ਨੀਟ 'ਚ ਗਲਤ ਸੈਂਟਰ ਦੇਣ 'ਤੇ ਹਿਮਾਚਲ ਹਾਈ ਕੋਰਟ ਵੱਲੋਂ ਕੇਂਦਰ ਸਰਕਾਰ ਤੇ NTA ਨੂੰ ਨੋਟਿਸ, ਧਰਮਸ਼ਾਲਾ ਦੀ ਬਜਾਏ ਢਲਿਆਰਾ ਦੇ ਦਿੱਤਾ ਕੇਂਦਰ

ਕਾਨੂੰਨੀ ਪ੍ਰਤੀਨਿਧ, ਸ਼ਿਮਲਾ : ਹਿਮਾਚਲ ਪ੍ਰਦੇਸ਼ ਹਾਈ ਕੋਰਟ ਨੇ ਨੀਟ ਪ੍ਰੀਖਿਆ ਵਿੱਚ ਗਲਤ ਕੇਂਦਰ ਦੇ ਕੇ ਪ੍ਰੀਖਿਆ ਤੋਂ ਵਾਂਝੇ ਕਰਨ ਦੇ ਦੋਸ਼ਾਂ 'ਤੇ ਕੇਂਦਰ ਸਰਕਾਰ ਅਤੇ ਐਨ.ਟੀ.ਏ. ਨੂੰ ਨੋਟਿਸ ਜਾਰੀ ਕਰਕੇ ਜਵਾਬ ਤਲਬ ਕੀਤਾ ਹੈ। ਜਸਟਿਸ ਜਯੋਤਸਨਾ ਰਿਵਾਲ ਦੁਆ ਨੇ ਪਟੀਸ਼ਨ 'ਤੇ ਸੁਣਵਾਈ ਤੋਂ ਬਾਅਦ ਮਾਮਲੇ ਦੀ ਅਗਲੀ ਸੁਣਵਾਈ 15 ਜੁਲਾਈ ਨੂੰ ਤੈਅ ਕਰਨ ਦੇ ਹੁਕਮ ਦਿੱਤੇ। ਪਟੀਸ਼ਨਕਰਤਾ ਦੀ ਸ਼ਿਕਾਇਤ ਹੈ ਕਿ ਉਸਨੇ 21 ਜੂਨ ਨੂੰ ਹੋਣ ਵਾਲੀ ਨੀਟ ਪ੍ਰੀਖਿਆ ਵਿੱਚ ਸ਼ਾਮਲ ਹੋਣਾ ਸੀ।

ਧਰਮਸ਼ਾਲਾ ਦੀ ਬਜਾਏ ਢਲਿਆਰਾ ਲਿਖ ਦਿੱਤਾ ਸੈਂਟਰ

ਉਸ ਨੂੰ ਸਰਕਾਰੀ ਕੰਨਿਆ ਸੀਨੀਅਰ ਸੈਕੰਡਰੀ ਸਕੂਲ ਢਲਿਆਰਾ, ਜ਼ਿਲ੍ਹਾ ਕਾਂਗੜਾ ਵਿੱਚ ਪ੍ਰੀਖਿਆ ਕੇਂਦਰ ਦਿੱਤਾ ਗਿਆ ਸੀ। 21 ਜੂਨ ਨੂੰ ਜਦੋਂ ਉਹ ਢਲਿਆਰਾ ਪਹੁੰਚੀ ਤਾਂ ਪਤਾ ਲੱਗਾ ਕਿ ਉੱਥੇ ਇਸ ਨਾਂ ਦਾ ਕੋਈ ਸਕੂਲ ਹੀ ਨਹੀਂ ਹੈ। ਉਸ ਨੂੰ ਜੋ ਟੈਸਟ ਸੈਂਟਰ ਨੰਬਰ ਦਿੱਤਾ ਗਿਆ ਸੀ ਉਹ ਧਰਮਸ਼ਾਲਾ ਦਾ ਸੀ, ਜਦੋਂ ਕਿ ਪਿਨ ਕੋਡ-176056 ਸੁਨਹੇਰ ਤਹਿਸੀਲ ਨਗਰੋਟਾ ਬਗਵਾਂ, ਜ਼ਿਲ੍ਹਾ ਕਾਂਗੜਾ ਦਾ ਦਿੱਤਾ ਗਿਆ ਸੀ।

ਅਧਿਕਾਰੀ ਦੀ ਲਾਪਰਵਾਹੀ ਨਾਲ ਕਰੀਅਰ ਬਰਬਾਦ

ਪਟੀਸ਼ਨਕਰਤਾ ਦਾ ਦੋਸ਼ ਹੈ ਕਿ ਨੀਟ ਦਾ ਐਡਮਿਟ ਕਾਰਡ ਜਾਰੀ ਕਰਦੇ ਸਮੇਂ ਸਬੰਧਤ ਅਧਿਕਾਰੀਆਂ ਦੀ ਲਾਪਰਵਾਹੀ ਕਾਰਨ ਉਸ ਦਾ ਕਰੀਅਰ ਬਰਬਾਦ ਹੋ ਗਿਆ ਹੈ। ਉਸ ਨੂੰ ਗਲਤ ਪ੍ਰੀਖਿਆ ਕੇਂਦਰ ਦੇ ਕੇ ਨੀਟ ਵਿੱਚ ਸ਼ਾਮਲ ਹੋਣ ਤੋਂ ਰੋਕ ਦਿੱਤਾ ਗਿਆ ਹੈ।