ਸਵਾਈਨ ਫਲੂ ਦਾ ਵਧਦਾ ਖ਼ਤਰਾ: ਦਿੱਲੀ-ਪੰਜਾਬ ਮਗਰੋਂ ਹੁਣ ਹਿਮਾਚਲ 'ਚ ਵੀ ਦਹਿਸ਼ਤ, IGMC ਸ਼ਿਮਲਾ 'ਚ ਸਵਾਈਨ ਫਲੂ ਨਾਲ ਬਜ਼ੁਰਗ ਦੀ ਮੌਤ

ਜਾਸ, ਸ਼ਿਮਲਾ : ਦਿੱਲੀ ਅਤੇ ਪੰਜਾਬ ਵਿਚ ਫੈਲ ਰਹੇ ਸਵਾਈਨ ਫਲੂ ਦੇ ਮਾਮਲਿਆਂ ਤੋਂ ਬਾਅਦ ਹੁਣ ਹਿਮਾਚਲ ਵਿਚ ਵੀ ਇਸ ਦੇ ਕੇਸ ਸਾਹਮਣੇ ਆ ਰਹੇ ਹਨ। ਐਤਵਾਰ ਨੂੰ ਆਈਜੀਐੱਮਸੀ ਹਸਪਤਾਲ ਸ਼ਿਮਲਾ ਵਿਚ 64 ਸਾਲਾ ਮਰੀਜ਼ ਦੀ ਸਵਾਈਨ ਫਲੂ ਕਾਰਨ ਮੌਤ ਹੋ ਗਈ। ਮ੍ਰਿਤਕ ਦੀ ਪਛਾਣ ਰਾਮਾਸ਼ੀਸ਼ ਰਾਮ ਵਜੋਂ ਹੋਈ ਹੈ ਜੋ ਸਾਈਂ ਡੋਭਾ, ਡਾਕਘਰ ਬਿਲਾਸਪੁਰ ਸਦਰ ਦਾ ਵਾਸੀ ਸੀ। ਇਸ ਤੋਂ ਪਹਿਲਾਂ, ਮੰਡੀ ਜ਼ਿਲ੍ਹੇ ਦੇ ਇਕ ਬਜ਼ੁਰਗ ਦੀ ਚੰਡੀਗੜ੍ਹ ਦੇ ਇਕ ਹਸਪਤਾਲ ਵਿਚ ਸਵਾਈਨ ਫਲੂ ਕਾਰਨ ਮੌਤ ਹੋ ਗਈ ਸੀ। ਮਰੀਜ਼ ਨੂੰ 13 ਅਗਸਤ ਨੂੰ ਆਈਜੀਐੱਮਸੀ ਹਸਪਤਾਲ ਵਿਚ ਭਰਤੀ ਕੀਤਾ ਗਿਆ ਸੀ। ਹਸਪਤਾਲ ਪ੍ਰਸ਼ਾਸਨ ਅਨੁਸਾਰ ਇਲਾਜ ਦੌਰਾਨ 29 ਅਗਸਤ ਨੂੰ ਮਰੀਜ਼ ਦੀ ਸਵਾਈਨ ਫਲੂ ਦੀ ਰਿਪੋਰਟ ਪਾਜ਼ੇਟਿਵ ਆਈ ਸੀ। ਮਰੀਜ਼ ਦੀ ਸਥਿਤੀ ਪਹਿਲਾਂ ਹੀ ਗੰਭੀਰ ਸੀ ਅਤੇ ਉਹ ਨਿਮੋਨੀਆ ਤੋਂ ਪੀੜਤ ਸੀ। ਇਸ ਤੋਂ ਇਲਾਵਾ, ਹੋਰ ਸਿਹਤ ਸਬੰਧੀ ਜਟਿਲਤਾਵਾਂ ਵੀ ਸਨ। ਡਾਕਟਰਾਂ ਵੱਲੋਂ ਮਰੀਜ਼ ਦਾ ਇਲਾਜ ਕੀਤਾ ਜਾ ਰਿਹਾ ਸੀ ਪਰ ਹਾਲਤ ਵਿਚ ਕੋਈ ਸੁਧਾਰ ਨਹੀਂ ਹੋਇਆ। ਇਸ ਘਟਨਾ ਨੇ ਸਿਹਤ ਵਿਭਾਗ ਦੀ ਚਿੰਤਾ ਵਧਾ ਦਿੱਤੀ ਹੈ ਅਤੇ ਲੋਕਾਂ ਨੂੰ ਸਵਾਈਨ ਫਲੂ ਤੋਂ ਸਾਵਧਾਨ ਰਹਿਣ ਦੀ ਸਲਾਹ ਦਿੱਤੀ ਜਾ ਰਹੀ ਹੈ।