ਮੈਡੀਕਲ-ਇੰਜੀਨੀਅਰਿੰਗ ਕਾਲਜਾਂ ’ਚ ਖੁੱਲ੍ਹਣਗੇ ਵਿਦਿਆਰਥੀਆਂ ਲਈ ਮਾਨਸਿਕ ਸਿਹਤ ਕੇਂਦਰ, ਸਰਕਾਰ ਨੇ ਚੁੱਕਿਆ ਕਦਮ

ਸਟੇਟ ਬਿਊਰੋ, ਜਾਗਰਣ, ਲਖਨਊ : ਪੜ੍ਹਾਈ ਦਾ ਦਬਾਅ, ਪ੍ਰੀਖਿਆ ਦੀ ਚਿੰਤਾ, ਪਲੇਸਮੈਂਟ ਦੀ ਚੁਣੌਤੀ ਅਤੇ ਪਰਿਵਾਰ ਦੀਆਂ ਉਮੀਦਾਂ ਵਿਚਕਾਰ ਵਿਦਿਆਰਥੀਆਂ ਨੂੰ ਮਾਨਸਿਕ ਤਣਾਅ ਤੋਂ ਉਭਾਰਨ ਲਈ ਸੂਬਾ ਸਰਕਾਰ ਨੇ ਨਵੀਂ ਪਹਿਲ ਕੀਤੀ ਹੈ। ਮੈਡੀਕਲ ਅਤੇ ਇੰਜੀਨੀਅਰਿੰਗ ਕਾਲਜਾਂ ’ਚ ਵਿਦਿਆਰਥੀਆਂ ਲਈ ਸਮਰਪਿਤ ਮਾਨਸਿਕ ਸਿਹਤ ਕੇਂਦਰ ਖੋਲ੍ਹੇ ਜਾਣਗੇ। ਇਨ੍ਹਾਂ ਕੇਂਦਰਾਂ ’ਤੇ ਵਿਦਿਆਰਥੀਆਂ ਨੂੰ ਗੁਪਤ ਤਰੀਕੇ ਨਾਲ ਪਰਾਮਰਸ਼ ਅਤੇ ਕਾਊਂਸਲਿੰਗ ਮੁਹੱਈਆ ਕਰਵਾਈ ਜਾਵੇਗੀ। ਲੋੜ ਪੈਣ ’ਤੇ ਮਾਹਿਰ ਇਲਾਜ ਦੀ ਵੀ ਵਿਵਸਥਾ ਹੋਵੇਗੀ।

ਆਈਆਈਟੀ ਦਿੱਲੀ ’ਚ ਐੱਮਐੱਸਸੀ ਭੌਤਿਕ ਵਿਗਿਆਨ ਦੇ ਵਿਦਿਆਰਥੀ ਦੀ ਮੌਤ ਤੋਂ ਬਾਅਦ ਮਾਨਸਿਕ ਸਿਹਤ ਸਹਾਇਤਾ ਅਤੇ ਸੰਸਥਾਗਤ ਵਿਵਸਥਾਵਾਂ ਨੂੰ ਲੈ ਕੇ ਉੱਠੇ ਸਵਾਲਾਂ ਵਿਚਕਾਰ ਸੂਬਾ ਸਰਕਾਰ ਨੇ ਇਹ ਕਦਮ ਚੁੱਕਿਆ ਹੈ। ਸਿਹਤ ਵਿਭਾਗ ਅਨੁਸਾਰ, ਨਵੇਂ ਕੇਂਦਰ ਮੌਜੂਦਾ ਮਨੋਚਿਕਿਤਸਾ ਵਿਭਾਗਾਂ ਤੋਂ ਵੱਖ ਹੋਣਗੇ ਅਤੇ ਖ਼ਾਸ ਤੌਰ ’ਤੇ ਵਿਦਿਆਰਥੀਆਂ ਦੀ ਮਾਨਸਿਕ ਸਿਹਤ ਨਾਲ ਸਬੰਧਤ ਲੋੜਾਂ ’ਤੇ ਕੰਮ ਕਰਨਗੇ। ਇੰਜੀਨੀਅਰਿੰਗ ਕਾਲਜਾਂ ’ਚ ਮਨੋਵਿਗਿਆਨੀ ਅਤੇ ਕਾਊਂਸਲਰ ਤਾਇਨਾਤ ਕੀਤੇ ਜਾਣਗੇ। ਉਨ੍ਹਾਂ ਦਾ ਉਦੇਸ਼ ਵਿਦਿਆਰਥੀਆਂ ’ਚ ਤਣਾਅ, ਦਬਾਅ ਜਾਂ ਡਿਪ੍ਰੈਸ਼ਨ ਦੇ ਸ਼ੁਰੂਆਤੀ ਸੰਕੇਤਾਂ ਦੀ ਪਛਾਣ ਕਰਕੇ ਸਮੇਂ ਸਿਰ ਸਹਾਇਤਾ ਮੁਹੱਈਆ ਕਰਵਾਉਣਾ ਹੋਵੇਗਾ। ਮੈਡੀਕਲ ਕਾਲਜਾਂ ’ਚ ਪਹਿਲਾਂ ਤੋਂ ਮਨੋਚਿਕਿਤਸਾ ਵਿਭਾਗ ਹਨ, ਪਰ ਨਵੇਂ ਕੇਂਦਰ ਵਿਦਿਆਰਥੀਆਂ ਲਈ ਵੱਖਰੀ ਵਿਵਸਥਾ ਵਜੋਂ ਕੰਮ ਕਰਨਗੇ।

ਉਪ ਮੁੱਖ ਮੰਤਰੀ ਬ੍ਰਜੇਸ਼ ਪਾਠਕ ਨੇ ਕਿਹਾ ਕਿ ਮੈਡੀਕਲ ਅਤੇ ਇੰਜੀਨੀਅਰਿੰਗ ਵਰਗੇ ਔਖੇ ਕੋਰਸਾਂ ’ਚ ਪੜ੍ਹਾਈ ਦੇ ਨਾਲ ਪ੍ਰੀਖਿਆ, ਮੁਕਾਬਲੇ, ਪਲੇਸਮੈਂਟ ਅਤੇ ਪਰਿਵਾਰਕ ਉਮੀਦਾਂ ਦਾ ਦਬਾਅ ਰਹਿੰਦਾ ਹੈ। ਅਜਿਹੇ ’ਚ ਸਮੱਸਿਆ ਗੰਭੀਰ ਹੋਣ ਤੋਂ ਪਹਿਲਾਂ ਵਿਦਿਆਰਥੀਆਂ ਨੂੰ ਸਹਾਇਤਾ ਮੁਹੱਈਆ ਕਰਵਾਉਣਾ ਜ਼ਰੂਰੀ ਹੈ। ਇਸ ਤੋਂ ਪਹਿਲਾਂ ਐੱਨਐੱਚਐੱਮ ਨੇ ਵਿੱਤੀ ਸਾਲ 2025-26 ’ਚ ਟੈਲੀ-ਮਾਨਸ ਸੇਵਾ ਦਾ ਵਿਸਥਾਰ ਕੀਤਾ ਸੀ। 24 ਘੰਟੇ ਦੀ ਮੁਫ਼ਤ ਹੈਲਪਲਾਈਨ ’ਤੇ ਸੂਬੇ ’ਚ ਤਿੰਨ ਲੱਖ ਤੋਂ ਵੱਧ ਲੋਕਾਂ ਦੀ ਸਲਾਹ ਲਈ। ਆਗਰਾ, ਬਰੇਲੀ, ਵਾਰਾਣਸੀ ਅਤੇ ਗੋਰਖਪੁਰ ’ਚ ਮਾਨਸ ਸੇਵਾ ਕੇਂਦਰ ਵੀ ਚਲਾਏ ਜਾ ਰਹੇ ਹਨ।