ਉੱਤਰਾਖੰਡ 'ਚ ਕੁਦਰਤ ਦਾ ਕਹਿਰ: ਭਾਰੀ ਮੀਂਹ ਤੇ ਮਿੱਟੀ ਖਿਸਕਣ ਕਾਰਨ ਮਾਂ-ਪੁੱਤ ਸਮੇਤ 11 ਦੀ ਮੌਤ, 2 ਲਾਪਤਾ

ਜਾਗਰਣ ਟੀਮ, ਦੇਹਰਾਦੂਨ : ਉੱਤਰਾਖੰਡ ਵਿਚ ਸੋਮਵਾਰ ਰਾਤ ਤੋਂ ਮੰਗਲਵਾਰ ਸਵੇਰੇ ਤੱਕ ਪਿਆ ਤੇਜ਼ ਮੀਂਹ ਜੀਵਨ ’ਤੇ ਕਹਿਰ ਬਣ ਕੇ ਟੁੱਟਿਆ। ਜ਼ਮੀਨ ਖਿਸਕਣ ਕਾਰਨ ਘਰਾਂ ਵਿਚ ਆਏ ਮਲਬੇ ਵਿਚ ਦਬ ਕੇ ਅਤੇ ਆਫਰਦੇ ਨਦੀਆਂ-ਨਾਲ਼ਿਆਂ ਵਿਚ ਰੁੜ੍ਹ ਕੇ ਰਾਜਸਥਾਨ ਦੇ ਇਕ ਐੱਮਬੀਬੀਐੱਸ ਵਿਦਿਆਰਥੀ ਅਤੇ ਇਕ ਬੀਬੀਏ ਦੇ ਵਿਦਿਆਰਥੀ ਸਮੇਤ 11 ਜਣਿਆਂ ਦੀ ਮੌਤ ਹੋ ਗਈ, ਜਦਕਿ 2 ਹੋਰ ਲਾਪਤਾ ਹੋ ਗਏ। ਮਰਨ ਵਾਲਿਆਂ ਵਿਚ ਦੋ ਪਰਿਵਾਰਾਂ ਦੇ ਪੰਜ ਲੋਕ ਅਤੇ ਵਾਇਲਡਲਾਈਫ਼ ਇੰਸਟੀਟਿਊਟ ਵਿਚ ਤਾਇਨਾਤ ਵਿਗਿਆਨੀ ਦਾ ਪੁੱਤਰ ਵੀ ਸ਼ਾਮਲ ਹੈ। ਚਾਰਧਾਮ ਸਮੇਤ ਕਈ ਮਾਰਗ ਬੰਦ ਹੋ ਗਏ ਹਨ। ਮੌਸਮ ਵਿਭਾਗ ਦੇ ਅਲਰਟ ਨੂੰ ਧਿਆਨ ਵਿਚ ਰੱਖਦੇ ਹੋਏ ਬੁੱਧਵਾਰ ਨੂੰ ਪਿਥੌੜਾਗੜ੍ਹ, ਅਲਮੋੜਾ, ਬਾਗੇਸ਼ਵਰ, ਨੈਨੀਤਾਲ ਅਤੇ ਊਧਮ ਸਿੰਘ ਨਗਰ ਦੇ ਸਕੂਲਾਂ ਵਿਚ ਛੁੱਟੀ ਦਾ ਐਲਾਨ ਕੀਤਾ ਗਿਆ ਹੈ।

ਦੇਹਰਾਦੂਨ ਦੇ ਪ੍ਰੇਮ ਨਗਰ ਸਥਿਤ ਕੰਡੋਲੀ-ਬਿਧੋਲੀ ਪੁਲ਼ ਦੇ ਨੇੜੇ ਸੋਮਵਾਰ ਰਾਤ ਦੇਰ ਨਾਲ ਬਰਸਾਤੀ ਰਪਟੇ ਵਿਚ ਰਾਜਸਥਾਨ ਨੰਬਰ ਦੇ ਦੋ ਵਾਹਨ ਰੁੜ੍ਹ ਗਏ। ਇਸ ਹਾਦਸੇ ਵਿਚ ਨਿੱਜੀ ਯੂਨੀਵਰਸਿਟੀ ਦੇ ਬੀਬੀਏ ਦੇ ਵਿਦਿਆਰਥੀ ਅਕਸ਼ੈ (21 ਸਾਲ), ਨਿਵਾਸੀ ਜੈਪੁਰ ਅਤੇ ਟਾਟੀਆ ਯੂਨੀਵਰਸਿਟੀ ਗੰਗਾਨਗਰ ਦੀ ਐੱਮਬੀਬੀਐੱਸ ਦੀ ਵਿਦਿਆਰਥੀ ਕਨਨ ਸਚਦੇਵਾ (19 ਸਾਲ), ਨਿਵਾਸੀ ਪੀਲੀ ਬੰਗਾ ਹਨੂੰਮਾਨਗੜ੍ਹ ਗੰਗਾਨਗਰ ਰਾਜਸਥਾਨ ਦੀ ਮੌਤ ਹੋ ਗਈ। ਤਿੰਨ ਹੋਰ ਵਿਦਿਆਰਥੀਆਂ ਸੰਭਵ, ਅੰਸ਼ ਬਵੇਜਾ ਅਤੇ ਸਹਿਜਪ੍ਰੀਤ ਕੌਰ ਨੂੰ ਸੁਰੱਖਿਅਤ ਕੱਢ ਲਿਆ ਗਿਆ। ਸਾਰੇ ਇੱਥੇ ਘੁੰਮਣ ਆਏ ਸਨ।

ਅਲਮੋੜਾ ਜ਼ਿਲ੍ਹੇ ਦੇ ਹਵਾਲਬਾਗ ਦੇ ਵਡਯੂਡਾ ਪਿੰਡ ਵਿਚ ਮੰਗਲਵਾਰ ਤੜਕੇ ਕਰੀਬ ਢਾਈ ਵਜੇ ਪਹਾੜੀ ਤੋਂ ਆਏ ਭਾਰੀ ਮਲਬੇ ਵਿਚ ਦਬ ਕੇ ਪ੍ਰੇਮਾ ਦੇਵੀ (41), ਪੁੱਤਰ ਮਨੀਸ਼ (17) ਅਤੇ ਪੁੱਤਰੀਆਂ ਕਲਪਨਾ (19) ਦੀ ਮੌਤ ਹੋ ਗਈ। ਅਲਮੋੜਾ ਦੇ ਤੁਨੀ ਵਿਚ ਸੁਰੱਖਿਆ ਕੰਧ ਡਿੱਗਣ ਕਾਰਨ ਦੋ ਨੇਪਾਲੀ ਮਜ਼ਦੂਰਾਂ ਦੀ ਮੌਤ ਹੋ ਗਈ। ਨੈਨੀਤਾਲ ਜ਼ਿਲ੍ਹੇ ਦੇ ਭੀਮਤਾਲ ਵਿਚ ਤਿੰਨ ਸਾਲ ਦੀ ਪੱਲਵੀ ਆਫ਼ਰਦੇ ਨਾਲ਼ੇ ਵਿਚ ਡਿੱਗ ਕੇ ਮੌਤ ਦਾ ਸ਼ਿਕਾਰ ਹੋ ਗਈ। ਦੇਹਰਾਦੂਨ ਵਿਚ ਇਕ 11 ਸਾਲ ਦੇ ਬੱਚੇ ਦੀ ਨਹਿਰ ਵਿਚ ਡਿੱਗ ਕੇ ਮੌਤ ਹੋ ਗਈ।

ਪਹਿਲਗਾਮ ’ਚ ਬੱਦਲ ਫਟੇ, ਖਾਂਡਲੀ ਨਦੀ ਵਿਚ ਫਸੇ ਛੇ ਲੋਕਾਂ ਨੂੰ ਸੁਰੱਖਿਅਤ ਕੱਢਿਆ

ਜਾਸੰ, ਜੰਮੂ : ਕਸ਼ਮੀਰ ਸੰਗਰ ਦੇ ਪਹਿਲਗਾਮ ਖੇਤਰ ਵਿਚ ਮੰਗਲਵਾਰ ਨੂੰ ਬੱਦਲ ਫਟਣ ਕਾਰਨ ਹੜ੍ਹ ਵਰਗੇ ਹਾਲਾਤ ਬਣ ਗਏ। ਕਈ ਹੇਠਲੇ ਖੇਤਰਾਂ ਵਿਚ ਕਾਫ਼ੀ ਪਾਣੀ ਭਰ ਗਿਆ, ਜਿਸ ਨਾਲ ਹੋਟਲਾਂ, ਦੁਕਾਨਾਂ ਅਤੇ ਘਰਾਂ ’ਚ ਪਾਣੀ ਭਰ ਗਿਆ। ਇਸ ਦੌਰਾਨ, ਜ਼ਿਲ੍ਹਾ ਪੁੰਛ ਵਿਚ ਵਿਦਿਆਰਥੀਆਂ ਦੀ ਸੁਰੱਖਿਆ ਨੂੰ ਧਿਆਨ ਵਿਚ ਰੱਖਦੇ ਹੋਏ ਸਕੂਲ ਬੰਦ ਰੱਖੇ ਗਏ। ਇਸੇ ਦੌਰਾਨ, ਜੰਮੂ ਸੰਗਰ ਦੇ ਰਾਜੌਰੀ ਜ਼ਿਲ੍ਹੇ ਵਿਚ ਲਗਾਤਾਰ ਹੋ ਰਹੀ ਮੀਂਹ ਦੇ ਵਿਚਕਾਰ ਖਾਂਡਲੀ ਨਦੀ ਵਿਚ ਤੇਜ਼ ਬਹਾਅ ਵਿਚ ਫਸੇ ਛੇ ਲੋਕਾਂ ਨੂੰ ਐੱਸਡੀਆਰਐੱਫ ਦੀ ਟੀਮ ਨੇ ਰੈਸਕਿਊ ਮੁਹਿੰਮ ਚਲਾਕੇ ਸੁਰੱਖਿਅਤ ਕੱਢਿਆ।

ਹਿਮਾਚਲ ’ਚ ਪਠਾਨਕੋਟ-ਮੰਡੀ ਐੱਨਐੱਚ ’ਤੇ ਸਰਕੀ ਪਹਾੜੀ

ਜਾਸੰ, ਸ਼ਿਮਲਾ : ਹਿਮਾਚਲ ਦੇ ਮੰਡੀ ਜ਼ਿਲ੍ਹੇ ਵਿਚ ਪਠਾਨਕੋਟ-ਮੰਡੀ ਕੌਮੀ ਰਾਜਮਾਰਗ 'ਤੇ ਕੁੰਨੂ ਪੁਲ਼ ਨੇੜੇ ਮੰਗਲਵਾਰ ਦੁਪਹਿਰ ਕਰੀਬ ਪੌਣੇ ਤਿੰਨ ਵਜੇ ਸਾਫ਼ ਮੌਸਮ ਵਿਚ ਪਹਾੜੀ ਖਿਸਕ ਗਈ ਅਤੇ ਮਲਬਾ ਅਤੇ ਚਟਾਨਾਂ ਹਾਈਵੇ 'ਤੇ ਆ ਡਿੱਗੀਆਂ। ਇਸ ਨਾਲ ਯਾਤਰਾ ਠੱਪ ਹੋ ਗਈ। ਕਾਫ਼ੀ ਕੋਸ਼ਿਸ਼ਾਂ ਤੋਂ ਬਾਅਦ ਯਾਤਰਾ ਮੁੜ ਸ਼ੁਰੂ ਕੀਤੀ ਗਈ। ਕਾਂਗੜਾ ਦੇ ਸੁਲਹ ਖੇਤਰ ਤਹਿਤ ਸਾਂਬਾ ਪੰਚਾਇਤ ਦੇ ਵਾਰਡ ਦੋ ਵਿਚ ਸੋਮਵਾਰ ਰਾਤ ਸਲੇਟਪੋਸ਼ ਮਕਾਨ ਦੀ ਛੱਤ ਡਿੱਗਣ ਕਾਰਨ 106 ਸਾਲ ਦੀ ਲੱਛੀ ਦੇਵੀ ਪਤਨੀ ਸਵਰਗੀ ਮੰਗਤ ਰਾਮ ਦੀ ਦੱਬਣ ਕਾਰਨ ਮੌਤ ਹੋ ਗਈ।