ਮੈਡੀਕਲ ਕਾਲਜ ਦੇ ਡਾਕਟਰਾਂ ਦੀ ਵੱਡੀ ਲਾਪਰਵਾਹੀ: 4 ਸਾਲਾ ਬੱਚੇ ਦੇ ਖੱਬੇ ਦੀ ਬਜਾਏ ਸੱਜੇ ਪੈਰ ਦੀ ਕਰ ਦਿੱਤੀ ਸਰਜਰੀ

ਜਾਗਰਣ ਸੰਵਾਦਦਾਤਾ, ਨੂਹ। ਜ਼ਿਲ੍ਹੇ ’ਚ ਸਰਕਾਰੀ ਡਾਕਟਰਾਂ ਵਲੋਂ ਇਲਾਜ ਦੌਰਾਨ ਲਾਪਰਵਾਹੀ ਦੇ ਮਾਮਲੇ ਰੁਕਣ ਦਾ ਨਾਂ ਨਹੀਂ ਲੈ ਰਹੇ। ਮੈਡੀਕਲ ਕਾਲਜ ਨਲਹੜ ’ਚ ਚਾਰ ਸਾਲਾ ਬੱਚੇ ਦੇ ਪੈਰ ’ਚ ਇਨਫੈਕਸ਼ਨ ਦੇ ਇਲਾਜ ’ਚ ਗਲਤ ਆਪ੍ਰੇਸ਼ਨ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੈਰ ’ਚ ਫੋੜੇ ਦੀ ਸਮੱਸਿਆ ਤੋਂ ਪਰੇਸ਼ਾਨ ਮਾਸੂਮ ਦੀ ਖੱਬੇ ਪੈਰ ਦੀ ਸਰਜਰੀ ਹੋਣੀ ਸੀ, ਡਾਕਟਰਾਂ ਨੇ ਉਸਦੀ ਬਜਾਏ ਸੱਜੇ ਪੈਰ ਦੀ ਸਰਜਰੀ ਕਰ ਦਿੱਤੀ।

ਮਾਮਲੇ ਦਾ ਖੁਲਾਸਾ ਤਦੋਂ ਹੋਇਆ ਜਦੋਂ ਸਰਜਰੀ ਦੇ ਬਾਅਦ ਬੱਚੇ ਨੂੰ ਆਪ੍ਰੇਸ਼ਨ ਥੀਏਟਰ ਤੋਂ ਬਾਹਰ ਲਿਆਂਦਾ ਗਿਆ। ਇਸਦੇ ਬਾਅਦ ਬੱਚੇ ਨੂੰ ਦੁਬਾਰਾ ਆਪ੍ਰੇਸ਼ਨ ਥੀਏਟਰ ਲਿਜਾ ਕੇ ਇਨਫੈਕਸ਼ਨ ਵਾਲੇ ਪੈਰ ਦੀ ਸਰਜਰੀ ਕੀਤੀ ਗਈ। ਬੱਚੇ ਦੇ ਪਿਤਾ ਦੇ ਮੁਤਾਬਕ, ਸਰਜਨ ਨੇ ਆਪਣੀ ਗਲਤੀ ਮੰਨਦੇ ਹੋਏ ਦੂਜੇ ਪੈਰ ਦੀ ਸਰਜਰੀ ਕੀਤੀ।

ਬੱਚੇ ਦੇ ਪਰਿਵਾਰਕ ਮੈਂਬਰਾਂ ਨੇ ਇਸ ਮਾਮਲੇ ’ਚ ਮੈਡੀਕਲ ਪ੍ਰਸ਼ਾਸਨ ਨੂੰ ਲਿਖਤ ਸ਼ਿਕਾਇਤ ਦਿੱਤੀ। ਇਸ ਤੋਂ ਪਹਿਲਾਂ ਜ਼ਿਲ੍ਹਾ ਹਸਪਤਾਲ ਮਾਂਡੀਖੇੜਾ ’ਚ ਬੱਚੇ ਦੇ ਜਨਮ ਦੌਰਾਨ ਲਾਪਰਵਾਹੀ ਨਾਲ ਨਵਜੰਮੇ ਦੀ ਉੰਗਲੀ ਆਪ੍ਰੇਸ਼ਨ ਦੌਰਾਨ ਕੱਟ ਦਿੱਤੀ ਗਈ ਸੀ। ਫਿਰ ਤਾਵਡੂ ਸੀਐੱਚਸੀ ’ਚ ਗਰਭਪਾਤ ਦੀ ਬਜਾਏ ਆਪ੍ਰੇਸ਼ਨ ਕਰ ਕੇ ਨਲਬੰਦੀ ਕਰਨ ਦਾ ਵੀ ਮਾਮਲਾ ਸਾਹਮਣੇ ਆ ਚੁੱਕਾ ਹੈ।