਿਤ ਬਾਲਿਆਨ ਦਾ ਕਤਲ, ਫਿਰ ਬਾਗਪਤ ਦੇ 3 ਪੁਲਿਸ ਮੁਲਾਜ਼ਮਾਂ ਖ਼ਿਲਾਫ਼ ਕਿਉਂ ਹੋਈ ਕਾਰਵਾਈ?

ਜਾਗਰਣ ਸੰਵਾਦਦਾਤਾ, ਬਾਗਪਤ : ਹਰਿਆਣਵੀ ਗਾਇਕ ਅੰਕਿਤ ਬਾਲਿਆਨ ਦੇ ਕਤਲ ਤੋਂ ਬਾਅਦ ਸ਼ਾਮਲੀ ਨਾ ਜਾਣਾ SWAT ਟੀਮ ਦੇ ਤਿੰਨ ਪੁਲਿਸ ਮੁਲਾਜ਼ਮਾਂ ਨੂੰ ਮਹਿੰਗਾ ਪੈ ਗਿਆ। SP ਸੂਰਜ ਕੁਮਾਰ ਰਾਏ ਨੇ ਲਾਪਰਵਾਹੀ ਮੰਨਦਿਆਂ ਤਿੰਨਾਂ ਪੁਲਿਸ ਮੁਲਾਜ਼ਮਾਂ ਨੂੰ SWAT ਟੀਮ ਤੋਂ ਹਟਾ ਦਿੱਤਾ ਹੈ।

ਪੁਲਿਸ ਅਧਿਕਾਰੀ ਸਭ ਤੋਂ ਪਹਿਲਾਂ ਆਪਣੇ ਅਧੀਨ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਨੂੰ ਡਿਊਟੀ ਲਗਨ ਤੇ ਇਮਾਨਦਾਰੀ ਨਾਲ ਕਰਨ ਦਾ ਪਾਠ ਪੜ੍ਹਾਉਂਦੇ ਹਨ। ਇਸ ਦੇ ਬਾਵਜੂਦ ਕੁਝ ਪੁਲਿਸ ਮੁਲਾਜ਼ਮ ਡਿਊਟੀ ਪ੍ਰਤੀ ਗੰਭੀਰ ਨਜ਼ਰ ਨਹੀਂ ਆਉਂਦੇ। ਅਜਿਹਾ ਹੀ ਇਕ ਮਾਮਲਾ ਸਾਹਮਣੇ ਆਇਆ ਹੈ। ਸ਼ਾਮਲੀ ’ਚ ਹਰਿਆਣਵੀ ਕਲਾਕਾਰ ਅੰਕਿਤ ਬਾਲਿਆਨ ਦੀ 26 ਅਗਸਤ ਦੀ ਸ਼ਾਮ ਕਰੀਬ 7 ਵਜੇ ਜਿਮ ਤੋਂ ਬਾਹਰ ਨਿਕਲਦੇ ਸਮੇਂ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਇਸ ਦੀ ਗੂੰਜ ਲਖਨਊ ਤਕ ਪਹੁੰਚੀ ਸੀ।

ਬਾਗਪਤ ਦੀ ਸਰਹੱਦ ਸ਼ਾਮਲੀ ਨਾਲ ਲੱਗਦੀ ਹੋਣ ਕਾਰਨ ਇੱਥੋਂ ਦੀ ਪੁਲਿਸ ਵੀ ਚੌਕਸ ਹੋ ਗਈ ਸੀ। ਜ਼ਿਲ੍ਹੇ ’ਚ ਸੰਘਣੀ ਚੈਕਿੰਗ ਮੁਹਿੰਮ ਚਲਾਈ ਗਈ ਸੀ। SP ਨੇ SWAT ਟੀਮ ਨੂੰ ਸ਼ਾਮਲੀ ਪਹੁੰਚ ਕੇ ਅਪਰਾਧੀਆਂ ਦੀ ਗ੍ਰਿਫ਼ਤਾਰੀ ’ਚ ਸਥਾਨਕ ਪੁਲਿਸ ਦੀ ਮਦਦ ਕਰਨ ਦੇ ਨਿਰਦੇਸ਼ ਦਿੱਤੇ ਸਨ। ਟੀਮ ਦੇ ਤਿੰਨ ਪੁਲਿਸ ਮੁਲਾਜ਼ਮਾਂ ਨੇ ਇਸ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਅਤੇ ਉਹ ਸ਼ਾਮਲੀ ਨਹੀਂ ਪਹੁੰਚੇ। ਇਸ ਦੀ ਜਾਣਕਾਰੀ SP ਨੂੰ ਮਿਲ ਗਈ। ਜਾਂਚ ਕਰਵਾਈ ਗਈ ਤਾਂ ਪਤਾ ਲੱਗਾ ਕਿ ਪੁਲਿਸ ਮੁਲਾਜ਼ਮ ਨਾ ਤਾਂ ਸ਼ਾਮਲੀ ਪਹੁੰਚੇ ਅਤੇ ਨਾ ਹੀ ਬਾਗਪਤ ’ਚ ਡਿਊਟੀ ’ਤੇ ਰਹੇ।

ਇਸ ਸਬੰਧੀ SP ਸੂਰਜ ਕੁਮਾਰ ਦਾ ਕਹਿਣਾ ਹੈ ਕਿ ਗੈਰਹਾਜ਼ਰ ਮਿਲੇ SWAT ਟੀਮ ਦੇ ਹੈੱਡ ਕਾਂਸਟੇਬਲ ਸ਼ਕਤੀ ਸਿੰਘ ਨੂੰ ਛਪਰੌਲੀ ਥਾਣੇ, ਕਾਂਸਟੇਬਲ ਨਿਤਿਨ ਕੁਮਾਰ ਨੂੰ ਦੋਘਟ ਥਾਣੇ ਅਤੇ ਸੰਬੰਧਤ ਕਾਂਸਟੇਬਲ-ਡਰਾਈਵਰ ਕਪਿਲ ਯਾਦਵ ਨੂੰ ਟਰਾਂਸਪੋਰਟ ਸ਼ਾਖਾ ਭੇਜਿਆ ਗਿਆ ਹੈ। ਹਦਾਇਤ ਦਿੱਤੀ ਗਈ ਹੈ ਕਿ ਜੇਕਰ ਕਿਸੇ ਪੁਲਿਸ ਮੁਲਾਜ਼ਮ ਨੇ ਡਿਊਟੀ ’ਚ ਲਾਪਰਵਾਹੀ ਵਰਤੀ ਤਾਂ ਉਸ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ।