ਜੰਮੂ-ਕਸ਼ਮੀਰ 'ਚ ਰੇਲ ਆਵਾਜਾਈ ਨੂੰ ਮਿਲੇਗੀ ਨਵੀਂ ਰਫ਼ਤਾਰ; ਤੀਜੀ ਵੰਦੇ ਭਾਰਤ ਐਕਸਪ੍ਰੈਸ ਨਾਲ ਸੈਰ-ਸਪਾਟੇ ਨੂੰ ਲੱਗਣਗੇ ਚਾਰ ਚੰਨ

ਜਾਸ, ਊਧਮਪੁਰ: ਜੰਮੂ-ਸ੍ਰੀਨਗਰ ਵਿਚਕਾਰ ਇਕ ਹੋਰ ਵੰਦੇ ਭਾਰਤ ਟ੍ਰੇਨ ਚਲਾਉਣ ਦੀ ਮਨਜ਼ੂਰੀ ਮਿਲ ਗਈ ਹੈ। ਜੰਮੂ ਤਵੀ ਤੋਂ ਚੱਲਣ ਵਾਲੀ ਇਸ ਟ੍ਰੇਨ ਦਾ ਸ਼ਹੀਦ ਕੈਪਟਨ ਤੁਸ਼ਾਰ ਮਹਾਜਨ ਊਧਮਪੁਰ ਸਟੇਸ਼ਨ ’ਤੇ ਵੀ ਠਹਿਰਾਅ ਹੋਵੇਗਾ।

ਰੇਲ ਮੰਤਰੀ ਅਸ਼ਵਨੀ ਵੈਸ਼ਣਵ ਨੇ ਕੇਂਦਰੀ ਮੰਤਰੀ ਡਾ. ਜਿਤੇਂਦਰ ਸਿੰਘ ਨੂੰ ਪੱਤਰ ਲਿਖ ਕੇ ਇਸ ਦੀ ਜਾਣਕਾਰੀ ਦਿੱਤੀ। ਲੰਬੇ ਸਮੇਂ ਤੋਂ ਇਸ ਟ੍ਰੇਨ ਦੀ ਮੰਗ ਕੀਤੀ ਜਾ ਰਹੀ ਸੀ। ਇਸ ਦੇ ਸ਼ੁਰੂ ਹੋਣ ਨਾਲ ਯਾਤਰੀਆਂ ਨੂੰ ਵੱਡੀ ਰਾਹਤ ਮਿਲੇਗੀ। ਇਸ ਨਾਲ ਜੰਮੂ-ਸ੍ਰੀਨਗਰ ਰਾਸ਼ਟਰੀ ਰਾਜਮਾਰਗ ’ਤੇ ਟਰੈਫਿਕ ਦਾ ਦਬਾਅ ਵੀ ਘਟੇਗਾ ਅਤੇ ਸੈਰ-ਸਪਾਟੇ ਨੂੰ ਵੀ ਨਵੀਂ ਰਫ਼ਤਾਰ ਮਿਲੇਗੀ।

ਮੌਜੂਦਾ ਸਮੇਂ ਜੰਮੂ-ਸ੍ਰੀਨਗਰ ਵਿਚਕਾਰ ਦੋ ਵੰਦੇ ਭਾਰਤ ਪਹਿਲਾਂ ਹੀ ਚੱਲ ਰਹੀਆਂ ਹਨ। ਟ੍ਰੇਨ ਨੰਬਰ 26407/26408 ਦੇ ਰੂਪ ਵਿਚ ਚਲਾਈ ਜਾਣ ਵਾਲੀ ਇਹ ਤੀਜੀ ਵੰਦੇ ਭਾਰਤ ਹੋਵੇਗੀ। ਨਵੀਂ ਵੰਦੇ ਭਾਰਤ ਦਾ ਊਧਮਪੁਰ ਵਿਚ ਠਹਿਰਾਅ ਜ਼ਿਲੇ ਦੇ ਉਨ੍ਹਾਂ ਯਾਤਰੀਆਂ ਲਈ ਖ਼ਾਸ ਤੌਰ ’ਤੇ ਮਹੱਤਵਪੂਰਨ ਹੈ ਜਿਨ੍ਹਾਂ ਨੂੰ ਨੌਕਰੀ, ਕਾਰੋਬਾਰ, ਸਿੱਖਿਆ, ਸਿਹਤ ਅਤੇ ਹੋਰ ਜ਼ਰੂਰੀ ਕੰਮਾਂ ਦੇ ਸਿਲਸਿਲੇ ਵਿਚ ਜੰਮੂ ਜਾਂ ਸ੍ਰੀਨਗਰ ਆਉਣਾ-ਜਾਣਾ ਪੈਂਦਾ ਹੈ।

ਹੁਣ ਉਨ੍ਹਾਂ ਨੂੰ ਇਸ ਸੇਵਾ ਦਾ ਲਾਭ ਲੈਣ ਲਈ ਪਹਿਲਾਂ ਜੰਮੂ ਜਾਂ ਕਿਸੇ ਹੋਰ ਸਟੇਸ਼ਨ ਤੱਕ ਜਾਣ ਦੀ ਲੋੜ ਨਹੀਂ ਪਵੇਗੀ। ਇਸ ਤੋਂ ਇਲਾਵਾ, ਊਧਮਪੁਰ ਵਿਚ ਫ਼ੌਜ ਦਾ ਉੱਤਰੀ ਕਮਾਂਡ ਹੈੱਡਕੁਆਰਟਰ ਵੀ ਹੈ। ਵੰਦੇ ਭਾਰਤ ਦੇ ਠਹਿਰਾਅ ਨਾਲ ਊਧਮਪੁਰ ਤੋਂ ਪਤਨੀਟਾਪ, ਸੁੱਧ ਮਹਾਦੇਵ ਅਤੇ ਹੋਰ ਸੈਰ-ਸਪਾਟੇ ਦੇ ਖੇਤਰਾਂ ਵੱਲ ਆਉਣ-ਜਾਣ ਵਾਲੇ ਯਾਤਰੀਆਂ ਨੂੰ ਵੀ ਬਿਹਤਰ ਆਵਾਜਾਈ ਸਹੂਲਤ ਮਿਲੇਗੀ।