ਦੋ ਧੀਆਂ ਤੇ ਪੁੱਤਰ ਨੂੰ ਫਾਹੇ ਨਾਲ ਲਟਕਾਉਣ ਤੋਂ ਬਾਅਦ ਮਾਂ ਨੇ ਵੀ ਕੀਤੀ ਖ਼ੁਦਕੁਸ਼ੀ, ਪਰਿਵਾਰ ’ਚ ਮਚਿਆ ਚੀਕ-ਚਿਹਾੜਾ

ਜਾਗਰਣ ਸੰਵਾਦਦਾਤਾ, ਸੋਨੀਪਤ: ਗ੍ਰੇਟਰ ਨੋਇਡਾ ਵਿੱਚ ਇੱਕ ਪਰਿਵਾਰ ਦੇ ਪੰਜ ਜੀਆਂ ਵੱਲੋਂ ਸਮੂਹਿਕ ਖ਼ੁਦਕੁਸ਼ੀ ਕਰਨ ਦੀ ਘਟਨਾ ਤੋਂ ਬਾਅਦ ਹੁਣ ਗੋਹਾਣਾ ਵਿੱਚ ਤਿੰਨ ਬੱਚਿਆਂ ਸਮੇਤ ਇੱਕ ਮਹਿਲਾ ਵੱਲੋਂ ਖ਼ੁਦਕੁਸ਼ੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਘਟਨਾ ਨਾਲ ਇਲਾਕੇ ਵਿੱਚ ਸਨਸਨੀ ਫੈਲ ਗਈ। ਮਹਿਲਾ ਦਾ ਪਤੀ ਜੈਦੀਪ ਸਰਕਾਰੀ ਸਕੂਲ ਵਿੱਚ ਜੇਬੀਟੀ ਅਧਿਆਪਕ ਹੈ।

ਗੁਆਂਢੀਆਂ ਅਨੁਸਾਰ ਮਹਿਲਾ ਨੂੰ ਦੁਪਹਿਰ ਕਰੀਬ ਡੇਢ ਵਜੇ ਗਲੀ ਵਿੱਚ ਪਾਣੀ ਭਰਦੇ ਦੇਖਿਆ ਗਿਆ ਸੀ। ਇਸ ਤੋਂ ਬਾਅਦ ਮਹਿਲਾ ਰੀਮਾ ਉੱਪਰਲੇ ਕਮਰੇ ਵਿੱਚ ਚਲੀ ਗਈ। ਕੁਝ ਸਮੇਂ ਬਾਅਦ ਉਸ ਨੇ ਆਪਣੇ ਤਿੰਨ ਬੱਚਿਆਂ ਸਮੇਤ ਖ਼ੁਦਕੁਸ਼ੀ ਕਰ ਲਈ।

ਮੈਡੀਕਲ ਕਾਲਜ ਵਿੱਚ ਹੋਵੇਗਾ ਲਾਸ਼ਾਂ ਦਾ ਪੋਸਟਮਾਰਟਮ

ਸਮੂਹਿਕ ਖ਼ੁਦਕੁਸ਼ੀ ਦੀ ਸੂਚਨਾ ਮਿਲਣ ’ਤੇ ਪੁੱਜੀ ਪੁਲਿਸ ਨੇ ਚਾਰਾਂ ਦੀਆਂ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਮੈਡੀਕਲ ਕਾਲਜ ਦੇ ਹਸਪਤਾਲ ਭੇਜ ਦਿੱਤਾ। ਏਸੀਪੀ ਸੰਦੀਪ ਧਨਖੜ ਅਤੇ ਐੱਫਐੱਸਐੱਲ ਦੇ ਮਾਹਿਰਾਂ ਨੇ ਵੀ ਮੌਕੇ ’ਤੇ ਪਹੁੰਚ ਕੇ ਜਾਂਚ ਕੀਤੀ। ਮਹਿਲਾ ਆਪਣੇ ਪਤੀ ਅਤੇ ਬੱਚਿਆਂ ਨਾਲ ਮਕਾਨ ਦੀ ਪਹਿਲੀ ਮੰਜ਼ਿਲ ’ਤੇ ਰਹਿੰਦੀ ਸੀ।

ਦੋ ਕਮਰਿਆਂ ਵਿੱਚੋਂ ਮਿਲੀਆਂ ਚਾਰਾਂ ਦੀਆਂ ਲਾਸ਼ਾਂ

ਪੁਲਿਸ ਅਨੁਸਾਰ ਪਿੰਡ ਮੁੰਡਲਾਨਾ ਵਿੱਚ ਸ਼ਨਿਚਰਵਾਰ ਸ਼ਾਮ ਇਹ ਘਟਨਾ ਸਾਹਮਣੇ ਆਈ। ਮਤਲੌਡਾ ਨੇੜੇ ਸਰਕਾਰੀ ਸਕੂਲ ਵਿੱਚ ਅਧਿਆਪਕ ਜੈਦੀਪ ਦੀ 38 ਸਾਲਾ ਪਤਨੀ ਰੀਮਾ ਨੇ ਦੁਪਹਿਰ ਬਾਅਦ ਆਪਣੀਆਂ 11 ਸਾਲਾ ਧੀ ਰਿਹਾਨਾ ਅਤੇ ਸੱਤ ਸਾਲਾ ਧੀ ਆਰਜ਼ੂ ਨੂੰ ਇੱਕ ਕਮਰੇ ਵਿੱਚ ਫਾਹੇ ਨਾਲ ਲਟਕਾਇਆ ਅਤੇ ਬਾਹਰੋਂ ਕਮਰੇ ਨੂੰ ਤਾਲਾ ਲਾ ਦਿੱਤਾ।

ਇਸ ਤੋਂ ਬਾਅਦ ਮਹਿਲਾ ਦੂਜੇ ਕਮਰੇ ਵਿੱਚ ਚਲੀ ਗਈ ਅਤੇ ਅੰਦਰੋਂ ਦਰਵਾਜ਼ਾ ਬੰਦ ਕਰ ਲਿਆ। ਉੱਥੇ ਉਸ ਨੇ ਆਪਣੇ ਚਾਰ ਸਾਲਾ ਪੁੱਤਰ ਦੁਸ਼ਯੰਤ ਅਤੇ ਖ਼ੁਦ ਦੀ ਜਾਨ ਲੈ ਲਈ।

ਜਦੋਂ ਜੈਦੀਪ ਸਕੂਲ ਤੋਂ ਘਰ ਪਰਤਿਆ ਤਾਂ ਦੋਵੇਂ ਕਮਰੇ ਬੰਦ ਸਨ। ਕਿਸੇ ਅਣਹੋਣੀ ਦੇ ਖ਼ਦਸ਼ੇ ਕਾਰਨ ਉਸ ਨੇ ਗੁਆਂਢੀਆਂ ਅਤੇ ਪਰਿਵਾਰਕ ਮੈਂਬਰਾਂ ਦੀ ਮਦਦ ਨਾਲ ਦਰਵਾਜ਼ੇ ਖੁੱਲ੍ਹਵਾਏ। ਅੰਦਰ ਦਾ ਦ੍ਰਿਸ਼ ਦੇਖ ਕੇ ਸਾਰਿਆਂ ਦੇ ਹੋਸ਼ ਉੱਡ ਗਏ। ਚਾਰਾਂ ਦੀਆਂ ਲਾਸ਼ਾਂ ਕਮਰਿਆਂ ਵਿੱਚੋਂ ਮਿਲੀਆਂ। ਸੂਚਨਾ ਮਿਲਣ ’ਤੇ ਪੁਲਿਸ ਅਤੇ ਐੱਫਐੱਸਐੱਲ ਦੀ ਟੀਮ ਮੌਕੇ ’ਤੇ ਪਹੁੰਚੀ। ਪਿੰਡ ਵਾਸੀਆਂ ਨੇ ਪਹਿਲਾਂ ਇਸ ਨੂੰ ਸਮੂਹਿਕ ਖ਼ੁਦਕੁਸ਼ੀ ਮੰਨਦਿਆਂ ਅੰਤਿਮ ਸਸਕਾਰ ਦੀ ਤਿਆਰੀ ਕੀਤੀ ਸੀ, ਪਰ ਪੁਲਿਸ ਨੇ ਲਾਸ਼ਾਂ ਕਬਜ਼ੇ ਵਿੱਚ ਲੈ ਕੇ ਖਾਨਪੁਰ ਕਲਾਂ ਦੇ ਮੈਡੀਕਲ ਕਾਲਜ ਭੇਜ ਦਿੱਤੀਆਂ।

ਘਟਨਾ ਸਮੇਂ ਘਰ ਵਿੱਚ ਨਹੀਂ ਸੀ ਕੋਈ ਹੋਰ ਮੈਂਬਰ

ਗੁਆਂਢੀਆਂ ਨੇ ਦੱਸਿਆ ਕਿ ਮਹਿਲਾ ਰੀਮਾ ਝੱਜਰ ਦੇ ਸਿਲਾਨਾ-ਸਿਲਾਨੀ ਪਿੰਡ ਦੀ ਰਹਿਣ ਵਾਲੀ ਸੀ। ਸ਼ਨਿਚਰਵਾਰ ਨੂੰ ਉਸ ਦੀ ਸੱਸ ਆਪਣੇ ਪੇਕੇ ਗਈ ਹੋਈ ਸੀ, ਜਦਕਿ ਸਹੁਰਾ ਖੇਤਾਂ ਵਿੱਚ ਗਿਆ ਹੋਇਆ ਸੀ। ਸ਼ਾਮ ਨੂੰ ਸਾਰਿਆਂ ਨੂੰ ਇਸ ਘਟਨਾ ਬਾਰੇ ਪਤਾ ਲੱਗਾ। ਜੈਦੀਪ ਦੇ ਭਰਾ ਦਾ ਪਰਿਵਾਰ ਮਕਾਨ ਦੇ ਹੇਠਲੇ ਹਿੱਸੇ ਵਿੱਚ ਰਹਿੰਦਾ ਹੈ।

ਗੁਆਂਢੀਆਂ ਅਨੁਸਾਰ ਰੀਮਾ ਨੂੰ ਦੁਪਹਿਰ ਕਰੀਬ ਡੇਢ ਵਜੇ ਗਲੀ ਵਿੱਚ ਪਾਣੀ ਭਰਦੇ ਦੇਖਿਆ ਗਿਆ ਸੀ। ਇਸ ਤੋਂ ਬਾਅਦ ਉਹ ਉੱਪਰ ਚਲੀ ਗਈ। ਮਹਿਲਾ ਦੇ ਪੇਕੇ ਪਰਿਵਾਰ ਦੇ ਮੈਂਬਰ ਵੀ ਪਿੰਡ ਮੁੰਡਲਾਨਾ ਪਹੁੰਚ ਗਏ ਸਨ। ਪੁਲਿਸ ਵੱਲੋਂ ਖ਼ੁਦਕੁਸ਼ੀ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।