ਕੁਦਰਤ ਦਾ ਕਹਿਰ: ਮੀਂਹ- ਹਨੇਰੀ ਨੇ ਬੰਗਾਲ ਸਮੇਤ ਕਈ ਸੂਬਿਆਂ 'ਚ ਮਚਾਈ ਤਬਾਹੀ, ਯੂਪੀ 'ਚ 20 ਤੇ ਬਿਹਾਰ 'ਚ 14 ਲੋਕਾਂ ਦੀ ਮੌਤ

ਜਾਗਰਣ ਟੀਮ, ਨਵੀਂ ਦਿੱਲੀ: ਕਈ ਦਿਨਾਂ ਦੀ ਭਿਆਨਕ ਗਰਮੀ ਮਗਰੋਂ ਵੀਰਵਾਰ ਨੂੰ ਬਦਲਿਆ ਮੌਸਮ ਕਹਿਰ ਬਣ ਕੇ ਵਰ੍ਹਿਆ। ਨਵੀਂ ਪੱਛਮੀ ਗੜਬੜੀ ਕਾਰਨ ਤੇਜ਼ ਹਨੇਰੀ ਦੇ ਨਾਲ ਪਏ ਮੀਂਹ ਤੇ ਗੜੇਮਾਰੀ ਨੇ ਭਾਰੀ ਤਬਾਹੀ ਮਚਾਈ।

ਬਿਜਲੀ ਦੇ ਖੰਭੇ ਅਤੇ ਰੁੱਖ ਡਿੱਗਣ ਕਾਰਨ ਬਿਜਲੀ ਸਪਲਾਈ ਪ੍ਰਭਾਵਿਤ ਹੋਈ, ਜਿਸ ਨਾਲ ਰੇਲ ਸੰਚਾਲਨ 'ਤੇ ਵੀ ਅਸਰ ਪਿਆ। ਖ਼ਰਾਬ ਮੌਸਮ ਕਾਰਨ ਕਈ ਉਡਾਣਾਂ ਦੇ ਰੂਟ ਡਾਇਵਰਟ ਕੀਤੇ ਗਏ। ਮੀਂਹ ਕਾਰਨ ਹੋਏ ਹਾਦਸਿਆਂ ਵਿੱਚ ਸਿਰਫ਼ ਉੱਤਰ ਪ੍ਰਦੇਸ਼ ਵਿੱਚ ਹੀ 20 ਲੋਕਾਂ ਦੀ ਮੌਤ ਹੋ ਗਈ। ਬਿਹਾਰ ਵਿੱਚ 14, ਉੱਤਰਾਖੰਡ ਵਿੱਚ ਦੋ ਅਤੇ ਝਾਰਖੰਡ ਵਿੱਚ ਦੋ ਲੋਕਾਂ ਦੀ ਮੌਤ ਦੀ ਸੂਚਨਾ ਹੈ।

ਉੱਤਰ ਪ੍ਰਦੇਸ਼ ਵਿੱਚ ਵੀਰਵਾਰ ਦੇਰ ਰਾਤ ਸ਼ੁਰੂ ਹੋਏ ਮੀਂਹ ਅਤੇ ਗੜੇਮਾਰੀ ਦੀ ਲਪੇਟ ਵਿੱਚ ਭਾਵੇਂ ਪੂਰਾ ਸੂਬਾ ਰਿਹਾ, ਪਰ ਸਭ ਤੋਂ ਵੱਧ ਅਸਰ ਬੁੰਦੇਲਖੰਡ ਅਤੇ ਪੂਰਵਾਂਚਲ ਵਿੱਚ ਦੇਖਣ ਨੂੰ ਮਿਲਿਆ। ਉੱਤਰ-ਪੂਰਬੀ ਰੇਲਵੇ ਦੇ ਵਾਰਾਣਸੀ ਮੰਡਲ ਅਧੀਨ ਪੈਂਦੇ ਚੌਰੀਚੌਰਾ ਅਤੇ ਗੌਰੀ ਬਾਜ਼ਾਰ ਰੇਲਵੇ ਸਟੇਸ਼ਨਾਂ ਵਿਚਕਾਰ ਰੇਲ ਲਾਈਨ 'ਤੇ ਚਾਰ ਰੁੱਖ ਡਿੱਗ ਗਏ।

ਵਾਰਾਣਸੀ ਵਿੱਚ 75 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਹਨੇਰੀ ਚੱਲੀ। ਪ੍ਰਯਾਗਰਾਜ ਵਿੱਚ ਮਈ ਦੇ ਮਹੀਨੇ ਵਿੱਚ ਇੱਕ ਦਿਨ ਵਿੱਚ ਸਭ ਤੋਂ ਵੱਧ ਮੀਂਹ ਪੈਣ ਦਾ 55 ਸਾਲ ਪੁਰਾਣਾ ਰਿਕਾਰਡ ਟੁੱਟ ਗਿਆ। ਰਾਤ ਇੱਕ ਵਜੇ ਤੋਂ ਸਵੇਰੇ ਪੰਜ ਵਜੇ ਦੇ ਵਿਚਕਾਰ ਚਾਰ ਘੰਟਿਆਂ ਵਿੱਚ 61 ਮਿਲੀਮੀਟਰ ਮੀਂਹ ਪਿਆ, ਇਸ ਤੋਂ ਪਹਿਲਾਂ 18 ਮਈ 1971 ਨੂੰ 54 ਮਿਲੀਮੀਟਰ ਮੀਂਹ ਦਾ ਰਿਕਾਰਡ ਸੀ।

ਯੋਗੀ ਆਦਿੱਤਿਆਨਾਥ ਨੇ ਨੁਕਸਾਨ ਦਾ ਮੁਲਾਂਕਣ ਕਰਕੇ 24 ਘੰਟਿਆਂ ਦੇ ਅੰਦਰ-ਅੰਦਰ ਰਾਹਤ ਰਾਸ਼ੀ ਵੰਡਣ ਦੇ ਨਿਰਦੇਸ਼ ਦਿੱਤੇ ਹਨ। ਬਿਹਾਰ ਵਿੱਚ ਸ਼ੁੱਕਰਵਾਰ ਨੂੰ ਹਨੇਰੀ-ਮੀਂਹ ਅਤੇ ਅਸਮਾਨੀ ਬਿਜਲੀ ਡਿੱਗਣ ਕਾਰਨ ਜਾਨ-ਮਾਲ ਦਾ ਭਾਰੀ ਨੁਕਸਾਨ ਹੋਇਆ ਹੈ।

ਤੁੰਗਨਾਥ-ਚੋਪਤਾ ਵਿੱਚ ਅਸਮਾਨੀ ਬਿਜਲੀ ਡਿੱਗੀ, ਲਖਨਊ ਦੇ ਦੋ ਭਰਾਵਾਂ ਦੀ ਮੌਤ

ਰੁਦਰਪ੍ਰਯਾਗ ਦੇ ਤੁੰਗਨਾਥ-ਚੋਪਤਾ ਇਲਾਕੇ ਵਿੱਚ ਸ਼ੁੱਕਰਵਾਰ ਸ਼ਾਮ ਨੂੰ ਤੇਜ਼ ਤੂਫ਼ਾਨ ਅਤੇ ਅਸਮਾਨੀ ਬਿਜਲੀ ਡਿੱਗਣ ਕਾਰਨ ਲਖਨਊ ਦੇ ਰਹਿਣ ਵਾਲੇ ਦੋ ਭਰਾਵਾਂ ਦੀ ਮੌਤ ਹੋ ਗਈ। ਉਹ ਤੁੰਗਨਾਥ-ਚੋਪਤਾ ਖੇਤਰ ਵਿੱਚ ਟ੍ਰੈਕਿੰਗ ਲਈ ਪਹੁੰਚੇ ਸਨ। ਇਸ ਹਾਦਸੇ ਵਿੱਚ ਤਿੰਨ ਹੋਰ ਲੋਕ ਜ਼ਖ਼ਮੀ ਹੋ ਗਏ।

ਖ਼ਰਾਬ ਮੌਸਮ ਵਿੱਚ ਫਸੇ 50 ਤੋਂ ਵੱਧ ਸੈਲਾਨੀਆਂ ਨੂੰ ਪ੍ਰਸ਼ਾਸਨ ਅਤੇ ਰਾਹਤ ਏਜੰਸੀਆਂ ਨੇ ਰੈਸਕਿਊ (ਬਚਾਅ) ਕੀਤਾ। ਜ਼ਿਲ੍ਹਾ ਐਮਰਜੈਂਸੀ ਆਪ੍ਰੇਸ਼ਨ ਸੈਂਟਰ ਅਨੁਸਾਰ ਸ਼ੁੱਕਰਵਾਰ ਸ਼ਾਮ 4:17 ਵਜੇ ਤੁੰਗਨਾਥ-ਚੋਪਤਾ ਖੇਤਰ ਵਿੱਚ ਅਚਾਨਕ ਮੌਸਮ ਖ਼ਰਾਬ ਹੋਣ ਕਾਰਨ ਕਈ ਸੈਲਾਨੀ ਫਸ ਗਏ।