'ਗਰਲਫ੍ਰੈਂਡ 0% ਤੇ FD 14.40% ਵਿਆਜ' ਵਾਲੇ ਅਸ਼ਲੀਲ ਇਸ਼ਤਿਹਾਰ ਨੇ ਮਚਾਈ ਤਬਾਹੀ, ਸਿਆਸੀ ਗਲਿਆਰਿਆਂ 'ਚ ਮਚੀ ਹਲਚਲ

ਡਿਜੀਟਲ ਡੈਸਕ, ਚੇਨਈ। ਚੇਨਈ ਮੈਟਰੋ ਰੇਲ ਦੇ ਇੱਕ ਕੋਚ ਵਿੱਚ ਲੱਗੇ ਇਸ਼ਤਿਹਾਰੀ ਪੋਸਟਰ ਨੂੰ ਲੈ ਕੇ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਡੀਐਮਕੇ ਦੀ ਸੰਸਦ ਮੈਂਬਰ ਨੇ ਇਸ ਇਸ਼ਤਿਹਾਰ ਦੇ ਸੰਦੇਸ਼ 'ਤੇ ਇਤਰਾਜ਼ ਜਤਾਇਆ ਹੈ। ਉਨ੍ਹਾਂ ਦੋਸ਼ ਲਾਇਆ ਹੈ ਕਿ ਇਸ ਵਿੱਚ ਔਰਤਾਂ ਦਾ ਅਪਮਾਨ ਕੀਤਾ ਗਿਆ ਹੈ ਅਤੇ ਉਨ੍ਹਾਂ ਨੂੰ ਇੱਕ ਵਸਤੂ ਵਜੋਂ ਪੇਸ਼ ਕੀਤਾ ਗਿਆ ਹੈ।

ਡੀਐਮਕੇ ਸੰਸਦ ਮੈਂਬਰ ਤਮਿਲਚੀ ਥੰਗਾਪਾਂਡਿਅਨ ਨੇ ਐਕਸ 'ਤੇ ਇੱਕ ਪੋਸਟ ਰਾਹੀਂ ਚੇਨਈ ਮੈਟਰੋ ਕੋਚ ਦੇ ਅੰਦਰ ਲੱਗੇ ਇਸ ਇਸ਼ਤਿਹਾਰ ਦੀ ਤਸਵੀਰ ਸਾਂਝੀ ਕੀਤੀ ਅਤੇ ਅਜਿਹੇ ਇਸ਼ਤਿਹਾਰ ਦੀ ਇਜਾਜ਼ਤ ਦੇਣ ਵਾਲਿਆਂ ਖ਼ਿਲਾਫ਼ ਕਾਰਵਾਈ ਦੀ ਮੰਗ ਕੀਤੀ। ਉਨ੍ਹਾਂ ਅਧਿਕਾਰੀਆਂ ਨੂੰ ਇਸ਼ਤਿਹਾਰ ਤੁਰੰਤ ਹਟਾਉਣ ਲਈ ਵੀ ਕਿਹਾ।

ਕਿਸ ਦਾ ਹੈ ਇਹ ਇਸ਼ਤਿਹਾਰ?

ਇਹ ਇਸ਼ਤਿਹਾਰ 'THECOS' ਨਾਮ ਦੀ ਇੱਕ ਕੋ-ਆਪਰੇਟਿਵ ਕ੍ਰੈਡਿਟ ਸੋਸਾਇਟੀ ਵੱਲੋਂ ਦਿੱਤਾ ਗਿਆ ਸੀ। ਇਸ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਲੋਕ ਉਨ੍ਹਾਂ ਕੋਲ ਫਿਕਸਡ ਡਿਪਾਜ਼ਿਟ (ਐੱਫਡੀ) 'ਤੇ ਬਿਹਤਰ ਵਿਆਜ ਦਰਾਂ ਹਾਸਲ ਕਰ ਸਕਦੇ ਹਨ, ਜਦਕਿ ਗਰਲਫ੍ਰੈਂਡ ਸ਼ਾਇਦ 0 ਫੀਸਦੀ ਵਿਆਜ ਦੇਵੇ।

ਥੰਗਾਪਾਂਡਿਅਨ ਨੇ ਕਿਹਾ, 'ਨਈ ਮੈਟਰੋ ਰੇਲ ਦੇ ਅੰਦਰ ਲੱਗਾ ਇਹ ਇਸ਼ਤਿਹਾਰ ਔਰਤਾਂ ਦਾ ਅਪਮਾਨ ਕਰਦਾ ਹੈ ਅਤੇ ਉਨ੍ਹਾਂ ਨੂੰ ਇੱਕ ਵਸਤੂ ਵਜੋਂ ਦਰਸਾਉਂਦਾ ਹੈ, ਜੋ ਬਹੁਤ ਹੈਰਾਨ ਕਰਨ ਵਾਲੀ ਗੱਲ ਹੈ। ਇਹ ਯਕੀਨੀ ਬਣਾਉਣਾ ਜ਼ਰੂਰੀ ਹੈ ਕਿ ਜਨਤਕ ਥਾਵਾਂ 'ਤੇ ਲੱਗਣ ਵਾਲੇ ਇਸ਼ਤਿਹਾਰਾਂ ਵਿੱਚ ਔਰਤਾਂ ਦੀ ਗਰਿਮਾ ਦਾ ਧਿਆਨ ਰੱਖਿਆ ਜਾਵੇ।'

ਉਨ੍ਹਾਂ ਕਿਹਾ, 'ਵਾਲ ਇਹ ਉੱਠਦਾ ਹੈ ਕਿ ਚੇਨਈ ਮੈਟਰੋ ਰੇਲ ਪ੍ਰਸ਼ਾਸਨ ਨੇ ਇਸ ਤਰ੍ਹਾਂ ਦੇ ਇਸ਼ਤਿਹਾਰ ਦੀ ਇਜਾਜ਼ਤ ਕਿਵੇਂ ਦੇ ਦਿੱਤੀ। ਮੇਰੀ ਮੰਗ ਹੈ ਕਿ ਇਸ ਇਸ਼ਤਿਹਾਰ ਨੂੰ ਤੁਰੰਤ ਹਟਾਇਆ ਜਾਵੇ ਅਤੇ ਭਵਿੱਖ ਵਿੱਚ ਅਜਿਹੇ ਇਸ਼ਤਿਹਾਰ ਦੁਬਾਰਾ ਨਾ ਦਿਖਾਏ ਜਾਣ, ਇਸ ਲਈ ਢੁੱਕਵੀਂ ਕਾਰਵਾਈ ਕੀਤੀ ਜਾਵੇ।'

ਕਾਨੂੰਨੀ ਕਾਰਵਾਈ ਦੀ ਮੰਗ

ਡੀਐਮਕੇ ਨੇਤਾ ਨੇ ਕਿਹਾ ਕਿ ਹਰ ਰੋਜ਼ ਲੱਖਾਂ ਲੋਕ ਚੇਨਈ ਮੈਟਰੋ ਦੀ ਵਰਤੋਂ ਕਰਦੇ ਹਨ ਅਤੇ ਇਸ ਤਰ੍ਹਾਂ ਦੇ ਇਸ਼ਤਿਹਾਰ ਦਾ ਲੋਕਾਂ 'ਤੇ ਪ੍ਰਭਾਵ ਪੈ ਸਕਦਾ ਹੈ। ਏਆਈਏਡੀਐਮਕੇ ਦੇ ਬੁਲਾਰੇ ਕੋਵਈ ਸਤਯਨ ਨੇ ਵੀ ਇਸ਼ਤਿਹਾਰ ਬਣਾਉਣ ਵਾਲਿਆਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਦੀ ਮੰਗ ਕੀਤੀ ਹੈ।

ਉਨ੍ਹਾਂ ਕਿਹਾ, ' ਇਸ ਚੀਜ਼ ਨੂੰ ਦੇਖ ਕੇ ਮੇਰੇ ਕੋਲ ਕਹਿਣ ਲਈ ਸ਼ਬਦ ਨਹੀਂ ਹਨ। ਇਹ ਸਪੱਸ਼ਟ ਤੌਰ 'ਤੇ ਇੱਕ ਔਰਤ ਦੀ ਗਰਿਮਾ ਨੂੰ ਠੇਸ ਪਹੁੰਚਾਉਣ ਵਾਲੀ ਗੱਲ ਹੈ, ਜੋ ਕਾਨੂੰਨ ਅਧੀਨ ਦੰਡਨਯੋਗ ਅਪਰਾਧ ਹੋ ਸਕਦਾ ਹੈ। ਸਿਰਫ਼ ਇਸ ਲਈ ਕਿ ਕਿਸੇ ਇਸ਼ਤਿਹਾਰ ਵਿੱਚ ਤੁਹਾਨੂੰ ਅਭਿਵਿਅਕਤੀ ਦੀ ਆਜ਼ਾਦੀ ਮਿਲਦੀ ਹੈ, ਇਸ ਦਾ ਇਹ ਮਤਲਬ ਨਹੀਂ ਕਿ ਤੁਸੀਂ ਲਿੰਗ ਦੇ ਆਧਾਰ 'ਤੇ ਕਿਸੇ ਨੂੰ ਨੀਵਾਂ ਦਿਖਾਉਣ ਦੀ ਹੱਦ ਤੱਕ ਚਲੇ ਜਾਓ।'

ਜਿਸ ਸੰਸਥਾ ਨੇ ਇਹ ਇਸ਼ਤਿਹਾਰ ਦਿੱਤਾ ਹੈ, ਉਸ ਨੂੰ ਤਿਰੁਵੱਲੁਵਰ ਟਰਾਂਸਪੋਰਟ ਕਾਰਪੋਰੇਸ਼ਨ ਐਮਪਲਾਇਜ਼ ਕੋਆਪਰੇਟਿਵ ਕ੍ਰੈਡਿਟ ਸੋਸਾਇਟੀ ਲਿਮਿਟੇਡ (TTCECS) ਦੇ ਨਾਂ ਨਾਲ ਵੀ ਜਾਣਿਆ ਜਾਂਦਾ ਹੈ। ਇਹ ਸੰਸਥਾ ਆਪਣੇ ਆਪ ਨੂੰ ਇੱਕ ਭਰੋਸੇਯੋਗ ਵਿੱਤੀ ਸੰਸਥਾ ਦੱਸਦੀ ਹੈ, ਜੋ ਪੂਰੇ ਤਮਿਲਨਾਡੂ ਵਿੱਚ ਟਰਾਂਸਪੋਰਟ ਕਰਮਚਾਰੀਆਂ ਦੀਆਂ ਆਰਥਿਕ ਜ਼ਰੂਰਤਾਂ ਪੂਰੀ ਕਰਨ ਲਈ ਕੰਮ ਕਰਦੀ ਹੈ।