- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਜਲੂਸ 'ਚ 40 ਫੁੱਟ ਦੀ ਉਚਾਈ 'ਤੇ ਵੈਨ ਲਟਕਾ ਕੇ ਕੀਤਾ ਧਮਾਕਾ, Video ਵਾਇਰਲ ਹੋਣ ਤੋਂ ਬਾਅਦ ਛਿੜਿਆ ਵਿਵਾਦ; ਚਾਰ 'ਤੇ FIR
ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਹਰਿਦੁਆਰ ਦੇ ਸੰਤ ਸੁਆਮੀ ਸ਼ਿਵਾਨੰਦ ਗਿਰੀ ਨੇ ਇਸ 'ਤੇ ਇਤਰਾਜ਼ ਜਤਾਇਆ। ਉਨ੍ਹਾਂ ਨੇ ਇੰਟਰਨੈੱਟ ਮੀਡੀਆ 'ਤੇ ਲਿਖਿਆ ਕਿ ਅਜਿਹਾ ਲੱਗਦਾ ਹੈ ਜਿਵੇਂ ਸੰਦੇਸ਼ ਦਿੱਤਾ ਜਾ ਰਿਹਾ ਹੋਵੇ ਕਿ ‘ਅਸੀਂ ਕਾਫ਼ਿਰਾਂ ਦੀਆਂ ਗੱਡੀਆਂ ਨੂੰ ਇਸੇ ਤਰ੍ਹਾਂ ਉਡਾ ਦੇਵਾਂਗੇ।’
Posted By alisha
Publish Date: Thu, 25 Jun 2026 03:39 PM (IST)
Updated Date: Thu, 25 Jun 2026 03:44 PM (IST)
ਡਿਜੀਟਲ ਡੈਸਕ, ਇੰਦੌਰ : ਉਜੈਨ ਜ਼ਿਲ੍ਹੇ ਦੇ ਬੜਨਗਰ ਵਿੱਚ ਮੋਹਰਮ ਦੇ ਜਲੂਸ ਦੌਰਾਨ ਕੀਤਾ ਗਿਆ ਇੱਕ ਪ੍ਰਦਰਸ਼ਨ ਵਿਵਾਦਾਂ ਵਿੱਚ ਘਿਰ ਗਿਆ ਹੈ। ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਈ ਵੀਡੀਓ ਵਿੱਚ ਇੱਕ ਟਾਟਾ ਮੈਜਿਕ ਵੈਨ ਨੂੰ ਕ੍ਰੇਨ ਦੀ ਮਦਦ ਨਾਲ ਜ਼ਮੀਨ ਤੋਂ ਕਰੀਬ 40 ਫੁੱਟ ਉੱਪਰ ਲਟਕਾਇਆ ਗਿਆ ਹੈ, ਜਿਸ ਤੋਂ ਬਾਅਦ ਹਵਾ ਵਿੱਚ ਹੀ ਉਸ ਵਿੱਚ ਧਮਾਕਾ ਹੁੰਦਾ ਦਿਖਾਈ ਦੇ ਰਿਹਾ ਹੈ। ਘਟਨਾ ਦੀ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਚਾਰ ਲੋਕਾਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ।
ਜਾਣਕਾਰੀ ਮੁਤਾਬਕ 23 ਜੂਨ ਦੀ ਰਾਤ ਨੂੰ ਬੜਨਗਰ ਦੇ ਅਡਾਨ ਮੁਹੱਲੇ ਵਿੱਚੋਂ ਮੋਹਰਮ ਦਾ ਜਲੂਸ ਕੱਢਿਆ ਗਿਆ ਸੀ, ਜਿਸ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕ ਸ਼ਾਮਲ ਹੋਏ ਸਨ। ਵਾਇਰਲ ਵੀਡੀਓ ਵਿੱਚ ਦਿਖਾਈ ਦਿੰਦਾ ਹੈ ਕਿ ਇੱਕ ਟਾਟਾ ਮੈਜਿਕ ਵੈਨ ਨੂੰ ਕ੍ਰੇਨ ਨਾਲ ਬੰਨ੍ਹ ਕੇ ਉੱਪਰ ਚੁੱਕਿਆ ਗਿਆ। ਵੈਨ ਦੇ ਉੱਪਰ ਦੋ ਨੌਜਵਾਨ ਖੜ੍ਹੇ ਸਨ, ਜਿਨ੍ਹਾਂ ਨੇ ਆਪਣੇ ਚਿਹਰੇ ਕੱਪੜੇ ਨਾਲ ਢਕੇ ਹੋਏ ਸਨ ਅਤੇ ਲਾਲ ਝੰਡਾ ਲਹਿਰਾ ਰਹੇ ਸਨ। ਕੁਝ ਦੇਰ ਬਾਅਦ ਕ੍ਰੇਨ ਦੀ ਮਦਦ ਨਾਲ ਵੈਨ ਨੂੰ ਹੋਰ ਉੱਪਰ ਲਿਜਾਇਆ ਗਿਆ, ਜਿਸ ਤੋਂ ਬਾਅਦ ਉਸ ਵਿੱਚ ਧਮਾਕਾ ਕੀਤਾ ਗਿਆ।
ਵੈਨ 'ਤੇ ਲਿਖਿਆ ਸੀ ਲੇ ਫਿਰ ਆ ਗਏ
ਵੈਨ 'ਤੇ ਹਿੰਦੀ ਵਿੱਚ ‘ਲੇ ਫਿਰ ਆ ਗਏ’ ਲਿਖਿਆ ਹੋਇਆ ਸੀ। ਇੱਕ ਇੰਸਟਾਗ੍ਰਾਮ ਆਈਡੀ 'ਪਰਵੇਜ਼ ਐਡਿਟਸ 2.0' 'ਤੇ ਇਸ ਘਟਨਾ ਦੀ ਵੀਡੀਓ ਵਾਇਰਲ ਵੀ ਕੀਤੀ ਗਈ। ਇਸ ਤੋਂ ਇਲਾਵਾ ਕੁਝ ਹੋਰ ਵੀਡੀਓਜ਼ ਵੀ ਇਸ ਆਈਡੀ 'ਤੇ ਮੌਜੂਦ ਸਨ। ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਇਸ ਤਰ੍ਹਾਂ ਦਾ ਧਮਾਕਾ ਕਰਕੇ ਕੁਝ ਲੋਕ ਕੀ ਸੰਦੇਸ਼ ਦੇਣਾ ਚਾਹੁੰਦੇ ਹਨ, ਪੁਲਿਸ ਇਸ ਬਾਰੇ ਵੀ ਪੜਤਾਲ ਕਰ ਰਹੀ ਹੈ। ਇਸ ਤਰ੍ਹਾਂ ਦੀ ਹਰਕਤ ਦੀ ਹਿੰਦੂਤਵੀ ਸੰਗਠਨਾਂ ਨੇ ਨਿੰਦਾ ਕੀਤੀ ਹੈ।
ਘਟਨਾ ਨੂੰ ਲੈ ਕੇ ਜਤਾਇਆ ਇਤਰਾਜ਼
ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਹਰਿਦੁਆਰ ਦੇ ਸੰਤ ਸੁਆਮੀ ਸ਼ਿਵਾਨੰਦ ਗਿਰੀ ਨੇ ਇਸ 'ਤੇ ਇਤਰਾਜ਼ ਜਤਾਇਆ। ਉਨ੍ਹਾਂ ਨੇ ਇੰਟਰਨੈੱਟ ਮੀਡੀਆ 'ਤੇ ਲਿਖਿਆ ਕਿ ਅਜਿਹਾ ਲੱਗਦਾ ਹੈ ਜਿਵੇਂ ਸੰਦੇਸ਼ ਦਿੱਤਾ ਜਾ ਰਿਹਾ ਹੋਵੇ ਕਿ ‘ਅਸੀਂ ਕਾਫ਼ਿਰਾਂ ਦੀਆਂ ਗੱਡੀਆਂ ਨੂੰ ਇਸੇ ਤਰ੍ਹਾਂ ਉਡਾ ਦੇਵਾਂਗੇ।’
ਹਿੰਦੂ ਜਾਗਰਣ ਮੰਚ ਦੇ ਰਿਤੇਸ਼ ਮਾਹੇਸ਼ਵਰੀ ਨੇ ਕਿਹਾ ਕਿ ਸਮੁੱਚੇ ਹਿੰਦੂ ਸਮਾਜ ਦੀ ਮੰਗ ਹੈ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਸਪਸ਼ਟ ਕਰੇ ਕਿ ਇਸ ਤਰ੍ਹਾਂ ਦੀ ਗਤੀਵਿਧੀ ਦੀ ਇਜਾਜ਼ਤ ਦਿੱਤੀ ਗਈ ਸੀ ਜਾਂ ਨਹੀਂ। ਮਾਮਲੇ ਨੂੰ ਲੈ ਕੇ ਬੜਨਗਰ ਦੇ ਥਾਣਾ ਮੁਖੀ ਕਮਲੇਸ਼ ਸਿੰਗਾਰ ਨੇ ਦੱਸਿਆ ਕਿ ਮਾਮਲੇ ਦੀ ਜਾਣਕਾਰੀ ਮਿਲ ਗਈ ਹੈ। ਪ੍ਰਬੰਧਕਾਂ ਤੋਂ ਪੁੱਛਗਿੱਛ ਕਰਕੇ ਜਾਂਚ ਕੀਤੀ ਜਾ ਰਹੀ ਹੈ। ਜਲਦੀ ਹੀ ਕਾਰਵਾਈ ਕੀਤੀ ਜਾਵੇਗੀ।
ਪੁਲਿਸ ਨੇ ਦਰਜ ਕੀਤਾ ਮੁਕੱਦਮਾ
ਪੁਲਿਸ ਨੇ ਦੱਸਿਆ ਕਿ ਮਾਮਲੇ ਵਿੱਚ ਐਫ.ਆਈ.ਆਰ. ਦਰਜ ਕਰ ਲਈ ਗਈ ਹੈ। ਇਸ ਵਿੱਚ ਚਾਰ ਮੁਲਜ਼ਮਾਂ ਖ਼ਿਲਾਫ਼ ਨਾਮਜ਼ਦ ਮਾਮਲਾ ਦਰਜ ਕੀਤਾ ਗਿਆ ਹੈ। ਇਸ ਵਿੱਚ ਮੁੱਖ ਪ੍ਰਬੰਧਕ ਸ਼ੋਏਬ ਖਾਨ ਸਮੇਤ ਹੋਰ ਮੁਲਜ਼ਮਾਂ ਨੂੰ ਵੀ ਸ਼ਾਮਲ ਕੀਤਾ ਗਿਆ ਹੈ। ਵੈਨ 'ਤੇ ਝੰਡੇ ਲਹਿਰਾਉਣ ਵਾਲੇ ਜਾਹਿਦ ਖਾਨ ਅਤੇ ਤਸਲੀਮ 'ਤੇ ਵੀ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਵੈਨ ਦੇ ਮਾਲਕ ਨੂੰ ਵੀ ਮੁਲਜ਼ਮ ਬਣਾਇਆ ਗਿਆ ਹੈ।