'ਪਹਿਲੀ ਪਤਨੀ ਦੀ ਮੌਤ ਤੋਂ ਬਾਅਦ ਦੂਜੀ ਪਤਨੀ ਨੂੰ ਪਰਿਵਾਰਕ ਪੈਨਸ਼ਨ ਦਾ ਹੱਕ ਨਹੀਂ', ਹਾਈ ਕੋਰਟ ਨੇ ਸੁਣਾਇਆ ਫ਼ੈਸਲਾ

ਜਾਸ, ਸ਼ਿਮਲਾ: ਹਿਮਾਚਲ ਪ੍ਰਦੇਸ਼ ਹਾਈ ਕੋਰਟ ਨੇ ਇੱਕ ਮਹੱਤਵਪੂਰਨ ਫ਼ੈਸਲੇ ਵਿੱਚ ਸਪੱਸ਼ਟ ਕੀਤਾ ਹੈ ਕਿ ਸਰਕਾਰੀ ਕਰਮਚਾਰੀ ਦੀ ਮੌਤ ਤੋਂ ਬਾਅਦ ਜੇਕਰ ਉਸ ਦੀ ਪਹਿਲੀ ਪਤਨੀ ਨੂੰ ਪਰਿਵਾਰਕ ਪੈਨਸ਼ਨ ਮਿਲ ਰਹੀ ਸੀ, ਤਾਂ ਪਹਿਲੀ ਪਤਨੀ ਦੇ ਦੇਹਾਂਤ ਤੋਂ ਬਾਅਦ ਦੂਜੀ ਪਤਨੀ ਇਸ ਪੈਨਸ਼ਨ 'ਤੇ ਆਪਣਾ ਦਾਅਵਾ ਨਹੀਂ ਕਰ ਸਕਦੀ। ਅਦਾਲਤ ਨੇ ਕਿਹਾ ਕਿ ਪਹਿਲੀ ਪਤਨੀ ਦੇ ਜਿਊਂਦੇ ਜੀਅ ਕੀਤਾ ਗਿਆ ਦੂਜਾ ਵਿਆਹ ਕਾਨੂੰਨ ਦੀ ਨਜ਼ਰ ਵਿੱਚ ਗ਼ੈਰ-ਕਾਨੂੰਨੀ ਹੈ। ਜਸਟਿਸ ਅਜੇ ਮੋਹਨ ਗੋਇਲ ਦੇ ਸਿੰਗਲ ਬੈਂਚ ਨੇ ਪਟੀਸ਼ਨਰ ਦਮਯੰਤੀ ਦੇਵੀ ਵੱਲੋਂ ਦਾਇਰ ਪਟੀਸ਼ਨ ਨੂੰ ਖ਼ਾਰਜ ਕਰਦਿਆਂ ਇਹ ਵਿਵਸਥਾ ਦਿੱਤੀ।

ਪਹਿਲੀ ਪਤਨੀ ਤੋਂ ਬੱਚਾ ਨਾ ਹੋਣ 'ਤੇ ਕੀਤਾ ਸੀ ਦੂਜਾ ਵਿਆਹ

ਮਾਮਲੇ ਅਨੁਸਾਰ ਪਟੀਸ਼ਨਰ ਦਾ ਪਤੀ ਖੂਬ ਰਾਮ ਸਿੱਖਿਆ ਵਿਭਾਗ ਵਿੱਚ ਜੂਨੀਅਰ ਬੇਸਿਕ ਟੀਚਰ (JBT) ਦੇ ਅਹੁਦੇ 'ਤੇ ਤਾਇਨਾਤ ਸੀ ਅਤੇ 1 ਜੂਨ 1996 ਨੂੰ ਸੇਵਾਮੁਕਤ ਹੋਇਆ ਸੀ। ਖੂਬ ਰਾਮ ਦੀ ਪਹਿਲੀ ਪਤਨੀ ਖਿਮੀ ਦੇਵੀ ਸੀ। ਪਹਿਲੀ ਪਤਨੀ ਤੋਂ ਕੋਈ ਬੱਚਾ ਨਾ ਹੋਣ ਕਾਰਨ ਖੂਬ ਰਾਮ ਨੇ 5 ਦਸੰਬਰ 1970 ਨੂੰ ਪਟੀਸ਼ਨਰ ਦਮਯੰਤੀ ਦੇਵੀ ਨਾਲ ਦੂਜਾ ਵਿਆਹ ਕੀਤਾ ਸੀ।

ਪਤੀ ਦੀ ਮੌਤ ਤੋਂ ਬਾਅਦ ਪਹਿਲੀ ਪਤਨੀ ਨੂੰ ਮਿਲ ਰਹੀ ਸੀ ਪੈਨਸ਼ਨ

13 ਅਕਤੂਬਰ 2014 ਨੂੰ ਖੂਬ ਰਾਮ ਦੀ ਮੌਤ ਤੋਂ ਬਾਅਦ ਨਿਯਮਾਂ ਅਨੁਸਾਰ ਉਸ ਦੀ ਪਹਿਲੀ ਕਾਨੂੰਨੀ ਪਤਨੀ ਖਿਮੀ ਦੇਵੀ ਨੂੰ ਪਰਿਵਾਰਕ ਪੈਨਸ਼ਨ ਦਿੱਤੀ ਜਾ ਰਹੀ ਸੀ। 2 ਜੁਲਾਈ 2023 ਨੂੰ ਖਿਮੀ ਦੇਵੀ ਦਾ ਵੀ ਦਿਹਾਂਤ ਹੋ ਗਿਆ।

ਦੂਜੀ ਪਤਨੀ ਨੇ ਕੀਤਾ ਸੀ ਦਾਅਵਾ

ਪਹਿਲੀ ਪਤਨੀ ਦੀ ਮੌਤ ਤੋਂ ਬਾਅਦ ਦੂਜੀ ਪਤਨੀ ਦਮਯੰਤੀ ਦੇਵੀ ਨੇ ਖ਼ੁਦ ਨੂੰ ਜੀਵਤ ਵਿਧਵਾ ਦੱਸਦਿਆਂ ਆਪਣੇ ਨਾਂ 'ਤੇ ਪਰਿਵਾਰਕ ਪੈਨਸ਼ਨ ਜਾਰੀ ਕਰਨ ਅਤੇ ਪਿਛਲੇ ਬਕਾਏ ਦੇ ਭੁਗਤਾਨ ਲਈ ਹਾਈ ਕੋਰਟ ਦਾ ਦਰਵਾਜ਼ਾ ਖੜਕਾਇਆ ਸੀ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਪਹਿਲੇ ਵਿਆਹ ਦੇ ਹੋਂਦ ਵਿੱਚ ਰਹਿੰਦਿਆਂ ਕੀਤਾ ਗਿਆ ਦੂਜਾ ਵਿਆਹ ਕਾਨੂੰਨ ਦੀ ਨਜ਼ਰ ਵਿੱਚ ਕੋਈ ਵਿਆਹ ਨਹੀਂ ਹੈ।