- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਹਾਈਵੇਅ 'ਤੇ ਰੋਡਵੇਜ਼ ਦੀ ਬੱਸ ਨੂੰ ਲੱਗੀ ਭਿਆਨਕ ਅੱਗ, 26 ਸਵਾਰੀਆਂ ਦੀ ਮਸਾ ਬਚੀ ਜਾਨ; ਮੌਕੇ 'ਤੇ ਪਹੁੰਚੀਆਂ 7 ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ
ਜੈਪੁਰ ਤੋਂ ਹਰਿਦੁਆਰ ਜਾ ਰਹੀ ਰਾਜਸਥਾਨ ਰੋਡਵੇਜ਼ ਦੀ ਡਬਲ ਡੈਕਰ ਬੱਸ ਨੂੰ ਸਕੌਤੀ ਦੇ ਕੋਲ ਦਾਦਰੀ ਦੇ ਸਾਹਮਣੇ ਦੂਨ ਹਾਈਵੇਅ 'ਤੇ ਅੱਗ ਲੱਗ ਗਈ। ਬੱਸ 'ਚ ਇੱਕ ਬੱਚੇ ਸਮੇਤ 26 ਸਵਾਰੀਆਂ ਮੌਜੂਦ ਸਨ। ਬੱਸ ਚਾਲਕ (ਡਰਾਈਵਰ) ਅਤੇ ਕੰਡਕਟਰ ਨੇ ਅੱਗ ਲੱਗਣ ਦਾ ਰੌਲਾ ਪਾਉਂਦੇ ਹੋਏ ਸਵਾਰੀਆਂ ਨੂੰ ਤੇਜ਼ੀ ਨਾਲ ਬੱਸ 'ਚੋਂ ਹੇਠਾਂ ਉਤਾਰਿਆ। ਉਦੋਂ ਹੀ ਅੱਗ ਨੇ ਭਿਆਨਕ ਰੂਪ ਧਾਰਨ ਕਰ ਲਿਆ ਅਤੇ ਪੂਰੀ ਬੱਸ ਧੂੰ-ਧੂੰ ਕਰਕੇ ਸੜਨ ਲੱਗੀ।
Posted By Sunita
Publish Date: Fri, 26 Jun 2026 10:47 AM (IST)
Updated Date: Fri, 26 Jun 2026 10:48 AM (IST)
ਜਾਗਰਣ ਪੱਤਰਕਾਰ, ਮੋਦੀਪੁਰਮ (ਮੇਰਠ) - ਜੈਪੁਰ ਤੋਂ ਹਰਿਦੁਆਰ ਜਾ ਰਹੀ ਰਾਜਸਥਾਨ ਰੋਡਵੇਜ਼ ਦੀ ਡਬਲ ਡੈਕਰ ਬੱਸ ਨੂੰ ਸਕੌਤੀ ਦੇ ਕੋਲ ਦਾਦਰੀ ਦੇ ਸਾਹਮਣੇ ਦੂਨ ਹਾਈਵੇਅ 'ਤੇ ਅੱਗ ਲੱਗ ਗਈ। ਬੱਸ 'ਚ ਇੱਕ ਬੱਚੇ ਸਮੇਤ 26 ਸਵਾਰੀਆਂ ਮੌਜੂਦ ਸਨ। ਬੱਸ ਚਾਲਕ (ਡਰਾਈਵਰ) ਅਤੇ ਕੰਡਕਟਰ ਨੇ ਅੱਗ ਲੱਗਣ ਦਾ ਰੌਲਾ ਪਾਉਂਦੇ ਹੋਏ ਸਵਾਰੀਆਂ ਨੂੰ ਤੇਜ਼ੀ ਨਾਲ ਬੱਸ 'ਚੋਂ ਹੇਠਾਂ ਉਤਾਰਿਆ। ਉਦੋਂ ਹੀ ਅੱਗ ਨੇ ਭਿਆਨਕ ਰੂਪ ਧਾਰਨ ਕਰ ਲਿਆ ਅਤੇ ਪੂਰੀ ਬੱਸ ਧੂੰ-ਧੂੰ ਕਰਕੇ ਸੜਨ ਲੱਗੀ।
ਮੇਰਠ ਤੋਂ ਚਾਰ ਅਤੇ ਮੁਜ਼ੱਫਰਨਗਰ ਤੋਂ ਤਿੰਨ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਨੇ ਅੱਗ 'ਤੇ ਕਾਬੂ ਪਾਇਆ ਪਰ ਜਦੋਂ ਤੱਕ ਅੱਗ ਬੁੱਝੀ, ਬੱਸ ਸਿਰਫ਼ ਲੋਹੇ ਦਾ ਇੱਕ ਢਾਂਚਾ ਹੀ ਰਹਿ ਗਈ ਸੀ। ਇਸ ਦੌਰਾਨ ਹਾਈਵੇਅ 'ਤੇ ਜਾਮ ਵੀ ਲੱਗ ਗਿਆ, ਜਿਸ ਨੂੰ ਦੌਰਾਲਾ ਪੁਲਿਸ ਨੇ ਭਾਰੀ ਮੁਸ਼ੱਕਤ ਤੋਂ ਬਾਅਦ ਖੁਲ੍ਹਵਾਇਆ।
ਰਾਜਸਥਾਨ ਦੇ ਜੈਪੁਰ ਨਿਵਾਸੀ ਬੱਸ ਡਰਾਈਵਰ ਰਾਜੇਂਦਰ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ ਜੈਪੁਰ ਤੋਂ ਹਰਿਦੁਆਰ ਲਈ ਰਾਜਸਥਾਨ ਰੋਡਵੇਜ਼ ਦੀ ਡਬਲ ਡੈਕਰ ਬੱਸ ਲੈ ਕੇ ਚੱਲਿਆ ਸੀ। ਬੱਸ 'ਚ ਜੈਪੁਰ ਤੋਂ 26 ਸਵਾਰੀਆਂ ਬੈਠੀਆਂ ਸਨ, ਜਿਨ੍ਹਾਂ 'ਚ 8 ਔਰਤਾਂ, 17 ਮਰਦ ਅਤੇ ਇੱਕ ਬੱਚਾ ਸ਼ਾਮਲ ਸੀ।
ਬੱਸ ਜਿਵੇਂ ਹੀ ਦੂਨ ਹਾਈਵੇਅ 'ਤੇ ਦੌਰਾਲਾ ਖੇਤਰ ਦੇ ਦਾਦਰੀ ਪਿੰਡ ਦੇ ਕੋਲ ਪਹੁੰਚੀ, ਤਾਂ ਡਰਾਈਵਰ ਨੇ ਬੱਸ ਦੇ ਇੰਜਣ ਵਾਲੇ ਪਾਸੇ ਤੋਂ ਧੂੰਆਂ ਨਿਕਲਦਾ ਦੇਖਿਆ। ਉਦੋਂ ਹੀ ਡਰਾਈਵਰ ਨੇ ਸੂਝ-ਬੂਝ ਦਿਖਾਉਂਦੇ ਹੋਏ ਬੱਸ ਨੂੰ ਸੜਕ ਦੇ ਕਿਨਾਰੇ ਰੋਕ ਦਿੱਤਾ।
ਡਰਾਈਵਰ ਅਤੇ ਫਤਿਹਪੁਰ ਸੀਕਰੀ (ਰਾਜਸਥਾਨ) ਦੇ ਰਹਿਣ ਵਾਲੇ ਕੰਡਕਟਰ ਗਾਗੀਆ ਨੇ ਬੱਸ ਤੋਂ ਹੇਠਾਂ ਉਤਰ ਕੇ ਅੱਗੇ ਇੰਜਣ ਵੱਲ ਦੇਖਿਆ ਤਾਂ ਉਸ ਨੂੰ ਅੱਗ ਲੱਗ ਚੁੱਕੀ ਸੀ। ਉਦੋਂ ਹੀ ਦੋਵਾਂ ਨੇ ਅੱਗ ਲੱਗਣ ਦਾ ਰੌਲਾ ਪਾਉਂਦੇ ਹੋਏ ਸਵਾਰੀਆਂ ਨੂੰ ਹੇਠਾਂ ਉਤਾਰਿਆ। ਸਾਰੀਆਂ ਸਵਾਰੀਆਂ ਆਪਣਾ ਸਾਮਾਨ ਲੈ ਕੇ ਸੁਰੱਖਿਅਤ ਤਰੀਕੇ ਨਾਲ ਹੇਠਾਂ ਉਤਰ ਗਈਆਂ। ਥੋੜ੍ਹੀ ਹੀ ਦੇਰ 'ਚ ਅੱਗ ਦੀਆਂ ਲਪਟਾਂ ਤੇਜ਼ ਹੋ ਗਈਆਂ। ਇਸ ਦੌਰਾਨ ਰਾਹਗੀਰਾਂ ਅਤੇ ਦਾਦਰੀ ਦੇ ਪਿੰਡ ਵਾਸੀਆਂ ਦੀ ਭੀੜ ਮੌਕੇ 'ਤੇ ਇਕੱਠੀ ਹੋ ਗਈ।
ਡਾਇਲ-112 ਦੀ ਸੂਚਨਾ 'ਤੇ ਦੌਰਾਲਾ ਥਾਣੇ ਦੇ ਇੰਸਪੈਕਟਰ ਸੁਮਨ ਕੁਮਾਰ ਸਿੰਘ ਪੁਲਿਸ ਫੋਰਸ ਸਮੇਤ ਮੌਕੇ 'ਤੇ ਪਹੁੰਚੇ। ਉੱਥੇ ਹੀ ਸੂਚਨਾ ਮਿਲਣ 'ਤੇ ਮੇਰਠ ਦੇ ਸੀ.ਐੱਫ.ਓ. ਸੁਰੇਂਦਰ ਸਿੰਘ ਚਾਰ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਲੈ ਕੇ ਘਟਨਾ ਵਾਲੀ ਥਾਂ 'ਤੇ ਪਹੁੰਚ ਗਏ। ਕਿਉਂਕਿ ਘਟਨਾ ਵਾਲੀ ਥਾਂ ਮੁਜ਼ੱਫਰਨਗਰ ਬਾਰਡਰ ਦੇ ਨੇੜੇ ਦਾਦਰੀ ਸੀ, ਇਸੇ ਕਰਕੇ ਮੁਜ਼ੱਫਰਨਗਰ ਤੋਂ ਵੀ ਤਿੰਨ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਸੱਦੀਆਂ ਗਈਆਂ। ਫਾਇਰ ਬ੍ਰਿਗੇਡ ਦੇ ਮੁਲਾਜ਼ਮਾਂ ਨੇ ਕਾਫੀ ਮੁਸ਼ੱਕਤ ਤੋਂ ਬਾਅਦ ਬੱਸ ਦੀ ਅੱਗ 'ਤੇ ਕਾਬੂ ਪਾਇਆ, ਪਰ ਉਦੋਂ ਤੱਕ ਪੂਰੀ ਬੱਸ ਸੜ ਕੇ ਸੁਆਹ ਹੋ ਚੁੱਕੀ ਸੀ। ਬੱਸ ਡਰਾਈਵਰ ਨੇ ਫੋਨ ਕਰਕੇ ਆਪਣੇ ਰੋਡਵੇਜ਼ ਅਧਿਕਾਰੀਆਂ ਨੂੰ ਇਸ ਦੀ ਸੂਚਨਾ ਦਿੱਤੀ।
"ਰਾਜਸਥਾਨ ਰੋਡਵੇਜ਼ ਦੀ ਡਬਲ ਡੈਕਰ ਬੱਸ 'ਚ ਮੁਢਲੀ ਜਾਂਚ ਮੁਤਾਬਕ ਸ਼ਾਰਟ ਸਰਕਟ ਹੋਣ ਕਾਰਨ ਅੱਗ ਲੱਗੀ ਸੀ। ਬੱਸ 'ਚ ਮੌਜੂਦ 26 ਸਵਾਰੀਆਂ ਨੂੰ ਸੁਰੱਖਿਅਤ ਉਤਾਰ ਲਿਆ ਗਿਆ। ਸਾਰੀਆਂ ਸਵਾਰੀਆਂ ਹੋਰ ਵਾਹਨਾਂ ਰਾਹੀਂ ਉੱਥੋਂ ਚਲੀਆਂ ਗਈਆਂ। ਫਾਇਰ ਬ੍ਰਿਗੇਡ ਨੇ ਅੱਗ 'ਤੇ ਕਾਬੂ ਪਾ ਲਿਆ ਹੈ।"
- ਸੁਮਨ ਕੁਮਾਰ ਸਿੰਘ, ਇੰਸਪੈਕਟਰ-ਦੌਰਾਲਾ।
"ਬੱਸ ਨੂੰ ਅੱਗ ਲੱਗੀ ਸੀ, ਸਾਰੀਆਂ ਸਵਾਰੀਆਂ ਅਤੇ ਡਰਾਈਵਰ-ਕੰਡਕਟਰ ਸੁਰੱਖਿਅਤ ਹਨ। ਮੇਰਠ ਤੋਂ ਚਾਰ ਅਤੇ ਮੁਜ਼ੱਫਰਨਗਰ ਤੋਂ ਤਿੰਨ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਮੌਕੇ 'ਤੇ ਪਹੁੰਚੀਆਂ ਸਨ। ਥੋੜ੍ਹੀ ਦੇਰ 'ਚ ਹੀ ਅੱਗ 'ਤੇ ਕਾਬੂ ਪਾ ਲਿਆ ਗਿਆ ਸੀ।"
- ਸੁਰੇਂਦਰ ਸਿੰਘ, ਸੀ.ਐੱਫ.ਓ.-ਮੇਰਠ।