ਜੰਮੂ-ਕਸ਼ਮੀਰ 'ਚ ਨਹੀਂ ਥੰਮ੍ਹ ਰਿਹਾ ਮੀਂਹ ਦਾ ਕਹਿਰ, ਦੋ ਦਿਨਾਂ 'ਚ 24 ਮੌਤਾਂ; ਵੈਸ਼ਨੋ ਦੇਵੀ ਤੇ ਅਮਰਨਾਥ ਯਾਤਰਾ ਮੁਲਤਵੀ

ਜਾਗਰਣ ਟੀਮ, ਰਾਜੌਰੀ: ਜੰਮੂ-ਕਸ਼ਮੀਰ ਵਿੱਚ ਮੌਸਮ ਦਾ ਕਹਿਰ ਦੂਜੇ ਦਿਨ ਵੀ ਜਾਰੀ ਰਿਹਾ। ਪੁੰਛ ਜ਼ਿਲ੍ਹਾ ਸਭ ਤੋਂ ਸੰਵੇਦਨਸ਼ੀਲ ਬਣਿਆ ਹੋਇਆ ਹੈ। ਸੋਮਵਾਰ ਨੂੰ ਪੁੰਛ ਵਿੱਚ ਇੱਕ ਘਰ 'ਤੇ ਮਲਬਾ ਡਿੱਗਣ ਕਾਰਨ ਪਰਿਵਾਰ ਦੇ ਸੱਤ ਜੀਆਂ ਦੀ ਮੌਤ ਹੋ ਗਈ।

ਡੋਡਾ ਵਿੱਚ ਬੱਸ 'ਤੇ ਚੱਟਾਨ ਡਿੱਗਣ ਨਾਲ ਦੋ ਲੋਕਾਂ ਨੂੰ ਜਾਨ ਗਵਾਉਣੀ ਪਈ। ਸੋਮਵਾਰ ਨੂੰ ਪੰਜ ਔਰਤਾਂ ਸਮੇਤ 12 ਲੋਕ ਮੌਸਮ ਕਾਰਨ ਆਫ਼ਤ ਦਾ ਸ਼ਿਕਾਰ ਬਣੇ। ਜੰਮੂ-ਕਸ਼ਮੀਰ ਵਿੱਚ ਮੌਸਮ ਦੋ ਦਿਨਾਂ ਵਿੱਚ 24 ਜ਼ਿੰਦਗੀਆਂ ਖਤਮ ਹੋ ਗਈਆਂ। ਅਜੇ ਵੀ ਹੜ੍ਹ ਅਤੇ ਮਲਬੇ ਵਿੱਚ ਦੱਬਣ ਕਾਰਨ ਛੇ ਲੋਕ ਲਾਪਤਾ ਹਨ। ਇਸ ਦੇ ਨਾਲ ਹੀ ਅਜੇ ਖ਼ਤਰਾ ਟਲਿਆ ਨਹੀਂ ਹੈ ਅਤੇ ਅਗਲੇ 48 ਘੰਟਿਆਂ ਵਿੱਚ ਭਾਰੀ ਮੀਂਹ ਦੀ ਸੰਭਾਵਨਾ ਦੇ ਚੱਲਦਿਆਂ ਖ਼ਤਰਾ ਬਣਿਆ ਹੋਇਆ ਹੈ।

ਅਮਰਨਾਥ ਤੇ ਵੈਸ਼ਨੋ ਦੇਵੀ ਯਾਤਰਾਵਾਂ ਮੁਲਤਵੀ

ਇਸ ਦੌਰਾਨ ਦੂਜੇ ਦਿਨ ਵੀ ਸ਼੍ਰੀ ਅਮਰਨਾਥ, ਮਾਤਾ ਵੈਸ਼ਨੋ ਦੇਵੀ, ਰਿਆਸੀ ਵਿੱਚ ਸ਼ਿਵਖੋੜੀ ਅਤੇ ਕਿਸ਼ਤਵਾੜ ਵਿੱਚ ਸਰਥਲ ਯਾਤਰਾਵਾਂ ਦੂਜੇ ਦਿਨ ਵੀ ਮੁਲਤਵੀ ਰਹੀਆਂ। ਹਾਲਾਂਕਿ ਦੱਸਿਆ ਜਾ ਰਿਹਾ ਹੈ ਕਿ ਅਮਰਨਾਥ ਧਾਮ ਲਈ ਬਾਲਟਾਲ ਦੇ ਰਸਤਿਓਂ ਕੁਝ ਸ਼ਰਧਾਲੂਆਂ ਨੂੰ ਰਵਾਨਾ ਕੀਤਾ ਗਿਆ। ਉੱਥੇ ਹੀ ਜੰਮੂ ਸਥਿਤ ਆਧਾਰ ਕੈਂਪ, ਲਖਨਪੁਰ ਤੋਂ ਇਲਾਵਾ ਕਸ਼ਮੀਰ ਵਿੱਚ ਹਜ਼ਾਰਾਂ ਸ਼ਿਵ ਭਗਤ ਯਾਤਰਾ ਸੁਚਾਰੂ ਹੋਣ ਦੇ ਇੰਤਜ਼ਾਰ ਵਿੱਚ ਹਨ।

ਕਟੜਾ ਵਿੱਚ ਲਗਪਗ 15 ਹਜ਼ਾਰ ਤੋਂ ਵੱਧ ਸ਼ਰਧਾਲੂ ਰੁਕੇ ਹੋਏ ਹਨ। ਸੋਮਵਾਰ ਤੜਕੇ ਜੰਮੂ, ਰਾਜੌਰੀ, ਪੁੰਛ ਸਮੇਤ ਹੋਰ ਜ਼ਿਲ੍ਹਿਆਂ ਵਿੱਚ ਭਾਰੀ ਮੀਂਹ ਪਿਆ। ਇਸ ਨਾਲ ਤਵੀ ਅਤੇ ਚਨਾਬ ਨਦੀ ਸਮੇਤ ਕਈ ਨਾਲੇ ਉਫ਼ਾਨ 'ਤੇ ਰਹੇ। ਮੌਸਮ ਵਿਭਾਗ ਨੇ 23 ਜੁਲਾਈ ਤੱਕ ਭਾਰੀ ਮੀਂਹ ਅਤੇ ਪਹਾੜ ਖਿਸਕਣ ਦੀ ਚਿਤਾਵਨੀ ਦਿੰਦਿਆਂ ਲੋਕਾਂ ਨੂੰ ਪਹਾੜੀ ਰਸਤਿਆਂ 'ਤੇ ਗ਼ੈਰ-ਜ਼ਰੂਰੀ ਯਾਤਰਾ ਤੋਂ ਬਚਣ ਦੀ ਸਲਾਹ ਦਿੱਤੀ ਹੈ।

ਹੜ੍ਹ ਤੇ ਮਕਾਨ ਢਹਿਣ ਨਾਲ 11 ਦੀ ਮੌਤ

ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਰਾਜੌਰੀ ਅਤੇ ਪੁੰਛ ਜ਼ਿਲ੍ਹੇ ਵਿੱਚ ਜਾਨ ਗਵਾਉਣ ਵਾਲੇ ਹਰੇਕ ਮ੍ਰਿਤਕ ਦੇ ਪਰਿਵਾਰ ਨੂੰ ਛੇ-ਛੇ ਲੱਖ ਰੁਪਏ ਦੀ ਮੁਆਵਜ਼ਾ ਰਾਸ਼ੀ ਦੇਣ ਦਾ ਐਲਾਨ ਕੀਤਾ ਹੈ। ਪੁੰਛ ਜ਼ਿਲ੍ਹੇ ਵਿੱਚ ਐਤਵਾਰ ਨੂੰ ਵੀ ਮੀਂਹ, ਹੜ੍ਹ ਅਤੇ ਮਕਾਨ ਢਹਿਣ ਨਾਲ 11 ਲੋਕਾਂ ਦੀ ਮੌਤ ਹੋ ਗਈ ਸੀ।

ਪੁੰਛ ਅਤੇ ਰਾਜੌਰੀ ਵਿੱਚ 21 ਮੌਤਾਂ

ਅਧਿਕਾਰੀਆਂ ਨੇ ਦੱਸਿਆ ਕਿ ਮ੍ਰਿਤਕਾਂ ਵਿੱਚ ਚਾਰ ਔਰਤਾਂ ਸ਼ਾਮਲ ਹਨ। ਇਸ ਦੌਰਾਨ ਰਾਜੌਰੀ ਵਿੱਚ ਉਫ਼ਨਦੀ ਮਨਾਵਰ ਨਦੀ ਵਿੱਚੋਂ ਹੈਲੀਕਾਪਟਰ ਰਾਹੀਂ ਇੱਕ ਵਿਅਕਤੀ ਦੀ ਦੇਹ ਬਾਹਰ ਕੱਢੀ ਗਈ। ਜ਼ਿਲ੍ਹੇ ਵਿੱਚ ਇੱਕ ਹੋਰ ਦੇਹ ਬਰਾਮਦ ਕੀਤੀ ਗਈ। ਅਧਿਕਾਰੀਆਂ ਮੁਤਾਬਕ ਪੁੰਛ ਅਤੇ ਰਾਜੌਰੀ ਜ਼ਿਲ੍ਹਿਆਂ ਵਿੱਚ ਦੋ ਦਿਨਾਂ 'ਚ 21 ਮੌਤਾਂ ਹੋਈਆਂ ਹਨ। ਛੇ ਲੋਕ ਅਜੇ ਲਾਪਤਾ ਹਨ।

ਇੱਥੇ ਸਾਰੇ ਕਰਮਚਾਰੀਆਂ ਦੀਆਂ ਛੁੱਟੀਆਂ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਕਸ਼ਮੀਰ ਵਿੱਚ ਤੇਜ਼ ਮੀਂਹ ਕਾਰਨ ਕੁਝ ਇਲਾਕਿਆਂ ਵਿੱਚ ਜਲ-ਥਲ ਦੀ ਸਥਿਤੀ ਬਣ ਗਈ। ਇਸ ਦੌਰਾਨ, ਭਦਰਵਾਹ ਤੋਂ ਜੰਮੂ ਆ ਰਹੀ ਯਾਤਰੀ ਬੱਸ ਨੇੜੇ ਪਹਾੜ ਤੋਂ ਵੱਡੀ ਚੱਟਾਨ ਆ ਡਿੱਗੀ। ਇਸ ਹਾਦਸੇ ਵਿੱਚ ਦੋ ਲੋਕਾਂ ਦੀ ਮੌਤ ਅਤੇ ਚਾਰ ਯਾਤਰੀ ਜ਼ਖ਼ਮੀ ਹੋ ਗਏ। ਡੋਡਾ ਦੇ ਹੀ ਕਾਸ਼ਤੀਗੜ੍ਹ ਵਿੱਚ ਮਕਾਨ ਢਹਿਣ ਨਾਲ ਔਰਤ ਦੀ ਜਾਨ ਚਲੀ ਗਈ।

ਉੱਧਰ ਕਟੜਾ ਵਿੱਚ ਮਾਤਾ ਵੈਸ਼ਨੋ ਦੇਵੀ ਦੀ ਯਾਤਰਾ ਦੌਰਾਨ ਬੈਟਰੀ ਕਾਰ ਮਾਰਗ, ਭੈਰਵ ਘਾਟੀ ਮਾਰਗ ਅਤੇ ਰਵਾਇਤੀ ਯਾਤਰਾ ਮਾਰਗ ਦੇ ਕੁਝ ਹਿੱਸਿਆਂ ਵਿੱਚ ਆਂਸ਼ਿਕ ਤੌਰ 'ਤੇ ਪਹਾੜ ਖਿਸਕਣ ਅਤੇ ਪੱਥਰ ਡਿੱਗਣ ਦੀਆਂ ਘਟਨਾਵਾਂ ਹੋਈਆਂ ਹਨ।

ਯਾਤਰਾ ਬੰਦ ਰਹਿਣ ਕਾਰਨ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਹੈ। ਪ੍ਰਭਾਵਿਤ ਰਸਤਿਆਂ ਨੂੰ ਸੁਰੱਖਿਅਤ ਬਣਾਉਣ ਲਈ ਆਫ਼ਤ ਪ੍ਰਬੰਧਨ ਟੀਮ ਅਤੇ ਸ਼੍ਰਾਈਨ ਬੋਰਡ ਪ੍ਰਸ਼ਾਸਨ ਕੰਮ ਵਿੱਚ ਜੁਟੇ ਹੋਏ ਹਨ। ਇਸ ਦੌਰਾਨ, ਜੰਮੂ ਅਤੇ ਸ਼੍ਰੀਨਗਰ ਸਮੇਤ ਕਈ ਜ਼ਿਲ੍ਹਿਆਂ ਵਿੱਚ ਤੜਕੇ ਭਾਰੀ ਮੀਂਹ ਪਿਆ, ਜਿਸ ਨਾਲ ਸੜਕਾਂ 'ਤੇ ਪਾਣੀ ਭਰ ਗਿਆ। ਲਗਾਤਾਰ ਮੀਂਹ ਕਾਰਨ ਕਈ ਪਿੰਡਾਂ ਦਾ ਸੰਪਰਕ ਟੁੱਟ ਗਿਆ ਹੈ।