ਮਹਾਸ਼ਿਵਰਾਤਰੀ ਮੌਕੇ ਹਿਮਾਚਲ 'ਚ ਮਾਤਮ: ਮੰਡੀ 'ਚ 200 ਮੀਟਰ ਡੂੰਘੀ ਖੱਡ 'ਚ ਡਿੱਗੀ ਜੀਪ, 3 ਨੌਜਵਾਨਾਂ ਦੀ ਮੌਤ

ਥੁਨਾਗ: ਸ਼ਿਵਰਾਤਰੀ ਦੀ ਸਵੇਰ ਸਰਾਜ ਵਿੱਚ ਹੋਏ ਭਿਆਨਕ ਹਾਦਸੇ ਵਿੱਚ ਤਿੰਨ ਨੌਜਵਾਨਾਂ ਦੀ ਮੌਤ ਹੋ ਗਈ, ਜਦਕਿ ਇੱਕ ਗੰਭੀਰ ਜ਼ਖਮੀ ਹੈ। ਹਾਦਸਾ ਸਵੇਰੇ ਚਾਰ ਵਜੇ ਦੇ ਕਰੀਬ ਵਾਪਰਿਆ। ਚਾਰ ਦੋਸਤ ਜੀਪ ਲੈ ਕੇ ਘਰੋਂ ਨਿਕਲੇ ਸਨ ਅਤੇ ਬੁਨਾਲੀਧਾਰ ਦੇ ਨੇੜੇ ਜੀਪ ਹਾਦਸੇ ਦਾ ਸ਼ਿਕਾਰ ਹੋ ਗਈ।

ਦੋ ਨੌਜਵਾਨਾਂ ਨੇ ਮੌਕੇ 'ਤੇ ਹੀ ਦਮ ਤੋੜ ਦਿੱਤਾ, ਜਦਕਿ ਤੀਜੇ ਨੇ ਹਸਪਤਾਲ ਵਿੱਚ ਆਖਰੀ ਸਾਹ ਲਏ। ਹਾਦਸਾ ਘਰ ਤੋਂ 24 ਕਿਲੋਮੀਟਰ ਦੂਰ ਹੋਇਆ। ਗੱਡੀ ਬਗਸਿਆਡ ਦੇ ਰਹਿਣ ਵਾਲੇ ਯੋਗਰਾਜ ਦੀ ਹੈ। ਹਾਦਸੇ ਵਿੱਚ ਯੋਗਰਾਜ ਦੇ ਪੁੱਤਰ ਹਾਰਦਿਕ ਦੀ ਵੀ ਮੌਤ ਹੋ ਗਈ ਹੈ।

ਐਤਵਾਰ ਸਵੇਰੇ ਜੀਪ (HP65 5148) ਲੈ ਕੇ ਚਾਰੇ ਦੋਸਤ ਘਰ ਵਿੱਚ ਕਿਸੇ ਨੂੰ ਦੱਸੇ ਬਿਨਾਂ ਨਿਕਲ ਗਏ ਸਨ। ਘਰ ਤੋਂ ਕੁਝ ਦੂਰੀ 'ਤੇ ਲੰਬਾਥਾਚ-ਕਲਹਣੀ ਸੜਕ 'ਤੇ ਬੂਨਾਲੀਧਾਰ ਦੇ ਕੋਲ ਗੱਡੀ ਬੇਕਾਬੂ ਹੋ ਕੇ 200 ਮੀਟਰ ਡੂੰਘੀ ਖੱਡ ਵਿੱਚ ਜਾ ਡਿੱਗੀ।

ਗੱਡੀ ਡਿੱਗਣ ਦੀ ਆਵਾਜ਼ ਸੁਣ ਕੇ ਆਸ-ਪਾਸ ਦੇ ਲੋਕ ਮੌਕੇ 'ਤੇ ਪਹੁੰਚੇ ਤਾਂ ਉਨ੍ਹਾਂ ਦੇਖਿਆ ਕਿ ਦੋ ਨੌਜਵਾਨ ਗੱਡੀ ਦੇ ਬਾਹਰ ਪਏ ਸਨ ਅਤੇ ਦੋ ਅੰਦਰ। ਤੁਰੰਤ ਇਨ੍ਹਾਂ ਜ਼ਖਮੀਆਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਦੋ ਨੌਜਵਾਨਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ, ਜਦਕਿ ਤੀਜੇ ਨੇ ਥੋੜ੍ਹੀ ਦੇਰ ਬਾਅਦ ਦਮ ਤੋੜ ਦਿੱਤਾ।

ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਵੀ ਮੌਕੇ 'ਤੇ ਪਹੁੰਚ ਗਈ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਨੌਜਵਾਨਾਂ ਦੀ ਪਛਾਣ ਕਰਨੀ ਮੁਸ਼ਕਲ ਹੋ ਰਹੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਨੌਜਵਾਨ ਆਈਟੀਆਈ ਵਿੱਚ ਪੜ੍ਹਾਈ ਕਰ ਰਹੇ ਸਨ। ਜੰਜੈਹਲੀ ਦੇ ਥਾਣਾ ਮੁਖੀ ਰਾਮਕ੍ਰਿਸ਼ਨ ਨੇ ਦੱਸਿਆ ਕਿ ਪੁਲਿਸ ਮੌਕੇ 'ਤੇ ਪਹੁੰਚ ਗਈ ਹੈ ਅਤੇ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।