ਰਿਸ਼ਤਿਆਂ ਦਾ ਕਤਲ: ਜਿਸ ਪਿਤਾ ਨੇ ਕਰਨੀ ਸੀ ਰਾਖੀ, ਉਹੀ 9 ਸਾਲ ਤੱਕ ਕਰਦਾ ਰੋਲ਼ਦਾ ਰਿਹਾ ਪੱਤ; ਅਦਾਲਤ ਨੇ ਸੁਣਾਈ 20 ਸਾਲ ਦੀ ਸਜ਼ਾ

ਸੰਵਾਦ ਸਹਿਯੋਗੀ, ਹਰਿਦੁਆਰ: ਕਨਖਲ ਖੇਤਰ ਵਿੱਚ ਨਾਬਾਲਗ ਧੀ ਨਾਲ ਜਬਰ-ਜਨਾਹ ਕਰਨ ਅਤੇ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਵਾਲੇ ਮਤਰੇਏ ਪਿਤਾ ਨੂੰ ਫਾਸਟ ਟ੍ਰੈਕ ਸਪੈਸ਼ਲ ਕੋਰਟ, ਵਧੀਕ ਸੈਸ਼ਨ ਜੱਜ ਚੰਦਰਮਣੀ ਰਾਏ ਨੇ 20 ਸਾਲ ਦੀ ਸਖ਼ਤ ਕੈਦ ਅਤੇ 30 ਹਜ਼ਾਰ ਰੁਪਏ ਜੁਰਮਾਨੇ ਦੀ ਸਜ਼ਾ ਸੁਣਾਈ ਹੈ।

ਸਰਕਾਰੀ ਵਕੀਲ ਭੁਪੇਂਦਰ ਚੌਹਾਨ ਨੇ ਦੱਸਿਆ ਕਿ 27 ਫਰਵਰੀ 2023 ਨੂੰ ਕਨਖਲ ਥਾਣੇ ਵਿੱਚ ਇੱਕ ਪਿਤਾ ਖ਼ਿਲਾਫ਼ ਆਪਣੀ ਧੀ ਨਾਲ 11 ਸਾਲ ਦੀ ਉਮਰ ਤੋਂ ਜਬਰ-ਜਨਾਹ ਕਰਨ ਦੇ ਦੋਸ਼ ਵਿੱਚ ਕੇਸ ਦਰਜ ਕੀਤਾ ਗਿਆ ਸੀ। ਮੁਲਜ਼ਮ 'ਤੇ ਘਟਨਾ ਬਾਰੇ ਕਿਸੇ ਨੂੰ ਦੱਸਣ 'ਤੇ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਦਾ ਵੀ ਦੋਸ਼ ਸੀ। ਪੀੜਤਾ ਨੇ ਦੱਸਿਆ ਕਿ ਕਰੀਬ ਅੱਠ-ਨੌਂ ਸਾਲਾਂ ਤੋਂ ਉਸ ਦਾ ਪਿਤਾ ਉਸ ਨਾਲ ਗਲਤ ਕੰਮ ਕਰਦਾ ਆ ਰਿਹਾ ਸੀ।

ਪਰਿਵਾਰ ਦੇ ਹੋਰ ਮੈਂਬਰ ਪੀੜਤਾ ਦੀ ਗੱਲ ਨੂੰ ਅਣਸੁਣਿਆ ਕਰਦੇ ਰਹੇ, ਜਿਸ ਤੋਂ ਬਾਅਦ ਪੀੜਤਾ ਨੇ ਖ਼ੁਦ ਆਪਣੇ ਪਿਤਾ ਵਿਰੁੱਧ ਕੇਸ ਦਰਜ ਕਰਵਾਇਆ। ਪੁਲਿਸ ਨੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰਕੇ ਜੇਲ੍ਹ ਭੇਜ ਦਿੱਤਾ ਸੀ। ਇਸ ਮਾਮਲੇ ਵਿੱਚ ਇਸਤਗਾਸਾ ਪੱਖ ਨੇ ਛੇ ਅਤੇ ਬਚਾਅ ਪੱਖ ਨੇ ਦੋ ਗਵਾਹ ਪੇਸ਼ ਕੀਤੇ।

ਦੋਵਾਂ ਪੱਖਾਂ ਦੀਆਂ ਦਲੀਲਾਂ ਸੁਣਨ ਅਤੇ ਸਬੂਤਾਂ ਦੇ ਆਧਾਰ 'ਤੇ ਅਦਾਲਤ ਨੇ ਮੁਲਜ਼ਮ ਪਿਤਾ ਅਤੇ ਪੀੜਤਾ ਵਿਚਕਾਰ ਹੋਈ ਗੱਲਬਾਤ ਦੀ ਮੋਬਾਈਲ ਰਿਕਾਰਡਿੰਗ ਨੂੰ ਪੁਖ਼ਤਾ ਸਬੂਤ ਮੰਨਿਆ। ਅਦਾਲਤ ਨੇ ਮੁਲਜ਼ਮ ਪਿਤਾ ਨੂੰ ਦੋਸ਼ੀ ਕਰਾਰ ਦਿੰਦਿਆਂ 20 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ।