ਮੁੰਬਈ 'ਚ ਕੁਦਰਤ ਦਾ ਕਹਿਰ: ਭਾਰੀ ਬਾਰਿਸ਼ ਨਾਲ ਰੁਕੀ ਮਾਇਾਨਗਰੀ ਦੀ ਰਫ਼ਤਾਰ, ਹੇਠਲੇ ਇਲਾਕੇ ਬਣੇ ਤਾਲਾਬ

ਖੇਤਰੀ ਮੌਸਮ ਵਿਗਿਆਨ ਕੇਂਦਰ ਤੇ ਬ੍ਰਿਨਮੁੰਈ ਨਗਰ ਨਿਗਮ (ਬੀਐੱਮਸੀ) ਤੋਂ ਮਿਲੀ ਜਾਣਕਾਰੀ ਮੁਤਾਬਕ, ਮੁੰਬਈ ਦੇ ਕੁਝ ਹਿੱਸਿਆਂ ’ਚ 24 ਘੰਟੇ ਦੇ ਸਮੇਂ ’ਚ 200 ਤੋਂ 300 ਮਿ.ਮੀ. ਬਾਰਿਸ਼ ਹੋਈ ਹੈ। ਮੁੰਬਈ ਮਹਾਨਗਰ ਖੇਤਰ (ਐੱਮਐੱਮਆਰ) ਦੇ ਗੁਆਂਢੀ ਜ਼ਿਲਿ੍ਹਆਂ ਠਾਣੇ, ਪਾਲਘਰ ਤੇ ਰਾਇਗੜ੍ਹ ’ਚ ਵੀ ਭਾਰੀ ਬਾਰਿਸ਼ ਹੋਈ। ਬੀਐੱਮਸੀ ਮੁਤਾਬਕ, ਪਰੇਲ ’ਚ 334 ਮਿ.ਮੀ., ਮਾਲਵਣੀ ’ਚ 340 ਮਿ.ਮੀ., ਕੋਲਾਬਾ ’ਚ 248 ਮਿ.ਮੀ. ਤੇ ਸਾਂਤਾਕਰੂਜ ’ਚ 225 ਮਿ.ਮੀ. ਬਾਰਿਸ਼ ਦਰਜ ਕੀਤੀ ਗਈ। ਮੁੰਬਈ ਦੀ ਮੇਅਰ ਰਿਤੂ ਤਾਵੜੇ ਦੇ ਸਾਹਮਣੇ ਸ਼ਰਮਨਾਕ ਸਥਿਤੀ ਤਦ ਪੈਦਾ ਹੋ ਗਈ, ਜਦ ਉਹ ਕਿੰਗਜ਼ ਸਰਕਲ ’ਚ ਪਾਣੀ ਨਾਲ ਭਰੇ ਗਾਂਧੀ ਬਾਜ਼ਾਰ ਦਾ ਨਿਰੀਖਣ ਕਰ ਰਹੀ ਸੀ। ਉਨ੍ਹਾਂ ਦੇ ਸਾਹਮਣੇ ਹੀ ਬੀਐੱਮਸੀ ਦਾ ਇਕ ਮੁਲਾਜ਼ਮ ਖੁੱਲ੍ਹੇ ਮੈਨਹੋਲ ’ਚ ਡਿੱਗ ਗਿਆ। ਹਾਲਾਂਕਿ, ਉਸ ਮੁਲਾਜ਼ਮ ਨੂੰ ਤੁਰੰਤ ਬਚਾ ਲਿਆ ਗਿਆ। ਇਸ ਸ਼ਰਮਨਾਕ ਘਟਨਾ ਦੇ ਕਾਰਨ ਮੇਅਰ ਨੇ ਘਟਨਾ ਵਾਲੀ ਥਾਂ ’ਤੇ ਮੌਜੂਦ ਅਧਿਕਾਰੀਆਂ ਦੇ ਪ੍ਰਤੀ ਸਖ਼ਤ ਨਾਰਾਜ਼ਗੀ ਜ਼ਾਹਰ ਕੀਤੀ। ਇਸ ਘਟਨਾ ਦੇ ਕਾਰਨ ਮਹਾਰਾਸ਼ਟਰ ਸਰਕਾਰ ਤੇ ਬੀਐੱਮਸੀ ਦੀ ਸਖ਼ਤ ਨਿੰਦਾ ਹੋ ਰਹੀ ਹੈ। ਕਾਂਗਰਸੀ ਸੰਸਦ ਮੈਂਬਰ ਵਰਸ਼ਾ ਗਾਇਕਵਾੜ ਨੇ ਆਪਣੇ ਐਕਸ ਅਕਾਊਂਟ ’ਤੇ ਘਟਨਾ ਦਾ ਵੀਡੀਓ ਸਾਂਝਾ ਕੀਤਾ ਤੇ ਮੇਅਰ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਕਿਹਾ ਕਿ ਇਹ ਵਿਅਕਤੀ ਆਪਣੇ ਨਕਾਰਾਪਣ ਤੇ ਭ੍ਰਿਸ਼ਟਾਚਾਰ ਦੇ ਟੋਏ ’ਚ ਡਿੱਗ ਗਿਆ। ਇਹ ਕੋਈ ਹਾਦਸਾ ਨਹੀਂ ਹੈ, ਤੁਹਾਡਾ ਭ੍ਰਿਸ਼ਟਾਚਾਰ ਰੰਗੇ ਹੱਥੀਂ ਫੜਿਆ ਗਿਆ ਹੈ। ਪਰ ਮੇਅਰ ਤਾਵੜੇ ਦਾ ਕਹਿਣਾ ਹੈ ਕਿ ਅੰਧੇਰੀ ਸਬਵੇ ਨੂੰ ਛੱਡ ਕੇ ਪੂਰੇ ਮਹਾਨਗਰ ’ਚ ਸਥਿਤੀ ਠੀਕ ਹੈ। ਕਿਤੇ ਵੀ ਪਾਣੀ ਨਹੀਂ ਭਰਿਆ। ਜਿੱਥੇ ਵੀ ਪਾਣੀ ਹੈ, ਬੀਐੱਮਸੀ ਪ੍ਰਸ਼ਾਸਨ ਤੇ ਜਨ ਨੁਮਾਇੰਦੇ ਉਸ ਨੂੰ ਕੱਢਣ ਲਈ ਕੰਮ ਕਰ ਰਹੇ ਹਨ।