ਜਾਪਾਨ ਦੀ ਪ੍ਰਧਾਨ ਮੰਤਰੀ ਸਾਨਾਏ ਤਾਕਾਈਚੀ ਭਾਰਤ ਦੌਰੇ 'ਤੇ ਆਉਣਗੇ, 16ਵੇਂ ਸ਼ਿਖਰ ਸੰਮੇਲਨ ਵਿੱਚ ਕਿਹੜੇ ਮੁੱਦਿਆਂ 'ਤੇ ਹੋਵੇਗੀ ਚਰਚਾ?

ਮੌਜੂਦਾ ਵਿਸ਼ਵ ਪਰੀਪੇਖ ਅਤੇ ਟਰੰਪ ਪ੍ਰਸ਼ਾਸਨ ਵੱਲੋਂ ਹਿੰਦ-ਪ੍ਰਸ਼ਾਂਤ ਮਹਾਸਾਗਰ ਨੂੰ ਲੈ ਕੇ ਨੀਤੀ ਵਿੱਚ ਬਦਲਾਅ ਦੇ ਸੰਕੇਤਾਂ ਦੇ ਮੱਦੇਨਜ਼ਰ ਇਹ ਮੀਟਿੰਗ ਬਹੁਤ ਮਹੱਤਵਪੂਰਨ ਮੰਨੀ ਜਾ ਰਹੀ ਹੈ।

ਭਾਰਤ-ਜਾਪਾਨ ਸ਼ਿਖਰ ਸੰਮੇਲਨ

ਵਿਦੇਸ਼ ਮੰਤਰਾਲੇ ਦੇ ਅਨੁਸਾਰ ਇਹ ਸੰਮੇਲਨ ਦੋਵਾਂ ਦੇਸ਼ਾਂ ਨੂੰ ਦਵਿਪੱਖੀ ਸਹਿਯੋਗ ਦੀ ਸਮੀਖਿਆ ਕਰਨ ਅਤੇ ਉਸਨੂੰ ਹੋਰ ਮਜ਼ਬੂਤ ਕਰਨ ਦਾ ਮੌਕਾ ਦੇਵੇਗਾ।

ਇਸ ਦੌਰਾਨ ਖੇਤਰੀ ਅਤੇ ਵਿਸ਼ਵ ਪੱਧਰੀ ਮੁੱਦਿਆਂ 'ਤੇ ਵੀ ਵਿਚਾਰਾਂ ਦਾ ਆਦਾਨ-ਪ੍ਰਦਾਨ ਹੋਵੇਗਾ, ਜਿਨ੍ਹਾਂ ਵਿੱਚ ਦੋਵਾਂ ਦੇ ਸਾਂਝੇ ਹਿਤ ਸ਼ਾਮਲ ਹਨ। ਇਹ ਦੌਰਾ ਅਗਸਤ 2025 ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਦੇ ਟੋਕਿਓ ਦੌਰੇ (15ਵੇਂ ਭਾਰਤ-ਜਾਪਾਨ ਸ਼ਿਖਰ ਸੰਮੇਲਨ) ਦੇ ਬਾਅਦ ਹੋ ਰਿਹਾ ਹੈ ਅਤੇ ਭਾਰਤ-ਜਾਪਾਨ ਵਿਸ਼ੇਸ਼ ਰਣਨੀਤਕ ਅਤੇ ਵਿਸ਼ਵ ਭਾਗੀਦਾਰੀ ਨੂੰ ਹੋਰ ਅੱਗੇ ਵਧਾਉਣ ਦੀ ਸਾਂਝੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।

ਭਾਰਤ ਅਤੇ ਜਾਪਾਨ ਨੇ ਸਾਲ 2000 ਵਿੱਚ ਗਲੋਬਲ ਭਾਗੀਦਾਰੀ ਸਥਾਪਤ ਕੀਤੀ ਸੀ, ਜਿਸਨੂੰ 2006 ਵਿੱਚ ਰਣਨੀਤਕ ਅਤੇ ਗਲੋਬਲ ਭਾਗੀਦਾਰੀ ਦਾ ਦਰਜਾ ਦਿੱਤਾ ਗਿਆ। ਫਿਰ 2014 ਵਿੱਚ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਅਤੇ ਤਤਕਾਲੀ ਪ੍ਰਧਾਨ ਮੰਤਰੀ ਸ਼ਿੰਜ਼ੋ ਆਬੇ ਨੇ ਇਸਨੂੰ ਹੋਰ ਮਜ਼ਬੂਤ ਕਰਦੇ ਹੋਏ “ਵਿਸ਼ੇਸ਼ ਰਣਨੀਤਕ ਅਤੇ ਗਲੋਬਲ ਭਾਗੀਦਾਰੀ” ਬਣਾਇਆ।

ਇਹ ਭਾਗੀਦਾਰੀ ਹਿੰਦ-ਪ੍ਰਸ਼ਾਂਤ ਖੇਤਰ ਨੂੰ ਆਜ਼ਾਦ, ਖੁੱਲ੍ਹਾ ਅਤੇ ਖੁਸ਼ਹਾਲ ਬਣਾਉਣ, ਲੋਕਤਾਂਤਰਿਕ ਮੁੱਲਾਂ, ਨਿਯਮ-ਆਧਾਰਿਤ ਅੰਤਰਰਾਸ਼ਟਰੀ ਪ੍ਰਣਾਲੀ ਅਤੇ ਆਰਥਿਕ ਸੁਰੱਖਿਆ 'ਤੇ ਆਧਾਰਿਤ ਹੈ।

ਮੁੱਖ ਸਹਿਯੋਗ ਖੇਤਰ

ਦੋਵਾਂ ਦੇਸ਼ਾਂ ਵਿਚ ਰੱਖਿਆ ਅਤੇ ਸੁਰੱਖਿਆ (ਸਾਂਝੇ ਅਭਿਆਸ, ਰੱਖਿਆ ਉਪਕਰਣ ਅਤੇ ਤਕਨਾਲੋਜੀ ਸਹਿਯੋਗ), ਆਰਥਿਕ ਸਹਿਯੋਗ, ਬੁਨਿਆਦੀ ਢਾਂਚਾ (ਬੁਲੇਟ ਟ੍ਰੇਨ), ਸੈਮੀਕੰਡਕਟਰ, ਕ੍ਰਿਟਿਕਲ ਮਿਨਰਲਸ ਅਤੇ ਕਲੀਨ ਐਨਰਜੀ ਵਰਗੇ ਖੇਤਰਾਂ ਵਿੱਚ ਸਹਿਯੋਗ ਹੋ ਰਿਹਾ ਹੈ।

ਦੋਵਾਂ ਦੇਸ਼ ਅਮਰੀਕਾ, ਆਸਟ੍ਰੇਲੀਆ ਅਤੇ ਜਾਪਾਨ ਨਾਲ ਮਿਲ ਕੇ ਕਵਾਡ ਦੇ ਵੀ ਮੈਂਬਰ ਹਨ।

ਭਵਿੱਖੀ ਚਰਚਾ ਦੇ ਮੁੱਖ ਮੁੱਦੇ

16ਵੇਂ ਸ਼ਿਖਰ ਸੰਮੇਲਨ ਵਿੱਚ 2025 ਦੇ ਵਿਜ਼ਨ ਨੂੰ ਅੱਗੇ ਵਧਾਉਣ ਦੇ ਨਾਲ ਨਾਲ ਆਰਥਿਕ ਸੁਰੱਖਿਆ, ਊਰਜਾ, ਕ੍ਰਿਟਿਕਲ ਮਿਨਰਲਸ, ਰੱਖਿਆ ਅਤੇ ਹਿੰਦ-ਪ੍ਰਸ਼ਾਂਤ ਖੇਤਰ ਦੀ ਸਥਿਰਤਾ 'ਤੇ ਧਿਆਨ ਰਹਿਣ ਦੀ ਸੰਭਾਵਨਾ ਹੈ।

ਪ੍ਰਧਾਨ ਮੰਤਰੀ ਤਾਕਾਈਚੀ ਦੇ ਨਾਲ ਇੱਕ ਉੱਚ ਪੱਧਰੀ ਜਾਪਾਨੀ ਕਾਰੋਬਾਰੀ ਡੈਲੀਗੇਸ਼ਨ ਵੀ ਭਾਰਤ ਆਵੇਗਾ।